السلام عليكم ورحمة الله وبركاته
الاخوه المتابعين الكرام🌻🤏🩵🩷
سيتم روايه ( بين ♥️قلبين ♥️)
الجزء الرابع عشر للكاتبه ( عبير الكبسي)


ام امير معصبه من الي سمعته بس مضطره تبين للي بتوصل لها كلام انها مش مهتمه : يعرسوا على عافيتهم

جارتها: يوه ماحصلش يختي ليش قد انتي هكذا ضعيفه

ام امير: يعني مانفعل قلدش الله، وبعدين كم جهد واحد يتحمل غيبه ونميمه يكفي خلين لنا حالنا

جارتها: ماشاءالله ماذلحين حين مابش في يدكم شي قلتو خلين لنا حالنا.

احلام وصلت بشنطه ثيابها وجهالها

ام امير:قد جيتي حانقه

احلام: استغفر الله ، جيت عندكم يعني ماشاجي الا حانقه، جيت نتعرس

ام امير: اين تتعرسي

احلام: عند سندس او نسيتي كنا خباير ، انا مادخلني من السامجه رنا، شاسير امد..

امها: لاعد تبدعي بنفسش اجلسي بس

احلام: اتحدا واحد يبدع بي ابسري ماشفعل به بس

امها صيحت: عتسيري تفعلي مشاكل مابش سيره

احلام: والله مفعل شي ماغير اسير ابسر

امها: قدنا فارحه اخوش سافر يشتغل اسكه المشاكل حقه عتجي انتي تفعلي لنا هدره

احلام: خلاص قلت والله ماتحاكى

لقيت الدعوه حقها شافتها: يهي يهي زوجها من بيت فلان الفلاني مرتاحين وتجار

امها: مادخل الصيت يابنتي هذك اختها صفيه زوجها الا مدرس وماشاء الله على اخلاق وفهنه فيها ولا قد يوم حنقت بيت اهلها وقالو فارشه بيتها ياسلام سلم

احلام: سبرت لهن مابلا انا حظي اعوج مش انا داريه على ايش

امها: ولاعتدري طالما نيتش وعينش على خلق الله

في البيت..
خالد دخل بالصرفه هو وفؤاد للمطبخ وهن بيكعكين : طعمونا

امه: عادهن حاميات
ام رنا: بعدا التناوير محوزات راعو خارج

رنا اشرت له من وراهن لا ينتظر

سارت سكبت لهم ،٢ شاهي وشلت كعك ملان صحن وسكته دلا دلا من وراهن مشيته ومدت الصحن بسرعه ناولته

ام خالد مسكت يدها بممازحه: ابسري لاعد به حيا ولاشي قبال عيننا

خالد: لاعد تزيدي يمه عمتي بينحس لو عليها لاتاكلني

ام رنا ضحكت: مابلا يابني نخطى على الي يسبر والي مايسبرش

خالد جلس في درجه باب المطبخ يشرب الشاهي وياكل : وماهو الي مايسبرش؟ قد قلت سهل خليتوها تسير بيت جدها تمام، بس مثلا هذه اللحظه وكلكم محوشين حولها ليش مايسبرش

ام رنا: مدري هكذا طبعنا وعاداتنا

خالد: مش شايف فيها صح او غلط، العادات والتقاليد لو بدون سبب ومبالغ فيها مش هي قران حرام لو نخالفها

امه: انت قد زيدت بها يابني والله ماعد بتستحوش

خالد ضحك شاف رنا: اسمعني هولا باصمات العادات والتقاليد بصم

رنا ضحكت اشرت له عيذبحنها لو تكلمت

خالد بصوت مرتفع: انتي اجلسي ساكته بس وانا شاقلهم وجهة نظري: يعني انا وسط ابي واعمامي وجدي وامي وامها والاهل كلهم ، كل الي بيحصل نظره وكلمه عاديه وبس وبعدا لاتضبحونيش باقي ايام وتوقع مرتي لاتخلنيش اول يوم العده اعقد عليها ونسافر
ونسافر مانشتيش عرس

امه: مع يابني من الخباله هيا مه، ماصدقنا تتزوج نشتي نفرح

سندس واقفه بغيره : ليش وانا مابينفرحش بعرسي او كيف؟

امها دمعت: انتين بنكبر ونتعب عليكن ويجو يشلوكن، اشتي افرح بابني ومرته وجهاله ملان البيت

رنا سمعت كلمه جهاله تذكرت جمله انتي مابتخلفيش تغيرت ملامحها طحس القلص من يدها للارض الكل شافها

ام خالد: هنا قدو حما قوي يابنتي اخرجي شمي هوا شويه

ام رنا : مابلا تشتحط ،مادخل الهوا تمسك القلص سوا

ام خالد غمزت لها تسكت

سندس: مش منها من الي شل حسها وهو واقف قبالها

خالد لفت لها كيف بتقلب المواقف لضحك مسك ساعدها قحصها

سندس: يو يامجنون فلتني قوووا فلتني حريوه عتطبع يدي ..يمماه حاكيه رنااا

رنا: امانه فلتها حرام

خالد شافها:عشانش انتي ولاكنت شاخليها تبطل لقانه وفضول وصلت له رساله من سام..
بيقرا مشي شويه للحوش

سام: تصدق بالصدفه وصلت دعوه للبيت تخيل من عيتزوج

خالد بمزحه: هههي بايخه ، كرم طبعا من عيتزوج

سام رد: ياخي اكلمك صدق، وصلت دعوه أمل عرسها يوم الخميس والعريس من اهل زوجتي

خالد: الله يوفقها ويستر عليها .

سام: تصدق اول مابسرت الدعوه قلت بيني وبين نفسي الله يستر لاتهرب هههه

خالد: خلاص ياصاحبي ماعد اشتي اذكرها قدنا مرتبط وهي الله يفتح عليها ابردلك ، وبالذات ان العريس من اهل زوجتك يامنعاه بحق العيش والملح الي بيننا لاذكرت شي ولاكأنك تعرفها ،خلي البنت تستقر وتبدأ حياه

سام: الله المستعان من قلك شافعل شي مثل هذا

خالد: مش انت اكيد ، بس مقصدي تكلم المره انت داري كيف هن مايجلس سر عندهن والمجتمع حقنا مايرحمش

سام: ياصاحبي انا فدال قلبك ولايهمك ابشر من عيني.

رنا شافته ماسك تلفونه له ربع ساعه بيراسل فكرت حد عرف ووقعت مشاكل بينه وبين امير خرجت لاعنده وقفت : خالد

خالد لفت لها بسرعه: ها روحي
رنا ابتسمت وبتتلفت للطيقان وباب المطبخ كلهن عيونهن عليهم : لحد يسمعك

خالد ضحك: مافي نفسش تشتي شي؟

رنا: مابلا بينبسرك متحمس بتراسل خفت لو في معك مشكله ولاشي

خالد ضحك: الغيررره يو منش بس

رنا: اي غيره، اصلا داريه ماعتحاكيش حد بس شفت وجهك حسيت به شي

امها: يارنااا هيااا عيحرقين خرجيهن من التنور

سندس شافتهم منسجمين: شاخرجهن انا ياعمه والله ماتقدري عليهم وضحكت

خالد: انا فدال الي داريه ماعد بش حد يهمني واحبه غيرها، هذا ياروحي سام رسل لي يقلي وصلت لمرته دعوه عرس امل

رنا: امل حق ( ماقدرت تقول حبيبتك )قالت حق ماليزيا

خالد: ايوه المهم العريس يقرب لمرته وجالس يعلق على الموضوع ويتليقن لاتهرب

رنا: يو لايتحاكى لمرته وتوقع مشاكل

خالد شاف بعيونها بحنيه: انا فدال الطيبه حقي، قد كلمته، قلتله لاعد يذكرها بخير ولاشر، الله يستر عليها وعلينا

رنا هزت راسها : هيا اطلع غرفتك ولا اخرج دور عمل ،بنات خالك يشتين ينزلين يعاونين

خالد: ومافيها ينزلين اصلا ماشبسرش حد وانتي قبالي

رنا ابتسمت بخزا: خااالد

سندس سحبته و دهفته: شرررق علينا والله بكره معنا يوم من الصبح وقدو مغرب اخرج هيا يشتين ينزلين يعاونين

صفيه لحقته بتبكي: خالد راعي

خالد شافها : مالش ليش بتبكي؟
صفيه: بنتي طعفرت الصباغ الاحمر فوق فستانها عتشلني نشل لها فستان

خالد: لبسيها من الي معها
صفيه: مايسبرش فستان يوم الحفله خالتها العروسه وعنسير معها لصنعاء قوا ياخي

خالد: هيا ناهي لكن النسوان والله انكن مبعسسات ضد
رنا جالسه متردده شافت سندس : ياخالد وانا اشتي اسير السوق

خالد :هيا ناهي ، شافها بجديه مخبي المزح: وانتي يتخايلش لو قد بينحبش شاشلكن

رنا ضحكت عارفه ملامحه لما يمزح هزت راسها : ايوووه عتشلنا

خالد:يلا البسين

في المطبخ: الجده جالسه تتفرجهن: والله انهم معاذير

الجد ضحك: والله ماخلي لهم حالهم شاسير معهم خاطركن..

فوق السياره وصل فتح الباب وطلع

صفيه نزلت له من الكرسي الامامي:, جي ياجد هنا

جدها: مع اشتي اجلس جنبها (شاف خالد من المرايه): حياك الله ياجد هيا ادعس ها نرجع وعادو بساع( بدري)

خالد شاف جده في المرايه وبسرعه شاف رنا و رجع بينه وبين نفسه: يو والحنبه ذلحين لو فيها خير صفيه لاتلهيه وتجابره وتشكي له من بنتها لفت لها
صفيه شافته تفاقدت الباب
خالد رفع حواجبه يأشر لها

صفيه بصوت مشاوره بس مرتفع الكل بيسمعه: ماهو الباب حق رنا

خالد. اشر لا

صفيه بمشاوره ببسمعوها: باب رنا

خالد ضبح من غبائها رفع صوته : جدي الهيه جابريه اشكي له من حياتش شاركيه كل شي ولا مابلا دحس الا على خالد

الوحيده الي فهمت قصده وضحكت بصوووت رنا

الجد: مابش زواج الا بشرط

خالد: هيا ناهي عاد جدي ذلحين عينتقم مني انتقام مافعلت ياخلق الله كل يوم وطلعين شروط

جدها ضحككك: مابش لك خرجه من البيت انت وهي، والله مامسلي على قلوبنا غيركم ، تتزوجوا وتجلسوا عندي

خالد فرح : ايوه ياجد هكذا ، فتح الزفه للأخير وبيسوق

وصلوا المكان
الجد لخالد : الله الله ، رعاها الله ايامنا ما مع المره غير الستاره واللثمه ويدها من الحطب والمزحقه قدي الا يابسه ساع ايدي الدجاجه ، وانا بينقل ليش قصر نظري مابينبسر فيتامينات هكذا

خالد بيضحك رنا وصفيه هربين من جنبه يضحكين دخلين المحل

خالد بيضحك رنا وصفيه هربين من جنبه يضحكين دخلين المحل
واحده بتبيع سمعت الجد قالت له: والله انحنا بنحطب وندور غاز ونسارب بترول ونجمع القرش فوق القرش نوفي صرفه البيت ونشتغل خارج وداخل البيت وبنذاكر للجهال وبنفعلهن كلهن ياحج قدحنا وقت غير وقتكم لاتحسدونا بحجر الله ، كنتو تطرحو راسكم ولابتهمو شي الارض والخيرات والبير والماء متوفر ولاهم ولا حرب ولا دين ولا شي.

الجد تأثر من كلامها: والله يابنتي ماقصدي شي انا ارحم من حق القريه عمري كله مابينبسر الا الي قلتلش اليوم جيت وابسرت العجب ، ولا مانتي وامثالش هنا هاااه ( مسك راسه) انتين اعظم زوجات وامهات وبنات وخوات حفظش ربي وششتري من عندش للحجه اطيب خاطرش حين غثيتش.

كملوا ورجعوا زحمه البيت والعرس..
ليلة الثلاثاء يوم الحفله حق رنا
كانت رنا بتجهز الديوان ليوم الحفله والشباب وصفيه وام خالد وامها بيساعدين
خالد: مارأيش :الاعمده هذه نخليها في الزوايه ووصلي معها الديكور الي عتفعليه ورا الستاره
رنا : نجرب
بعد ماكملوا وبيتعشين
ام رنا: ماعنقول للناس يابنتي بسرتي يوم النقش كيف سألين وطنشتهن مادريت ماقل ماعيتحاكو عليكم

رنا: للمه تطنشي مابنفعلش شي غلط ، بغض النظر عن الكلام وكل الي حصل و انحنا بنبرر لهم من حقي اعيش، انا ظلمت نفسي ومحد عاش معي الي عشته ولاعد بينهم احد يتحاكى من ماتحاكى، خطيبي وابن عمي وعيقع زوجي وخلاص الناس هولا اتعبونا وضيعو اعمارنا نشتي نعيش يمه انا عن نفسي مابينهمش حد وانتي بردي قلبش و دعممي

خالد بيشوفها ماعد قدر يكمل ياكل من ابتسامته ملان وجهه

امه شافته ضحكت: هيا اوبه تشترغ

رنا شافت عمتها ابتعدت ملامح الضبح واستحت وضحكت

امها: تاثرت وتذكرت الي مرت به بنتها وفعلا حست انه صح ماعليها من الناس

صفيه: كيف كانين مايخرجين من هنا وصحبات وكل شي ومن حين ماصاحبتهن ام امير قلبين علينا هذا دليل مهما فعلتي للناس مابيملى عينهم شي

سندس: مش وقت المحاضرااات عرررسي ياخلق الله اقطبووو الدنيا منعوثه والوقت شررق ايحين عتكملين

صفيه شافتها بنص عين: ماعد بحد العريس يشغلش بتهرمينا اوامر

خالد ضحك شاف الساعه: هيا خاطركن شاسير عنده وشمسي لبكره هانك من السيره والجيه : وفؤاد عندكن وعياال خالي
رنا رفعت راسها شافته نظره وداع وتملي عينها منه.

