tgoop.com/Hatrashattollap/28704
Last Update:
بما انو انا عاطل وقاعد ساكت لاشغلة ولا مشغلة
فبقوم بساااااهر في الفيس والواتسااااب لحدي الساعات الاولي من الصباح ولحدي اخر زول في قائمة اصدقائي في الفيس يطلع من الدردشة انا بودعو
وبضرب خدمات المشتركين (زين) بمعطهم شوية
خدماتكم الجديدة شنوووو
واخليهو ينضم لوك لوك لوك يسكت
اها لو داير احول رصيد كيف
لوك لوك لوك لوك
اها الرقم اعلاه كيف
لوك لوك لوك لوك
اها اسعار المكالمات كيف
لوك لوك لوك لوك
نفس الحنك مع ناس (ام تي ان) برضو بمعطهم شوية
بعديها بقرر انوم تقريبآ بنوم تلاتة صباحآ
والطبيعي بصحي وحدة ضهر مدير كبير
بستحمي وبتسوك وبصلي الصبح والظهر سواء
بقعد بلقي اختي خاتة لي
شاي الصباح +الفطور + شاي الفطور+القهوة
كلووو ورا بعض بقشهم وبتخارج من البيت
مابجي راجع الا بعد المغرب بستحمي بشوف لو في حفلة بمشي بحضرها ماف بقعد في الخور مع الشباب
الموضوع دة غايظ امي بشكل ماعادي بس مابتقدر تفتح خشمها وكانت فترة مشغلاها لي ماتنوم لحدي الضهر
ابوي فاهم ووعاي قال ليها نوم الظالم عبادة
ينوم جنبك هنا ولايطلع يجيب ليك مصيبة من الشارع
يوم جاتني من ستة ونص صباحا
قووم يازفت قوم ياسجم الرماد قاعد لي كدة زي الهم في القلب
في شنو يمة يعني عاررفاني ماشغال بتصحيني لي
قالت لي شغلك عندي قوم علي حيلك بس انا بشغلك
قمتا علي حيلي
كوركت لي اختي الكبيرة قالت ليها
دخلي ضياء دة معاكم ف الجدول
انا اتهجمتا جدول شنو يمة
قالت لي جدول النضافة بتاعت البيت تمسح وتكنس وتغسل العدة وتكوي الملابس
شنووووو انا اكوي واغسل العدة لا لا لا مستحيل ابدآ ماحايحصل ياتو يوم شفتي ليك راجل بعمل كدة
شوف يازفت عجبك اقعد ماعجبك اتفضل اتخارج
ربيتك وقريتك لمن اتخرجتا شغل مالقيت عشان كدة تشتغل مع اخواتك علي الاقل تساعدهم
ولقيت نفسي مجبر اشتغل معاهم يا اتخارج
واتخارج وين وانا حق التمباك ماعندي
وعند اخت حاقدة خلاص ختت لي جدول لو ادوك
قروش ماتشتغلو
السبت والاحد والاتنين عدة ومسح البيت كلو
التلاتاء الاربعاء الخميس ملابس غسيل ومكوة
الجمعة طبيخ
اول يوم نزلت شغل العدة علي
ان شاءالله ماخلو لي صحن ولا كورة ولا حلة ماجابوها اي عدة عندنا ختوها لي قدااامي
قعدت في البنبر ورفعت جلابتي لحدي الركبة
قلت ابدأ بالعدة الكبار اول شئ لاقتني حلة
رز ليها تلاتة يوم الرز دة لاصق لصقة تقول ملصقنو بي صباع امير
مسكت الليفة وبقيت اكرش في الحلة ابت
#تعديل
تنكرش لي
جبت اللماع قدر ماحكيتها ابت تنضف
لا لا الموضوع خطير والبنات ديل والله تعبانات شديد
خلصت عدتي قبلت علي الحوش
خلصت الحوش ضهري ابي يرجع محلو من الدنقيرة
لا لا لا الموضوع ماساهل
اليوم داك من تسعة نمتا
تاني يوم
صحتني امي ستة صباحا
لقيتهم مجهزين لي 6 دست ملابس غسيل ومكوة
اممممممك كتمت
بديت اغسل لحدي زمن الفطور الغسيل كمل
فطرت جهزو لي المكوة وشغال اغني
(والمكوجي الفي الحي تش تش هدومي علي)
وبقيت ثابت في الجدول طوالي قلت يومين والحجة تنسي الموضوع لكن رفضت رفض بات انو اطلع الا القي شغل في الشارع غير كدة مافي طريقة
قاعد في البيت هنا تشتغل مع اخواتك لقيت شغل برة نطلعك من الجدول لكن قعاد ساي تاني مااافي
وجاتني فكرة مجنونة امثل ليهم انو غسيل العدة وشغل البيت اثر فيني وبقيت متااااثر بي البنات عشان اتحلا من
الورطة الخشيت فيها دي
ابوي قال لي امشي السوق ياضيو جيب لينا خضار ولحمة
قلت ليهو بري بري سوق شنو البمشيهو انا
لا لا لا بخجل من الرجال وبعدين الشمس بتاثر في بشرتي انا عامل قناع قبل شوية
قال لي ياولد ارررجل
قووووم امشي السوق يازفت
قلت ليهو دقيقة البس عبايتي وامشي
قال لي شنووووو
ابوي داير اتشلا عديييل هههههه ههههه
قال لي شوف تاني ما القاك قاعد في طشت عدة نهااااائ
ياولدي انحنا لاعبين ناقصين داير تنقصنا زيادة
ومن دييييك طلعووووني من الجدول
وزي مابقولو العقلو في راسو يعرف خلاصو
#تعديل
شابكني ولد ولد شنو يابنات حواء دا منشور #منقول وعجبني قلت اضحكم معاي مااضحك براي احتمال في وحده فيكم موجوعه لمن تلقه بوست زي دا بتضحك غايتو الحمد لله بس
BY هترشات طلاب💤📝🎻🌚
Share with your friend now:
tgoop.com/Hatrashattollap/28704