tgoop.com/Fluoxetine6564/8802
Last Update:
أولادي و بناتي الحلوين الزعلانين و مضايقين عشان الجامعات و المدارس قفلت ..
حابه أنبهكم انو كل شي لخير و ما تشيلو هم حاجه بتخص الدنيا و حاجه في الدنيا ❤
النبي صلَّ الله عليه وسلم قال انو الدُنيا دي ما بتسوى عند ربنا جناح بعوضه " جناح ناموسه " !!
الدنيا ما بتسوى قُصاد حُضن من أمك و أبوك وقت رجوعك من الداخليه ..
ما بتسوى قُصاد كلمة بحبك لمن تتقال ليك من زول منتظر عمرك بحالو تحلم يجمعك ربنا بيهو في الحلال ..
ما بتسوى قُصاد شرابك للمويه بدون مُشكله في صحتك ..
ما بتسوى قُصاد إنك تنزل المويه اللي شربتها من جسمك و تقضي حاجتك بدون ما يكون عندك تدمير في المثانه أو إحتباس يخليك تصرخ من الألم ..
الدُنيا ما بتسوى قُصاد سندوتش فول تأكلو أو أكله بتحبها تأكلها بدون مرض يمنعك عنها ..
ما بتسوى قُصاد كابوس مُرعب تصحى و تلاقي انو كان كابوس ما حقيقه فتحمد ربنا ..
ما بتسوى قُصاد طفل صغير يمسك إيدك و يضحك ليك و يقول ليك أنت عبيط يا خالو أو يا خالتو 😂 .. هو شافع قليل أدب ! 😂 .. بس الدُنيا ساعتها ما بتسوى قُصاد ضحكتك و أنت بتسمعها ..
ما بتسوى قُصاد نومك بُسرعه بدون أرق و قلق و تفكير ..
ما بتسوى قُصاد زول بتحبو ما يتغير عليك مع مرور الوقت ..
ما بتسوى قُصاد لحظة روقانك و ضحكك بدون سبب .. بتحس إنك أهبل .. بس ما بتكرر كتير ..
ما بتسوى قُصاد دعوه من حبوبتك .. و لمة بيتكم في العيد و ونسه مع الأصحاب ..
ما بتسوى قُصاد حُضنك لصاحبك يوم عرسو ..
ما بتسوى قُصاد سجده بكون جسمك كُلو خاشع فيها لله و ندمان و بتقرب شديد من ربنا نادراً لو حسيتها ..
ما بتسوى قُصاد حتة لحمه بتأكلها من المطبخ قبل الأكل و أمك ما تجوط فيك ..
ما بتسوى قُصاد روقان أبوك و أمك مع بعض بدون مشاكل بتحس إنك نفسك الزمن يقيف و ربنا يثبتهم علي كده ..
ما بتسوى قُصاد ثقتك و يقينك في الله و إنك تبتسم حاليا إبتسامتك الحلوه دي 😉😉😉 و أنت بتقرأ و تقول حاتُفرج ..
ما بتسوى قُصاد صاحب يحس بيك و أنت بتضحك و يعرف انو ضحكتك تمثيل و يقول ليك في حاجه ؟! ..
ما بتسوى وقت لمن تزوغ من المحاضره أو الحصه و تتطلع مع أصحابك تأكلو بره 😂 .. ياااااه ع الإبتسامه الحلوه دي بتأكد لي إنك كنت/ي بتعملها و تدك المحاضره أصبر لي أبوك الليله ! 😂 ..
ما بتسوى قُصاد انو ربنا يعوضكم بأحسن من اللي خسرتو من سنين و أيام و شهور و مصاريف و تعب و موصلات و محاضرات و دكتور غشيم محاضراتو طويله 😂 ..
ما بتسوى قُصاد لحظه تحس فيها برضا من الله عليك 😊 !
#الدنيا_ما_بتسوى .. !!
#صدقوني يا أولادي ما بتسوى و ما بتستاهل زعلكم من الحظر الشهر دا ..
انتو اتحملتو الكتير و عوضكم ربنا لمن يجي بنسيكم كل الفات و كلها تبقى زكريات و تتكلمو عنها و تحكو بيها لي أطفالكم بس كلها مسأله زمن و ربنا هو الوحيد البِعلم و يرتب الأمور وهو البختار لينا الأفضل و الأحسن و نظرتو لِـ الأمور أفضل مننا ..
نظره مُقربه و مُتقنه ،، كريم و رحيم بعبادو ❤
#أقسم بربي كل شي لي خير ماف حاجه بتحصل ساي ❤
#منقول
BY فلوكستين
Share with your friend now:
tgoop.com/Fluoxetine6564/8802