خالد : عتقدري تقنعي جدي وابي انحنا نسير صنعاء انا و رنا الصدق تعبت ومواصلات تعبت مساربه بينجلس لاخر الليل في المحطه واحيانا ارجع ثاني يوم لاعد بينبسركم ولا ابسر مرتي عمل ومساربه وانا مقدرش اجلس هنا بدون عمل

امه عشان تبعدهم من حسد الي في الحاره: سيرو الله معاكم حتى ذلحين يابني وانا الان ادخل لاعند جدك واعرف الا يوافق سير حاكي مرتك تتجهز وشل اختك لزوجها زيدت باللعب والمجهاله تعيف عنده والله معاكم

خالد استغرب مال امه هكذا ضابحه منهم كلهم وتشتي تطيرهم طلع لاعند رنا : تجهزي هيا لفي الثياب كلهن الي تحتاجيهن وشويه قلافد عنحتاجهن هانك

رنا:اين هانك

خالد : عنستقر في صنعاء معي عمل

رنا طنشته لمده ثوان حست بمغص وبعدين كملت كلامها : ها

خالد :بس مدري ليش امي ماصدقت تقلعنا ماتشتي حد غثيت والله

رنا: عمتي ؟؟ تقلعنا من وين بعقلك انت ! الظاهر مابلا غثيت منك

خالد: ماغثيتش والله بتقل سير وشل اختك تبطل المجهاله وتعيف عند زوجها سير وشاكلم جدك، اسلوبها غريب ، يعني قبل اربعه ايام وهي فارحه تذكري حين قالت اتغربنا انا وانتي ورجعنا وانهي فارحه قوي ومانفلتهم وو

رنا : ايوه صح ، يعني يمكن غاثيه منك ، عمتي مستحيل تقلعنا لاتقلش هكذا لها عتغثى عيب مافهمتهاش سوا... اوووف ايش هذا مسكت بطنها ( شكلي استبردت)

خالد قام من فوق السرير جلس بيشوفها بتتمغوص: طيب امتدي تدفي هااا ( سحب البطانيه) شانزل اديلش قربه دافيه واجي

في غرفه جدته: اين القربه رنا مستبرده
جدته افتجعت: يو ؟ او بتتمغوص ؟

خالد خاف: ايوه ليش عيحصل لها شي او كيف؟

جدته: مايفعلوش قربه ماشي اوبه راعي شاطلع

خالد: لا تعب عليش شاقلها تنزل لاعندش

جدته: لاعد تخليها تتحرك اقلك ادعي امك بس ، خليها تفور لها
خالد خاف اكثر كلم امه وقالت له يشلها عند دكتورتها افضل بطل

ام رنا جت بعد ماحكت لها ام خالد وبكيت بتمسح وجهها:ماعد تشرب شي قوا خلو لبنتي حالها تسير المستشفى شلها ياخالد للدكتوره احسن

سندس منصدمه لما سمعت امها الي حصل طلعت بس امها قالت لاتكلم رنا مع الشك والوسوسه والزعل يأثر عليها : رنا مالش او تاعبه

رنا: ماشي بس فيني مغص شويه شكلي استبردت في الحوش
سندس: وبعدا طبيعي ابسرتي ماقالت الدكتوره يوقع مغص اول اربعه شهور

رنا: قد افتهنت اول شويه ذلحين احسن قامت وعطفت البطانيه: ذلحين ماجهز؟

سندس منصدمه بتشوفها كانت خايفه عليها: ماتجهزي؟ مالش!

رنا: هيا وانتي جهزي اداتش خالد عينقل صنعاء معه عمل وقال اجهز الشنط

سندس: طيب كنتي ممغوصه افتهني

رنا: افتهنت والله ، تقلي اشل هذا ؟

سندس: شليه احتياط
رنا: وهذا؟
سندس: مدري اظن مابش داعي

رنا: طيب هولا كلهن ايوه

سندس: يلا وانا اسير الفلف ثيابي المصبنه ياهمتاه حين ارجع البيت يف من شمه

خالد فتح الغرفه وقدامه ثلاث شنط في الارض بتعطف وتطرح فيهن الاشياء صاح: مسرررع مقطوبه عاد انتي كنتي تاعبه؟ قومي البسي نسير المستشفى

رنا: مع الحمدلله ياقلبي افتهنت ، جي اجلس قلي ايش تحتاج معك قلافد خيرات

خالد واقف: رنا مش وقت التجهيز جي نسير المستشفى

رنا ضبحت: يخ ماعد اشتيش اسمع كلمه مستشفى انا بخيره والله مافيني شي ماشسيرش هيا لو سمحت اجلس نكمل نجهز

خالد معصب شويه: ايش من تجهيز وين حسش وانا بينقلق عليش

رنا مستغربه: تقلق من ايش؟ قد بينقلك بنفسي بخير ياخالد نخطى مسافه ونرجع امد قلق مبالغ به بس امانه دلع اجلس هيا

خالد بضبح: ماعتخطيش؟
رنا: لو تعبت نخطى بس ذلحين ماسير افعل

خالد : خلاص اجلسي بعنادش هذا جهزي وحدش ،خرج وقفل الباب جالس في الدرج ضابح من عنادها ومش ساخي يفلت وينزل خايف عليها

رنا داخل نفسها: قد انا راحمه له سيره رجعه وذلحين على شويه مغص عيحلقها مثل الهنود، انا فدالك ياخالد انا عارفه انك خايف بس ماسخاش تتعب هذه الطريق كلها على مغص وقالت الدكتوره طبيعي بيحصل مغص في الشهور الاولى ومابش فيني شي ( بتكلم نفسها ومتفائله وفارحه وبتتخيل جا لها احساس شويه خوف بس رجعت تقول قد ربي سخره لي بعد الوقت هذا كله الحمل هذا يعني ربي كتب لي ابطل بعسسه وخوف ماعيقع الا كل خير)

بعد انتظار نص ساعه دخل الغرفه بيشوفها بنظرات زعل
رنا بتشوفه وهي بتعطف الثياب وتبتسم له وترجع تشل ثياب وتعطفهن

خالد معصب من عنادها بينهم تحدي نظرات

رنا ماسكه بطنها بتجابر النونو: بابا زاعل مننا ، لاني ماسخاش عليه يتعب ويسير ويجي

خالد اول ماسمع كلمه بابا ابتسم : كيف انتي ذلحين؟

رنا قربت وماسكه يده : بخيييير والله قلتلك بخيرررر يعني شارضى اشوف خطر على نفسي واعاند بعقلك!

خالد بضبح منها مسك يدها وقحصها: بس معانده
رنا ضحكت وبتسحب يدها وتصيح رجعت شلت يده قحصتها

سندس خافت سمعت صوتها دخلت وهم بيتسافطو: الله يقلعكم فجعتيني ياكلبه ليش بتصيحي

سندس خافت سمعت صوتها دخلت وهم بيتسافطو: الله يقلعكم فجعتيني ياكلبه ليش بتصيحي

رنا: ابسري يدي هااا كيف قحصها والله لاسير اوري جدي قامت ومشيت

خالد يضحك ويحانكها رافع صوته يسمعها: معش لبكره تكوني تسيري تحارشي بعدا ولامعش مخلوق

الجد جالس بيسبح ويستغفر

رنا جلست جنبه بدلع: ياجد ابسر خالد كيف قحصني

خالد لحقها بيضحك: منش صدق سرتي تحارشي ، مجنونه

الجد دعاه لاعنده : جي اجلس

خالد جلس جنبه: ذلحين وافقت نخطى؟

الجد: ايوه سيرو الله معك يابني مشتيش اعسرها عليك

خالد: ماعنفلتكم طبعا اي يوم اجازه او بترول متوفر عتبسرونا هنا

رنا بتحانكه : ياجد بيغالطك وانت تصدق
الجد سحب يده وقحصها

خالد متتتتحمل القحصه: ماشاءالله الاجداد تناكعين اسنانهم وانت حجار

الجد فلته: كنا نتغذا سوا مش اندومي ومشروب طاقه وببسي ودخان وبلا هلكتوا اعماركم

بعد ساعات وصلوا صنعاء
كرم قد خلا شغالتهم تسير تنظف شقه خالد وتفرش الفراشات الي شلهن خالد