خالد شافها والعيون كلها حولهم تهرب سريع من نظراتها ومشي

سندس: خالد بغير خباله الخميس تروح محد غيرك عيوصلني للكوافير ويشلني بيت خالي
خالد: ذاحين على ماتفقنا تسيري كوافير في صنعاء ونشلش منه لبيت خالي يجو المخرجين منه؟

سندس شافت جدها: ايوه اذا جدي موافق

جدها: مابش فرق جدش هذك وانا واحدي

جدها: مابش فرق جدش هذك وانا واحدي وماشتيش تتعبي يابنتي تمام وانا شاكون هانك


يوم الصاله وصل لهن للكوافير فتح الباب لسندس وبعدين رنا، طلع وفتح الزفه : الله يديم السعاده علينا زفيت اختي وصفيه وعقبال حبيبه قلبي واخر العنقود رفيده

سندس: ليش جت بنت صفيه معك ، لاتضيع قوا خليها معك ياخالد هذه الايام بيخرجين ويضيعين

خالد: جننت امها وهي عندي فوق السياره لاتقلقين

رنا: خلاص انا شاشلها معي احسن شانتبه لها اضمن انت منشغل

على نزلتهن للصاله نزل خالد وماسك سندس: بيغلقين على وجهكن كيف عاد تستضين
رنا وطت تمسك ذيل الفستان بنت صفيه بتلاعبها طيرت البرقع وبان نص وجهها

خالد رفع حاجبه وصاح فوق بنت صفيه: هاااه مع هيا ادخلين هاا فيسع

وقف معهن باب الصاله

رنا: وانت ماعد باقي الا تدخل عند النسوان خلاص ارجع

سندس: هيا بيذوب المكياج من غيرتكم على بعض اقطبوني دخليني يارنا

خالد ضحك اشرلها باي ومشي

كان العرس منظم مرتب بسبب رنا اشرفت على الكوشه وكل شي فيه

احلام: ابسري على لبس وعلى فساتين فوقهن مطقمات كلهن الظاهر اهل العريس ادولهن هذا مش ذوقهن

امها: اهجعي يابنتي خلاص
احلام: قوا اساليها من وين فستان بنتها عجبني قوي
امها: اسالي انتي

احلام: قلك منظمه مدري كيف على كيف عادي كله به احسن

امها: خلاص اسكتي وصلت خطيبه امير وامها مشتيش حقش المرض هذا

احلام تشتي تحانك رنا مسكت يدها قامت معها: جي نخطى للمرايات اسبرلش القصه حق شعرش

خطيبه امير: انا فعلتها هكذا مش هي خاربه، هذه موضه

احلام نفسها تبقصها : يوو كيف انتي جي معي ماقلش مايسبرش قبالهن شاورتها( خطيبش بيسلم عليش)

خطيبته ابتسمت ومشيت معها

رنا بتمشي بترفع خيط فستانها ولفتت على جنب وهن بيمشين

احلام قلبت عيونها: احلى خطيبه اخ في الدنيا

رنا شافتها من راسها لرجلها ضحكت و داخل نفسها( غبني على قلبش) عتعيدي تعيشي النكدكله



النسوان: يو والله انه حرام بنتش تجلس بغير زواجه وهي قمر قذا خطب وانتو اخطبوا لها

خالد: مابش عندنا بنات يخطبين لنفسهن، بس احنا شاريينها وخطبتها لابني قد اسمكن بتتكلمين بتتكلمين خلنا نكسب جوهره لاتضيع

انصدمت: يوه خطبتي لها وعادهي

ام خالد: والله هي خلعته وناس بيقلو عدتها شهر وناس بيقلو ثلاث واحنا خطبنا والعرس بعد العده مباشره

مرت جارهم: انتين كل شي عندكن سكته سكته ماندرا الا وقد به مناسبه

ام خالد: انتين جيتين تفرحين لبنتي ولا تعاتبين

فلتنها ودخلين لاعند ام امير يكلمنها: قد عتتزوج رنا بعد سندس

احلام وصلت : من الي تتزوج تيك الوقحه فعلت نفسها ماتعرفنا

احلام وصلت : من الي تتزوج تيك الوقحه فعلت نفسها ماتعرفنا

خطيبه امير: من هي؟

احلام سكتت

مرت جارهم: قصدش رنا ؟

احلام: ايوه
خطيبه اخوها: اين هي ؟ نفسي ابسرها

احلام: ليش ياروحي على حلاها لعد تبسريهاش احسن خليها هي تبسرش تبسر ادينا احسن منها

خطيبه امير: كيف جيتي وانتي غاثيه منها؟ بينكن مشاكل!

احلام: جيت علشانش ياروحي ماخليش وحدش

امها بتبهرر لها بعد ماشافت ام خطيبته

رنا كانت بتمشي وبتدور صفيه عشان بنتها بتبكي

احلام: هذك

خطيبه امير: هذك بنتها؟

احلام: ماشي مابتخلفش مش هي بنتها

خطيبته: ها

بعد العرس وقد كلهن بيتجهزين يلبسين يروحين خالد و فؤاد يسياراتهم واقفين باب الصاله

خالد رسل لها رساله: جي انتي وصفيه قبل الكل للسياره عندي معي لش حاجه

رنا تحمست خرجت هي وصفيه بعد ماراشتها مراشاه يسبقين قبل الكل

خالد فتح لها الخانه شلي هديتش كل سنه وانتي طيبه قبل الكل، والترته خليها للبيت لما نروح

رنا فرحت كانت اول مره جد يهنيها ويذكرها من سنواااات عاشتها مع امير مش مهتم بيوم عيدميلادها

صفيه: الله ذكرتنا ايام زمان حين كنا نفعل حفله بالكبانه

خالد ضحك: عشان هكذا تكبدت حياتنا

ضحكوا طلعين السياره وبعد صمت شويه

رنا: خالد

خالد: ها روحي

صفيه: احم احم
رنا: شكراً قوي فرحتني والله
خالد ضحك: ياسعم اننا صحبتش، هذا واجبي اسعدش العمر كله انتي غاليه عندي قو

فتحت باب السياره امها وامه وطلعين وقطعين كلامهم

صفيه: مامعاكم الا انا المسكينه الي بنتسمع سكته

على خرجتهن مع سياره زوجها احلام وامها شافنها في السياره مع خالد جلست تدحس امها

زوجها بيتأفف: ياريت ومافلت الفهنه الي كنت فيها وجيت

ام احلام: الله المستعان يابني

زوج احلام: ياعمه نكدت لي حياتي والله


في بيت الجد وصلت على محاجر وكملت تتصور مع اعمامها وجدها
خالد دخل بالترته: هيا نكمل الحفله مع خطيبتي

رنا مستحيه واقفه باب الباب

جدها: جي هيا

رنا طيب لحظه خرجت راحت غسلت وجهها ورجعت معهم

خالد: على فكره امس اخر يوم بعدتها ينفع ياجد ذلحين توقع خطيبتي

جده ماحب يكسفه : ناهي قد قلنا خطيبتك

خالد خرج علبه الدبل من يده: ها لبسنا انت

كلهن بدأين يحجرين

صفيه: طلعت ادت الشنطه مع فؤاد.ونزلتها

ابو رنا: هذه خطوبه عائليه

خالد بكره العصر نخزن الرجال والليل اسير السمره حق كرم

الجد فتح علب الخطوبه: تم

ابو خالد: ذلحين خطبتها ولا عيدميلادها

سندس: كلهن هيا قدي فرحه واحده

الجد لبس رنا الدبله والمحبس ولبس خالد : الله يتمم لكم على خير ويسعدكم دنيا واخره

ابو رنا وعمها باسوها فوق راسها

اليوم ٦بارتات.مامليتوش؟
.ت.ع خ

ثاني يوم بعد اذان المغرب..
النسوان حق الحاره متفرطات في الديوان ، و سندس بتتنقش

رنا جالسه ماسكه التلفون وبتراسل خالد مبتسمه ويدها ع خدها وشويه ترجع شعرها

سندس شافت صفيه: محلا الدبله في يدها جبرهم

المنقشه شافتها باستغراب: ارزي (اهداي) يابنت لاتتحركيش

سندس : تمام ولو فيني عطسه
صفيه ضحكت
المنقشه: يوووه والله لو تجلسي تهرمي هكذا لافعل يدش لانصها وارحلي قدو شرق

رنا لفتت لها وبهررت: سندس

سندس: انتي في عالم ثاني الي يبسرش مايقل ان انتو اربعه وعشرين ساعه في وجه بعض، من اين بيجي مجبر كان يجابرني ويسير نص النت والرسايل فيسات هو يرسل فيس وانا فيس هو ورده وانا ورده

المنقشه بنص عين شافتها: ماعد تشتي ياسعم، صدقتين انفسكن قد انتين غر الا بتقلدين الاتراك

سندس ضحكككككت سحبت يدها وبتأشر لها بيد: ذلحين انتي جيتي تنقشيني ولا تبهذليني مالش عليا من اول
قوا يامنعاه والله اننا حاليه وهو زوجي الي بينحاكيها عليه

المنقشه: هااا ، هيا اسرعي ادي يدش
سندس بتقلد انها بتبكي دموع ومبتسمه للبنات وايداتها ممدوده للمنقشه

رنا: هيا صفيه مراعي يشتي يسير السمره طلعي له الشال حقه نسيه نازل وبه نسوان يشتي ينزل تبسري له طريق
صفيه بترقد بنتها تشتي تطرحها قامت بتبكي

سندس بتقلدها وتضحك: هيا صفيه تمعذري امد تخليها تبسره

صفيه بتضحكك وسندس ماسكه نفسها عشان المنقشه تكمل..مسكت نفسها رجعت قرحت الضحكه بصوت وهي ثابته
ضحكتهن كلهن
صفيه: خلاص سيري انتي

رنا انحرجت: الله يقلعكن كيف بتفعلين بالواحده ماشسيرش انا خلاص

صفيه: وانا والله ماسير حلفت

رنا خرجت ووقفت باب الباب بتداعي: رفيده يااا رفيده

خالد سمع صوتها فكر انه تلميح له نزل بسررررعه ماشافته الا قدامها

رنا اول كلمه قالت له: مالك؟
رجعت شويه لورا انصدمت دخلت وقفلت بسرعه

سندس كانت بتشوف لانها مقابل الباب والمنقشه مقفيه
ماسمعنها الا بتضحككككك

صفيه قامت تشوف رنا مالها

رنا مسكتها خرجتها لخارج: جاوبيه ، قلتلكن وانتين بتضحكين

سندس شافتها وضحكت

رنا رجعت تضحك معها وتسألها وهي تشرح لها الموقف ويضحكين

المنقشه: الله يسلي عليكن جيت شاقرح وامانه قد ضحكت ضحك
سندس: الله يجعله خير بعدا لايوقع فلم هندي ويهرب العريس عليا

المنقشه: مابلا لو تمكنيه ضحك هكذا فجأه عيهرب صدق عيقل مجنونه

رنا جاوبت اتصال خالد اول ماسمعت ضحكته جلست تضحك معه

خالد: مالش هكذا كان لمستش كهرباء

رنا فجعتني قلت انك اتدربت كيف نزلت بسرعه

خالد: سمعت صوتش قلت اكيد لي انا ونزلت بسرعه امد النسوان، المهم عجبتيني

رنا : خااالد
خالد: خلاص ناهي والله كنت مربوش ومستعجل ،
رنا: بتسمع جدتها بتدعيها : يلا اسير اجاوب بيباي..

ثاني يوم في صنعاء يوم الزفه بعد مارجعين من الكوافير كلهن بيت خال خالد ..
رنا زاعله: ليش ياعمه ماينفعش يمكن عندهم عادي مش ساع عندنا يعني جي معهن بعدا

ام خالد: مع يابنتي عندنا كلنا ماتسيرش الام مع الحريوه

صفيه: بس هم قالو عازمين الناس كلهم لانهن ماجين كلهن للقريه يعني كانحنا سرنا عرس

الجده: انتين قد زيدتين بها قد غيرتين عاداتنا وتقاليدنا مابش لها سيره، البسين انتين وخطيتين تفرطتين ولما يتمو الزفه الرجال يجولكن وروحنا ماعنخليش ابوش. وجدش وحدهم
رنا زعلت على عمتها وهي بتبكي
سندس شافت امها حضنتها وبتبكي

امها بتهوي وجهها لايخرب المكياج: وقعتي ساع القمر ,الله يسعدش يابنتي ويبسرش بقلبه وعينه ويحفظكم من كل شر واوقعي عاقله والمره

رنا مسكت يدها: قوا ياعمه لاتوصيها شي من الي وصيتيني ، اهم شي بينهم الاحترام وتقدره وتوقف معه في ظروفه وهو يهتم بها وماتسمح له ابدا يهينها معها اهل ورجال ماتخافش من حد، المرأه ماتصبرش ياعمه على الاهانه والذل من الرجال، تصبر على ظروفه وعلى وضعه وتوقع له ستر في هذه لكن ماتستر عليه وهو بيهينها

سندس: من هو هيا ناهي مش انتين داريات بي امانه انا الي شاوصيكن الثنتين بتمسح دموعها ، شافقد لكم خيرات وعيفوتني حركاتش انتي وخالد

رنا حضنتها

صفيه: هيا الرجال بيصيحوا ننزل اخطين

ام رنا ناولت صفيه شنطه الذهب ومشيو بالسيارات المزينه
وصلين على استقبال وقوارح وترحيب طلعين لغرفتها
خوات كرم وامه وخالاته وعماته رحبين بهن احسن ترحيب وعلقين بالطوهاتهن ونزلينهن للديوان وتجهزت المغنيه تزفها

كان الديوان حقهم كبيرررر وملان نسوان ومجهزين كوشه ووجبات

دخلت سندس وجلست في الكوشه ماحست نفسها غريبه بدأين يسلمين عليها الي تعرفين عليها في العرس من اهله وباركين لها..

بعد ساعات تمت الزفه وجو لهن لصفيه ورنا وامها وروحين بيبكين

خاالد شاف الوضع حزين فتح الزفه: هيا عاد انتين عتزفيننا

ام رنا: عاد انا هنا

خالد ضحك: ياعمه انتي امي مابينحسبش عمه وحد غريب افرحي لنا ومعنا الدنيا حق الله.


ام رنا : الله يجبرني بسعادتكم يارب


وصلوا كلهم البيت بعد الطريق..

في الغرفه رنا وصفيه بيشوفين اشياء سندس ويبكين عليها

رفيده: الله شاشل لي حقها الاشياء كلهن

صفيه ضحكت: وين حسش ذكرتيني حين رنا تزوجت كيف فعلنا

رنا ضحكت ورجعت تذكرت زواجتها تلاشت الضحكه

صفيه غالطت الموضوع: ذلحين رنا البيت كله لها كلنا عنسير وهي عتجلس في البيت

رفيده: ماعتبكيهاش زفه الا يمه كثر خيرش

صفيه: عتعيش عند امها

بعد ماسلمت على ابوه طلعوا شقتهم..

كرم بيوريها شقتها
سندس مبتسمه مبسوطه كل شي روعه افضل مما توقعت وتخيلت

كرم: ايش اكثر شي عجبش في البيت

سندس: التلفزيون كبير ملان الجدر واحد يحس انه داخل بيمثل معهم

كرم ضحك : نفس التفكير انا شليته امد المباراه من كثر الحماس احس التلفزيون صغير مايلعبوش سوا

سندس ضحكت: اليوم به مباراه

كرم بحماااس : لاتقليش ان انتي بتتابعي

سندس :ايوه واراعي لهذه المباراه بالذات

كرم فرح : بينكتشف فيش اشياء حاليه مناسبين بعض

سندس ضحكت

كرم: باقي للمباراه ربع ساعه مارأيش نبسرها

سندس بحماس: ايووه
كرم فرح فتح التلفزيون ومسك فستانها لما جلست قرب قدامها الماسه

سندس بتضحك مستغربه ليش ماسه

كرم فتح الثلاجه وخرج عصاير وببسي وشكلاتات وجهز لها ملان صحن وقرب لها

سندس ضحكت : تسلم
كرم: انتي اليوم اضخم من اصحابي كلهم منوره الديوااان تبارك الله ماجملش

سندس انحرجت ضحكت

كرم: يعني كل ماشتي اضحكش اجلس اتغزل بش

سندس رفعت عينها ايوه

كرم جلس جنبها : ايوه نسيت اسألش انتي ايش من فريق

سندس قالت له فريقها..

كرم بحماس : اوف وانا الثاني يعني اليوم عنبسر من يفوز يلا بيننا تحدي

سندس جالسه تتفرج الديوان والفراش ذواقين لونه الي بتحبه سماوي وابيض
بدأت المباراه ومتحمسين قبل مايكمل الشوط الاول فاز فريقها بهدف

كرم ناولها العصير : اول مره اهني لخصمي يفوز من قلبي

سندس ضحكت : بس عتهني واصل ولا اليوم حين انا ضيفه

كرم: ضيفه !!! انا الضيف انا ، بيتش وانا الضيف

سندس ارتبشت : مدري حاسه نفسي معزومه مش مصدقه ان قد حياتي هنا

كرم ضحك: الصدق ماجربت احساسش اقلش واعبر معش

بدأ الشوط الثاني وهم منسجمين يتحابروا شافو الا هدف لصالح كرم مسكها بفرحه : تعادلنا

وصلت نغمات لتلفون كرم فتح تلفونه

ضحك بيوريها فيديوهات وبيوافوه بالاخبار والاهداف : بيحانكوني انهم بيبسروا المباراه

بيصور لهم فيديو انه بيشوف المباراه وكتب لهم: يلا سيرو ارقدو ياشطار.

