تبديل الرايات
اليوم والليلة الاول من محرم

قصيدة ( يامظلوم )


ــــــــــــــــــــــــــــــــــــــــ




يامظلوم رايتك شالوهه
يامظلوم للحزن بدلوهه
يامظلوم  ...

••••••••••••••••••••••••••••••••

رايتك صابغهه نَحرك من حَمار ادمومك
بيهه مضمون ودلاله يالسليبه اهدومك
يا قتيل الرايه تعني وبعده ثار اعلومك
بدلوهه الليله سـوده مـن تقرب يـومك

يمذبوح بالدمع رفعوهه
يامظلوم للحزن بدلوهـه
يامظلوم  ...


••••••••••••••••••••••••••••••••

الـرايه واهلال المأسي علنو لأجلك حداد
طب محرم يا خلايق واجبه لبس السواد
نُصبو عزيات و مأتم ابچو لخيامه الرماد
الذبيح لهسه ينزف و اختـه مسبيه تقُـاد

بالسياط للسبي ودوهه
يامظلوم للحزن بدلوهه
يامظلوم  ...

••••••••••••••••••••••••••••••••

رايتك بيهه كرامه تشفي كل داء و عليل
بيهه لِذْنه واحتمينه ياأبن حامي الدخيل
رايتك راية رسالـه و الگلب لأجلك يميل
اترفرف بنص المناير چنهه رفات الدليل

بالگلوب رايتك شافوهه
يامظلوم للحزن بدلوهـه
يامظلوم  ...

••••••••••••••••••••••••••••••••

رايه مخطوطه بحروفك انعقـد ألهه الولاء
بوصله لقبلة عشگـنه عقــرب لدرب السماء
اتبـاركو بيهـه الملايـك و الـرسل و الانبيـاء
يعگـد المهدي طرفهـه ويعـتبرهه كالـكساء

بالدموع رايتك شَموهه
يامظلوم للحزن بدلوهـه
يامظلوم  ...

••••••••••••••••••••••••••••••••

بالـگـبر اتمنـه باجـر رايتك هيـه الچفـن
تنقـل الوادم كرامه براية حسين اندفن
بيهه ملفوف ويقيناً تحضره ام الحسن
يستلم منهـه كتابـه امنيه تعـادل زمـن

يمولاي بلعرش خيطوهه
يامظلوم للحـزن بدلوهـه
يامظلوم  ...

••••••••••••••••••••••••••••••••

كلمات  /  حيدر العمار الخزعلي
.

لحن قصيدة
( يامظلوم )
بصوت الرادود سيد سراج الموسوي

أهوازيه:

قصيدة ( كاروكك دليلي )

ليلة عبد الله الرضيع
لسان حال امه الرباب عليهم السلام

ـــــــــــــــــــــــــــــــــــــــــــــــــــــــــــــــــــــ

كاروكك ديليلي اشلون تريد انساك فهميني
عبـد الله يبعـد الـروح اسمـك يُمـه يلچمني


~٠~٠~٠~٠~٠~٠~٠~٠~٠~٠~٠~٠~٠~٠~٠~٠~


اجه الليل وبده وني وأنه يايُـمه متعوده
اضمك عالقلب وتنام ضلعي هوه المخده
حاچيني اهيد اشلون بَعدك نومتي شده
يالخدك عطـر قداح يالثغـرك مثـل ورده

يا اجمـل وجه بالكون ريتـك يُمـه تسمعني
عبـد الله يبعـد الـروح اسمك يُمـه يلچمني


~٠~٠~٠~٠~٠~٠~٠~٠~٠~٠~٠~٠~٠~٠~٠~٠~


يالوجهك صباح العيد حتى آبـ بچيتك دافي
ارحمني يبعـد اچـلاي و ارجع ليـه مو كافـي
اعصرلك تريـد العيـن اشرب يالـوِلـد صافـي
يالـماخـذ سنين الـروح ميت انته لو غـافـي