وصلوا خالد و رنا وسندس
سندس: يوو البيت فاضي جو عندنا
خالد: اهم شي موكيت وفرشين امد لبكره اشتي رنا تختار كل شي هي ولا كنت شاختار
سندس: هاا سوا ماهكذا ، طيب جو عندنا

خالد بهرر لها: هيا عيب كرم مراعي

نزل معها للسياره : زوجش قد دلعش خيرات عيب، وبعدا بطلي تحسسيه عيافتش والله ان رنا عيفتني ولا حسيت الا امي حاكتني ، احنا بنتفهم وانتين والكل قدرين التفهم هذا لاتزيدين بها دلع

سندس: ناهي حين هو صاحبك بتدافع عليه

خالد: والله عشان الي يسبر والي مايسبر وانتي اختي. هو اخ وصاحب

سندس: حاضر
رنا فتحت لخالد رجع لاعندها

خالد قفل الباب وبيشوف: ماقد اتصلت اشكر كرم ، كيف رجعت الشقه كانت وسخه قوي
رنا: بس مرنجه جديده

خالد: ايوه بس ماناش داري ليش العمال يجو يوسخوها قات في كل بقعه وقوارير وقراطيس ، كيف الموكيت اعجبش؟

رنا: ذوقك طبعا ماعد بش بعده نقاش عجبني
خالد فرح اكثر بكلامها: سامحيني هكذا فتره شويه نأثث على حاجه حاجه كل ماوقعت لي زلط اهم شي الاساسيات شليتهن

في مكان ثاني
ام احلام دخلت وهي بترقد بنتها: كيف عيهنالش نوم وانتي كنتي عتفعلي مصيبه

احلام: ساع ماهم بيهنالهم نوم

امها: يابنتي اتقي الله معش بنات عيقع بهن كل شي بتفعليه ماعد معش الا تيه البنيه عندش قد كل جهالش فلتوش وسارو عند ابوهم من طبيعتش


بقناتكم. ( طنافس 🎻وروايات🇾🇪 )

https://www.tgoop.com/FkamhSnanee3

💢لكل من يصله هذا المنشور

فرج الله همك وقضى دينك
وأسعدك الله في الدنيا والآخرة ‏
وحقق أمنياتك ورزقك الخير الوفير 🤲

@ALFkamah

السلام عليكم ورحمة الله وبركاته
الاخوه المتابعين الكرام🌻🤏🩵🩷

✿سيتم انزال الجزء الاخير والنهاية
من روايه ( بين ♥️قلبين ♥️)
للراويه والكاتبه ( عبير الكبسي)

بقناتكم. ( طنافس 🎻وروايات🇾🇪 )

https://www.tgoop.com/FkamhSnanee3

السلام عليكم ورحمة الله وبركاته
الاخوه المتابعين الكرام🌻🤏🩵🩷

💢 روايه ( بين ♥️قلبين ♥️)
الجزء الاخير. والنهاااااااايه
للكاتبه ( عبير الكبسي)


النهااااااااااااااااااااااايه:

احلام: يفلتوووني مشتيهمش وهذه يشلوها والكل بينتعب واكبر ويجي يشلهم ، كل اسبوع يرسل لي عماد يجي يدي كلام بيعلموه امد مايقرح قلبي ويرجع يجي له

امها: ابنش بيجي لانه صغير عادو يشتيش ليش بتفكري هكذا، الجاهل يكلم امه بكل شي ماعيحانكش ولد صغير

احلام صاحت: انتو هكذا كلكم مغلطني دائماً في كل شي في كل شي ماشتيش حد يلا ها مشتيش. .دهفت بنتها ودخلت وقفلت باب الغرفه

امها بكيت شلت بنتها الغرفه ورجعت تصيح: اخوش بيتمنى جاهل وانتي هكذا بتفعلي بالنعمه الي رزقش الله، حرام عليش بنتش تسمعش هكذا، والله لاتصل لابوها يجي لها

احلام: اتصلي يشلهم كلهم مشتيش حد

في مكان ثاني عند ابنها...

هبه: امير اشتي ارجع اليمن

امير: مسررررع ماتميناش سنه

هبه: قد لقيت البنت الي عنربيها

امير: بس عادو يشتي لنا معامله وجنان

هبه بنظره تشكيك في موافقته: اميررر
امير. : ماهو امير مالش بينقلش ذلحين ماقدرش

هبه: وانا لقيت البنت واشتيها ولا اشتيها

امير: ليش ياسعم مابلا هي

هبه: امها ماتت وهي بتولد وابوها قالو له فتره من ايام الحرب مش داريين اين هو استشهد او مات او اسير ، ومابش معهم حد جالسه بيت خالتي

امير: خالتش تنتبه لها

هبه: ماعتنتبه لها قدي كبيره في السن ، انا شاجهز نفسي وشلني وارجع لو معك عمل

امير بعصبيه بيصيح: شلني ياسعم اني شاشلش للحاره الثانيه انتي مستوعبه

هبه: تصرف

امير : لاحول ولاقوه الا بالله

هبه صاحت: قلتلك بطل صياح ، ليش بتصيح تحاكى بصوت واطي

امير شافها منصدم صوتها عالي: مالش بتتحاكي هكذا

هبه: جرب اسمع صوتك كيف مزعج ، عشان تفهم ليش قلتلك بطل صياح شاتحاكى مثلك بالضبط

امير: انتي مجنونه

هبه: والبركه فيك جيتلك بعقلي

امير: لسانش شبر ونص يشتي له قص

هبه: جرب حد المقص اول في لسانك

امير خرج وقفل الباب

هبه قامت تكمل تجهز نفسها بكل ثقه انها باتمشي كلامها عليه وتسافر.

امير خرج والتقى بصاحبه وبيكلمه

صاحبه نصحه واداله كلام مقنع يوافق على كلام مرته وطلبه يجهز له امور السفر ويمسك شغله امد


في اليمن بيت اهل امير...

احلام في غرفتها جالسه فاتحه التلفون صفحه الفيسبوك لقيت واحده بتحل مشكله واحده كتبت لها شكوى جربت تكتب لها رسالتها :( ليش انا حياتي خاربه كنت احب ابن جيراننا واشتي يخطبني وانصدمت فلتني وسافر بعد ماكانت امه تشتيني ، وتقدم لي واحد وافقت حناك فيه وطلع مش سوا طلع عيني وتزوج فوقي ، مرت اخي تدلعت وعاشت حياه تمنيتها وفي الاخير فلتت اخي ورجعت تزوجت بالشخص الي كنت اشتيه واحبه وجالسه تصلح لها الحياه بعد ماعاشتها بالطول والعرض، وانا الان وصلت لمرحله مش طايقه عيالي ولا نصايح اهلي ولا نفسي

الاستشاريه الأسريه: ابدأي صلحي داخلس عشان ينعكس للخارج، رتبي أفكارش نواياش نظرتش للي حولش واعرفي الأسباب الي خلت حياتش توصل لهذه التعقيدات، ولاتنسي ماتكوني صريحه مع نفسش وواجهيها بصدق، لاتعيشي دور الضحيه وتبرري لنفسش ،اتقبلي ان كل شي في الحياه بيتغير