بعد ماشاف في المجموعه خالد فيديو كرم ضحك ورسل لسندس: ادالش الله واحد ساع جنانش ،

سندس ردت له: اصلا ماختارني الا من اول لحظه مجنونه

كرم جلس يضحك وقام يقلدها كيف شافها لاول مرره

بيسمعو باب الشقه
كرم راح يفتح

اخته: من عندك هذا الصوت؟او خبرتك عندك

كرم : ايوه

اخته بصدمه: يوووه

كرم ضحك: قدو واحد ذلحين ، بنبسر انا وياها المباراه

اخته ضحكت ناولته العشاء: الله يسعدكم يارب هيا ها

كرم طرحه وسط المكان: هيا عشاء

سندس ضحكت

كرم: ضحك مالش

سندس: بس حسيت نفسي في بيتنا

رسل لها رساله: رقدتي

رنا: ماشي جالسه اتخور ، جاوعه ومكسله انزل

خالد ضحك: هيا انزلي من الكسل

رنا: اخاف وحدي وصفيه قد رقدت

خالد وهو بيكلمها نزل المطبخ بس ماقلها: ذلحين انتي داريه اننا حجزت الصاله والفنان اصبري بكره شاقرح المفاجاه وسط الصبوح

رنا: منك صدق
خالد: ايوه مني صدق ، واتفقنا انا وكرم يأجل سفرهم لبعد شكمه سندس مع عرسنا و نسافر جمعه

خلص يفعلها سندوتش وشاهي وطلع طرحهن باب غرفتها و دخل غرفته وقفل رسل لها : افتحي الباب

رنا: ليش؟
خالد: هيا افتحي الباب
رنا فتحت الباب شافت الصحن: ضحكت شلته ودخلت الغرفه: يووه ياخالد مسرع فعلته عادنا حاكيتك

خالد: ليش انا شاراعي ثانيه واحده انتي اطلبي عيوني ، مش انتي داريه كم بينحبش

رنا:الا داريه

خالد: مسرع اذن فجر ولا حسيت الوقت واحنا بنتكلم ، تعشي وانا اقيم فؤاد نسير الجامع اصلي وارجع ارقد تصبحي في حياتي ياخير حياتي انتي
رنا: وانت كل حياتي

ثاني يوم الصبح فوق الصبوح

ثاني يوم صفيه مربطه راسها : يوو عنرفع هذا كله ، لو نخليه لعرس رنا وخالد

جدتها: عنخليهن شهر؟
خالد: اصلا قد حجزت الصاله والفنان
الكل لفت له

امه: يو ياخالد منك صدق؟ عتخلينا يابني نجهز سوا

الجده: وانتي ماعتجهزي؟

ام خالد: ايحين عتكتسي مرتك

صفيه: سهل السوق في اسبوع عنتم، كنت عتحاكينا نكسيها مع سندس عاد ارجلي مورمات

الجد قاطعهم: الدور الي طالع انا شنزل منه غرفتك وانتو اطلعوا طالع جهزه وابسر مايحتاج تجديد ورنج

رنا خرجت من المطبخ بالخبز الدافي

صفيه: من ذلحين عتستلم المهره رفيده وانتي تحجبي

رنا شافته

خالد: حاكيتهم

ام رنا: كان قد انتو متفقين ها

ام خالد ضحكت: انا شاجهز واكسي وافعلهن كلهن لحد يغثيهم قوا

ابو خالد : كم تحتاج اوفيلك، ماقد تحاكينا على الشرط والمهر ياخي

ابو رنا: الجهال جهالك وجهالي مابش بيننا شروط

الجد دق صدره: خالد جاهز وقد جمع زلط وانا عليا كل مانقص

خالد شاف ام رنا: شاناول عمتي المهر ونخرج نكسيها والي ينقص انا من هذه العين وهذه العين

رنا مبتسمه وجالسه تغالط احراجها وتجابر بنت صفيه

صفيه: هيا شرق نسيتو حريوتنا تسيرو تسلمو عليها

لما وصلوا عند سندس

جدها واعمامها واخوالها طرحوا لها ذهب و زلط في ظرف
الا خالد قبل مايناولها الظرف ناولها كيس وخرجوا

كرم شاف الكيس: مدالش خالد؟

سندس فتحت الكيس وضحكككت اثنين كراتين بواتي رياضيه له ولها

كرم جلس يضحك ورسل له: انا اوريك يا زباج عيديك الله ليدي

خالد: قللتلك اختي امانه في عينك ،وانت ماقصرت تتفرجوا مباراه يامدكوم انت وهي يوم العرس

كرم ضحك: والله محلا منها ومن روحها ماعد اشتيش خبره واصحاب

الأيام بتمر وخالد منشغل مابين حجوزات وتجهيز الدعوات ويجهز الشقه حقهم ، و رنا منشغله للكسوه وبيحاولوا يقنعوها تفرح وتفرح اهلها وخالد وتفعل عرس وماتهتم بالنسوان..

يوم بعد يوم واسبوع بعد اسبوع باقي لعرسهم ١٢ يوم

بدأو يوزعوا الدعوات ومادوش دعوه لبيت ام امير لان رنا طلبت مايعزموهم

مرت جيرانهم سارت تبدي عليها الصبح وبالعاني طرحت الدعوه فوق الماسه

ام امير قرأت لقبهم : لمن قد عيعرسوا

دخلت احلام بالشاهي تضيف الجاره

الجاره: انتي عند امش؟

احلام: ايوه بنجهز غرفه اخي امير عيوصل بعد يومين امد يجهز لعرسه

الجاره ضحكت: بدل الخساره خلوه، عرسوا انتو وجيرانكم جمعه

ام احلام: مش احنا عاجزين قادرين نعرس لابني والحاره كلها

احلام فتحت الدعوه وشافت ضحكت: يوه على قله عقل ماقد بسرتش حد فارح بروحه ساعهم

امها لفتت لها بهررت

الجاره: هيا خاطركن قلت ابدي اسلم عليش

احلام غلقت بعدها: هولا قدهن بيجين عاني يحانكين
امها: انتي الي بتديلهن فرصه ابسري كيف بتتحاكي وانتي رجعتي مطلقه

احلام: عتعايريني يمه ، قلتلش ماكان يشتي يطلق نسي وقالها

امها: كم قد قالها وهو غاضب وجوزنا له قلنا ماتقعش طلقه وقالها وهو ضابح ذلحين قدهن فوق العشر ماعد بش رجعه لو تموتي

احلام: ماشرجعش بخيل جلده مارضي يدي صرفها ، عنبسر الثانيه كيف عتعيش معه وهو حراف هكذا

احلام رسلت لاخوها: اقطب ارجع تزوج قبل ماتتزوج قبلك


في بيت طليق احلام..

مرته: تشتي تدي عيالك اديهم في عيني

زوجها: وين اديهم بتبسري ماعد بيكفي شي كل شي غالي وماقد لقيتش عمل
مرته: سهل عناكل الحاصل ونزيده شويه ماء تكثر الدبيخ ولا الفول، وشويه طحين وزيدنا الخبز واكلنا الحاصل وبعدا انا قد ناولت واحده تبيع الي القطع الي طرزتهن وعتدي لي الزلط امد ماتستأجر المحل الي قلتلي وتصلح تلفونات وبعدا كما ادا الله اشتريت دفعه تلفوناات وبعتهن

زوجها: ريتني شليتش من زمان ماكانش ضاع نص عمري حريق دم معها ، اقلش والله لانزل اشتغل اي شي شابطل تشراط طالما انتي هكذا .


في الغربه امير قرأ رسالتها وجلس ضابح سار ياخذ اذن من عمله وسحب مبلغ راتبه الي جلس يجمعه عند المحاسب عشان لايصرفه وراح يكمل معامله مرته عشان يشلها معه..

بعد يومين جهزت اوراقه و رجع اليمن..

اهل العروسه لام امير في التلفون: ليش نقدم العرس مانقدرش حجزنا كل شي

امير بيصيح : انا قد تنازلت عن العرس وهم بيزيدو الدلع

احلام: زيد لهم الزلط وسير حل موضوع القاعه وقلهم امد عتخلص تواريخ وصلاحيه اقامتها

امير: فكره

ابوه: يمين بالله العظيم يا امير لو تفعل مشكله معه لاحبسك قسما بالله لاخلي راسك بعدا في الارض

امير : خلاص ناهي مايستاهلوش اصلا ، طز فيها وفيه الطيور على اشكالها تقع ، والطبع قدو طبع الناس عتبسر من الغلطان وانتو عتبسروا

ام احلام مسكت احلام في المطبخ: يابنتي انتي زد تحاكيتي مع خطيبه اخوش قبل الخطبه انه في مشاكل إنجاب واحتمال ما

احلام قاطعت امها: ايووه تحاكيت تطمني وغلقي الموضوع يمه

امها: يلا تمي عملش اسير اتصل لبنات خالش يجين يعاونينا

احلام: تمام شافت امها خرجت و داخل نفسها( الله يهديش يمه محد يبدع بابنه وبعدا انا متاكده ان السبب فيها هي وكل شي عيبان وبالذات خالد الي كان طبعه جلف ماعيتحمل لفها و دورانها )

امير: سيري يمه حاكيهم عنغير لهم الي يشتو ونوفي زلط

امه سارت لبيت العروسه
العروسه: بس ياعمه مش هي قصه صاله، وناس وكوافير وفستان وبعدا ايش السبب لهذا كله

ام امير: يابنتي الاقامه ماكرهن الكفيل سبرهالش

ام العروسه: ناهي يتزوج وسافرو حتى ثاني يوم يعني مش هو ضروري نقدم العرس لجل تجلس عندكم اسبوع بالعقل فكري

ام امير شافت صح كلامها كيف جايه تقدم العرس وهم اصلا مسافرين بعد العرس بأيام يعني عذرها بايخ رجعت لأمير تكلمه.

ابوه: بغير قله عقل انتي وجهالش قد خربتي حياتها وحياته ذلحين سبري ما خرب مش توفي فحس و دحس

امير : محد خرب حياه حد هي خربت حياتها وهربت معه خاينه

ابوه ضحك : ناهي لو كلامك صدق والله ماعد تهمني لو هي هكذا مش جالس مصدق لامك وختك حركات نسوان قالت قلتي قبلهم بعدهم ، غر اوقع رجال ، لك الحمد ياربي والشكر
خرج من البيت

احلام شافت امها سارت تتصل : ولو ماسبرش هذا كله

امير هز راسه وضحكه شر وعيونه بتلمع: والي مايسبرش شاسبره انا ، امانه لاخلي عرسه سيره على كل لسان
وبعدا توقع المرمله وجلس يضحك

احلام: يستاهلوا ، حقهم حق واحنا مع كل شي نفعله عيب وغلط قد بتسمع ابوك

في البيت الثاني
رنا جالسه بتتواصل مع استاذتها بصفحة الفيسبوك الي درستها في المدرسه ايام ماكنت مغتربه

الاستاذه: ليش ياحبيبتي ، محد يكتم الفرحه بقلبه ،افرحي وفرحيهم معاكي هذولا اهلك، اتركي عنك كلام الناس لاتخلي احد يسرق فرحتك

بقناتكم. ( طنافس 🎻وروايات🇾🇪 )

https://www.tgoop.com/FkamhSnanee3

السلام عليكم ورحمة الله وبركاته
الاخوه المتابعين الكرام🌻🤏🩵🩷
سيتم روايه ( بين ♥️قلبين ♥️)
للراويه والكاتبه ( عبير الكبسي)

بقناتكم. ( طنافس 🎻وروايات🇾🇪 )

https://www.tgoop.com/FkamhSnanee3

السلام عليكم ورحمة الله وبركاته
الاخوه المتابعين الكرام🌻🤏🩵🩷
سيتم روايه ( بين ♥️قلبين ♥️)
الجزء الخامس عشر للكاتبه ( عبير الكبسي)


رنا : تعرفي ماقدرت اكلم حد غيرش يمكن لان انتي تعودتي تسمعيني من ايام مشاكلي ولما كنت اداوم في المدرسه انتي اكثر واحده شافتني كل يوم بيومه ولاحظتي عليا وسحبتيني وجلستي تحاولي معي لما فتحت لش قلبي وارتحت

الاستاذه: مانسى يا رنا كيف كنتي بأول يوم وجهك ابيض مخدخد مورده خدودك وعيونك تضحك وجمالها ولمعتها وخجلك كنتي مره كيوت وهاديه فرحتك بالدراسه درجاتك ،بس يوم عن يوم طفيتي مثل الشمعه ماقدرت اتحمل اشوفك صراحة وكم نصحتك وقتها وقلتلك يابنت انتي صابره على طبع عمره مابيتغير، كلمي اهلك تصرفي ،صار عندك رعب من اي صوت مرتفع واي حد يعصب كنتي مو طبيعيه ، وكم انبسطت من قلبي لما كلمتك صوره وصوت وشفتك رجعتي زي اول مره شفتك فيها
شايفه كيف ارواحنا رقيقه ماتقبل الكسر! شايفه كيف بنزهر مع الشخص الي يحبنا ويقدرنا ! ولو ماقدرنا نفسنا واحترمناها عمرنا مابنلاقي حد يقدرها يارنا

رنا: صح

استاذتها: تحبي ابن عمك ولا موافقه عشان بيحبك؟

رنا: احبه ومن طفولتي بس لما تزوجت جلست اقنع نفسي وانسيها انه خلاص حرام ماينفع افكر فيه، وفعلاً نسيته فتره زواجي بس بعد مارجع ورجت ذكرياتنا حبيته وكلمه احبك الي ماقلتها عمري غير له واحنا صغار احس نفسي اقله بس خايفه اعبر عن مشاعري خايفه افرح حاسه شعور متلخبط

استاذتها: انتي عمرك ماقلتيها لانك مالقيتي الشخص الصح الي تنقال له ومش عيب الان تقليها لشخص شاريك ويحبك وانتي قلبك مرتاح له، انتي عشتي اشياء كثيره مايعلم بها الا الله وانا اعرف شويه، حرام عليكي تستكثري على نفسك الفرحه اوقفي قدام المرايا وقولي لنفسك كلام حلو انتي تستحقي كل شي حلو، انتي تستحقي الحب والضحك والحياه الكريمه

رنا بعد ماكملت كلامها معها حست براحه كبيره كانت مقيده بمشاعرها الان نفسها تطير وتفرح وتغني لأنها حست انها تستحق فعلاً ،حست شعور فرحة العروسه بس هذه المره مش بغموض لانها عارفه ومتطمنه للشخص الي بتكمل حياتها معه.. نزلت وجالسه جنب جدها

جدها جالس بيسبح: ايش قد معش
رنا: ولاشي بس مابش عمل قلت اونسك شويه

خالد دخل لاعند جده وشافها ابتسم لها

الجد: قلنا مابش بسره كل واحد بعد عمله ماعد عيجي لكم شوق بعدا

خالد: من قلك ياجد ، والله اين ماسرت ولو غمضت اتخيلها

الجد: هذه قرينتها مش هي

رنا ضحكت: يو ياجد تسخى عليا

الجد رجم له المسبحه :اسبقني للجامع و سبح واستغفر بدل اللقانه

خالد: هو لو تخليني هنا بس خمس دقايق قبالها شاسبح اكثر من التسبيحات الي قد سبحتها انت من الصبح

رنا ضحكككت

الجد: لسااااان هيا قبالي هااا اخطى

في الشارع امير واقف بيكلم واحد: ناولهم صورته يشلوه يخفوه شهر ، واديلهم كم ماشتو

الرجال: والزلط

امير: الله المستعان قلهم اطبع وجهي لهم.