يالـ مني خـذاك الموت يمته يمُــه يرحمني
عبـد الله يبعـد الـروح اسمك يُمـه يلچمني


~٠~٠~٠~٠~٠~٠~٠~٠~٠~٠~٠~٠~٠~٠~٠~٠~


بلى حضني فلا ترتاح شلك بلـتُرب درجـع
دلالي ييمـه ايصيح عبد الله لـَــوَن تسمـع
چـانـت امنيه عـالبـال تكبـر بيه مـا تگطـع
تحضرني گلت بلموت من ارويحتي تطلع

تمنيت وأمـل وضنـون بيـدك يُمـه تـدفنـي
عبـد الله يبعـد الـروح اسمك يُمـه يلچمني


~٠~٠~٠~٠~٠~٠~٠~٠~٠~٠~٠~٠~٠~٠~٠~٠~


بالخيمه واجتني النار حرگت ثوبك بأيدي
تيهت الدرب ماشوف واصرخ يُمه يوليدي
طفيت بأديه الثوب شبت نـاري بـ وريـدي
تارس ثوبك الدخان وينك يالچنت عيدي

يالثوبك كحل العيون حزنك و الله شيبني
عبـد الله يبعـد الـروح اسمك يُمـه يلچمني


~٠~٠~٠~٠~٠~٠~٠~٠~٠~٠~٠~٠~٠~٠~٠~٠~


ياوسفه تضل عالگاع والراس بسهم يِنزف
ماشالك رُمح يـ صغير ضلت رگبتك تلصف
يا لب الحشه والروح گاعي والسمه ترجف
حگي دهري لـو يندار حگي دمعتـي تذرف

گلبي يالـوِلد مَسحــون عجبـه يُمـه تاركنـي
عبـد الله يبعـد الـروح اسمـك يُمـه يلچمنـي


~٠~٠~٠~٠~٠~٠~٠~٠~٠~٠~٠~٠~٠~٠~٠~٠~
حيدر العمار الخزعلي
.
.

لحن قصيدة
(كاروكك دليلي)

قصيدة ( بيه ما بيه)

لسان حال السيده سكينه بنت الحسين
(عليهم السلام)

ــــــــــــــــــــــــــــــــــــــــــــــــــــــــــــــــــــــ

بيه مابيـه امشي مسبيـه
وينظر اعليه عمي عباس


:::::::::::::::::::::::::::::::::::::::::::::::::


انـه سكينـه ياعلـي فخــر الصـواويــن
اخذوني بحبال اليسر صوب الدواوين
ضلت عمامي امطشره بأرض الميادين
والـوالد ابـلايه جســد امـوذر آحسين
گاعه مدميه ضلوعه ماهيه
وينظـر اعليـه عمـي عباس


:::::::::::::::::::::::::::::::::::::::::::::::::


يِتئمـر اعليـه الشمـر و يطگنـي ياحـيـف
بمتوني مطبوعه العبه ويتلاهب الصيف
كرهنـي بالمـاي وردت يذبحنـي بالسيف
و للكـافل اعيوني تصد واتمنـه لو طيف
چفوفه مرميه وانه منسيه
وينظر اعليـه عمي عباس


:::::::::::::::::::::::::::::::::::::::::::::::::


محترگه ايدي ياعلي ويلچمهه الحجاب
مالحضه فـارگ يمنتـي مابيـن الاجنـاب
بهدومي دخـان الخيـم متروسـه الثياب
و عيوني مليـانـه رمـل يا داحي البـاب
تُعرف شبيه بگلبي مچويه
وينظر اعليه عمـي عباس


:::::::::::::::::::::::::::::::::::::::::::::::::


جٕـدي بقينـه بكـربله ثَكلات و ايتام
ماعدنه والي ولاخيم ما بين الازلام
بيمن نلوذ وننتخي ياسيف الاسلام
بلكت تمرني هـالمسه ياراعي اللثام
لو إِلك نيـه مُـرنـي ليليـه
وينظر اعليه عمي عباس


:::::::::::::::::::::::::::::::::::::::::::::::::


راس الكفيل البالـقنـه امدخن وحـار
صوبي يصد بحسرته واعليـه ينـدار
ينحب علينه ياعلي متحسف الصار
ينگـط اشوفنـه دمـع سهمـه يـكـرار
عينه مطفيه بنبله مرميه
وينظر اعليه عمي عباس


:::::::::::::::::::::::::::::::::::::::::::::::::
حيدر العمار الخزعلي
.