احلام: كيف يعني بهذه البساطه بتتكلمي هكذا؟ يعني انظلمت من حبيب وتركني

الاستشاريه: وعدش بفمه؟
احلام: لا بس امه قالت وبعدها سافر وخلاص

الاستشاريه: يبقى كان لازم وقتها تقولي خلاص انتي كمان ماتتعلقي بشي عابر ماحصل نصيب وتكبريه داخل نفسش السنين هذه كلها

احلام: طيب زوجي الي باعني بسهوله وتخلى عني مشاكل من اولها واصل وفي الاخير تزوج

الاستشاريه: كان لازم تصلحيهل اول باول ولو شفتي الطريق مسدود توصلوا بحل للتراضي مش تأثروا على نفسيه الأطفال يعني الأفضل في حاله انش مش قادره تعيشي مع الشخص وعيالش عيتضرروا تتفقوا انه ماننفع نكمل ننفصل باحترام عشان نفسيه الاطفال لايتعقدو ويكرهونا ويضيعوا بين مشاكلنا

احلام: خلاص حتى هم راحو ايش فايده الان لهذا كله
الاستشاريه: في فايده طالما ادركتي ان في غلط وانش ماشيه طريق خارب تغيري ابدأي من داخلش سامحي الي ظلموش وتخلصي من احساس و دور الضحيه وابدأي طوري من نفسش اشتغلي على شخصيتش الشي الي مكره الناس فيش مبعدهم منش ايش اكتشفيه! شوفي اكتبي بورقه كل شي كوني صريحه مع نفسش واخرجي من دوامه الماضي

احلام فكرت في كلامها: ينفع اكون ارجعلش لو صعب عليا شي

الاستشاريه: اكيد لو ناويه تتغيري وعندش اراده

احلام جلست تفكر اول شي: ليش تغيرين سندس وصفيه و رنا عليا وكنا صاحبات وبدات تتذكر افعالها معهن ، بدأت تتذكر ليش زوجها بطل يراجعها كل ماتحنق لانها زيدت بها واصل حنقات ،وزعل على اتفه شي نصايح بنات خالها خربت حياتها لما كانين يقلين لها عوديه تدلعي عليه خليه خاتم في اصبعش يوو راقد مخزن مش موظف يووه ليش قابله هكذا فلتيه ولا واحده قالت لها ونصحتها كيف تغيره او توصل معه لحل بدات فعلا تفكر وتعرف اسباب كانت متجاهلتها لانها بتبرر

لنفسها كل شي وتحس انها مظلومه..

بعد المغرب في بيتهم وصل خالد من الشغل وجالس بيشتغل في الورق
رنا : ياخالد
خالد: ها حبيبي
رنا: في واحده في العماره نزلت تعرفت عليا اليوم الصبح ، وعزمتني بكره اسير بيتهم معهم ولاد مرت اخوها

خالد: تمام سيري

رنا فرحت وافق لها بسرعه: لو تبسر كيف هي طيبه قوي وجلست تشتي تعاوني حين شافت بينرفع الكراتين لخارج

خالد: انتي الي طيبه ، والناس بتحبش لانش مميزه
رنا: مارأيك لما نرتب البيت نرجع نسير ونديهم عندنا يسافرو يغيرو جو؟

خالد كمل الورق رفعهن

خالد كمل الورق رفعهن وغلق شنطته انبسط: والله فكره ضخمه عادنا قلت بينفكر بس قلت ترتاحي شويه ترتبي على مهلش لاعاجلش وتتعبي

ثاني يوم طلعت بعد العصر عندهن تتفرط وطلعت معها صحن كيك وتعرفت عليهن. بعد المغرب النسوان روحين وبدأين يصلحين سجاف الوالده( سجاف يعني تزيين المكان الي تجلس فيه الوالده) واضافت لمساتها وطلبتهن اشياء تسويها ثاني يوم

تجملت منها مرت جيرانهم وحبنها البناات والجيران الي عرفوها ، حست انها بدأت تكون علاقات اجتماعيه لما نزلت بيتها

خالد شافها: الله ايش الحلا هذا كله

رنا بتتحيلا لنفسها وتحرج

خالد بمزح: ولاهي عيونش الحاليه

رنا ضحكت: تم الغزل اول
خالد: ايوه كيف الجيران الجديدات تعرفتي عليهن؟

رنا تحمست وبتحكي له وانها ساعدتهن ومبسوطه قوي

خالد: ماشاءالله باين من كلامش انش ارتحتي قوي الله يسعدش ياروحي ، وبعدا قلتلش مبدعه من غير مايقلين هن صح او لا

رنا: ايوه ، وبتقلي بنتهم انها عتفتح مشروع توفير ادوات زينه قالت لو نشتغل سوا ما رأيك؟

خالد: لو شي ماعيتعبش ليش لا
رنا داخل نفسها بتشوفه وبتحمد الله وتشكره انها تعوضت ولقيت فيه اشياء كثيره انحرمت منها، بتحمد الله وتشكره عشان تزداد النعمه الي هي فيها .

مكان ثاني بعد ما وصلوا لحل انهم يسافروا ويعامل يضم الولد بأسمه عشان ماتوقع مشاكل الاقامه ..الخ

بعد اسبوع وصلوا واخذت الطفله وراحوا لبيت امير..

ام امير : يعني عتربوها ؟
هبه دمعت وهي في حضنها: قدي بنتنا ياعمه لاتقليش تربوها

ام احلام شافت امير: وانت مارأيك؟
امير حاسس بغرابه مش عارف كيف متخوف: انا ماقدرش امنعها قدو اقل شي أفعله، حرمتها تكون أم ومافلتتنيش

امه هزت راسها سمعت صوت باب غرفه احلام: الله يهديك ( بتهم احلام تخرج من غرفتها وتفعل مشاكل)
احلام خرجت استغربت بنت صغيره في حضنها: من هذه ؟؟

هبه: بنتنا

احلام: بسم الله الرحمن الرحيم؟ ايحين وحمتي وولدتي؟

امها: تبنوها

احلام : الله يكتب اجركم ويعينش على البزا

امها استغربت: مالش تاعبه؟

احلام: ماشي ، جلست جنب هبه حضنت النونو وتذكرت جهالها دمعت ناولتها ودخلت غرفتها

اتصلت لابنها: ها كيف انت وأخوتك ، ادي احاكيهم

جلست تجابرهم وطلبتهم يجو عندها تشوفهم وفقدتهم وانها اشترت لهم كل شي.

في بيت رنا وصلوا اهلها كلهم عندها..

الجد: ماشاءالله البيت كبير قوي عليكم

خالد: انا قلت كبير امد تجو هنا يعني ماتتعذروش حين تجو

الجد لابنه بيشاوره: عتخرجني او مع

ابو خالد : تمام ذلحين؟ عادحنا وصلنا

الجد: امد يصدق الكذبه عيزعل مشتيش اغثيه

ابو خالد: تمام

خالد شافهم خارجين: اوصلكم انا؟

وهم فوق السياره
ابو خالد: بس ليش يابه هكذا تفعل والله مايسبرش،
ابوه بكسل: عتعرف بعدا ، المهم اقطب الرجال قد شلينا موعد عيب
ابو خالد : انت مريض؟ قالو فيك شي! قلدك الله

ابوه: ماشي قلنا اخطى سكته.

في بيت خالد و رنا
ام خالد تشتي تقوم تساعدها

رنا: ماشي امانه ولاحد يتعب نفسه : افتهنوا قدنتين واصل واصل بتشتغلين
صفيه بتتحيلا لها: خلوها تشتي تدلعنا
امها ضحكت: انا خايفه يابنتي تقربي لنا اندومي ، انتي وسندس مابش عليكن ركن.

