tgoop.com/Hauij/11438
Last Update:
قصيدة ( ماشفنه اي ذله )
خدمه
ـــــــــــــــــــــــــــــــــــــــــــــــــــــــــــــــــ
ماشفنه اي ذله
بالخدمه نتعله .. خدمتنه يا ناس
مصدر سعادتنه
بالجنه كشختنه .. والتاج عالراس
خدمتنه ياناس
∆∆∆∆∆∆∆∆∆∆∆∆∆∆∆∆∆∆∆∆∆
عوف السوالف والحچي والقيل والقال
عنـدي دليـل آبخـدمتي ايهـــد الجبــال
عبـاس مهيـوب الزلـم مـا مثلـه خيــال
دومـه ينـادي سيـدي يا خـويه ما گـال
خادم إله الكافل
لو يسئل السائل .. ولأخر انفـاس
ما ينظر ابعينه
واهداله چفينه ... الهيبه عباس
والتاج عالراس
خدمتنه ياناس
∆∆∆∆∆∆∆∆∆∆∆∆∆∆∆∆∆∆∆∆∆
فطرس هُبط من السمه آبلايه جنحين
الله استجاب لدعوته مـن هَـز الحسين
بكاروكـه چلب يندعي ادمـوعه شَطين
رد ونبت ريش الجنـح بجناحه الثنيـن
فطرس نزل خادم
يـم السبط نـادم .. لوتعرف الصار
رد ونبت جنحهه
ما شالته الفرحه .. لمـن رجع طـار
والتاج عالراس
خدمتنه ياناس
∆∆∆∆∆∆∆∆∆∆∆∆∆∆∆∆∆∆∆∆∆
ام البنيـن الاربعـــــه ضحـت بـالسبـــاع
صاحت سبيل بخدمته وتحملت اوجاع
وبنت الزچيه الطاهره چانت على الگاع
تفرشلــــه وادنـگ إلـه ولأمـره تنصـــاع
من زغره خادمته
هاي العقيله اخته ... مـا عـافتـه بيوم
امچلبه بذيالــه
واتكفلت اعيالـه ... مـن هجمو الگوم
والتاج عالراس
خدمتنه ياناس
∆∆∆∆∆∆∆∆∆∆∆∆∆∆∆∆∆∆∆∆∆
انه بخدمته افتخر و اليحچي بطران
باجر يموت ويكتشف يا هوه خسران
انه الخدامه و دمعتي سوتني انسـان
هيه الربـح بالأخـره مو مال و اخوان
الخدمه مركبنه
تنجي و تقرُبنه ... من باب الجنان
البـاري سواهـه
والمنجه خلاهه ... ابكـل الازمـان
والتاج عالراس
خدمتنه ياناس
∆∆∆∆∆∆∆∆∆∆∆∆∆∆∆∆∆∆∆∆∆
عندي بشاره للبچـه و الگلبـه مصيوب
بالخدمه يزداد البخت وتصير مهيـوب
لحسين سيد كل وكت سلطان الگلوب
الخدمه يَمه مُربحه وعِد غيره مگلوب
العــزه و النعمـه
بخدمة ابو اليمه ... وبدمعة العين
كل الفخر بيهه
وربك يجازيهه ... خـدام الحسين
والتاج عالراس
خدمتنه ياناس
∆∆∆∆∆∆∆∆∆∆∆∆∆∆∆∆∆∆∆∆∆
حيدر العمار الخزعلي
.
BY الشاعر حيدر العمار الخزعلي
Share with your friend now:
tgoop.com/Hauij/11438