الرجال: حاضر

امير: بس اشتي يوم الربوع العصر وسكته وبهدوء استدرجوه مشتيش مشاكل وهدره وزحمه في الشارع

الرجال: حاضرررر ومشي

امير دخل وقفل الباب

في الحوش الجد مراعي وبيجابر ابو خالد..
خالد كمل يتوضأ بسرعه وخرج وهي تشتي تدخل لاعند جدتها شافها اشر لها يومين

رنا ضحكت بتأشر له امشي
جت بنت صفيه تشتي رنا تتحملها

خالد بصوت واطي مشاوووره : قليلها خالد بيحبش خيرات

رنا ابتسمت شاورتها ترد عليه

بنت صفيه: قالت و رنا بتحبه خيرات

خالد فررررح مشي خطوه من الباب و رجع شافها: ماقلتي؟

رنا: الي سمعته

خالد: معش لسان
رنا: تخيل جدتي الي داخل يعني لو سمعتنا والله لاتزفنا

خالد: والله ماخطى لوماتقليها واسمعش

الجد بيصيح وابوه بيداعيه من الحوش

الجده من داخل:مالش واقفه من بتحاكي

خالد : سمعتي يلا تحاكي اشتي اسمعها الان لو اموت وماقد سمعتهاش

رنا ضحككت: بطل افلام هنديه ولاعتموت ولاعيقع بك شي بطل تتحاكى هكذا

خالد: هيا قوا عشان خاطري

رنا بترجع خطوات للغرفه وبتقوي قلبها تقولها له ابتسمت وخدودها محمره وبصوت واطي همس: احبك .. وقفلت الباب

خاالد فرررح خرج وهو مبتسسسسم وهم ضابحين من الإنتظار

ابوه: ايحين عيجو يعلقو اللمبات ؟

خالد: قالو اليوم بعد العصر او بكره الصباح
الجد: اشتي من اليوم افرح بهن وتضوى الحاره كلها

ابو خالد: مابش داعي عتقع تكلفه

الجد: من جيبي ماعليك انت اول حفيد يتزوج من العيال

خالد حب راس جده ومشيو للجامع

صفيه جت لرنا ذلحين ماعتلبسي اليوم

جدتها ضابحه: لاتحاكيهاش معانده غيرت عاداتنا كلها

صفيه استغربت شافت رنا: ماقصد جدتي

رنا : ياصفيه قلدش الله ليش نفعل اسبوع طويل عريض وربشه ومعنا عرسين انا وخالد قلت اليوم البس العصبه و زنه جرز للمتفرطات وبعد المغرب عتجي تنقشني المنقشه وبكره يوم النقش البس الي خيطناها

صفيه: يعني هو سمره وانتي نقش

رنا: ايوه هم في الصاله بعد المغرب واحنا في الديوان

ام خالد دخلت: الا صدق قدي حشيره واحده وبعدا بدل مايجين يتليقنين نسوان الحاره اشقيهن شويه

صفيه ضحكت : ياجده خليها والله انه سوا بدل الخساره

والخميس قدو كوفره مره واحده

سندس وصلت بشنطه صغيره

فرحين كلهن وحضنينها واستقبلنها بشوق

سندس : يوووه فقدت لكم وللبيت، وجده حضنتها وامها وعمتها..

صفيه: يوه ماهي هذه

سندس: اداتي شامسي عندكم كيف ماهي هذه

امها: عادش حريوه يابنتي

سندس: طيب ومافيها واخي وبنت عمي حريوه

حضنت صفيه و رنا فقدت لكن وين رفيده اللقنه

رفيده دخلت: مالكم محسسني انها كانت مسافره ماقد لحقت اتهنى ببقعتها

الجده: هيا شرق اقطبين
سندس : قد شنطش جاهزات؟
رنا : ثد كنت لفيتها وامي وصفيه مش داريات عنسافر رجعين كل شي وسط الدولاب

سندس: يووه مابش وقت اقطبي نطلع نجهزهن بكره زحمه وعتتنقشي مابش وقت

صفيه: بس ذلحين عتجي المره تلبسها العصبه

سندس: لوما تجي طلعيها عنجهزها بسرعه

رنا و سندس طلعين وجالسات يتجابرين كلام سندس عن كرم ومرحه وطيبته معها خلاها تتفائل وتبعد الافكار السودا من راسها وتبعد المقارنات والتوقعات الي عايشه في خيالها هذه الفتره.

مر اليوم عادي والجيران الي كانين بيتكلمين عليها نسيين وانبسطين وشاركين فرحه ام خالد وام رنا وعرفين انه حماقه منهن يتكلمين على الناس بمجرد مايسمعين على الناس كلام شافين طيبتهن وكيف ماذكروا ابدا اهل امير بخير او شر بعد الي حصل

في الحاره نفسها بدأ اول يوم عرس خطيبه امير وهو يوم الحمام كان اغلب الي يسيرين عندها يستغربين مابش ناس ويرجعين يجاوبين بعض قدام اهل البنت ان الناس كلها اصلا في عرس رنا طليقه امير..

بعد المغرب ام امير رجعت من الحمام حق خطيبه امير وبتشوف الحاره كلها لمبات والنسوان ملان الحاره بيخرجين من بيتهم تنهدت نفسها تدخل وتفرح لهم ومشتاقه للجلسه حقهم بس ماعد تقدرش دخلت بيتها

ابو امير : ماقالو العقد ايحين؟

ام امير: قالو نعقد يوم الخميس نفسه
ابوه: يلا تمام على بركه الله

ام امير: هلى حظ من يصدق كانو لبعض وذاحين عرسها الخميس هذا وهو الي بعده

ابو امير: و ابنش وين هو.

ام امير: خرج هو واخته يشلو بقيه الاشياء الي يحتاجها

ثاني يوم النقش لرنا و سمره خالد..

صفيه : يو محلا البيت فيه سعاده ، شم العرس والشذاب وصوت الزفه

سندس بتشوف النقش حق رنا كيف وقع : يجنن قوي ماشاءالله رووعه تشتي تقلها ( احلى من نقش عرسش الاول) وغيرت الجمله( احلى من نقش عرسي)

رنا بابتسامه: يا سندس مش انا مصدقه بينحس نفسي في حلم
سندس ضحكت: عتصدقي عتصدقي بس امانه مش اضخم عرس قد وقع عرسين في بيت ماقد وقعت

رنا: قوي حاسه بأمان مدري كيف
سندس: امانه اقري على نفسش خيرااات واذكري الله لو الي عيجين اليوم جيران احلام وامها يخ منهن

رنا: الله ماعيسخاش بنا قد شلينا قسمنا انا وهو

خالد مع كرم بعد مارجعوا من تنسيق السفر

كرم: انت ادخل اتغدا وارقد شويه وبعد المغرب نلتقي في السمره

خالد: قبل السمره شاعقد امانه من عيجيله نوم ياخي فارح فرحه الله يرزقها لكل واحد

كرم ضحك: الله يسعدك ياصاحبي ويتمم بخير

خالد نزل: ماعتنزلش تتغدا ماذلحين قدو بيتك

كرم ضحك: قد الاصل عندي ماذلحين، وبعدين البيت عرس وشغله ونسوان الجايات خيرات ماعنتعازمش
فوق السياره بيشوفو واحد ورياح تراااب

خالد اشر لكرم بيباي ودخل..

امه مسكته: ياااي وين عتسير

خالد: اطلع ارقد شويه
امه غمزت له: سير مكان فؤاد ادخل من الشق الثاني قد فتحنا الباب حق الدرج الي قفا البيت

خالد: شغلتووو نفسكم وفرغتوا المخزززن امد خالد لايطلع ويبسرها وقدي ثاني يوم عندي

امه بتضحك وبتدهفه: ايووه هيا اخطى انا فدال الوجه هذا

خالد ابتسم: كيف الحلاقه

امه دمعت: ماشاءالله صلاه على النبي وحضنته وبكيت ، ياربي لك الحمد الي جا اليوم هذا وابسرتك حريو

خالد حضنها : طيب بتحبيني ليش بتعامليني هكذا

امه مسحت عينها ضربته: انا بغير ملعنه هيا اطلع مكان اخوك كل اداتك الي عتلبسهن هانك النسوان ملان البيت

خالد : ومرتي مابتفعل اسكه اوصفيلي الحريوه مابتفعل وانا هكذا ارحم الله مابش معي حد يعبرني وانتو بتعانوها الاسبوع كله واهتمام وحفلاات

امه ضحكت: بتلبسها المره عيجين نسوان العصر

خالد: وشابسرها ولا والله لادخل لعند النسوان

امه: تمام ايحين عتبسرها معك زفه ولا عتتفرط عندنا هيا من قله العقل قدي بكره عندك واهجع هرمك

دق الباب

امه: لاتفتحش شافتح انا لو هن النسوان

خالد: عادو بيأذن عصر ايش من نسوان ذلحين راعي شافتح انا

طالع عند البنات.
المره بتلبسها: ماشاءالله على شعر معش خيرات مارضي يتم
صفيه: صلي على النبي
المره:الصدق يابنتي معش خوات زوج ابسري كيف بيفتجعين عليش
رنا: هن خواتي قبل مايقعين خوات زوج وعوضني الله بهن

في بيت امير

الاب جالس بيفكر تذكر المشكله الي قد وقعت وتذكر في سياره باب الباب غريبه بس فكرها حق عرس خالد اصحابه خرج بيسألهم : ليش موقفين قبال بيتنا

صاحب السياره بلسان ثقيله وشمه كأنه شارب شي: تعرف هذا

ابو امير: قد قلكم واحد تقتلوه بزلط هيا راعي انت وياه
الرجال عقله بطيء الفهم: مش نقتله مابلا نخفيه تعرفه ونديلك قرشين تخزن تقطبنا نروح تعبنا مراعاه

ابو امير بيتصل لصاحب القسم سمعوه وهربوا

في الحوش خالد بعد مافتح لهن هرب لغرفه اخوه وبعد المغرب عقدوا بسرعه في غرفه الجد وقبل مايخرج زفته من الحوش طلب يشوفها في الصاله بسرعه

سندس خرجت معها ع اساس تشربها ماء

خالد قدامه واحده لابسه فستان ذهبي مثل الأميرات ولثمه ذهبيه ومصلح شعرها وعيونها مرسومه بطريقه خلته يتأمل نظراتها

رنا انصدمت ضحكت شافته بلبس السمره

خالد: حتى وقد انتي مرتي ابسرش سرقه هكذا انا اوريهم كيف اشلش و اخفيش عن الكل، حاول يتجرأ شويه باسها فوق راسها وخرج بسرعه للحوش

رنا مسكت يد سندس بقوه : الله يسامحش كنتي تقليلي

سندس: احلى اللحظات هي هكذا فجأه بدون ترتيب

رنا رفعت يدها تصلح اللثمه حقها وشم يدها من عطره

ثاني يوم الزفه..
رنا عادها وصلت من الكوافير وخالد في الحاره في الزفه..
صوت الناس بتزف معه والرجال حوله والي بيرقص

ابو امير جالس خايف يحصل شي دخل شاف امير راقد سحب المفتاح وغلق من خارج الغرفه وخرج للشارع بين الناس بارك لخالد وسلم على الجد وابو رنا وخالد وبيتلفت يشوف لو في شي خايف على ابنه يورط نفسه

في غرفته كان بيمثل انه نوم سمع ابوه قفل بالمفتاح جنن عصب قام زبط الباب كسر المغلقه ،،، طاقته كلها من ضوء لمبات الشارع حق عرس خالد رزع الطاقه غلقها لما اكتسرررر الزجاج

وجلس صح الغرفه كان متغيره عشان العروسه الجديده بس ذكرياتها في كل مكان ،
فتح اغاني للاخير ولبس السماعه يغالط صوت الزفه بس ماقدرش في صوت عادو بيسمعه وفيه فضول يعرف متى خلصت الزفه.. فتح حسابه ودخل واحد من برامجه وجلس يشكي لواحده كان يتكلم معها

البنت : مايزعل مثلك الا حد نادم

امير: تشتي الصدق انا غلطان بس هي مارضيت تدي فرصه باعت بسرعه

البنت: يعني ولامره في حياتكم ادت لك فرصه؟

امير: الا كثير بس ولو هي عشر سنوات
البنت: بتقلي عرفت انك تكلم واحده وماتشتيها تزعل وتبيع

امير:ماعد قدر يكمل بقيه الاشياء الي زعلتها منه سكت وخلاها في قلبه

البنت بتمزح معه جلست تحانكه رسلت له اغنيه: مسكين ياناس من قالو حبيبه عروس.

بعد الزفه دخل الديوان خالد مع ابوه واعمامه وجده

وهي واقفه منوره الديوان مبتسمه بخجل
خالد نفسه يسبقهم كلهم بس جالس يمشي مع خطوات جده البطيئه

الجد بيمشي ويوقف ويضحكك بيحانك خالد

خالد متحمل اهم شي قدها قدامه

كملوا يتصوروا
ابو رنا: ماعد شاوصيك
الجد: انت داري من هي رنا
خالد اشر لعيونه وقلبه: قدي هولا عيونه وهنا في قلبه

رنا سمعت توصيتهم ودمعت عينها

بعد ماقربوا لهم عشاء

خالد: تسلمي ياصفيه عنخرج ذلحين لبسينها
رنا شافته: وين
سندس بتلبس معهم

صفيه: وانتي اين عتسيري

خالد: حجزت فندق ومن هانك ثاني يوم عنسافر

صفيه: ها انا قلت عتسافرو بكره ، يلا تمام اصلا كل شي جاهز الشنط جاهزه حقك وحقها شاخلي فؤاد يطلعهن السياره

سندس خرجت تكمل تلف اشيائها: شاسبق لاعند كرم

نظرات كلها دهشه وفرح وسعاده رنا حلاله ومعه واخيرا
: ذلحين اشلش منهم كلهم مثل ماجننوني واهرب بش

رنا ضحكت : بس ماقلت لهم انحنا عنسير

خالد متأمل تفاصيل شعرها تسريحتها فستانها مش مركز معها

دق باب الغرفه
امه: يو قلتلنا عتسافر بكره وين عتسير اليوم اخر الليل فنادق ليش يابني

خالد شافها: قلتلش اشلش واهرب

فوق السياره كل الطريق بيسوق هو بسيارته ويده بيدها

وكرم وسندس بسيارتهم

نايمه على السرير والغرفه لونها رمادي صوت بيصحيها

بعصبيه: رناااا ، يااااي بس نوووم هيا قومي
رنا فتحت عينها شافته قدامها انصددددمت صاحت : امير

امير: ايووه مالش راقده كل الوقت هذا صحصحي هيا قومي بس لش نوم

رنا شافته دمعت يعني ايششششش !!! كل الي عاشته ورجعت وحبت خالد وتزوجت خالد كان حلم بدأت تبكي : كيف جيت، مش خلعتك وتزوجت خالد

امير معصب : سحبها و وضربها وهي بتمسك ستاره البلكونه وهي مفتوحه ، خالد هااا موووتي ورجمها من البلكونه

نكز خالد لما سمعها صاحت وقامت فجأه من النوم
رنا بتستوعب شافته خالد بتتفرج له بصدمه

خالد مسك يدها :مالش بسم الله عليش ، حلمتي شي؟

رنا بتتنفس بسرعه بخوووف سمعت صوته وشافت الشمس والغرفه مختلفه عن الي بالحلم حتى صوتها كان مكتوم في الحلم وهي تحاول تصيح تخرج من الحلم شافت يد خالد بيدها مسكت يده: خالد

خالد: مسح على شعرها وحضنها وبيطبطب على ظهرها: الظاهر انه كابوس ،تطمني اذكري الله وتعوذي من الشيطان ، ايش حلمتي

رنا داخل نفسها: لاتسأالش ايش حلمت الحمدلله اننا معاك الحمدلله ، رجعت ردت عليه: حلمت اني اتدربت من البلكونه وكنت اصيح وصوتي مخنوق

خالد ضحك: ماصحاني الا صوتش ماكان مخنوق ، صباحي انتي ، يا احلى صباح في الدنيا وانتي معي

رنا ابتسمت والدمعه في عينها: الحمدلله يارب انه كان حلم وواقعي جبر خاطر.