لحن قصيدة ( بيه ما بيه)
بصوت الرادود سيد سراج الموسوي

نزله
قصيدة ( صاحو الگوم )
ليلة الامام العباس (ع)

ــــــــــــــــــــــــــــــــــــــــ



صاحو الگوم ابو فاضل ضهر
شايل السيف علينه لو سقر


♕♕♕♕♕♕♕♕♕♕♕♕♕♕♕♕♕♕♕♕♕♕♕


اجهنم الحمره بيده والشمره حيدر بصغره سيفه فتاك
يصهر الصخره يذبح بخزره يشمر بظهره و الرگب هاك
بلا احساب لمن غار واتسرفن
يطش روس والجروف ماكفن
غِده الموت على الگاع يتصفن
نزل سيل على الجيش يتفنن
شُمــر نـاس للكـوفــه
ضوه يفوت متشوفه


♕♕♕♕♕♕♕♕♕♕♕♕♕♕♕♕♕♕♕♕♕♕♕


راكب الشگره والهوى بضهره اليبرز يشطره يقبض ارواح
يطعن ويگطع والارض تبلع بالـرگب تسمع بس اجه وراح
فقط روس على الگاع تتكلم
والاجسـام بالاجسـام تتردم
والـرگـاب بـالـرگاب تتلـچم
مُطر موت على الجيش من دلهم
مطر نار دولبهم
مثل خيط عاگدهم


♕♕♕♕♕♕♕♕♕♕♕♕♕♕♕♕♕♕♕♕♕♕♕


غربـل العسكر و الشمـر اصفـر لـونه و تغيـر و الفلك مـال
كونك اتشوفه هزهه بچفوفه وصلت الكوفه طگهه زلزال
طـوى الگاع چـن كتاب يتصفح
والعيون تصد سيف بس يجدح
عـدى الموت و الأجال ما تلمـح
والخيول على الجيـش تتچبـح
فقط موت يسگيهم
والارواح مو بيهـم


♕♕♕♕♕♕♕♕♕♕♕♕♕♕♕♕♕♕♕♕♕♕♕


يـا كُبــر شـانـه النهـر هـانـه زينــة اخـوانـه هـذا عبـاس
واگف بصدره ماشرب قطره العلگمي بكبره جره ياناس
اجـه ويا  ولهلحين يم قبـره
نبع مـاي يهـالناس بالحضره
ابـو الجود اجه بي ومأسره
اخذ صيت كرامات لو تقره
لمن صار يم رجله
دوه الناس والعله


♕♕♕♕♕♕♕♕♕♕♕♕♕♕♕♕♕♕♕♕♕♕♕


صاحب الشاره يچوي بتاره تبقى اخباره واسمه نبراس
گُبته لـنجمـه زلمـه من زلمـه ينطي اليلزمه هـذا عباس
اهــل خيـر تمـد ايـد يـَّـم بـابـه
بلا اچفوف يطش خير بأعتابه
أسـد غــاب مينعـاب بصـوابــه
عِـرگ حـار مينعـاف بطــلابـه
العرب بي تتراضه
قِسـم بي تتقاضه


♕♕♕♕♕♕♕♕♕♕♕♕♕♕♕♕♕♕♕♕♕♕♕


حيدر العمار الخزعلي
.

