tgoop.com/EsraaHarounLifecoaching/762
Last Update:
أمى كانت بتنشر مرة الغسيل فوق السطح
وأنا وأختى الصغيرة والعيال جيراننا بنلعب قدام البيت
كان قدام بيتنا كده عمود وبنقعد نمسكه وندور كده هى دى اللعبة
وإحنا بلف وبنلعب أختى اتكعبلت ووقعت وعيطت
أنا وقفت ثوانى كده أستوعب يعنى هى وقعت إزاى
و كان قريب منها بنت من اللى بتلعب معانا قومتها من الارض
وأختى بطلت عياط وكملنا لعب
ساعتها أمى نادت عليا بصوت غضبان جدا وقالتلى اطلعى هنا
طلعت
أمى سابت الغسيل وقالت لى بلهجة شديدة هى أختك لما وقعت ماقومتيهاش ليه ؟؟
قولتلها ماهى فلانة قومتها
قالت لى هى فلانة دى أختها ؟؟؟
قالت لى تعالى وخدتنى فى جمب السطح كده بحيث اشوف العيال بوضوح
وقالت لى بصى على فستان أختك كده
قولت لها آه ده اتوسخ من الوقعة بس ده تراب عادى هينضف
قالت لى بس بصوت أهدى كتير لما الغريبة قومت أختك كتر خيرها .. بس الغريبة مانضفتش هدومها
ولا حسست عليها تشوفها اتعورت ولا لأ
ولا طبطبت عليها وحضنتها وراضتها
قومتها وسابتها ومشيت تكمل لعبها
اللى بيقع بيحتاج أخوه يقومه ..
عشان أخوه يشوف إيه اللى كعبله ويشيله
عشان أخوه ينضفله هدومه مايسبش الناس تشوفه متهان
عشان أخوه يطبطب عليه ويراضيه
اللى بيقع لما بيقف مابيقفش سليم
بيحتاج أخوه يخليه يقف سليم
علمتنى أمى مالم أتعلمه فى المدارس والجامعات 👌👌
منقول
BY 🌸 اطمئن .. مع اسراء هارون🌸
Share with your friend now:
tgoop.com/EsraaHarounLifecoaching/762