في بيتهم..
كرم: اتصلتي ؟

سندس: ايوه مابتجاوب

كرم: طيب انا شحاول اتصل شرق ضروري نتحرك احتياط لاتتاخر في الطريق

سندس: والله انكم غامرتوا وتحجزوا الرحله الي عنوصل ع طول من الطريق ونسافر كنا نفتهن يوم

كرم: عنوصل ياروحي قد حسبناها وبعدين مابش الا هذه الرحله هذا الاسبوع والجو الان عيكون حلو لانتأخر

سندس: طيب ، اتصل وانا اكمل ارتب الغرفه واغلق الشنطه

كرم بيتصل لهم

خالد رفع السماعه: هلا صباح الفل

كرم: هيا اتفقنا نخرج نصتبح على الطريق ونمشي

خالد شاف الساعه: او تاخرنا ساعه ، قد انتو جاهزين

كرم: ايوه يلا الان جايين لاعندك

خالد: يلا تمام

في القريه..

ابوه فتح له الباب : هيا صبوح.. شاف الغرفه نص اشيائها مكسره

امير معصب بيشوف ابوه بنظرات غضب : ليش بتتعامل معي هكذا؟؟؟

ابوه: يكفي بهذله ويكفي جنان انا سكت وهديت الوضع بس تشتي نتحاسب الحقني للصاله يلا.. خرج


امير: انا مش انا جاهل عندك تغلق عليا الباب هكذا ، الواحد يكبر ويعقل وانت خرفت

ابوه لطمه في وجهه كف: انت تشتي تتربى من اول وجديد عاد امك المجنونه قامت تزوجك نبتلي ببنت ناس ثانيه مايكفي الاولى

امير مسك وجهه وعصبب بصياح ونرفزه :ايوه هكذا اجلس غلطني دائماً

ابوه : اخر مره اوقف معك المره الي تجي لو تزيد تفعل ابسط مشكله والله لاحبسك انا واشمت بك خلق الله كلهم

احلام جالسه بتقرأ معصبه بنت عم طليقها رسلت رساله:( لو تبسري كيف اثث البيت اثاث يوه يوه وبيت يا احلام من الحديثه دورين كله رخام وديكور فخم ، انا حاسه انه كذب عليش امد مايطلقش اليوم عزمونا غدا حق البيت الجديد ، شاصورلش تبسري

امها : احلااام هيا قومي اعجني واطرحي الغدا
اليوم النقش حق مرت اخوش

احلام:اوف الله يخطي الايام هذه بسرررعه باقي لي اسبوعين وبعدا افتهن

امها: تتداولي انتي وهي

احلام ذكرت وصاحت: يمه مدري خرط او صدق قالو رزق عمر بيت دورين واثاث مدري كيف على كيف ، لو هو صدق مافعل

امها: ولاتفعلي شي تحمدي الله وتشكريه

احلام: شارجم له جهاله خليهم يفحرو البيت قلك احمد الله

امها: استغفر الله

ابنها: رديني عند ابي يلا انتي مابتحبيناش كل يوم بتقلي شارجمكم عند ابوكم، وخاله احسن منش اطيب منش

احلام لطمته: عيب من قله الحيا تكلم معي سوا ولا شاخرجك

امها مسكته حضنته: هكذا تخرجي قهرش في الجاهل؟
ابنها بكي وسار لاعند جده يراشيه يتصل لابوه فاقد له يشتي يسير عنده.

بعد ساعااات في الطريق

رنا قلبها منقبض تذكرت رجعتها والحاله الي كانت فيها تذكرت الحلم الي حلمته.. قاطع تفكيرها صوت خالد بيكلم صاحب النقطه

كرم بيكلم صاحب النقطه لانه اقرب

خالد قرب منها بيشاورها: تذكري حين قلت لهم مرتي، صدقتي اننا مابينكذبش

رنا ابتسمت

بعد مسافه وقفوا في محافظه ينزلو يتعشو

سندس طلبت غير كرم وشافته بياكل الوجبه الي اختارها مدت يدها لصحنه وبتاكل

كرم ضحك: قلتلش نطلب نفر دقه
سندس: قلت كبده احسن بس الدقه شكلها اضخم

خالد بيكلم رنا وبيشوف سندس وكرم ويضحك: هيا كلي ياسعم بتستحي ابسري هذه الي مع عريس غريب مش من الاهل وقدي سارق مضارب بتهزور الاكل عليه

رنا ضحكت: ماشي بس انت عارف من الطريق ماقدرش اكل شي

خالد لقمها بيده: ومن يدي ماعيقع شي

رنا ماحبت تكسفه واكلت ، وذكرت كيف كان امير لما يسيرو مطعم يطلب لنفسه وياكل ويكمل وطلبها لو ماوصل ومايقلها حتى اطعمي

في بيت الجد

رفيده ضابحه جالسه تلوي من غرفه لغرفه. امها بتطرز ، وام رنا بتتفرج التلفزيون ، الجد بيشوف الاخبار هو والجده

امها: مالش واقفه

رفيده بدأت تبكي: ضبح مافعل البيت شوعه

جدها شافها ضحك: جي عندي

امها :هيا شويه ولحقتيهم

ام خالد بتضحك خرجت الابره من فمها : تقلي اين قد هم؟
ام رنا : ابردي في يد الله ولا اتصلت

ام خالد: الله يوصلهم بالسلامه

ام رنا ضحكت: كم كنت اغير منش واحسد حين انتي السليفه الاوله وذلحين اعظم من اخت


🌼لاحول ولاقوة الا بالله🌼

ام خالد طرحت القماشه من يدها وشافتها بنظرات حب : اي والله، الله يديم المخوه بيننا.

الجده: انا ربي قدر تقع خلفتي عيال بس انتين وبناتكن كفيتين ووفيتين

الجد: وانتي مالش بتبكي
رفيده: فقدت لهن وقع البيت طافي
الجد تنهدد: اي والله ربي يسعدهم ،
بنبره صياح: او بتبكي تشتي عريس

رفيده خافت واستحت: يوه مع ياجد مالك ضحكت

الجد: ايوه هكذا اضحكي ادعيلهم بالسعاده ويوصلوا بالسلامه ، وشويه ونسمع الا قد دق الباب وجولنا خطاب يشتو رفيده ، بس حظه عيجي وقدش اخر واحده شاطلع عينه.

رفيده ضحكت : مشتيش افلتكم

بعد يومين طريق بر وجو ووصلوا ارتاحوا ، بعد اذان العشاء عشان يخرجوا

خالد بيتصل لغرفتهم من الفندق

رنا جالسه جنبه ومنتظره

في الغرفه الي جنبهم
سندس اول ماتسمع التحويله الرد الالي بصوت رجال تقله: نو نو وتقفل بسرعه

كرم كمل يسلم من الصلاه وشافها : من اتصل؟

سندس: واحد غلطان ولايفهم ثالث مره يتصل
قله ذوق معاكسات حتى لهنا

رن التلفون وكرم مستغرب معقول ! جاوب

خالد: مالكم اول مايفتح الخط يتقفل في وجهي
كرم قرح يضحك ماقدر يمسك نفسه بيضحككك ومن ضحكه بتضحك سندس يشوفها بتضحك على نفسها ويزيد يضحك

خالد بيسمع رنا ويضحك هو وياها ضبح منه: مالك

كرم بعد ضحك حاول يمسك نفسه شويه : اختك مكنت الرد الالي نو نو وتقفل وذاحين تقلي معاكس وغلطان وضحك

سندس صاحت: يو هو رد الي قد حسيت صوته غريب يو ماعندك حجه تضحك عليا ،،وجلست تتكركر


كرم:يلا عشر دقايق واحنا نازل

خالد قفل وبيحكي لرنا وهي تضحك معه فتح الثلاجه فتح شكلاته وعصير وأكلها قبله

رنا اكلت وبتشوفه

خالد اكل الباقيه: اصلا ميت جوع هيا ننزل حين جهزنا اوريش وين كان حبيبش عايش

رنا شايفه روقانه رغم جوعه ليش ارتبطت براسها فكره وحش لما يجوع ممكن ياكلها وياكل البيت تكسير ، صدق لاقالوا اصابع اليد ماتستوي شافت الياقه حق شميزه معطوفه : خالد

خالد لفت لها: عيوني

رنا سحبت الياقه صلحتها له وابتسمت له

خالد مسك يدها باسها: مايحرمني منش ياروحي الغالي

سمعوا بالباب بيدق

خالد فتح شاف سندس ضحك: غلطان هاه يامبدعه

سندس: اسكت قد متتت من كرم يوه والفعله ،شافت رنا ، يوو محلاكم وانتو سوا ومزوجين

رنا قربت منها بقصت يدها: اصه يامفضوحه زوجش واقف في الباب مسكت يدها وخرجين سوا جالسات يتجابرين ويضحكين

خالد وكرم بيتذكروا الاصحاب والأماكن ووو

في اليمن..
يوم عرس امير بس مافعلش عرس راح يعقد وجو يخزنو الاهل عنده

ام احلام : بخرتي المكان

احلام: ايوه بينها وبين نفسها( مش ضروري مايستاهلين) لما تزوجت محد فعلي شي طلعت اخته تتفلسف من يوم الصباحيه

بعد ساعات وصلت عروسه امير دخل يشوفها انصدم :رجع من الباب يشاور احلام: كم عمرها؟

احلام: قالت امي ١٥ عمرها
امير شافها بعصبيه: عميا او كيف

امه بهررت له: عنتحاكى بعدا

امير دخل وهو ضابح غلق الباب شافها وتذكر رنا وملامحها وخجلها

العروسه جالسه بتشوفه منزل راسه وسارح كانه ضابح : ماسكه نفسها لاتتليقن رجعت تتأفف: اوووف

امير استغرب اول ماسمعها شافها : مالش؟ او ضابحه

العروسه بتهوي بالطرحه الي على وجهها طفحت

امير :ارفعيها افتشي ليش مغطيه نفسش

العروسه بينها وبين نفسها: كان مالها قرح قلبها الاولى الا من حلاك

امير ذكر لما فتش لرنا قام : ها يعني العريس يفتش
العروسه شافته بنظرات ضبح

امير:كم عمرش

العروسه: مادراني ياسعم شاحسب عمري

امير ضحك: زباجه ماشاءالله ، كم عمرش

العروسه: كان قبل سنتين ٢٧
امير انصدم: ماهو؟

العروسه شافته

امير: ليش ماتزوجتي؟
العروسه: من قلك ، كنت محجوزه من صغري لواحد من بلادنا ومات بعدا فسخو الخطبه، وحين فسخوا محد رضي يتقدم لي

امير: ماشاءالله ومن حظي تقدمت انا

العروسه فكرته يمدحها استحت:اشرت براسها ايوه

امير مسك وجهه بودافه: هنيت لي صدق ( داخل نفسه) محد يتزوج على ذوق النسوان كنت شادورلي بنفسي مع اشتي واحده محترمه على يد امي ها بتلف لي اي واحده تجاهها

العروسه: ان مالك بتطنن خيرات عيجي لك جني

امير : قد جا من زمان قدو وسط راسي لما تبسريني هكذا مطنن اوبهي تحاكيني عيخرجوا لش بعدا

العروسه كانت مستقويه على ماعلمنها نسوان عايلتها بس بعد كلامه خافت منه

امير شافها بعدت وجلست في الطرف: مالش ياخبلا بينمزح معش
العروسه: احلف

امير: والله مزحه ،

العروسه: ماشصدقش الا لما نصلي ركعتين وابسر لو صليت وماوقع بك شي يعني مابش جن


في مكان ثاني..
كرم بيحكي لهن وهم سامرين على الشاطئ في البحر على خالد ويضحكهن كيف كان متهور

خالد قام: ولا ما انت تذكر حين كنت تقلد انك بتفهم لغه الولد وبعدا انت ضحكت له وهو لطمك

بعد ضحك وذكريات كل واحد مشي لمنطقه الشاليه حقه

خالد شافهم مشيو والمنطقه هدوء : رنا

رنا لفتت له : ها ؟
خالد شوفي القمر فوق
رنا شافت : بس مابش نج.. : خالد

خالد تحملها وجلس يجري

رنا بتضحك: يامجنون نزلني
خالد بعد مزح وضحك جلس هو وياها: تذكري وانتي صغيره حين امسك يدش وادورش ملان الحوش

رنا:اذكر وكنت اطير وانا متمسكه بك واثقه ماعتفلت يدي واقرح راسي على قوله جدتي

خالد مسك يدها وحطها على قلبه: طول ماقلبي بينبض ماشفلت يدش ،اضحكي وافعلي كل شي نفسش فيه


رنا طرحت راسها على كتفه : كنت مفكره السعاده في التلفزيون والقصص بس انت طلعت حقيقي تغيرت عن زمان ياخالد

خالد : كيف تغيرت عن زمان؟

رنا ضحكت بعدت من كتفه عشان تشرح له : يعني تخيل كنت واصل تكسفني على دراسه، بعدا لما انخطبت قلبت عليا
كان طبعك غير الطفوله كيف تدافع عني وتقسم لي من جعالتك وماتخلي حد يغثيني ولو مغلقين الشارع تخليهم يفتحوا لي ويغلقو على سندس وكملت كلامها بضحكه

خالد: تعرفي ليش تغيرت جننت حين كنتي فارحه عتنخطبي كنت اشتي تتمي دراستش حين بتعجبش وبعدا حاكيت جدي قلتله هي خطيبتي واحنا جهال كيف تخطبوها

رنا بصدمه: منك صدق حاكيت جدي؟

خالد: ايووه والله واسأليه

رنا: ليش ماحاكيتني؟

خالد: كنتي فارحه بالدبله والشنطه والفستان وتحاكي صفيه وسندس وجدي بهذلني ليش افتح الموضوع هذا رجعت سكت و اقتنعت بكلامهم

رنا وعينها بعينه اسلوب تحقيق مبتسمه: يعني كنت بتحبني !!