رنا ضحكت ذلحين توصل سندس و زوجها وقربنا نتغدى اندومي

جارتها شافت عندها ناس نزلت دقت لها الباب

رنا قامت تفتح بعد سلام وكلام: ادخلي تعرفي عليهن

جارتها وقت غدا: شاجي بعد الغدا ان شاء الله ، اشتي اقلش كيف عتخبزي

رنا: يو ذكرتيني اقله يشتري خبز نسيت من الفرحه بهم نسيت

جارتها ضحكت: والله انني شفت وصلوا ماشاءالله خيرات من نفسي زيدت العجين بس قلت اجي اسالش ايحين عتقربي انزلهن دافيات

رنا انحرجت بطيبتها بعد شكر دخلت وقفلت

خالد خرج من الديوان الي فيه الرجال: مالش تشتي شي؟
رنا حكت له الي حصل

خالد: كل شي عيكفي ؟ او اخرج اوفي؟

رنا: الا يكفي
خالد: تمام انتي اخبر لو تشتي شي كلمتيني

وصلوا الجد وابوه وسندس و زوجها

رنا دخلت المطبخ بدأت تدفي الأكل وقربت في الغرفه الي فاضيه كانت السفره كبيره موزع فيها( الشفوت ، محشي وكبسه ودجاج بالفرن، سلطه نوعين والمرق واللحم والسلته وبنت الصحن والبريك والعصير والماء والفواكه على جنب والحلا والشاي والقلصات ، جالسه بترتب الملاعق

وهن بيدورينها في غرفتها والمطبخ سمعين اصوات الملاعق

ام خالد وامها وصفيه وسندس
ماشاءالله ايحين قربتي وايحين فعلتي هذا كله

ام خالد بتمشي من جنب السفره: ماشاءالله ماشاءالله

امها منبهره منصدمه: انا هذه بنتي؟

سندس: يووه كم نفسي في المحشي ، الصدق علميني يارنا ماعرفش لبنت الصحن بتوقع قفوع مش بنت صحن

صفيه: يوه قد تعبت قراب وحدها لايبرد الأكل سيري ياسندس انتي هو مابلا زوجش

سندس لفتت: هذا خالد قد جا

ام خالد: ماتعبتيش يابنتي؟
رنا شافت خالد: الصدق الله يحفظه خالد ساعدني
ام خالد: عيجبرني بقلبكم ، هيا ابني ادعيهم غدا

دخلين الغرفه بيتكلمين

الجده نسيت نفسها وتكلمت قدامها: قالين رجع هو ومرته معهم جاهله
رنا مش عارفه عن من بيتكلمين؟: من ياجده؟

الكل تلفت للجده
الجده: أمير
رنا باستغراب: ماقد تموش سنه كيف جاهل

الجده: ايوه قد الكل طنن وجننهن لوماتحاكين ولا ماكنين يشتين يقلين لحد انه ومرته تبنو جاهله

رنا داخل نفسها رغم كل الي حصل فيها الا انها زعلت عليهم : الله يعوضهم ويكتب اجرهم ويتقوا الله فيها اهم شي

امها: عادش بتدعي لهم بعد كل الي فعلوه

رنا: دعوه بيندعيها لاي حد حتى لو هو غريب ،الله يسخر للكل يمه

ام خالد: الا سوا يابنتي لاتصدقيش وتوقعي مثلهم، واحد يخلي قلبه نظيف، مانقعش ساعهم واحد يتمنى الخير للكل كيف ماوقعوا عيحاسبهم الله.

صفيه: على الله يعقل هو و اخته وينظف قلوبهم هم، محنا والله مافعلنا شي .

رنا ضبحت غالطت الموضوع: بنقل نخلي هذه الغرفه للجاهل مارايكم
سندس: ايوه حالي قريبه من غرفتش

الجده صاحت: عيجلس الجاهل وحده بغير جنان ، بتسمعين على مجنانه فيهن

سندس ضحكت: ايوه قلنا نعودهم

ام خالد ضحكت شافت ام رنا: بعدا عيرقدين هن عندهم

ام رنا: مابلا هذه عيكونو يطردوهن هن وجهالهن من الازعاج

الجده: ايحين قد انطردتين والله انه جهالي يرحمو كان يسيرو الديوان

سندس: يسير الجاهل وحده يبكي لوما يسكت من نفسه ولا يسير هو يسكته

رنا بتشوفها مستغربه: بتمزحي

سندس: ماشي والله ياخبلا لاتعوديش زوجش يجلس وحده بعدا يضبح ابليس يلعب بعقله تشاغله واحده

صفيه شافتها: حمي العقل الي معش صدق
سندس: انتي اول واحده تغيري بطلي الطيبه حقش الزياده

رنا: انتي الي بطلي تقرأي مشاكل النسوان في الفيسبوك وتطبقيها في حياتش ، شلي المفيد مش تخليهن يأثرين عليش زوجش وانتي مش مثل زوج فلانه وفلانه كل واحد له تجربته الخاصه يتعامل بها بعقله مش يخلي حياه الناس مقياس

سندس: ياسلام ضروري يقع بي ساعهن امد ارجع افهم

خالد دخل لاعندهن : هيا اخرجين تغدين ، تسلمي يارنا الاكل طعيم قوي ماتوقعت عتقدري تفعلي كل هذا

سندس: ياااي احنا هنا سيرو تغازلوا هانك

خالد ضحك: قومي جاوبي كرم يشتي يخطى ناوليه المفاتيح

بعد ماراح كرم خطبه ابن عمه وهن تغدين وغسولين ، وبقيو بيت خالد الاهل بس الجد جمعهم كلهم وجالس في علاو الديوان في الوسط عياله وجهالهم ونسوانهن ومرته وجهال صفيه.

ابو خالد متوتر لايسمع شي يضايقه ويكسر فرحه اللمه والضحك.

الجد: انا فارح ياجهالي من داخل قلبي بهذه اللمه يوم ماقررت اشل الحجه حقي لبيتي تخيلت نفسي وقتها وانا وسط بيت كبير معي جهال وجهالهم معهم جهال ومابش بيننا غثى ووجع وزعل والحمدلله قدرت اربي عيالي بالعدل في كل شي عدلت في الحب في الصرفه في التعامل في توزيع المهام امد لايقع بينهم حسد وكره وعمري ماقارنت واحد بالثاني كان كل واحد معه وضعه ومقدرته اهم شي بيفعل ويحاول بينعلمكن انتين هذا الكلام لانكن عتخلفين وعتكبرين أسره وعائله بكلها

سندس ضحكت: ذلحين جدي عيفعلنا درس كيف نربي جهالنا، ياجد ربيهم انت مابش فينا طافه

صفيه ورنا بهررين لها الموضوع كان جاد وهي بتمزح

الجد مسك نفسه لايقلبها ضحك وزبج مع حفيدته رفع صوته يكمل كلامه: يعني اليوم قررت ماخلي شي يغير نفوس جهالي للعمر كله والورث شاوزعه بينهم بمايرضي الله وعادنا عايش ، مشتيش اخلي هواره وطمع الدنيا تفرقهم
الكل قاطعه بدأت الاصوات ترتفع الي يقول ليش والي يقول مايهمناش الورث والي يسأل ليش

خالد : ليش ياجد او فيك شي ؟
الجد: والله مافيني شي اننا بخير له الحمد والشكر، اشتي اكمل امانتي واعيش خفيف محد ضامن عمره

رنا سندس صفيه كل واحده بطريقتها: من غير شر الله يحفظك
ومحد رضي يصدق
الجد قطع كل شكوكهم وحلف يمين لما يحلفه يصدقوا اي شي يقوله: قلتلكم والله ماغير حرام الأملاك والاراضي تجلس هانك لوما اموت عشان تتقاسموها وابليس يفتن بينكم، اشتي تشلو حقكم وتعيشوا معززين مكرمين قد الظروف صعبه ياجهالي، الحقوا لكم ارض بيت اي شي .

