tgoop.com/Hauij/11359
Last Update:
قصيدة ( بـرز طلع )
نزل ليلة الامام العباس ( عليه السلام)
ــــــــــــــــــــــــــــــــــــــــ
برز ... طلع ... والكون مختل
حلف .. قسم ... الجيش ينذل
ابو فاضل ... ابو فاضل
---------------------------------------
من لگدهه كلهه صاحت يلله شردو بالعجل
هاذه ابو فاضل اجانه شايل السيف ونزل
كلهه جفلت كلهه تصرخ من ينازل هالبطل
حيره صارت والجحافل طاحت اگبال الفحل
هتف .. صرخ .. والسيف منجل
حصد .. خـُبط .. والماي وشـل
ابو فاضل ... ابو فاضل
=============================
هد رسنهه وهيه غارت والارض بيه انطوت
يخطف ويسحگ عليهم والعظام اترضرضت
چنـه طاير مـا ركبهه وهيه چنهه ما مشـت
ماجت ابنص العساكر چن سفينه وابحرت
مشت .. علت .. والموج احمر
جثث .. زلم .. عباس طشـر
ابو فاضل ... ابو فاضل
=============================
كالــشراع الرايه بيده سيفه يحچي بالفرض
يطبر بكيفه و مزاجه يطبر بطول وعرض
يـا صواعــق يـا نيـازك كسر اضلوع الارض
طلابة والكافل دخلهه كلهه گالت ماتفض
رعب .. خطر .. بالعين يذبح
يلف .. بشر .. طوفان ششرح
ابو فاضل ... ابو فاضل
=============================
روحه رده يـمر عليهم ما ترك واحد ابد
كلهه طاحت عالوطيه والـسبع بيهم لبد
دز جثثهم قبل اسمهم للمنايه وما بـرد
خلبص بأيده الكتايب والبقه راسه شرد
كلف .. شرس .. عالروس يفتر
صگر .. نسر .. مايوم يخسر
ابو فاضل ... ابو فاضل
=============================
دگله ثايه عالـ شريعه ثلـم وكــف الجـرف
شرد الوادم امامه كلشي بيده ينكرف
كلهه خنست سنطه صارت مانطق واحد حرف
يقلع بچفه حناجر من يزمجر چالعصف
لهب .. جمر .. عباس بالذر
نهر .. بحر .. بالأيد ينجر
ابو فاضل ... ابو فاضل
=============================
حيدر العمار الخزعلي
.
BY الشاعر حيدر العمار الخزعلي
Share with your friend now:
tgoop.com/Hauij/11359