خالد: وذلحين بينموت فيشش ، والسعاده في القصص والافلام وفينا مش هي شي مستحيل
الحب عشان ينجح يحتاج علاقه صادقه وشجاعه

ثاني يوم

كرم: ذلحين مانقلهم

خالد راعي شويه واتصل لك .. قفل المكالمه
رنا: ماقال؟
خالد: بيقل اصحابنا الي عادهم هنا عازميننا يباركوا لنا

رنا ابتسمت: حالي

خالد: يعني برأيش نسير؟

رنا: ايوه عيب ليش بتسألني كثر خيرهم

خالد: كيف ليش ماسألش، يعني جايين عرسان وشهر عسل مدري حاسس عيب افلت مرتي واسير

رنا منصدمه من الي هي فيه ماعاشت حاجات زي هذه

خالد بيأشر بيده : يااي وين حسش

رنا هزت راسها وتنهدت: احبك والله ياخالد وحضنته

خالد ضحك: يعني كيف اسير او مع
رنا: سير ياروحي حاكيه وانا شاجهز لك لبس

خالد وهو بيتصل له: وانتين انزلين المطعم حق الشاليه وتمشين على الشاطئ عنجلس معهم ساعتين ونجي لكن

رنا برضو تخرج ومكان كله يحتاج انجليزي وماقلهاش ممنوع خرجه و دخله داخلها شعور سعاده محد يقدر يوصفه

بعد ماخرجوا وخلصوا يتغدوا مع اصحابهم

واحد من اصحابه جنسيه ثانيه: يعني ماعد رجعت انت وامل لبعض؟

خالد اشر له: لا

صاحبه: ليش هيك ، فكرتها لحظات غضب بين اي حبيبين وبترجعوا احسن من قبل

خالد: بس ماكانت لحظه غضب، كانت لحظه قرار وانفصال هي تركت

صاحبه: ياحبيبي بتكون ضعفت مرت بموقف بشي

خالد: محد بيعرف البنت الي كنت احبها اكثر مني، اصلا لما حبيتها كانت شخصيه قويه ماتترك حقها ولا حق حد ولما شفتها تركت بدون تبرير عرفت انه قرارها امل قويه مستحيل تتعرض لضعف وبعدين ايش فتح الموضوع هذا جيت تباركوا لي اقلكم عريس تزوجت عيب

ضحكوا الشباب خلاص يا سامر بطل فضول

سامر ضحك

في الشاليه نزلين سوا وفي المطعم بيطلبين اكل

سندس : راعي اعرف في الثانويه الانجليزي حقي كله ضخم اديت٨٤

رنا: يلا اسكه انا قدلي خيرات حاكيهم انتي انا بينخزا

سندس تحمست تبين شجاعتها ومعرفتها باللغه : هيا ابسريني امانه وانا بينتحاكى انجليزي وصوريني لصفيه تبسرني

رنا مسكت تلفونها وبتصورها

سندس: مترر يا متر

رنا: مايقلوش يا

سندس: ماقله

رنا: خلاص جا

الجرسون واقف يسجل طلباتها

سندس: ون ( يعني اولا) درينك وبتوصف له لانها عاطشه( كووولد درينك قوود وذ ايس اوكيه ، ثرسداي قوي {نطقتها ثيرزداي)

الجرسون متغيره كل ملامحه ومعقد حواجبه ومبهرر بيحاول يفهم

سندس الاطباق اشرت له: و ذيس وذيس وذيس

الجرسون هز راسه تمام ومشي

رنا غلقت التصوير هيا رسلي لصفيه

سندس متحمسه رسلت لها الفيديو ولان اول المحادثات كرم وصل له الفيديو

تاخروا في الطلب شويه بعدين وصل لهن..

وهم بيتمشوا وبيتجابروا

خالد بضبح: ياخي ضبحني سامر ليش عاد يفتح الموضوع لو كانت رنا معي

كرم: هو مسكين مش داري يفكر انك تزوجت امل فهمته وسكت


خالد: ايوه يلا حصل خير

كرم بيضحكككككك على الفيديو بيوريه

خالد بيسمع وصوت البحر مزعج له بيقرب يسمع ويضحك على نطقها

كرم: جي ابسرها كيف بتتفاهم معهم

اول مادخلوا وشافوا الجرسون طرح لهن عصير بس لونه عسلي وثلج والقلص هذا شافوا لبعض

كرم: ادالها درينك المجنونه

خالد مشي بسرعه هو وكرم وصلوا للطاوله

كرم كلمه يغير المشروب

رنا شافت خالد ابتسمت: جيت مسرع

خالد منصدم ماسك الضحكه وكيف وجه كرم رد عليها: ايوه ياروحي انتي وياها مافعلتين؟ انتي داريه ايش هذا

سندس صاحت لما قلها كرم: يوه استغفر الله يوو يارب سامحني يوووه قدها بتدمع

كرم ماقدر يتحمل رده فعلها جلس على الكرسي وكان يضحك

سندس بتشوفه مصدومه بيضحك وشافت خالد : من صدق ياخالد

خالد: مجنونه عتقلي عصير

سندس: نسيت بسمه كنت شاقوله مجوس ذكرت انه دين ، رجعت قلت اشرب اي شي بارد ملببه يو جعلي

كرم شافها وبهرر لاتنطق جملتها( جعلي مكسر)

سندس: جعلي الخير

كرم ضحك: خير ان شاءالله ، هيا تغدين


سندس شافت رنا واستحت ضحكككت غطت وجهها

خالد: وانتي ليش ماتساعديها

رنا ماحبت تكسفها قدام كرم : كانت بتتكلم سوا والله بس هو مافهمهاش

خالد ضحك: مافهمتهاش انا ابسرنا الفيديو ومتنا ضحكه

سندس: ايحين لحقتي ترسلي له او رسلتيه للمجموعه حق العائله جدي عيصيح وانا فاتشه

رنا : ماشي مارسلتش

كرم: انتي رسلتي لي

سندس: يو مانتبهتش


في اليمن

بيت امير

العروسه شافت احلام دخلت لاعندها : اشتي ماء

احلام ضبحت تسير تدي لها بس اضطرت

العروسه شلت القلص تشرب وتغاثت ناولتها: يخ شمه زفر ماغسلتيه سوا او كيف

احلام مزحه بضبح: يااي ابسرري والله النقش مايسير قومي احفظي البيت واغسليه وشربتي

العروسه بجديه بتهز راسها: ماشي انتي

العروسه: ماشي انتي اديلي انا لما اتم الشهر امي قالت مافعل مهره

احلام: ياسلام من قلش ماعد بش هذا الخبر غيرو المنهج ياهبه

هبه( العروسه) : ماشي عندنا ماغيروش
بنت احلام الصغيره فتحت شكلاته من فوق تسريحه العروسه ويدها كلها موسخه وقربت للسرير تشتي تمسك السرير

هبه: يااي يابنت لاتعسيش هذا عتمهدي سيري تنظفي

احلام ضايقت: ليش بتصيحي فوقها هكذا

هبه ضحكت: هذا صياح ؟ هذا مجبر حاكي بنتش ولا سيري اغسلي لها عتمهد( توسخ)

احلام ضبحت شلت بنتها وتشتي تخرج

هبه ناولتها القلص: اصفيه سوا واديلي ماء شاموت عطش يوه حريوه ومابش معها ماء ياعيبتكم عليا

احلام خرجت وهي منصدمه من لقانتها كسفتها

امها : مالش

احلام: وقحه والله انهي وقحه هذه لاطلقها ابنش اليوم ماشقلش ليش

امها مافعلت

احلام بتحكي لها الي حصل

امير دخل وسمع : ياااي قد.عتبدأي مع هذه والكل

امه: هي غير بتشرح لي الي وقع

امير: ولاتشرح ولا لها دخل
احلام: كان شرب مرتك انت تشتي ماء وبتتويقح عليا

امير شل القلص وسكب لها ماء : شاشربها هذا قدش عتشربيها سم ماعدوش ماء

احلام منصدمه شافته خرج بالماء
امها: حسبي الله ونعم الوكيل

احلام: مابيفعلين به هولا بيسحرين ابنش او كيف هيا قبال عينش يمه ابسرتي ، تبليتو عليا بالاوله

في الغرفه

هبه بتمسح طرف السرير

امير ناولها الماء: ماهو هذا

هبه: بنت اختك مسحت يدها في الملايه بالشكلاته

امير: ها قد ابسرت احلام خرجتها الظاهر لاتمهد لش

هبه: هو انا الي قلتلها تغسل يدها مايعجبنيش الوسخ

امير خلس الكوت و رجمه طرف السرير وغير الثوب وخلاه في الارض

هبه: يااي عادنا بينتحاكى مايعجبنيش المهد مابتفعل ؟
امير بيتلفت لو حد دخل الغرفه: بتحاكيني؟

هبه: كان من بينحاكي بتبسر كيف بتخلس وتطير باداتك


امير عصب: انا مايعجبنيش مرتي ترفع صوتها

هبه: هذا صوتي مافعل اقطع لساني

امير ضبح ومسك نفسه لايسوي مشاكل من اولها

في ماليزيا احد الجزر اخر الليل

بعد مشاوير وفسح وصلوا الشاليه

رنا فتحت شعرها ومن الحمى ولانه طويل ضايقها

بتهويه وتشعفله بيدها

خالد واقف شاف المنشفه الي معلقه فيها شي بيتحرك قرب: راعي في صرصور
رنا بعدت بسرعه وطار لشعر رنا بتبعده ويضيع بين شعرها بتسمع صوته بيوززز وبتصيح وتتقفزز : خااالد


خالد سحب المنشفه وبيخفع الصرصور. يهرب وهي تهرب منه بتتقفز يطير وهو يلحقها يخفع الصرصور ويضحككك على شكلها


بعد ماهرب للارض

رنا بكيت

خالد حضنها وجالس يضحك ويصلح شعرها: خلاص ابسري قدو في الارض

رنا بتشوف نفسها في المرايه وقد شعرها مششششعفل بكل قوته : يووه قدني اخوف أكثر من الصرصور


خالد ضحكك: بيصلح شعرها

ثاني يوم رنا بتكلم سندس وهم جالسين يتغدو بصوت واطي

سندس ضحككت وبعدها بتحكي لها وخالد وكرم بيتجابرو سكتوا

كرم: تذكر ثاني يوم حين جينا هنا وبعدين جيت للحمام بالصميل ، قلع الخشبه حق تعليقه الملابس في الدولاب وفتخ الباب وخرج
فتحت الباب بسرعه اهرب

خالد قاطعها: مش فاهم شي ماهو ماتشتي

كرم ضحك: ياخي جالس في امان الله وهي في الحمام اسمع الا بتصيح وتحاكيه الله يقلعك ابعد لاتجي لاتقرب يماا ويقلدها
وهم بيضحكوا على حركاته ، قلت لو حد بدي من الطاقه خرجت بالصميل حق الدولاب. وانها نبعت من الصرصور

خالد شاف رنا فهم انها حكت لسندس ضحكك وغمز لها انه فهم

سندس شافتها: قد شمش ديتوووول قلت تعقمتي من الكورونا

رنا ضحككت

بعد شهر قرروا يرجعوا سندس و كرم عشان شغله بدأ

اما خالد وصل له ايميل يروح تركيا يتعاقد مع صاحبه فتح شركه يستورد اجهزه وخالد يستلمها ويتاجر بها في اليمن ويحتاج وقت المعامله ولازم يكون موجود معه ياخذ دوره في الصيانه والتركيب.

في السعوديه وصلوا العرسان لهم اسبوعين

امير: قد معش شهر واسبوع عتطبخي؟

مرته: ايش في نفسك

امير: افعلي كباب وسلطه و زحاو

مرته قاطعته بنبره تعجب:, ماهوو كباب حد قلك كنت فاتحه مطعم بعدا ماهو من كباب اخر الليل

امير: طيب افعلي دجاج محمر مع الخضار و رز اب

مرته ضحكت: الي يسمعك يقل كنت عايش في فرنصا(قصدها فرنسا) بتدي اكلات غريبه معرفش افعل غرر فول عدس فاصوليا زحوقه وزبادي لبن محوج عصيده فته حليب

امير عصب: فته جن يفتوش هوذا بينحاكيشششش ماتفعلي

هبه: سير دورلك طباخ اجنبي تتخور له قلتلك ماعرفش الا الحاصل

امير تذكر كيف كانت تسوي رنا وهو بيشوفها ويعاجلها وهي تجري وتسرع وترتب وتفعل اكثر من شي وهو بيصيح ويعصب خرجت منه الكلمه بدون مايحس( ياعيباه)

مرته: ياعيباه عليك انت بتدور تعجزني

امير ضبح من مراددتها:, جي معي المطبخ قطعي لي وانا اعلمش


مرته : بتناوله البطاط والبصل والطماط

امير: اغسلي الدجاج

مرته صفتهن بالماء مرتين

امير: ماقلتلش اغسلي القات قلت اغسلي دجاج نظفيها

مرته: اديلها شامبو؟

امير صاااح وصوته ملان الشقه: شلي دقيق ملح خل افحسيهااا انقعيهاااا سوااا نتفيها هكذااا هكذااا ابسرتي كيف رجعت

بقناتكم. ( طنافس 🎻وروايات🇾🇪 )

https://www.tgoop.com/FkamhSnanee3

السلام عليكم ورحمة الله وبركاته
الاخوه المتابعين الكرام🌻🤏🩵🩷
سيتم روايه ( بين ♥️قلبين ♥️)
الجزء السادس عشر للكاتبه ( عبير الكبسي)

مرته فلتت له الدجاج بضبح:. غسل انت وسارت غرفتها لقيت لبان بخور كان معها في علبه اكلت شويه وجالسه تجرب المكياج الي فوق التسريحه وتتمكيج وتغني
امير مراعي ترجع مثل ماكانت رنا تسير تبكي وتغسل وجهها وترجع تأخرت واصحابه بيتصلوا قدهم في الباب دخل لاعندها وهي بتلبن وتغني وتجرب الرسمات الملونه على عينها ... قرب نفسه يهزر شعرها
امير واقف مش عارف ايش يفعل والباب بيدق غلق عليها وسار يفتح الباب

اصحابه وصلوا وهو مربوش دخلهم للديوان وخرج يتصل بسرعه من الغرفه عندها لمطعم يمني: ياخي ادي كبسه حنيذ اي شي رز ولحم سريع ..

هبه بتمسح المكياج وبتشوفه في المرايه بيتكلم قفت وبتشاوره: وانا اشتي دجاج مشوي

امير غلق وطرح تلفونه فوق التسريحه: صميل مشوي عنتحاسب بعدا خرج وقفل

هبه عوجت فمها واتصلت باخر رقم اتصل له: ها ياولد ادي دجاجه مشويه

امير بيكلمهم ويحسس تلفونه رجع له

هبه بتقرح لبان وواقفه في الطاقه تتفرج

امير : مابتفعلي عندش

هبه: اتبسر خلق الله

امير: هكذا؟
هبه: بثياب صلاه

امير: ووجهش
هبه: مابينوصلش للطاقه ماغر عيوني وبعدا الكهرباء طافيه

امير: ولو مابش عندي انا طيقان وخرجه ودخله

هبه: مافعلك وانا محد قلك اقرب تبسر

امير: بينتحاكى عليش بتفهمي

هبه: وانا اشتي اتبسر مش حرام ولاعيب

امير: انا قلت ممنوع

هبه: مش كل شي على ماتشتي مش انا في المستشفى قلك ممنوع

امير معصب : عندي ناس والله لارجمش من هنا

هبه ضحكت: اتحداك قلك يرجمني ، حرام لايطلعوا لك اخوالي واعمامي يرجموك من الحيد حق بلادنا.. رزع الباب وخرج جالس مع اصحابه وصل العشاء قرب لهم

صاحبه لاحظ عليه متغير وضابح: كيف الزواجه هذه معك شكلها ودافه

امير : كلهن ودافه

صاحبه :مش كلهن لكن احنا ياصاحبي وقت الندم بنقل هكذا، عن نفسي كيف شايفك وحالتك ولبسك وبيتك والطبخ متغير كيف كنت وكيف اصبحت، لعل وعسى تتعلم من الدرس وماتكرره ولا بتجلس عمرك كله بدون زوجه ، انا اكثر واحد عاندت في الدنيا هذه وخسرت كل شي اهل وزوجه واولادي كله بسبب طبعي ماغيرته

امير: ساكت بيسمع ، نفس الكلام الي كان يكلم نفسه وهو بيغسل الدجاج كيف في فرق بحياته.

