tgoop.com/Hauij/11381
Last Update:
قصيدة ( ياگُمـر ليلي )
يوم و ليلة الامام العباس (ع)
لسان حال زينب الحوراء (ع)
ــــــــــــــــــــــــــــــــــــــــــــــــــــــــــــــــ
ياگُمر ليلـي .. انهض احچيلي
شنهو المتعبك .. يابعد حيلي
/////////////////\/////////////////////
ياحامل الرايه شعجب گلبك طفت ناره
تدري شنو اعلينه سده يَبن الحمه جاره
حسينك اتگطع وصل ضل دمـه يـِجاره
وانه ألوب أبخيمتي و أنشد عن اخباره
بينك و بيني .. ضني ناسيني
شنهو المأخرك .. يابعد حيلي
/////////////////\/////////////////////
چانـت امانينـه تــرد گـام الأمــل يصغـــر
من شاهدت خيل العده سِحگت ابو الاكبر
عالتله ياخويه صحت عوف النهر واحضر
عباس يا راعـي الوفـه صدر الاخو اتكسر
يمته تلفيني .. ذبحو حسيني
و أنه انتظـرك .. يابعد حيلي
/////////////////\/////////////////////
تدري الشمس من غربت وانه بلا خيمه
العيـن ضلت شابحه مَّطـاره چـن غيمه
تمنيت تبلعنـي الارض ولا ابقـه بالهيمه
ليل اهدعش ماينوصف لا ينسردضيمه
لو تلاگيني .. ميته تلگيني
دَورت عنك .. يابعد حيلي
/////////////////\/////////////////////
ما خمنت و اتـأكدت مامـش بعـد رجعه
من الشمر مني دنـه ويشتم بقه البضعه
يرفع اديـه وبالمتن صـوطه بـده يطبعه
تمنيتك بهذا الوضع تحضرني واتسمعه
شَـره تكفيني .. منه تحميني
ياهو اليرجعك .. يابعد حيلي
/////////////////\/////////////////////
بيدي حبل و اتيسرت كونك شفت حالي
مـن الكوفه للشام بهزل و انته على بالي
بين العساكر و الحرس انظر رمـح عـالي
بي راسك الماينحمل هيچي صفت تالي
وانه چفيني .. تنزف وعيني
وتلتفت لـَنك .. يابعد حيلي
/////////////////\/////////////////////
حيدر العمار الخزعلي
.
BY الشاعر حيدر العمار الخزعلي
Share with your friend now:
tgoop.com/Hauij/11381