وەکوو من پیرەهەنیش بەدبەختە
یا دەبێتە کەفەنم، یا بە کەوا

چونکە نەوعێکە وەفای یار و حوباب
لە ئەزەل هەردوو ڕجووعن بە هەوا

@Honrave
#سالم

لە کونجی بێ کەسیدا فەردم ئەمڕۆ
زەلیل و زار و بێ هاودەردم ئەمڕۆ

گەواهی لافی عیشقی تۆیە قوربان
سرشکی سوور و ڕەنگی زەردم ئەمڕۆ

لە سۆزی عیشقی سەردی میهری تۆیە
دەروون گەرم و هەناسە سەردم ئەمڕۆ

وەکوو تەیرێکی گوم بووبێ جەناحی
هێلانەواز و هەرداوهەردم ئەمڕۆ

مەگەر سۆزەی نەسیمی وەسڵی ئەو بێ
موعەتتەر کا دڵەی پڕ دەردم ئەمڕۆ

لە عەرسەی وەسفی ئەو مەحبوبە لەنگە
خەیاڵی وەک سوارەی جەردم ئەمڕۆ

لە بۆ وەسڵی جەماڵی یاری کوردی
ئەگەر ڕۆحم نەدەم نامەردم ئەمڕۆ

@Honrave
#کوردی

چیی بەسەر هات تاقی کیسرا، هەیئەتی سوڵتان ڕەشاد
حوکمی هاروونوڕڕەشید و تەخت و بەختی کەیقوباد؟

چەند هەزار ئینسانی نازدار جوملە بوونە خاک و خۆڵ
کوورەییی ئەرزیش سەرا سەر پڕ لە ئیسقانی عیباد

نەسرەت و ماڵی جیهانیش بێ بەقایە ئەی ڕەفیق
عاقیبەت دنیا نەمانە قەت نەکەی فیتنە و فەساد

فرسەتە، عومری عەزیزت بێ سەعی زایع مەکە
تەرکی ئەربابی جەفا کە و ڕێی فەلاکەت مەگرە یاد

@Honrave
#فایق_بێکەس

خەم خەنجەرە و
ئەوەندە دڵ
کەوتووەتە بەر پەلاماری
کون کون بووە وەک شمشاڵێ
بۆیە کاتێ
شوانە وێڵەی شیعرێکی نوێ
قامکی خۆی بۆ ڕادەدێرێ
وا بەسۆز و کوڵ دەناڵی

@Honrave
#جەلال_مەلەکشا

درێخیم لێ مەکە ئەی شەو، بە هێزێ جووتە باڵی ڕەش
زەمینی ژینەکەم یەکسەر بخە ناو سێبەری باوەش

بە سەرما شێوە ڕەشماڵی هەڵیبە جوستەکەم بگرێ
هەتا ئەتوانی پرشنگی ژیانی شادی من ببڕێ

مەهێڵە ڕوو بە ڕووی من بێت بەرەو ڕووی زۆر بە دەربەستی
بچۆ تاکوو لەتواناتا هەیە زووبیکە بەربەستی

بڕۆ هەرچی ئەکەی دەربارەمی کە سا بە چالاکی
پەلامارێکی شێرانە بەرە سەر تیشکی ڕووناکی

بە قامچی گازەرای پشتی سەراسەر توێخی داماڵی
بەرەو دوا بێ ئەوەی سڵ کەی نەوەی ڕووناکی ڕاماڵی

لە ئامۆژگاری ئەستیرە و ڕەشی ئەو هەورە تارایە
کە شێرازەی چنینی چۆتەیەک چی کەت لە بارایە؟

بە گیانێکی نەبەز پڕ دەم ئەڵێم تۆی مل کەچی فەوتان
نەمانە پاشەڕوژی هێزی کاروانانی ڕێ چەوتان

@Honrave
#کاکەی_فەلاح

چل ساڵە من
تەرمی خۆمم لە کۆڵ ناوە
دەیگێڕم و ئەشک ئەڕێژم
ڕێگەی دووری تەمەن ئەبڕم
بستێ خاکم دەست ناکەوێ
ئەم جەستە پڕ لە ئازارەی
تیا بنێژم