خرجوا الضيوف دخل لاعندها وهي بتاكل

امير: كيف لوما ادا دجاج وانا ماقلتش استغرتب لما شفتها ناولتش حبن انا معاجل بس الان تفهميني

هبه شافته: فتحت تلفونك واتصلت اخر رقم وطلبت بسيطه ماتحتاج ذكاء

امير: مابتستحيش على نفسش؟

هبه: ماشي والله استحي على نفسك انت ذليتني بدجاجه ها شلها مشتيش منك شي وسارت تراسل ابو امير تشكي له كل شي حصل.

في مكان ثاني وصلوا الشقه ..

خالد: انبسطتي؟

رنا: قوووي كم عجبوني الي تقدم لها وبعدا رقص معها في الشارع عادي هكذا ساع المسلسلات

خالد ضحك انتي ليش محسستني كل شي مسلسلات مسك يدها وجلس يدورها يرقصها : عادي الموضوع عادي

رنا بتضحك كملت جلست: هيا تخيل ياعادي تفعل هكذا في اليمن في البيت

خالد: بس تخيلت جدي واقف

رنا ضحكت: فقدنا لهم قوي

خالد: وانا مش فاقد لحد وانا معش
رنا: بتشم؟
خالد: ايش!
رنا: شم كيك

خالد: مابش شم كيك

رنا بتشم حولها وتمشي خطوتين للطاقه وتشم وترجع للباب

خالد مستغرب بيضحك : قومي افعلي كيك وشمي براحتش

رنا: طيب شافعل

خالد: يامجنونه الساعه١ ليل

رنا: طلع في راسي بساعتي شافعلها

خالد مستغرب: ايش التصنيفه هذه
رنا فعلت الكيكه وجلست تاكلها وتتلذذ

خالد بيجاملها ويمدحها ويأيد كلامها انها رووعه بس بيطعمها عاديه قوي ليش بتبالغ غريبه..

بعد اسبوع خلص خالد اشغاله و رجعوا اليمن
اول ماوصلوا البيت استقبلوهم في الحوش كلهم وسندس و صفيه

رنا بتسلم على جدها: يو ياجد شمك مداعه او رجعت للدخان

جدها استغرب: ولا به اي مداعه حتى جدتش بطلت تمدع

خالد : ماعليكم منها مرضت كورونا وحاسه الشم عندها انضربت جننتني

سندس: احمدي الله رجعت لش انا من حين كنا سوا ولاعد رجعت لي مقطوعه ولابنطعم ولا اشم شي

رنا: مدري ماله خالد والله بينطعم واشم بس بيقل هكذا

امها: ماشاءالله يابنتي كيف امتليتي واحلويتي

خالد: ماشاءالله الكورونا فتحت نفسها للأكل كل شويه وجاوعه وخاوره

رنا شافته تحسست: والله

خالد: انا فارح مالش تعبتيني مراشاه

الجده: هي الحريوه تقع خازيه بعدا بتبان على حقيقتها

رنا: وانتي ياجده كلكم عليا

الجد ضحك: هذا خالد عودش الدلع عتزعلي من كل كلمه

رنا تحسست منهم ليش بيعاملوها هكذا.

صفيه: هيا هيا غدا يووو كان ناقصنا انتو والله رجع روح البيت جبركم وجبر عنادكم هيا غدا

رنا جلست شافت اللحمه بتاكل تضايقت قامت خرجت

خالد: اين عتسيري؟

رنا ماحبت تقلهم غثت وهم بياكلوا: ادي صحن اغرف لي واجي سارت المطبخ كرهت ريحه المطبخ طلعت غرفتها بعدت عن ريحه الاكل الي نازل

راعوا لها شافو تأخرت صفيه خرجت تدورها مابحد هي طلعت لها الغرفه

رنا جالسه في الطاقه بتهوي

صفيه: مالش
رنا : تعب من الطريق غثيت مشتيش اكل الان

صفيه: يو صدق نسيت ان انتي بتغثي في السفر لبعدا وغرفت لش

رنا: تمام

مرت الأيام واسابيع

ام رنا بتكلمها: مالش يابنتي الفتره هذه من حين رجعتي من السفر وانتي وحدش ولابتاكلي معنا ولا بتنزلي تعاوني عيب مايسبرش

رنا بتبكي : يمه انا مقهوره على نفسي ولا قدرت اتحاكى واصارح خالد لايغثى او يغير ماعد اشتي افتح الموضوع الاول

امها باستغراب: اي موضوع؟

رنا: انتي داريه شكل العلاجات الي كنت اشربها لخبطتني قوي واشتي اسير اتعالج بس محرجه من خالد

حاكي سندس وسرتي معها هي بتتابع عند دكتوره للحمل حقها ( امها نفسها تلمح لها تتعالج بس خايفه تجرحها وتذكرها) لعد تكون صدق مابتخلف مثل ماقال امير

رنا: خلاص تمام حاكي عمتي تحاكيه اننا شاسير مع سندس

خالد دق باب الغرفه يشتي يدخل

ام رنا خرجت

خالد دخل وقفل شافها واقفه ومكرشه شويه بيمزح معها : من اكبر كرشتش او كرشتي

رنا شافت بطنها تحسست: يووه شابطل اكل

خالد: اكثر من الي انتي فيه مابتاكليش او غثيتي مني هذك اليوم حين مزحت معش

رنا: مابلا شكلك مرعتني

خالد ضحك: ناهي ياعجوزه مالش يا حبيبي صدق الاحظش متغيره هذه الفتره مغثيش شي؟ حاكيني يمكن مش بقصد او حصل مني شي

رنا: ماشي ياروحي والله مابش منك شي انت ، ( بكيت) بس انا مدري مالي احس الكل مابيحبنيش ولايشتيني

خالد استغرب حضنها: يوووه يوه ايش الكلام هذا من الي مايحبش جدي وامي وابي وخواتي والكل بيجنني ليل نهار ويحلفني لو انا مضايقش وجدي تهددني قوي وغاثي مني

رنا حست بتأنيب ضمير: مش انت السبب انا شاحاكيه،

بعد يومين في العياده..
رنا مع خالد: مابش داعي كنت تجي معي انا قلت لعمتي بس تحاكيك اننا شاسير مع سندس

خالد: وليش ما اجي تشتي افلتش ولاتقليلي بمشاكلش هكذا تحسسيني غريب

رنا: ماشي بس مابش داعي شي بسيط ، ومشتيش اشغلك

خالد: انتي اهم شي عندي قلك تشغليني واجبي اجي معش ولو مشغول افلت الشغل عشانش

رنا حاسه بغصه كم تحملت سنين اهمال وكانت تروح وحدها تتعالج وتحسد كل واحده مع زوجها في عياده النساء وماسك بيدها يطمنها ويدعمها وهي الوحيده بينهن حاسه بخوف ، شافت الي قدامها اليمنيات كلهن مثلها لما كانت مع امير وقليل الي مع ازواجهن مثلها هي وخالد تحسرت عليهن وكانت حاسه بهن كلهن وشعورهن

جا دورها ودخلت مع خالد
الدكتوره بتفعل لها تلفزيون : قد انتي في الاسبوع ال١٤

رنا: انا داريه قلتلش يمكن من الادويه يادكتوره كنت اشرب من قبل واتعالج للحمل

الدكتوره استغربت: ايش من ادويه؟ شربتي وانتي حامل ادويه؟؟ ايش هن

خالد: لا مش هي حامل يعني شربت ادويه قبل

الدكتوره: الان وهي حامل شربت ادويه

رنا: انا حامل

خالد باستغراب: هي حامل؟؟
الدكتوره مستغربه طرحت الجهاز من يدها لفتت بالكرسي لهم: مش عارفه انش حامل؟؟؟ قدش في الشهر الثالث

رنا قامت من فوق السرير جلست بصدمه: ايش ؟ شافت خالد

خالد ابتسم ابتساااامه

الدكتوره رجعت مكتبها وجالسه تسألها وكتبت لها فيتامينات
خرجوا الاثنين وهم مستغربين مصدومين بهدوء طلعوا السياره

رنا جالسه ماسكه بطنها

خالد شافها: جي نسير دكتوره ثانيه

رنا: ايوه شكلها الدكتوره هذه مش فاهمه

في القريه..
ام رنا بتقلق: ليش تأخروا قدلهم من عصر ، قد الساعه١١

الجده : اتصلي اسالي لو به شي خطير ومحد حاكانا

صفيه: يو من فالكم ان شاءالله مابش شي ، يمكن بس زحمه و دورهم متأخر

الجده: مش انتين داريات العلاجات مرض وتدي بلا مابتفهمينش اشربين اعشاب تقهوين وانتين مع

في الطريق

خالد بعد ماخرجوا من عياده ثانيه وفعلت فحص وحامل في الشهر الثالث

جالسه تبكي بفرحه على الاحساس الي هي فيه ، وعلى كل لحظه حست بنقص وشفقه من امير واهله والناس بتبكي بعدد دموعها على لحظات عاشتها

خالد: ذلحين كم شاراعي تتمي تبكي انا ماسك اعصابي بينسوق واصلي على النبي من الفرحه وانتي تبكي

رنا داخل نفسها: انت فرحه يا خالد وانا اضعافك فارحه

سكتت فجأه وذكرت بدلع ومسكنه : وانت بتضحك عليا اننا كرشت وبيناكل خيرات واتشمم كل شي

خالد ذكر كلام الدكتوره لما شرحت له : ممكن تمر بتغيرات نفسيه ضيق انفعالات بكاء حاول تتفهمها هي فتره وتعدي
داخل نفسه اتفهمها وبس واسعدها اذا هي عتتحمل كل الضغوطات هذه وتعب حمل وحدها اقل شي اسويه اننا اتفهمها واخرجها من الي هي فيه..

رنا: خالد بتسمعني؟

خالد: عيون خالد انتي داريه مش انا داري وين انا فارح يارنااا واسف اننا قلتلش هكذا ماكنتش داري انه حمل لو دريت ماتعبتش

رنا: ماتعبتنيش بس قلت اننا كرشت واننا حامل ..بكيت

خالد انصدم: طيب ليش بتبكي؟

رنا: مشتيش ارجع في عينك شوعه مثل ماكنت تضحك عليا وانا صغيره وانا مشعفله

خالد ضحككك كركر بصوت: انا فدالش وفدا الطفله الي ماكبرت بعيني جالسه طفوليه احبش كيف ماكنتي احب روحش قبل كل شي ولو توقعي كيف ماوقعتي

رنا ارتاحت من كلامه: اسفه لو زعلتك

خالد مستغرب ساعه تزعل ساعه تتأسف و داخل نفسه : كيف الغبي ضيع واحده من يده مثلها بهذه البراءه والطيبه

وصلوا البيت..

ام خالد وام رنا واقفات يدخلوا خايفات من اي خبر بيسمعنه

الجده بتمشي ببطء تعرج رجل برجل بتسحبها

الجد خرج: هيا مه قدجو؟

نزلوا من السياره بيشوفوهم واقفين

خالد شافها: كلمتيهم؟

رنا: ماشي وانت؟

خالد: لا كيف لهم مارقدوش؟

رنا : مدري

في الباب

الثنتين في نفس الوقت بيتكلمين: وين انتو لاذلحين ماحصل ؟
الجده: ماقالو فيها؟

خالد شاف جده: قالو ( عبدالرحيم)

جده: مالي ؟ ماهو

صفيه ابتسمت حست من فرحتهم

رنا بكيت بفرحه: واحمه
خالد: السمايه ياجد جهزها

الجد ضحكك: ماشاءالله تبارك الله

الجده: يوه لك الحمد يارب
امهاتهم جالسات يبكين معها

خالد:هيا ناهي قلت عتعقلنها وان انتين عتبكين مرتي

صفيه حضنتها: مبروك ياقلبي

ثاني يوم الصبح..

رنا واقفه في المطبخ: يمه

ام رنا: مال روحي

رنا : خاوره الملوح حق خالتي نبيله( جارتهم في الحاره)

ام خالد:, شاسير احاكيها تفعلش ذاحين

ام رنا مسكت ام خالد: يو بغير جنان خزا، عنفعلها احنا

رنا: خلاص مشتيش

ام خالد طلعت من درجه المطبخ: والله شاسير احاكيها مافيها

ام رنا: كان ها شلي معش طحين وسمن

بعد دقايق سارت عندها وفي ثنتين من الحاره

نبيله: يوو رنا واحمه ماشاءالله من عيني ذلحين افعلها

ام خالد ناولتها الدقيق: ها شليهن وفيهن فوق حقش

نبيله: يو ياعيبتش ياسعم مابش معنا ، رديهن بس

الثنتين بيتفرجين بعض استأذنينهن و سارين لاعند ام هبه( زوجه امير)

ام هبه : قلدكن الله واحمه؟ اسكه اين تلفوني يابنتي اديه اتصل لاختش

بعد مارن التلفون مرتين

امها: يو او راقده؟

هبه: ايوه مالكم؟ خير او به شي

امها: ليش راقده لذلحين او واحمه

هبه: ماناش واحمه من قال؟

امها: ليش ماقد وحمتيش؟ هيا لو تبسري من هي واحمه؟

هبه: من؟
امها: رنا طليقه زوجش

هبه بصدمه قامت وجلست. : كيف وقالو مابتخلفش؟

امها بعصبيه وصياح: هيا سيري ابسري ليش ماوحمتيش ،مع السلامه.