فؤاد:زواجه
ابوه لفت له: اول تم الجامعه قلك زواجه
ام خالد: مارأيك نزيد نشل لك رفيده جنب رنا لخالد
رفيده : مع ياااعمه

فؤاد: ياسعم انه طقم شل واحد واربح الثاني مجانا
ضحكواا
صفيه:اشرت على رفيده وفؤاد، هولا اخوه صدق، وشافت خالد و رنا هم هولا حقنا المميزين.

الجد شاف سندس: وانتي يامقاطعه الكلام اربي جهالكن انا
سندس ضحكت: الصدق ياجد تربيتكم ثانيه
الجد: كل وقت يابنتي وفتره زمن ولها تربيه خاصه الدنيا بتتغير واساليب التربيه، الا المبادئ الي هي اهم شي تربي الجهال عليها الدين الأخلاق الأمانه الشجاعه والاحترام

سندس لفتت لرنا بخوف بتشاورها: والله مانا داريه كيف نعلمهم هذا كله

رنا: كل شي عيجي من نفسه لاتهميش, ذلحين اولدي وبعدا سهل
سندس: قد ابسرت معي ولد وانتي ؟
رنا: معي موعد بكره

خالد جالس يقرب قدامهم كل شي ، و رنا تخورهم الكيك والشاي والقهوه قشر حق جدها وجدتها، فارحين بهم ..

مشيت الأيام بدون احداث مهمه وبعد سته شهور..

بيت اهلها
ابن احلام: هيا امه تمينا القرايه، انتي وعدتينا ترجعي
احلام: ابوك يمكن غير رأيه

ابن احلام شاف ابوه جنبه بيسمعه: الا هو جنبي مراعي تقولي ايوه عيجي لاعند جدي وخالو امير يحاكيهم

احلام دمعت :تمام يجي.
ابنها بيصيح من الفرحه وخواته وبيصفقو
زوجها سمعها بتبكي وقفلت ، قفل واتصل لابوها

في غرفه هبه..
هبه رقدت بنتها: مالش بتبكي؟
احلام: مش داريه عيسامحوني جهالي على كل الي فعلته، كنت ام خبيثه اصيح اعصب من اي حد واضربهم هم، كنت اتنرفز من ابوهم واضربهم كيف سخيت اقلهم سيرو لابوكم وخليتهم فتره

هبه ساكته بتسمعها: اهم شي ترجعي ذلحين عتعوضيهم وينسو

ليش فولتو على الجد ؟ صحته بخير حق زمان صحتهم ثانيه 😂😂 البلا بنا احنا جيل النيدو

احلام: عاد في نفسي شي يا هبه بس مش انا قادره ولا جازمه افعله
هبه : ايش؟
احلام: اشتي اخلي ناس اذيتهم يسامحوني ، اشتي ارجع حياتي وانا مابش بيني وبين حد شي

هبه: اتصلي وحاكيتيهم

احلام: ولو ماسامحونيش

هبه: فعلتي الي عليش، جربي ذلحين، لمن عتتصلي؟
احلام ماقالت لها مسحت دموعها واتصلت لبيت صفيه الي تعرف رقمها : طلبت السماح منها

صفيه: انا مابش بيني وبينش شي،انتي تغيرتي وسحبتي وقلبتي من نفسش. مسامحه.

احلام: اشتي رقم رنا
صفيه: رسلت لها

في المستشفى..
رنا بتبكي : مشتيش عمليه لو اموت ياخالد، هنا بيقتلوا ياخالد الاوادم

خالد ضحك ماسك يدها ويطبطب ع ظهرها في غرفتها قبل ماتدخل غرفه العمليات: بس خباله كنت اقلش لاتسايري سندس مهووله مابتصدقيش

رنا: هي سندس لما ولدت ابسرت بعينها المره ماتت

خالد: يارنا ياروحي انتي فاهمه ومتعلمه، المره ماتت معها مشاكل صحيه من قبل وحصل خطأ طبي، الواحد يتوكل على الله ، الان القبيله حقنا كلهم جو قدهم في البيت بيجهزو ويفرشوا وامي وعمتي وجدي في طريقهم لهنا هيا حبيبي انا جنبش

رن التلفون والممرضه الي عتدخلها غرفه العمليات في نفس الوقت هيا رنا الدكتوره في غرفه العمليات

رنا بتتهرب من الممرضه جاوبت وهي بتبكي: الو

احلام: رنا انا احلام

رنا بسبب عصبيه الولاد والخوف: ياهارب من الموت يامالاقيه ماتشتي ذلحين

احلام: ليش بتبكي؟
رنا: تحاكي ماتشتي
احلام: بس كنت اشتي اتصلش انا تغيرت وو..

رنا مش مركزه بتسمعها وهم بيمشوها لغرفه العمليات خالد والممرضه غير اخر كلمه سمعتها ( سامحيني) حست بخوف اول ماشافت جمله( غرفه العمليات) وقفت وجالسه تكلم نفسها: يارب شاسامحها بس قيمني بالسلامه عشان جهالي وخالد واهلي

احلام سمعت صوت الممرضه بتقلها هيا ادخلي غرفه العمليات خطر تولدي طبيعي ، دمعت وبحماس بتدعي لها: الله يقومش بالسلامه يارنا

رنا الله يسامحش وقفلت ناولت خالد التلفون

خالد حبها فوق راسها وعيونه ملان دموع ماسك يدها بقوووه: هيا مراعي لش هنا

رنا هزت راسها ودخلت

الجد وابوه وكلهم مراعيين معه
في غرفه العمليات
الدكتوره حق التخدير بتطمنها: الحمل الكم؟
رنا: الاول
الدكتوره مع اسئله عرفت انها انتظرت طفل من عشر سنوات واستخدمت ادويه كثير لفتره بس حاولت تطمنها : وعادش خااايفه معش دقايق بس وتلتقي بهم
رنا: عيكونوا الثلاثه بخير؟ ليش قالت الدكتوره في خطر
الدكتوره ضربت مخدر: مابش خطر خذي نفس عميق وعدي

رنا اخذت نفس عميق وبتشوف السقف وغمضت

بعد نص ساعه انتظار.
خرجت الممرضه بعربيتين فيها ولد وبنت

كلهم مراعيين خارج الغرفه

خالد شاف اثنين بس: وين الثالث؟


عوض الله بعد ماتخرت رنا🥺❤

خالد شاف اثنين بس: وين الثالث؟
الدكتور حق الاطفال خرج: كان وضعه مش كويس والقلب عنده ضعيف يعني احتمال مايعيش والحمدلله الاثنين بخير وصحتهم تمام

خالد زاعل

الدكتور: اكيد عتزعل لكن احمد الله انه ماحصل له شي قبل كنا عنضطر ولاده مبكره وممكن كان تخسر الثلاثه، فسبحان الله انه وصل للتاسع اكتمل نمو اخوته

خالد تنهد بزززعل وبيهم رنا كيف عتزعل كانت متأمله :طيب وين هو
الدكتور: في الحضانه

بعد ماخرجت لغرفتها وفاقت.

