tgoop.com/EsraaHarounLifecoaching/754
Last Update:
كنت بتكلم مع واخدة صحبتي بتقولي عن نفسها ( انا فاشلة .. معملتش اي انجاز في حياتي )
فقلتلها حتى لو شايفة كدة مع انها مش حقيقة بس حتى لو فرضنا صحتها .. طيب ابدأي .. غيري .. وابدأي من جديد ..
قالتلي ابدأ دلوقتي في السن ده .. السن ده اللي خلف خلف واللي هاجر زيك كدة هاجر
انتي بتقولي كدة عشان وصلتي لحاجة
الناس وصلت لمراحل قدام وانا لسة هبدأ من جديد ؟! انا تعبت ..
قلتلها ثانية واحدة ..
هو انتي فاكرة ان اللي هاجر ده وصل ؟
وصل فين ولا وصل لايه ؟
كلنا كل شوية بنبدأ من جديد ..
انتي بالعقلية دي مش هتتحملي الهجرة ولا التغيير عموما.. هتنهاري اساسا من اول يوم تحطي رجلك فيه برة الطيارة او برة الوضع السابق ..
اللي هاجر ده اقوى مثال للي بيبدأ من جديد .. من الصفر واحيانا من تحته ..
اللي هاجر ساب كل انجازاته وسنين حياته في بلده وراح مكان تاني صفر تماما يعيد من تاني ..
يعيد الجهد ويعيد الصبر ويعيد التجربة ويعيد طولة البال ويعيد الدموع .. وفي الاخر يعيد الفرحة بكل خطوة ناجحة ..
الهجرة هزة شديدة ما يعلم قوتها وصعوبتها غير اللي جربها ..
لما بقولك ابدأي بقولهالك مش لاني ايدي في مية باردة لا .. ده انا ايدي في نفس اللي بقوله وبنصح باللي بعمله ..
( وعلى فكرة مش الهجرة بس اللي كدة .. الطلاق كدة .. وتغيير الكارير كدة ودول مجرد امثلة وفي غيرهم )
ومش بسميه نار بالعكس .. التغيير جنة ( بشرطين بس ١- يكون مدروس و ٢- تتوكلي على الله بشجاعة وحسن ظن ويقييييييييين يقين يقين يقين ) ..
والبدء من جديد حياة .. بس ليها تمن او ضريبة .. والشاطر اللي يدفعها برضا ويتحملها .. و اللي عايز العسل يتحمل لدغات النحل .. وعلى رأي دكتور ابراهيم الفقي كان دايما يقولنا مفيش حاجة تستاهل بتيجي بالساهل .. والتغيير يستاهل تتحملي عشانه الصعوبات والمرار و هزات الفقد لانجازاتك و اشيائك وعالمك اللي اتعودتي عليه ..
كلنا كل شوية بنبدأ من جديد ..
مفيش حد هيحقق اهدافه وهو بيخاف او عمال يكوم العقبات والسلبيات قدام عينه تسد عين الشمس وتسد نفسه .. ولا وهو قاعد يقول لنفسه انا فاشل ويشوف غيره انجز ايه ويلوم في نفسه ويبكتها .. ارحموا نفسكم ..
يا تستمتع باللي انت فيه يا تقوم تغيره وتستحمل لحد ما توصل .. وربك بيعين اللي به بيستعين
ومش عيب انك تستمتع باللي انت فيه ابدا بالعكس ده نضج وهنا ..
انا لما كنت تخنانة كنت بقول وماله انا بحبني كدة لاني بحب اكل اللي انا عايزاه ومبحبش الرياضة .. و لا كنت ببص لحد رفيع ولا بقارن واحس بفشل .. و لما ابقا اقرر اخس واتغير هبقا استحمل بعد الاكل الحبيب عني ☺️.. لما اقرر هدفع التمن انما دلوقتي مش مستعدة ادفعه عادي وبستمتع ..
وخسيت برضو بس دفعت تمن تاني هبقا اقولكم عليه بعدين عشان مش موضوعنا ..
المهم ركز كويس يا تستمتع باللي انت عليه مهما كان تسبح كدة في الوحل بسعادة وتتخيله عسل ومتلومش نفسك وتبكتبها .. يا تقوم تشد حيلك و تستعد للوكميات اللي هتخدها وانت بتغير واقعك .. وتضحك وتقول لصعوبات التغيير كمان زيديني عشقا زيديني و انت بترقص كدة كدهو
#مسمعش_انا_فاشلة_دي_تاني_هاه ..
#اسراءهارون
🌸 اطمئن .. مع اسراء هارون🌸
https://www.tgoop.com/EsraaHarounLifecoaching
BY 🌸 اطمئن .. مع اسراء هارون🌸
Share with your friend now:
tgoop.com/EsraaHarounLifecoaching/754