لحن قصيدة ( صاحو الگوم )
بصوت الرادود سيد سراج الموسوي

قصيدة : ( ريشه بـ صحره )

لسان حال الحوراء زينب (ع)

ـــــــــــــــــــــــــــــــــــــــــــــــــــــــــــــــــــــــ



ريشه بصحره  ..  يبن الزهره  ..  بچفوف الريح
انـه وضعنـك  ..  نسئـل عنـك .. نوگف ونطيـح
مشونه دروب هواي
چتالك يمشي ويـاي
يبن الزهره  ..  يبن الزهره


••••••••••••••••••••••••••••••••••


غصب صارت يبـو الاكبر نـروح ابساع
ويضل جسمك على الغبره تشمه الگاع
الحچي يكتـل لـون ينزل على الاسماع
ردت كـون الأجـل يمـك قبــل الـــوداع

چبدگ جمره  ..  ثيابك حمره  ..  چثه بلاراس
كون بكترك  ..  قبـري وقبرك  ..  يمنـه العباس
يمـك كون اتمنيت
قبري ولا ارد لبيت
يبن الزهره  ...  يبن الزهره


•••••••••••••••••••••••••••••••••••


العطش يكتل لَچـن فگدك يهـد الحيل
نسيت اسمي لمن داست عليك الخيل
الشمس تنزف بقت لأجلك لضه والليل
نصب مأتم و أجت تلطم نجوم آسهيل

حَدب ضهره  ..  آهلال العشره  ..  من المأسات
جوع و حسره  .. خوف وعبره  ..  نار بخيمات
بالحومه اعيال وياي
نسانـه الخـوف الماي
يبن الزهره   ..  يبن الزهره



•••••••••••••••••••••••••••••••••••



مثل ريشه الضعن يحلم يحط يرتاح
الـى جنحك حلـم نرجـع امانـك راح
الحزن يعصف وانه انزف ألم وانياح
صفت بيد الگطع نحرك يزينب صاح

هسه بأمــري .. ضعنچ يسري .. و النـوگ اتسير
ساعه ايطگني  .. ساعه يسبني .. والروح اتحير
كفـالـي ابـــلا چفيـن
وانته مگطع يحسين
يبن الزهره   ..  يبن الزهره



•••••••••••••••••••••••••••••••••••


مشه بضعنك شمر يحـدي تميل النـوگ
شتم حيدر رفـع صوته و عساكر طـوگ
بـده يشتـم بـدت تضحك اصـد احلوگ
صحت وسفه يبـو فاضل اطب بسـوگ

نافخ صدره  ..  عسكر بأمره  .. واعليه افياي
وانه بجمره  ..  نار و حسره ..  و يبدي الماي
يرفع صوته اغتاضيت
و يشتـم بأهـل البيـت
يبن الزهره  ...  يبن الزهره


•••••••••••••••••••••••••••••••••••


زرف قلبي اليطگ متني واعض الايد
اخافـن صوتي لا يطلـع كفيلي ابعيـد
زجـر نـاده يبت حيـدر الاميـر ايـزيـد
بعث كاتب الى العسكر سبايــه انريد

رايد اسره  .. روس وحره  ..  كـاتب مكتـوب
شيب گلبي  .. خلص عمري  ..  والروح اتلوب
مسبيه لقصر ايزيد
وحبال برگبه وأيد
يبن الزهره  ..  يبن الزهره


•••••••••••••••••••••••••••••••••••
كلمات  :  حيدر العمار الخزعلي

.

لحن قصيدة ( ريشه بـ صحره )

قصيدة ( سالم يـ حسين اتمنينه )
نزله


ـــــــــــــــــــــــــــــــــــــــــــــــــــــــــ



سالم يحسين اتمنينه
سالم يحسين اتمنينه


++++++++++++++++++++


سـالم كونـك يابـو الاكبر
مامش دم وگطعت منحر
ولا بتـراب الخـد اتعفـــر
بيض اثيابك يا والينه
سالم يحسين اتمنينه


++++++++++++++++++++


كون اتعـود وصاعـد مُهـرك
مامش حافر خويه بصدرك
لا عطشـان ويلهـب جمــرك
ضِعنه ابفگدك لو تدرينه
سـالـم يـحسين اتمنينه


++++++++++++++++++++


بعدك صرنه بنار وحيره
وين انروح وچف الغيره
فوگ الگاع وانه آيسيره
ريتك تسمع واتحاچينه
سالـم يـحسين اتمنيـنه


