tgoop.com/DkreatA/12009
Last Update:
ياخي يا سياف ما تتغاب..
سكتت مسافة واخدته وقت حتى إستوعبت هو قاصد شنو وهو كان بعاين لي
بقيت اعاين للكباية وانا ساكتة
ما اديتيني رايك في الشاي
إبتسمت وقلت ليه ريحته حلوة شكراً..
بعد لحظة صمت قلت ليه سياف وسكتت بحيرة وبتنهيدة قلت ليه رغم كل شيء صعب هنا وماف حتى بصيص امل واحد للوصول لنتيجة مرضية بعد كل التعب والمعافرة والجري دة بس بحس إنه لولا وجودي هنا كنت لسة حأكون عايشة في وهم ،المعالجة النفسية بتاعتي كانت بتاخدني في حضنها وبتربت على كتفي حتى لو حست إنه ملامح وشي متغيره ساي ،كنت بشاركها كل مشاكلي وافكاري وطموحاتي واهدافي بالتفصيل ،حتى قراراتي لو م اخدته رأيها وأثنت عليها هي ما بقتنع بيها، كانت بتناديني بتي من وانا عمري 17سنه معاها ولولاها ما كنت إتخطيت مشكلة فقدي لأمي ،
كنت بتكلم وانا سرحانه في الكباية..
بعدين جيت هنا و إكتشفت إنه اساساً راجلها ليه يد في موت امي مع العلم إنه راجلها دة صاحب ابوي لزم،ضحكت بإستنكار وحزن وقلت ليه عارف شعور إنه تم إستغفالك و إتلعب بيك سياسة لا سنه ولا سنتين ولا تلاته؟ومن منو؟من الناس الكانت في المقاعد الأمامية في كل مراحل حياتك؟
في تخريجي من الجامعة ما بتذكر إنه عندي صور لي مع واحد من اخواني بس هي وراجلها كانو اول الموجودين وهم الطلعو معي منصة التخريج وإستلمو معي الشهادات،عدت علي فترة هنا كل م افكر في الموضوع بطعن جسمي بدبوس عشان استوعب إني ما بحلم وإنه دة واقع فعلاً ما كابوس...
خت الكبايه من يده على جنب ومسك يدي وكان ساكت مساااافة..
انا محترم مشكلة الثقة العندك حتى من غير ما اعرف تفاصيل وعارف قدر شنو الحاجة دي صعبة على النفس ف ما محتاج منك تبرير او توضيح ابداً ولا تحسي بنفسك ملزمة توضحي لي وصدقيني انا بحب اسمعك وحأكون دايماً عايز اسمعك لما تكوني عايزة تحكي وحتكوني مرتاحة وإنتِ بتحكي ،مش لما تكوني مجبرة عشان تبرري موقف انا كمان بيوصلني شعور سيء شديد لما اشوفك بالحالة دي وبتضايق اكتر من نفسي..
اسألك سؤال يا سياف وتجاوبني بصراحة؟
أسألي
بيقولو ماف زول بمسكوه القلم بكتب على نفسه شقي ليه مختار تتشاقى معي انا ومشاكلي رغم إنه إنت ما مجبور وعلاقتنا وضعها معروف شكلو كيف..
انا حأختارك دايماً ،ولو دة الشقى معاك يا زولة حبابو وحباب كتابتو حتى لو ما بينا شي ما شرط يا شهد وانا م معنى إني معاك معناها منتظر مقابل لا ابداً ما تنسي نحن هنا اولاد بلد واحدة وانا مستحيل اتخلى عنك وما ناسي وضع علاقتنا وشكلها بدون ما تذكريني حتى ولو بالنسبة لينا دي فترة وحيجي يوم وتنتهي انا مبسوط بالفترة دي..
كنت ساكتة وبسمعه بكل حواسي حتى السادسة كانت حضور في اللحظة دي..
كمل كلامو ب إلا إذا إنتِ عندك رأي غير كدة..
وقف على حيلو وهو ماسك يدي وقال لي المهم أنسي كل شي و تعالي أعلمك تلعبي "سلة"
سجلي عندي إشتراك تدريب شهر وأدفعي بالتقسيط م مشكله انا رغم إني مدرب رهيب وعالمي إلا إني متعاون مع متدربيني..
ضحكت وانا بقول ليه مدرب رهيب وعالمي ومتعاون متأكد إنك عايز تعلمني "كرة السلة"ما النرجسية ..
قال لي طالما ضحكتي كدة ممكن نقول شمس بكره شرقت من هسي
السعودية/الرياض
عارف يا طارق انا ما عاوزة ارجع السودان ما عشان إنت معيشني في نعيم لأنه بالعكس أنا طلعت من نعيم كنت عايشة فيه عشان اجي واعيش معاك في الجحيم دة وبين الأربعة حيطان دي،لكن السبب الأساسي إنه لو رجعت وانا مطلقة "وعزباء" زي ما بقولو عندنا في جحيم تاني مستنيني واسوأ من الأنا فيه دة،انا اساساً عرستك وجيت هنا لأني كنت بتعرض لمضايقات من شهاب ،طول الوقت كنت خايفة نايمة او صاحية انا خايفة معي ناس او بدونهم خايفة على نفسي منه ولما جيت قلت ليك عرسني وأستر علي منه حكيت ليك جزء قليل من افعاله..
بعيداً عن إني بحبك بس الله بعلم إني كنت مستعدة اعمل اي شي يحميني منو ويوقفه في حده،وماف زول لجأته ليه و عمل كدة ووقف معي غيرك،ما حسيت إني براي لما لقيتك نازل السودان عشاني ومتكلم معاه ومواجهو وموقفه في حده،ما حسيت بأمان من فترة طويلة إلا بعد ما شفتك قدامي يومها..
انا بكل الرضى هسي بقول ليك من وقتها وإنت كبير في عيني والموقف دة بيمحي عندي كل الأفعال السيئة البتجي منك..
وانا قاعدة مع نفسي إتذكرت وحسيت إني عايزة اقول ليك الكلام دة ♥️
تعالي ما تمشي..
مسكها من يدها وقعدها جمبه في طرف السرير وقال ليها خلينا نحاول..
نحاول؟
ايوا خلينا نحاول نتجاوز كل شي فات ونمشى لقدام،مش دة العايزاه إنتِ؟
بدهشة وإستنكار سندس كانت بتعاين ليه..
بس بشرط مشاكلنا تكون في حدود علاقتنا بدون ما يكون سببها اي اطراف تانيه إنتِ فاهماني اكيد
إنتِ يوم م قلتِ لي يا طارق انا حاصل معي لقيتيني معاك صح؟
صح
BY مكتبتي 💙
Share with your friend now:
tgoop.com/DkreatA/12009