الجد كان يقرالها قران شافها فتحت : الحمدلله على سلامه حفيدتي وقبيلتها

رنا بتشوفه وتغمض، وترجع تتلفت تدور وين عيالها مابش حد جنبها بس بتسمع اصوات بكاهم، تغمض وترجع تشوف خالد: خالد
الجد: هيا بعيني انا اوريش انا جالس جنبش أقرا قران واول مافتحتي خالد

رنا: ايوه هو كل الدنيا
خالد ضحك وانحرج من جده: هي مخدره ياجد، قرب منها ( رنا صحصحي)

الجد اهم شي تطمن عليها قام: انا شاستاذن البيت نصلي ونرجع وقدي بخير

خالد لحقه: فؤاد خارج عيوصلكم ياجد، ماشقدرش افلتها لو وقع شي بالجاهل عتخاف وحدها

الجد: تمام اجلس معها يابني ولو سار حق الله، الحمدلله الي سخرلكم وعيعجلهم ذريه صالحه باذن الله

امها جالسه جنبها توريها بنتها
ام خالد: وذيه الولد ساع ابوه
خالد رجع ومسك يدها : ذلحين كل واحده عتشل لها واحد وتشبه على ماتشتي وانا خلولي حبيبه قلبي هذه

رنا ذكرت : وين الثالث ياخالد
خالد: في الحضانه
رنا: هو الي تاعب؟
خالد: ايوه
رنا بكيت:وليش يبعدوه عني حين هو مريض

خالد استغرب: هو في الحضانه
رنا شافته بنظره رجاء: عيعيش ياخالد؟

امها وعمتها ماتحملين خرجين خارج بيبكين

خالد: كم كنا نشتي؟ كنتي تتمني توحمي صح؟ يعني واحد، ولما سرتي تبسري ايش معنا فرحنا انهم اثنين وبعد ماكبرت بطنش قالو ان به ثلاثه بس ماكان واضح كل شي كان نعمه من الله ورزق كان يزيدنا رضا فوق الرضا، وذلحين ياروحي اراده الله واحد فيه مشاكل، والاثنين بخير وعافيه له الحمد والشكر لاتعترضي اراده رب العالمين امد لايحرمنا بحجر الله لاغثيتي وكسرتي فرحتنا بالاثنين احمدي الله واشكريه على اي شي يقع

رنا وهي بتبكي :صعب ياخالد كلهم جهالي بس الحمدلله على اي شي من عند الله. وله الحمد والشكر اننا بخير والاثنين بخير وانت جنبي سندي وقوتي في وقت ضعفي ماكنت اتمنى اكثر من هكذا لله الحمد والشكر.
خالد حبها فوق راسها وحب يدها مسح دمعته وقام: اسير اديهم نبسرهم

ام رنا: ذلحين انتي سيري عند سندس مايسبرش تفلتيها

ام خالد: سهل قدي بخير جدتها وعمتها وخوات زوجها وسلايفها مابيقصرين كلهن ماشاء الله مابينفعل شي
ام رنا: بس لايدخل في نفسها الكل عندها واهلها مابحد.

في علاو الديوان في المرتبه
جده سندس: ليش بتخلي الولد عندش، قلتلش الولد تخبيه، وبعدا ماتقليش ولد قلي بنت

سندس ضحكت: يو ياجده هذا قدو خرط قوي حرام

جدتها: مش انتي داريه ياخبلا مايتحاكين النسوان الا بعدا، سكته سكته طنشي لحد سألش

سندس ماسكه نفسها بتضحك

دخل كرم وهو بياكل سكريم ناول سندس الثاني: اديتلش بالمانجو
سندس شلته: تسلم ياروحي
الجده انصدمت مبهرره تستضي ايش : يو يو قلك تسلم ياروحي مابتاكلي سكريم؟
كرم شاف الجده بتصيح لفت لسندس: دفيه في فمش لايوجعش حلقش

سندس بتضحك عليه وبصوت واطي لاتسمع جدتها: سعم فمي سخانه ادفيه

كرم بغمغمه: الحجه عندي ادافع عليش تستاهلي الصياح, ياجده بارد والله انه ثلج

سندس ضحكت: الله يقلعك ياكرم كنت خاوره له

جدتها: اشربي قهوه دافي قلك بارد عتمغصش بطنش

كرم شافها وبتنهيده اووف: الله يعينكن والله انها عسكره مش هي خلفه هذه كله ممنوع من الوحام للولاد

الجده: بدل ماتعقلها هو انت الي بتجننها

سندس ضحكت : عادنا اشتي اسير ابسر رنا
الجده: مابش والده تخرج
كرم بصوت واطي وبيضحك: والله اننا اشتي اخليها عندنا مابتقدر عليش الا هي
سندس: ياجده ماقد بسرتيش رنا ولدت اليوم ومعها جهالها من عيبزيهم حرام
الجده:قد ولدت؟؟ يعوو شلوني ابسرها
سندس: هيا شلها الله يحفظها دور رنا تتعسكر، نفسي اسير ابسر عيالها وماعتنفع الا هذه الطريقه

في بيتهم ابوه وامه مستغربين امير كيف تغير هدوءه صلاته في وقتها ، بيشتغل خفف اصحابه

امير جالس يتحسس راس البنت: ليش حاميه؟
هبه :مدري
امير: قلتلش لاتستبرد بتلعب والطاقه مفتوحه
هبه: هي تحتاج تتهوى ضروري، بس قالت عمتي انها وقت تسنن

امير: قومي نشلها دكتور ماقدرش ابسر بنتي تاعبه هكذا

هبه متحمله هرمه على بنته، قدرت تغيره في اشياء كثيره بس الشي هذا عاجبها فيه بتحسه أب حقيقي للبنت.

احلام تشتي تتطمن على رنا ، دخلت غرفتها لايسمع امير واتصلت لصفيه تسأل عليها : يووه الله يجبر خاطرها، ويبارك لها في الي معها.

ابوها دخل : احلام

احلام : قلقت لما اتصلت لها وهي في المستشفى قلت ابسر كيف هي، يلا سلمي عليهم..قفلت

ابوها: من هي في المستشفى؟

احلام: رنا اتصلت لها وهي بتولد قلت اتطمن عليها

ابوها ابتسم: ماشاءالله ماقع لهم

احلام : تؤام ثلاثه واحد منهم كان تاعب قالت توفى والاثنين بخيرين بنت وولد

ابوها: ماشاءالله لاقوه الا بالله، الله يبارك للكل ، وانتي يابنتي ذلحين يشتي ابو جهالش يردش داري انش موافقه وتحاكينا بس قلت ازيد اسالش

احلام: الا يابه شرجع، صدق معي طبينه، لكن كثر خيرها ماقصرت مع جهالي يعني ان فيها خير وانا معترفه كنت غلطانه وذلحين على الله

بعد يومين خرجت من المستشفى..

الجده في بيت رنا بتشوفهم صغار: هيا كلي سوا
الجد جا وطرح الجنبيه حقه طرح: هذه حق السمايه حق الحفيد الاول الي جا شل اسمي واسم العائله

خالد فرح وحبه فوق راسه

الجد: وهذه البنيه من ذلحين ماتفتش ولاتبدي على ابنش

سندس: يوه ياجد ياعيبتك على ابني مافعل بك

الجد: يكفي امها واخوش طلعوا عيننا

سندس ضحكت: انا فدالهم، لاقد عيقعو ساعهم ، لكن الصدق والله مانفعل ساعكم ياجد، صح يارنا؟

رنا: ايوه اخوه نكن نقلهم مابش خطيبتك وحبيبتك

الجده : هيا اسمعي انتي وهي ابسرين على قد جهال خلفتين شقران مكنينا غير اندومي ويخ ويع ومعيفه ، وانت سير ادي لهن بسكوت سكته اخر الليل قبل مايرقد تاكلنهم ويرقدو يكبر تبسرين كيف يوقعو ماشاءالله

رنا وسندس مبهررات بيتفرجين لبعض

سندس: وافعله شاي ولا نسكافيه

جدتها : قلعو عينش بينتحاكى من صدق استمعين فعلنا كلنا هكذا وشويه عسل الصبح

رنا لطمت وجهها: ياجده العسل ممنوع لعمر سنتين يضر يدي تسمم للجاهل

جدتها: لاتصدقين للدكاتره صدقين لنا

سندس: كان مالنا وقعنا هكذا بلاده فرص

رنا بتضحك وتبهرر لها تسكت

الجده: هذه نصايحي وماشتيتين خرجت
سندس: اوبهي مشتنيا ، اوبهي انا عند الله وعندش قلك بسكوت يو ياجده لش القوا يعلم الله ماقد اكلتينا، تقلي اكلونا طرزان وبفك

رنا ماسكه بطنها: اسكتي لاتضحكيني

خالد: ينفع اجلس مع مرتي شويه مامعي الا ذلحين بعدين نسوان لاخر الليل

سندس : تمام جي عند مرتك وانا اسير ابسر امي تجهز لرنا الغدا.