هبه قفلت وشافته راقد : اميررر

امير نكز: مالش؟

هبه: قوم اشتي احاكيك

امير خاف لو في شي جلس: امي ابي ؟ ماهو ماحصل حد وقع به شي

هبه: ليش مرتك الاولى ماكانت توحم

امير: مدري من الله

هبه : انا اشتي اسير عند دكتوره

امير: قلتلش مشتيش جهال

هبه : مش هو على ماتشتي ، وانا اشتي جهال وامي شرطت اسير ولا اسير للدكتوره قد بتصيح ولا عتتبرى مني

امير خاف تعرف وتفلته مثل رنا وتذكر كلام ابوه حذره وأكد عليه يصارحها

هبه: هيا ذلحين اخطى

امير : ولو المشكله مني عتفلتيني وترجعي بيتكم؟

هبه شافته بنظره: يعني المشكله فيك؟
امير بربشه: ماشي مدري بس بينقلش

هبه: اسمع يابن الناس من اللف والدوران حقك انت واختك ، طليقتك واحمه وامي بتجنن ليش ماوحمتش صارحني تحاكى لاتخلينيش اقلق على روحي

امير: تمام قلتلش لو فيني المشكله عتفلتيني ساعها وتسيري؟

هبه: يعني كنت داري؟ وخبيت

امير: ماكنت متأكد ولا صدقتها وانا . يلا عادي تشتي تخطي سيري بعدها

هبه تعاطفت معه: اسمع ماشسيرش ساعها بس معي شروط
لو نفذتهن شاجلس

امير: ايش؟

هبه: تعمر لي بيت بأسمي ونتبنى جاهل

امير: اتبنى جاهل بعقلش انتي

هبه: ايوه مافيها ، نفسي في جاهل وانا

امير: ماتخيلش اربي ابن حد

هبه: حرام عليك عنربي واحد يتيم مابش معه حد ، خلاص اصرف عليه وانا شاربيه ، من حقي اوقع أم بس ماشوقعش انانيه مثلك رضيت انحرم من هذا الشي لكن من حقي انك تتنازل وتوافق

أمير جالس محتار

هبه:ومش بس هذا ، طبيعتك هذه تغيرها لاتجلس تتقارح على كل شي

امير: انتي مابتفهميش اقلش مايعجبني حد يجي هنا وابسرش تعاندي امس وتعزمي نسوان العماره

هبه: ماشجلس افعل انقي رز وانت مابحد؟ ايوه شاعزم بيتي او بيت الحارس

امير: قلتلش مابش دخله وخرجه مابتفهميش

هبه: مابينفهمش انت داري ، طليقتك مافلتتكش حين مابتخلفش مابلا كانت تقل على ايش تصبر يعني لا بتتعامل مع واحد ساع الناس عصبيه وجنان واصل وانت بتحرق الدنيا وتحكام و أوامر ، ياااي انت تزوجتني ماشتريتني عندك ميداليه

امير: وانتي لسانش لسان مترين

هبه: هذا طبعي عجبك ماشي قلي انقلع

امير: عتذليني ذلحين

هبه: هاااا كان نفس العذر قلتلها حين حنقت قلت فلتتك وهربت حين دريت مافيها المشكله

امير: ماقد ابسرت واحده تتفق مع واحده كانت قبلها الا انتي ليش هكذا قلبتي عليا

هبه: انا ماشكذبش بينقل الصدق ، هو انت الي بتحمل اغلاطك للناس، تشتي تغلطها وانت الغلطان

امير: ماعليش منها ذلحين بينحاكيش ليش تعزمي امس نسوان

هبه : اسمع هذا اخر كلام عندي اشياء بالعقل مالك حق تمنعني ماعتحبسني ، خرجه وباذنك وجيه نسوان باذنك ، اشتي اتبنى جاهل حين ارجع اليمن، اخلاقك وعصبيتك ورفعه صوتك تغيرها تعصب اخرج من قبالي ماشتحملش عصبيتك وتمرضني ارجع وقت ماتعقل ويرجع عقلك طبيعي وتأمن لي حاجه للعمر طالما ومابش معي جاهل

أمير ساكت قام لبس وخرج

هبه طنشته وقامت بتكلم نفسها : سبحان الله انا مره غريبه اول واحده ماتغثاش انها ماتكون ام سبحان من خلاني نصيبه قدو اخبر الباري اني مابش في حسي من الجهال قوي، لكن شاربي جاهل افعل خير في دنيتي وهو لعل وعسى يتغير ويعقل حين يقع أب ، رسلت لأمه واحلام تقلهم الي حصل كله وتعاتبهن ليش كذبين عليها وخبين.

في اليمن بعد ماغلقت من اتصال هبه

احلام: ابسري على محانكه وحمت امد تحانك اخي وتقهر قلبه وصل الخبر لاعند مرت اخي واحنا جنبهم ولا درينا

امها: حسبنا الله ونعم الوكيل

احلام: والله العظيم مادام قدي هكذا بوجهها وبتتملعن انا العن منها لاندمها واخليها تنحرم ساع ماقهرت قلب اخي ومرته ، انا شاوريش فيها.

بيت الجد..
خالد شاف سندس: ذلحين انتي وياها مالكن؟ نسيتين انكن مزوجات رجعتين في غرفه ايام الطفوله؟ مالش ماترجعي بيت زوجش قدلش اسبوعين تسيري يوم وتجي شهر

سندس: ليش شكالك؟ ولا فاقد لي؟

خالد: او متقالعين؟

سندس : ماشي بس بيتي كله اشتي اغيره فيه ياخالد شم سم

خالد مبهرر: ايش من سم؟ انا امس هانك ولا به شي

ام خالد: يابني اختك معيفه زوجها

خالد: ليش جننتنا بتحبه وهو بيحبها كيف عيفته ، هذه رنا واحمه وماعيفتني

ام خالد لفتت لرنا وضحكت

جالسين في المطعم
خالد شاف كرم: مالك؟
كرم : مابش نفس
خالد: ليش؟
كرم: ياخي حياتي ضبح ممله بدون اختك

خالد: وانا مثلك والله بس انت داري مامعنا غير نتحمل وهن الله يعينهن على الي هن فيه اليوم جالس اقالع سندس امد مرتي تحس على نفسها وان امي فهمتني انهن معيفات شي مش بيدهن ياخي الله يعينهن على الي هن فيه

كرم رفع حاجبه: هاا يعني هي عيافه، الحمدلله قد كنت اقل كرهتني تغيرت عليا

خالد: وانا مثلك بس باقي شهر ويعين الله ، انا تعبت سيره جيه لصنعاء وتعب مواصلات وطريق اشتي استقر العمل كله هنا قررت استأجر بيت وافرشه وانقل

كرم فرح: اهلا وسهلا اعتبر الشقه حقك جاهزه

خالد: ماشي اشتي قريب جنب العمل

كرم: ياخي بدل الدوار معنا شقق شاجرها لك

خالد: ابدا ، قلتلك اشتي جنب عملي

كرم: تمام عنيد اعرفك، هيا تميت قم اخطى نبسر

في بيت الجد

الجد جالس يقطف لهن رمان والجده تفتحهن للصحن : انتين حق الايام هذه فيكن دلع، احنا كنا نعيف ونفعل كل شي امكن كانين يعيفين ويدخلين المطبخ ملثمات

سندس: يعني ياجده ماكنتي ترحميهن

جدتها صاحت: قلعو عينش بينقلش كلنا هكذا ، اختش صفيه عيفت ولاحد سمع لها حس ، وانتين زيدتين بها تحملين شويه مايقع بكن

سندس لفتت لرنا بمشاوره: والله ماعد انا داريه نصدق نصايحهم او ماشي

رنا ضحكت: نجرب مارأيش
سندس: يعني تشتيني ياجده ارجع ضبحتو مني

جدتها: ابسري انا لمصلحتش زوجش قد تفهم ثلاثه شهر خلاص لاتزيدي بها ايضبح وبعدا العيافه تتم

سندس بتاكل الرمان: والخورات نتخور ولا خلاص يكفي

رنا بتضحك

سندس شافتها ضحكت

جدتها : اللقانه ماشاءالله

الباب دق الجد فتح وشل الصحن من يد واحد في الحاره
الولد: هذا ادوه لكم خوره.. وهرب

الجده: من؟

الجد: مدري. قع لهن خوره مدري من اداه
قامين الثنتين شافين
سندس:ملوح بعسل ماشتيش اشتي لبن فحه

رنا قسمت واكلت: يووه انا يعجبني قوووي حق خاله نبيله اطعميه ياسندس

سندس: مشتيش

رنا : طزفيش شاكله انا

الجده مابتسمعش: مابتاكلين؟

رنا بتاكل قربت وطرحت الصحن قدام جدتها: اطعمي ياجده دافيات وعسل بلدي

الجده لطمت على وجهها: واكلتي منه؟

رنا ردت الخبزه الي في يدها من فمها: ليش ماله؟ بتشوف لو فيها شعره. او شي

الجده: خافت تقلها يدخل نفسها وتتأثر

سندس: ماله؟

الجده: ولاشي ادين الصحن هذا ، اصلا كيف تأكلين من ناس مادرانا منهم

رنا: اكيد خاله نبيله هي الوحيده داريه اننا خاوره ملوح اصلا هذا صحنها

الجد: وانتي بطلي وسوسه مافيها ياكلين سهل يهنى قلبهن ، كلين قلين بسم الله

ام خالد خرجت من المطبخ وجت: مالكم ، وهذا من اداه نبيله

ام خالد : يوه يوه ليش هكذا سكبت دبه العسل كلها بتشم العسل لاعندها( يوه كيف بيفحط قارح) وبلدي

كثر خيرها امانه طلبتها مره وكيف شغلت نفسها شافت رنا : او انتين الي اكلتين منه.

الجده بتبهرر لها تسكت
سندس : ماااشي يع اي شي مسكر بيغثيني ، مش انا داريه كيف بتاكل الحالي رنا

رنا:قوي بينخور اي شي حالي
الجده: انتي معش ولد وهي بنت
سندس: يوه ماشي انا اشتي بنت
رنا: سهل عيوقعو كلهم عيالنا ايش مادا الله اهم شي ربي رزقنا اي شي يجي من الله له الحمد والشكر

ام خالد مطننه بتفكر كيف نبيله اكثر واحده تفهم وتنصحهن لو واحده واحمه او على وشك ولاده ايش تاكل وايش ماتاكل تفعل عسل لرنا وهي داريه انها واحمه حلفت ماتخلي في خاطرها من نبيله وتسير تعاتبها

باب بيتها جالسه بتصيح فوق عيال الحاره يسيرو يلعبو بعيد

ام خالد : مابتفعلي هنا

نبيله: كسروا راسي يختي مرتين كانت الطاقه عتكتسر ، وانتي ماخرجتي تفعلي هذا الساع قدو ظهر ماعدوش وقت لوي
ام خالد: الصدق انا جيت اشكرش كثر خيرش حين ميزتي مرت ابني وبنتي وخورتيهن لكن مستغربه الصدق وقلت والله لاجي احاكيش انتي داريه انهن واحمات تقومي تسكبي عسل بلدي ملان الخبز الله يسامحش

نبيله ضربت ع صدرها: قسما بالله مافعلت نقطه عسل صلي على النبي مابش معي بلدي ادخلي فتشي مطبخي ودولابي لالقيتي قطره عسل ، بيتخايلش الظاهر هن

ام خالد: ماشي والله ماهن هن وصل هكذا قد سألتهن جي ابسري بعينش
نبيله: هيا راعي والله لابسر ماهو الجنان هذا لبست الستاره حقها ورفعت لثمتها الي كانت لابستها وخرجت وقفلت الباب

وصلت بيت الجد وشافت الصحن والخبزه مأكول منها ربعها وكلها ملان عسل: اكلتيها وفيها العسل؟

رنا: ايوه
نبيله شافت ام خالد وخرجت تداعي الولد الي بينفعها :جي يابطل انا حين ناولتك الصحن سرت بيتكم؟ او جيت لهنا على طول؟

الولد: انا كنت بينتضارب مع عماد(ابن احلام) وهي دعتني بقصتني في اذني وبعدا قالت لي اين عتسير قلت هذه خاله( اشر بيت نبيله) قالت امكن هذا البيت( بيت الجد) اقلهم هذه خوره الواحمات

نبيله ايوه كمل وبتشوف ام خالد ماسكه صابرها بتسمع

الولد: وبعدا هي شلت الصحن وقالت راعي ليش مافعلو عسل شافعل واناولك تدي لهم وانا اديته

نبيله بضبح ماراعت يتم كلامه جريت بتمشي لابيت اهل احلام
ام خالد لحقتها بتمشي معها دخلين الحوش وثلاث نسوان من الحاره شافين بيمشين بسرعه وبيدقدقين الباب بقوه ودخلين جالهن فضول لحقين يعرفين ايش في

ام احلام فتحت باب البيت وهن في الحوش: ماشاءالله قدلش شهور مادعستي بيتي ولا اتصال ولا عزيتيني في عمي ولا فرحتي لابني في عرسه وذاحين جايه تحانكي عتبشرينا مرت ابنش واحمه

ام احلام فتحت باب البيت وهن في الحوش: ماشاءالله قدلش شهور مادعستي بيتي ولا اتصال ولا عزيتيني في عمي ولا فرحتي لابني في عرسه وذاحين جايه تحانكي عتبشرينا مرت ابنش واحمه وتقلي هيا ابسرتو العيب في من انا داريه بكن

نبيله: استغفر الله العلي العظيم ولاحول ولاقوه الا بالله ، والله مستحيه منش يا ام امير اكبر مني ولا كنت شاقلش كلمتين

ام خالد: ولاتقلي شي على قدر نواياهم و ظنونهم بيوقع بهم. ربي بيجاوب انا ولا شاقل شي مسلمين امرنا لله ، لكن لو ماقدو فعل ماشسكتش والله لاسمع بش الحاره انتي وبنتش الحقوده

احلام فتحت الباب خرجت: هذك زمان حين كنت اقلش خاله شاحترمش واسكت لاقلتي هكذا، لكن ماذاحين والله ما حقودين الا انتو ماتشتو مننا قد الزايد عندكم

نبيله: ليش تفعلي عسل فوق الخبز؟ الي فعلته انا وبلدي ياكريمه يابنت الكرماء

احلام بتتلفت بصدمه لامها ولهن: انااا ؟ افعلها عسل وبلدي ..ضحكت ليش ! مارقدت من همها اوبه لها ولا ياسعم عادهي مرت اخي

ام خالد بتتفرج لها بنص عين على وقاحتها ورده فعلها الي فيها خوف : هذه ابسرتش واحده من الحاره عتنكري ، وابسرتش ام رنا بعينها

ام احلام شافت لها؟ : انتي الي سكبتي القاروره حق العسل وقلتلش من قلتي بنتش طعفرتها !!!!

احلام بتبهرر لها قدامهن: يمه مادخلنا هذك ثاني

نبيله ناولت ام احلام الخبز: ابسري هذا عسلكم؟

احلام شافت امها بتشم وشافتها دخلت

ام احلام انحرجت منهن: ادخلين ماعنتفاضحش قبال النسوان وهولك من هن؟ اديتين الحاره تبدعين بنا

نبيله وام خالد لفتين يشوفين نسوان واقفات خرجين اول ماسمعين ام احلام

ام خالد: والله مابدعتو بنفسكم الا انتو ، تبدعوا معد حد بيحاكيكم لمن تضرونا ماشي كم قد تحاكيتي ومطنشه احنا بالقانون بنخطى ابنش تعدى على ابني وتربى بشكوى في القسم وذلحين بنتش لايتخايلش انهي بنت ماعنسحبهاش للاقسام والله لابهذلها

نبيله مسكت يد ام خالد: اول اشتي ادرا ليش مافي نفسها

ام احلام جلست طرف الدرج بكيت: مانا ماعد دريت مافعل اتعبوني والله هي واخوها

نبيله : عادش كنتي بتبهذليها المسكينه وهي ساكته لش ( قصدها ام خالد) ليش ماذلحين حين فيها قسم عتبكي

ام احلام: مش انا خايفه من القسم ، اوقات ادافع عليهم بحجه انهم جهالي وانا ام مسخاش، بس عمايلهم ترجع تخليني اقلب عليهم واندم على اليوم الي خلفتهم فيه، اسكه ياخواتي قلين لي مافعل في الابتلاء الي انا فيه مافعل

ام خالد مسكت يد ام احلام: انتي داريه ماهو ، والله ماهو ابتلاء ولاشي حاشا لله يفعل هكذا ، انتي السبب احلام بنتش نسخه منش لكن عاد فيش انتي اثنين في الميه ضمير ماهي ولاشي حقوده ياساتر قليلها تنظف قلبها

ياساتر قليلها تنظف قلبها عشان تعيش لا زوج سبر ولا جهال يشتوها وعتكبر ماتلقى حد جنبها، ماخلت لها عدو ولا صديق، بنتي ومرت ابني لو وقع بهن شي قسما بالله لاشتكي عليكم وحسبي الله ونعم الوكيل فيكم وفي جورتكم

وصلين باب البيت
خالد عادو وصل: اين كنتي يمه؟
ام خالد بضبح وقهر وصدمه ماتوقعتها من احلام كيف تسخى تضر رنا دخلت ماتشتي ترد ولاتتكلم
خالد: يمه مالش؟

امه: ولاشي يامي انا الا جيت من عند واحده وغاثيه عليها