++++++++++++++++++++


ريت اترد أشوف الخيمه
بس ارمـاد واحنه ابهيمه
تسئل عَنـك چـم ايتيمـه
عمه حسين الوالد وينه
سـالـم يحسين اتمنينه


++++++++++++++++++++


بَعـد اعيونك يبن البضعـه
بس اسياط وعَبره ودمعه
كلشي ابزينب لأجلك ينعه
خويه اخلافك لاضلينه
سـالـم يحسين اتمنينه


++++++++++++++++++++


بيـن الشـام و بين الكـوفـه
يمشي الموت ويانه انشوفه
ردنـه الكافل ردنـه اچفـوفه
يّرد اوياك شگد تانينه
سالم يحسين اتمنينه


++++++++++++++++++++


روح الزهره انحس ويانه
تباري لـراسـك يا مـولانـه
اسمـع چنهه تـوون تعبانه
يم الراس اتصد اعلينه
سالـم يحسين اتمنينـه


++++++++++++++++++++
حيدر العمار الخزعلي
.

قصيدة ( اجانه الموت)

ليلة القاسم (ع)

لسان حال رمله (ع)


ـــــــــــــــــــــــــــــــــــــــــــــــــــــــــــــــــــــ



اجانه الموت يتخطه على الخيام
گلتله ارجوك تاخذني مثل جسام


•••••••••••••••••••••••••••••••


تمنيتك عـدل يَّـبني و تشاهدني
انه بحيره يجاسم دهري دولبني
حَـي ميـت اريدن هسه تاخذني
اريدك هسه ترجع يبني تشبگني
اريدك يُمه جاسم
تعود وگلبي هايم
اهلهل و الفواطم  ...  تبارك كلهه ليه

يضي العين ما تگدر عيوني تنام
گلتله ارجوك تاخذني مثل جسام


•••••••••••••••••••••••••••••••


شفت راسك يالمعدل صُفگت الايد
هوه يتلاعب بشعرك يا وجه العيد
گطع ضني يالمعتب گطـع الوريـد
اعاتب وانته ماتسمع عتب شيفيد
يـَـ عايفني بعذابي
متـه ينـزل كتـابي
كُبر همي ومصابي  ... مته گلي المنيه

كسـر بالـروح واتمنـه انه بأوهـام
گلتله ارجوك تاخذني مثل جسام


•••••••••••••••••••••••••••••••


اسـولفلك تـريد إسمع شنـو اليصـار
بقيت بخيمتي وحدي واجتني النار
شبگت ثيـابك وانعـه سگفهـه آنهـار
خفتهـه تحترك بيـدي دليلـي احتار
انـه ثيابـك خذتهه
من النار احرستهه
لچن تالي شفتهه  ...  يسلبوهه من اديده

الشمر الثياب سلبهه سِلب الاحلام
گلتله ارجوك تاخذنـي مثل جسام


•••••••••••••••••••••••••••••••


انـه مفجوعه و اتشتم دريت بهاي
طبع صوط الشمر يُمه على مگفاي
يمذبوح العمر عُـگبك سراب المـاي
شنـو تاليتي من بعدك شنو دنيـاي
عـذاب وكلهـه ضلمـه
الحچي گلبك يهضمه
كسر بضلوعي عظمه  ...  رمح ابن الدعيه

عفتني شلون يايُمه وسط الازلام
گلتله ارجوك تاخذني مثل جسام


•••••••••••••••••••••••••••••••


دخلنه الكـوفه نتعثر نگوم انطيح
بلاحيل وفقط خدر نخاف نصيح
وابو الباقر يناظرنه دمومه تسيح
على متنه ويخوفنه هبوب الريح
دخلنه الشام اساره
ركـب كلـه حيـــاره
واريدن يُمــه چاره  ....  يبن خير البريه

مشينه دروب ولحيره دخول الشام
گلتلـه ارجوك تاخذني مثل جسـام


•••••••••••••••••••••••••••••••
حيدر العمار الخزعلي
.