خالد : تشتي شي ناقصش شي افعلش شي؟

رنا: مع تسلم قدهم بيفعلو لي كل شي
خالد: انا ، انا ماعليا منهم انتي مسؤوله مني انا

رنا: سلامتك وعافيتك

خالد بيحاول يمزح معها وينسيها عشان نفسيتها الي مكتئبه بسبب الطفل الي توفى : ذلحين انا خلاص مصمم مصمم البنت رنا

رنا: ياخالد كيف رنا وانا رنا

خالد: من حبي لش مافعلش
رنا ضحكت: عنوقع مجانين

خالد: وانا مجنون فيش

رنا: ماعيقلين لها صحباتها في المدرسه

خالد: عتقلهن ابي حب امي قوووي ومن حبه لها سماني رنا

رنا ضحكت بخزا

خالد: الولد سميتيه على جدي والبنت عليش
الجده دخلت بالغدا حق رنا: هيا اخرج تتغدا

خالد: وانا اشتي اتغدا مع مرتي

الجده: ماشي ماحد ياكل مع الوالده

خالد: ليش؟
سندس دخلت تضحك: وانا عادنا والده

جدتها: اخرجي قد تميتي الولاد

خالد: فهمونا ليش

الجده: امد لحد يمرعها
خالد ضحكك: الي يسمع جدتي يتخايله مرتي بتفترس الاكل

الجده: انتو شويه لقانه تقرحوا قلب واحد ، افعلو مشتيتو

رنا: شاقل ياجده بسم الله واخليهم ياكلو شويه منه امد لحد يدخل في نفسه ، ماقدرش اكل وحدي مايهنالي لقمه بدون خالد

سندس: كل مايسمع كرم اسم ابنش يارنا يحسد يقل ليش ماسميتي تيم كرم

رنا: قليله قد وزنا الاسم والقافيه ميم اهم شي

سندس ضحكت: حرشتو بيننا

خالد: اصلا اتحداه لو اديتي بنت يسميها سندس

سندس: تكفيه مجنونه واحده ماقدر على ثنتين

خالد: ماهو العاقل كلكم مجانين

سندس: يمي اكل الوالده الثانيه احسن من اكلها هي يقع طعيم

خالد بيشوفها باستغراب: عيزكيش عقلش ، ويأكل رنا .

عدت أيام وكانو يساعدوها اهلها في جهالها لما كبروا شويه وبعدها كانو يسيرو ويجو هم واهلهم..

فجأه تغير خالد ودخل في اكتئاب شديد محد قدر يساعده ويحتويه غير رنا

بعد اربعه شهور بتتذكر حوارها معه بالحرف الي حصل هذك اليوم، وهي واقفه قدامه بصحن الأكل تراشيه ياكل ..

رنا : اين عتسافر؟ بينخاف وحدي يا خالد مع الجهال يقع شي يشترغ يبكو الاثنين سوا، وماقدرش اتصرف

خالد: قد فؤاد عيديهم في الطريق

رنا: طيب ينفع ماتسافرش

خالد بيتعطر: يوه، مش هو سفر هو يوم اسير مع سام يسترجع مرته حانقه للبلاد حقهم

رنا بكيت : ياخالد مطر كيف عتسوق وهو مطر ونقيل و

خالد: ياروحي انتي هو قلقش مع الولاد والضيق الي بيجيلش ، حرام خلينا نسير مع سام كرم مشغول مايقدرش شاسير انا واخوته يشتي واحد من اصحابه امد يشهد ع اخلاقه وكذا

رنا: حاضر انتبه امانه بطل تجابر حد ، وسوق بدون ماتمسك تلفون

خالد: توصياتش هذه بتفجعني ، تمام شكلي شابطل اسافر

رنا : يارب الجو مش جو سفر سيول ومطر. ورعود

خالد: تغدي سوا وكلي سوا و اوبهي لنفسش وجهالي.

رنا مسحت دمعتها وحمدت الله وشكرته ودخلت لاعنده

خالد لحيته ملان وجهه وبيشرب سجاره ، شافها بصحن الأكل قام يشله منها

رنا فتحت الستاره والطاقه يتغير هواالديوان بدون ماتتكلم بتدعي الله ياكل

خالد : تسلم يدش

رنا فرحت تكلم: هات وانا اكلك بيدي

خالد شافها وحشته فقد للحياه الطبيعيه معها ومع جهاله، حس بعد شهرين من حادثه صاحبه سام الي توفى وهو خرج من الحادثه بخير ..

رنا بتمزح معه وتأكله وتاكل عليه: الصدق رعى الله ايام زمان كنت اتدلع ذلحين بينجوووع قوي بسبب جهالك

خالد ضحك: فقدت لكم

رنا طرحت الملعقه واخيرا نطق وابتسم حضنته وبكيت: ياخالد الله لاوجعني فيك ولا عليك، شهرين نسيتني اكتئابي على نفسي وابني وضيق الولاد، وانا اهمك وادعيلك

خالد : اخ يارنا، انتي كل شي بحياتي والله لولاش بعد الله اننا جننت

رنا: الله يرحمه وهذه حال الدنيا ، والحمدلله انك بخير

خالد: الحمدلله
رنا : هيا كمل كل هاا : بتأكله

خالد: ماندمتيش ان انتي ودفتي بواحد مثلي يعني بعد العمر كله الي عشتيه قلتي اعيش مع مجنون !

رنا شافته بزعل ليش يقول على نفسه هكذا !!

رنا بنبره زعل عليه: خااالد انت مات قدام عينك سام أعز صديق لك انت وكرم، طبيعي تمر في الي مريت به ، انت مش مجنون ، انت شخص طبيعي وشخص قلبه حنون وشخص ماهان عليه الشخص الي قاسمه العيش والملح..

ليش تقلي هكذا!! اندم ؟؟

اندم على ايش شخص رجعني للحياه رجع روحي واسعدني وعشان ظروف مر بها اقول هكذا !! وعلى من ؟ حب عمري و زوجي وابو جهالي..

خالد سحبها وحضنها وعيونه ملانهن دموع

رنا بعد مامسحت دموعها بعدت منه: وحتى لو مجنون يتخايلك شافلتك

خالد ضحك

رنا: تعال معي

خالد قام ناولته المنشفه حقه وخرجت مكينه حلاقته: جي اوريك كيف توقع مجنون ، هكذا

شغلتها وحلقت له عشوائي

خالد مبتسم وعيونه فيها حب لها ، شاف نفسه ضحك الله يسامحش

رنا: راعي افعل سيلفي

خالد هرب ودخل وقفل الحمام..

رنا فرحت وبتحمد الله وتشكره انه تغير.

خرج من الحمام وجهزت له ملابسه شاف جهاله.. وحضنهم

رنا : فقدتوا لبابا..

خالد: انتي احسن زوجه في الدنيا يارنا

رنا: لانك احسن اختيار وقرار في حياتي ،انت نصي الي كملت به حياتي

خالد: انتي كامله بدون اي حد انتي مش ناقصه عشان اكملش ، انتي فيش من كل شي الجمال الاخلاق الطبيعه الحاليه الحنان ، انا جيت احتويت قدرت اهتميت وحبيت بس ، انتي بدوني كل شي ومعي احلى شي في حياتي.

