tgoop.com/DkreatA/12007
Last Update:
#ليله_في_ديسمبر53
شهد..
شهد سامعاني إنتِ؟
في اللحظة دي إنتبهت لصوته وهو بتكلم معي وانا سرحانه ،وإستوعبت حجم الغلطة الكنت حأعملها لو قلت ليه بموضوع زواجي دة..
انا تمام ،في مكان ما لقيتني فيه ،ما حأطلع ولا حأنتقل لمكان تاني اياً كان السبب ،الخدمة الوحيدة الحتقدر تقدمها لي إنه ما تحاول تتصل علي مرة تانيه..
شهد انا بتكلم عشانك ولسلامتك الله يرضى عليك
انا بخير وسلامة ،طول ما أنا بعيدة عنك ما جايني شي خليني في حالي يا إنسان وم تتعرض لي بأي شكل كان ممكن؟
شهد إنتِ عارفة روحك شغالة وين ومع منو حالياً؟عارفة دخلتي نفسك في اي مكان؟
عايزة تصلي لشنو إنتِ؟
شوفي طول ما إنتِ هناك ما حتقدري تثبتي شي ولا حتقدري تتحصلي على شي،إنتِ هناك بتودي نفسك للهلاك صدقيني يا شهد الإنتِ بتعملي فيه دة حيصل حد روحك بس إنتِ ما حتقدري تصلي حده،حتقضي نص عمرك وإنتِ بتحاولي تصلي حد الدوامة دي والنص التاني وإنتِ بتحاولي تطلعي منها وكلامي دة لأني عشت الحاجة دي ..
والدتك ماتت في السودان،اختك ماتت في السودان،اي شي مس اسرتك بسؤ في يوم حصل ليهم في السودان لو عايزه تثبتيه حتلقي أدلته في السودان ،إنتِ هناك متبنية قضية ما قضيتك ،وصولك لجذورها ما فيه اي مكسب ليك ،دي قضية أمن الدولة نفسه بكل مقوماته والياته البمتلكها وقوة إستخباراته عاجز عن حلها وكل البصلو ليه بيكون نقطه في بحر وفي الأخير بينتهي المطاف بالإستخباراتين منتحرين او فاقدين لعقلهم لأنه في الحقيقة دي دولة عميقة داخل دولة..
انا ما عارفة إنت بتتكلم عن شنو بس البتتكلم عنهم ديل ما اعتقد يكونو اسوأ منك واسوأ من العيشتني ليه ،انا اليوم بسببك ما بقدر اتكلم مع اهلي فيديو ساي عشان ما جاهزة اوريهم وشي ،ما جاهزة اشوف الحيرة والدهشة في نظراتهم لي،انا لسة بحاول اتعالج منك إنت نفسك ،إنت حتخاف علي من شنو؟
خايف عليك مني،خايف حقدك تجاهي عاميك و يهلكك،إنتِ بتضري في نفسك الأن إنتِ مستوعبة ؟
إنت خايف على نفسك يا عمار و..
قاطعني وقال لي طيب يا شهد الأن النقاش دة ما مُجدي،إتكلمنا قبل كدة كتير وم وصلنا لشي،عارفة المشكلة شنو؟
إتجاهك الواحد دة،يعني لو في يوم عرفتي إنه ابوك زاته كان جزء من وفاة امك دة حيكون موقفك منه؟
إنت بتقول في شنو؟ابوي علاقته شنو ؟
شايفة بتاخدي اي حرف على محمل الجد ،انا قايل ليك الكلام دة ك ضرب مثل..
اخد نفس وإتنهد وهو بقول لي بصوت خافض شهد اديني فرصة اساعدك وانا ربنا يشهد على كلامي واغلى من الله ماف شي ما عندي اي نوايا غير إني اساعدك واحميك
حتحميني من منو؟لو عايز تساعدني بالجد وريني حتحميني من منو وليه حتحميني منه؟
لو عايز تساعدني حتوريني عارف شنو عن وفاة أمي؟
ومنو المسؤول عن موتها..
مش دة العايزة تصلي ليه؟تمام يا شهد مستعد اساعدك وأخطي معاك خطوة بخطوة لغاية ما تصلي للعايزاه بس اديني فرصة..
قصدك مقابل إنك تساعدني لازم اديك فرصة ؟إنت بتساومني؟
ليه إعتبرتيها مساومة؟
شهد انا وشاهد الله على كلامي أعظم إبتلاء إبتلاني بيه ربنا هو إنه كشف ليك الجانب السيء مني وبالطريقة دي بس والله انا من يوم ما إتزوجنا وانا بجاهد في نفسي عشان أبعدها عن الحرام عشانك وكنت بصرف عليك وعلى بيتنا من راتبي حق المستشفى ومن شغلي وتعبي وسهري وحلالي لأني وبعيداً عن كل السؤ الفيني بس انا شفت فيك الزولة اللي ما ينفع أعيشها بالحرام ،وبغض النظر عن الطريقة العرفتي بيها بس كل مرة بيزيد يقيني وتعلقي بيك كل م اتذكر إنك كنتِ سبب في إني اليوم ببعد عن الحرام ،زمان كان م عندي سبب امنع بيهو نفسي عن الغلط وإنتِ بقيتي سبب كافي..
أنا كنت مستني منك تقولي عني أي شي كعب كنت حأكون راضي اسمعه واقبله واتحمله بس إنتِ إتعاملتي معي كأن البني أدم معصوم من الخطأ زيه زي الملائكة،شهد المرتد عن دينه زاتو الدين بيكفل ليه التعزيز قبل الرجم،ربنا سبحانه وتعالى بذات نفسه ابواب التوبة والمغفرة عنده فاتحة لعباده في اي وقت،..
إنتِ شفتي غلطي،بس ما شفتي محاولاتي في تقويم نفسي عشانك وخليأرتكب خطأ اكبر كمان من خوفي من رد فعلك انا الما حصل خوفني شي..
كنت ساكتة وانا بسمع ليه وهو لسة بتكلم،للحظة إستوقفتني نبرته وهو بتكلم قبل ما افهم هو بقول في شنو..
في اخر المكالمة قال لي حتى ولو م عايزة تستعجلي في إتخاذ اي قرار أديني وأدي نفسك فرصة في إنه تخليني اساعدك واقدم ليك البقدر عليه ،جربي تصدقيني المرة دي وم شرط تثقي فيني..
كنت لسة مستمعة بصمت..
قال لي حأستنى ردك،وحأفضل اتصل وارسل واتطمن عليك كل يوم حتى لو م حتردي حأفضل أتصل ولو إتضطرني الأمر اخلي كل شي في يدي والغي كل شي وارجع هناك عشانك..
المكالمة إنتهت شكلياً بس م إنتهت في مسامعي وجوا راسي لسة كنت سامعة صوت عمار وهو بتكلم معي،وعديت طول اليوم بفكر في كلامه..
BY مكتبتي 💙
Share with your friend now:
tgoop.com/DkreatA/12007