خالد: ابسرري عبدالرحيم ساع جده مقزز

رنا: الظاهر مابيعجبه الرمسسه

خالد: ايوه انا فداله ، وهذه كسله على عمتها راقده واصل

رنا ضحكت : عمتها جايه في الطريق شاحارش لها

خالد: كبرتي ووقعتي ام وجالسه محارشه

رنا ضحكت: استغل الفرص

في مكان ثاني
احلام متعايشه مع جهالها وطبينتها بعد ماتغيرت. تقبلت واقعها، ورجعوا يحبوها قدرت تكسبهم


رفيده متقدمين لها ناس بس لانها اخر العنقود بتتدلع شرطت تكمل الجامعه وتنخطب..


امير و زوجته مش حاسين انهم تبنوها فعلاً اصبحت( حياة ) بنتهم ورجع انسان عقلاني مازال يعصب بس هبه بتعرف تسيطر على عصبيته..

ومحد يقدر عليها ، وفي نفس الوقت قوتها في محلها مابتقلل من احترامها مع حد.


بعد ماوصلوا اهل خالد قرروا يشلوهم اسبوع عندهم يغيروا جو في القريه عشان خالد تتعدل نفسيته وبيتذكروا ايام طفولتهم وحبهم وشبابهم والعائله متماسكه مترابطة بقوانين الجد الي قدر يخليهم تحت بيت واحد بحب واحترام

السعاده والحب الحقيقي مش صعب هو قرار يحتاج شجاعه ومواجهه وتضحيه

❤️ محد ييأس من رحمة الله وعوضه ، وبينصر ولو بعد حين❤️


بقناتكم. ( طنافس 🎻وروايات🇾🇪 )

https://www.tgoop.com/FkamhSnanee3

السلام عليكم ورحمة الله وبركاته
الاخوه المتابعين الكرام🌻🤏🩵🩷

✿ روايه ( بين ♥️قلبين ♥️)
للراويه والكاتبه ( عبير الكبسي)

شخصيات الروايه حابه تجيب لكم نصائح

أمير : الزواج مودة ورحمه ، لما يختار الشاب بنت يختارها لأدبها واخلاقها من ناس ربوها ماعد في داعي يختار الصغيره الي يربيها ويكسرها عشان لاينكسر هو.
ويخرب حياته بيده، اتقوا الله في بنات الناس

انا اعترف غلطت في حق رنا وكابرت بس بعد ايش بعد ماراحت من يدي، صحيح الله عوضني بهبه بس جت لي درس تعلمني اني كنت غلطان في تصرفاتي مع رنا. ماقدرت بنت الناس.

رنا: انا كنت انسانه وفيه، سكات وتحملت وصبرت ورضيت بعيوب الرجال الي قالوا زوجش لاتخرجي سر ولامشكله، سكتت له وتمادى، بس لما خانني وكذب عليا وخدعني فوق كل عيوبه ماقدرت اتحمله يمكن واحده غيري تقدر بس انا مقدرش حياتنا مش مقارنه مع بعض من تتحمل اكثر، لايكلف الله نفساً الاوسعها...

ولاني صبرت ربي عوضني بخالد ، حب الطفوله الي كان مجرد حلم وخيال اصبح واقعي وحاضري وكل حياتي


خالد: مش عيب تكون شجاع وتدافع تحارب على رغبتك في الحياه، سواء حب او شغل او قرار طالما مش عيب او غلط، مش مهم كلام الناس والمجتمع ، فكر بسعادتك وايش تشتي .


امل: انا كنت قويه وشجاعه بس خفت وندمت على خوفي وعدم مصارحتي لخالد ، خليت شخص من الماضي يتحكم بسعادتي، ماتخافي من اي حد يهددش الي يهدد جبان عمره مايسوي شي.

احلام: لو حياتش خاربه صلحيها من داخلش قبل خارجش شوفي انتي ظالمه من في حياتش، بتتمنى زوال نعمه من وبتغيري من من! كوني انسانه قنوعه وابعدي عن الظنون والفتن الدنيا بتقضينا قبل الاخره ، انا فتحت اذني للناس وخربت بيتي، ورجعت له بس بعد ماضيعت اشياء كثيره منها صداقات وجيران و زوج كان ممكن يتغير على يدي..


الجد : انسوا زواج الاقارب ولو سيطرت قلوبكم على عقولكم ، لاتنسوا فحص الزواج الثلاسيميا..


❤️وبين قلبين قلب انكسر
وانجبر على يد قلب ثاني❤️

صح كانت روايه من الخيال بس لامست ناس كثيره بتتابعني ، والأحداث الي سويتها نقدر نسويها ونغير حياتنا ونسعد لو عندنا شجاعه.

مع تحيات الكاتبه والروائيه (عبير الكبسي)

بقناتكم. ( طنافس 🎻وروايات🇾🇪 )

https://www.tgoop.com/FkamhSnanee3

مساء. الخيرات. يااحلا اعضاء

وفقرتنا اليوم. تقووووول


للبنات🙋🏻‍♀
ما موقفكن لو واحده.
قالت لش زوجش زميلي بالعمل
وانا معجبه به. لكن انتي مهمله له
وباين عليه انه مش مرتاح معاكي

للشباب 👨🏻‍🦱
ما موقفك لو احد جاء قلك.
يااخي انا معجب بااختك
اناشفتها بالعمل او بالجامعه واعجبتني
والان اشتي اخطبها


للمشاركه
ازغفو مشاركاتكم لهانا. @ALFkamah

والنشر. عيكون هانا. @FkamhSnaane2

تعلن قناة ✤طنافس🎻 وروايات🇾🇪✤
عن اقوى مسابقه بعالم التليجرام🤩

🥇جائزة المركز الاول رصيد بقيمة 5 ألف ريال
🥈والمركز الثاني رصيد بقيمة 4 الف ريال
🥉والمركز الثالث رصيد بقيمة 3 ألف ريال

💢المطلوب:
ارسال أسمك + مؤهلك الدراسي

📛وشرط المسابقه لكسب الجوائز
إن المتنافسين على المراكز الثلاثه الاولى
لازم انهم يتخطوا حاجز الـ100 اعجاب💞
وبعدين يبدأ التنافس على المراكز الاولى

🔰وستبدأ المسابقه. عصر اليوم الخميس
وستنتهي الساعه 4 عصر يوم الاحد

💢للمشاركه بالمسابقه
ارسلو مشاركاتكم لهونا. @ALFkamah


والنشر.بقناة المسابقة https://www.tgoop.com/+UVGrpamv9KNbTkiB

تعلن قناة ✤طنافس🎻 وروايات🇾🇪✤
عن اقوى مسابقه بعالم التليجرام🤩

🔰اسم المتسابق ( وردة الاوركيدا )
المؤهل الدراسي ( ثانويه عامه )
رقم المتسابق.( 1 )

💢للمشاركه بالمسابقه
ارسلو مشاركاتكم لهونا. @ALFkamah


والنشر.بقناة المسابقة https://www.tgoop.com/+UVGrpamv9KNbTkiB

تعلن قناة ✤طنافس🎻 وروايات🇾🇪✤
عن اقوى مسابقه بعالم التليجرام🤩

🔰اسم المتسابق ( رقيقة القلب💕🫰 )
المؤهل الدراسي ( تمريض )
رقم المتسابق.( 2 )

💢للمشاركه بالمسابقه
ارسلو مشاركاتكم لهونا. @ALFkamah


والنشر.بقناة المسابقة https://www.tgoop.com/+UVGrpamv9KNbTkiB

تعلن قناة ✤طنافس🎻 وروايات🇾🇪✤
عن اقوى مسابقه بعالم التليجرام🤩

🔰اسم المتسابق ( Latifa )
المؤهل الدراسي ( مخبريه )
رقم المتسابق.( 3 )

💢للمشاركه بالمسابقه
ارسلو مشاركاتكم لهونا. @ALFkamah


والنشر.بقناة المسابقة https://www.tgoop.com/+UVGrpamv9KNbTkiB