@Honrave
#جەلال_مەلەکشا

‍ خۆزگە بەو ڕۆژە کە لەو مەنزڵە وێرانە دەڕۆم
وەکوو مەل لەو قەفەز و دانە بەرەو لانە دەڕۆم

گەرچی لەو ‌ڕێیە دەزانم کە غەریب نابەڵەدە
من بە بۆنی سـەری ئەو زولفە پەرێشانە دەڕۆم

وەکوو با بەو لەشی بیمار و دڵی بێ‌تاقەت
بە هەوای قامەتی ئەو سـەروی خەرامانە دەڕۆم

دڵ لە زیندانی سکەندەر وەڕەزە، ڕزگار بم
تاکوو ئەو جێیە کەوا مڵکی سولەیمانە دەڕۆم

ئەوی سووکبارە خەمی حاڵی گرانباری نییە
من بەهۆی هیممەتی پیرانە مریدانە دەڕۆم

گەر بەسەر وەک قەڵەمێ، ڕێگە بڕۆم بۆ لای ئەو
بەو برینی دڵ و بەو دیدەیی گریانە دەڕۆم

شەرتە کردوومە ئەگەر لەو خەمـە دەرچم ڕۆژێ
بە شێعر خوێندنەوە تا دەری مەیخانە دەڕۆم

بەهــــەوای چاوی بە ڕەخسـین و سەما وەک زەڕڕە
تاکوو سەرچاوەیی ئەو خــۆرە درەخشانە دەڕۆم

گەر وەکوو حافزی لەو دەشتە نەشێ ڕێ ‌دەرکەم
لەگەڵ ئەو بار و بنەی ئاسەفی دەورانە دەڕۆم

@Honrave
#حەقیقی

لە تاوی تۆیە فرمێسکم ڕژاندن
هەواڵی مەرگی تۆ جەرگی وژاندن
چ نامەردێکە ڕۆژگاری من و تۆ
لە یەک دەم دا دڵ و دیدەی هەژاندن

@Honrave
#ئەمیر_ڕەشیدی (#دڵبەخوێن)

تۆ دەزانی بۆ چی یادی دڵبەری ڕەعنا دەکەم
مەیلی بەدنامیمە بۆیێ کاری بێپەروا دەکەم

سەر لەسەر سەودایی تۆ و دڵ لە پایی پێیەکەت
بۆ چمە جانا سەر و دڵ، هەر دوویان ڕیسوا دەکەم

موڵکی میسرم بۆ چییە، گەر ماهی کەنعانم هەبێ؟
چم لە بازاڕی زولەیخا، یووسفی سەودا دەکەم

چاوەکەم چاوم لەبۆ چاوی تۆ خوێنباری دەکا
وا منیش هەر لەحزە بۆ تۆ شین و واوەیلا دەکەم

مەیلی من هەر مەستی و ڕەندی و شاهیدبازییە
وا لەبەر میحرابی ئەبرۆت تاعەت و تەقوا دەکەم

من لەدەست دنیایی دون و عالەمی وا بەدعەمەل
ڕوویی شکوا وو تەوازوع بۆ شەهی بەغدا دەکەم

سافییا هیران وەکوو نیرانە، جیرانی جەحیم
سا کە وا بێت و تەوەکول دائیما بە خودا دەکەم

@Honrave
#سافی_هیرانی

#گۆرانی
دەڕۆم/ بۆکان هەورامی
شێعر: #حەقیقی
@Honrave

ئەی ئەو کەسەی دەتپەرەستم و لێم ونی
تۆ خودا نی تۆ خۆشەویستی منی

لە ئاسمان نی تا وێت ڕانەگا دەستم
لەقاف نی کاڵەی ئاسنت بۆ هەڵبەستم

تۆی لەمن ون کرد و منی لە تۆ دوور
ئەو بستۆکەی دوژمن ناوی نا سنوور

@Honrave
#هێمن

ئەبرۆیی کەشیدەت لە پەنا توڕەیی سەودا
ماهێکی نەوە؛ گۆشەیی کێشاوە لە شەودا

فەرمووتە: دەبێ گیان بەفیدای تیغی برۆکەم
ئەی ماهی دوو هەقتە؛ بەمنت موژدەیی نەودا

خاڵ و خەتی بەر ئەو گەردەن و سینەت
شایستەیە سەد تەعنە؛ لە خاڵ و خەتی کەو دا

ئەمشەو، کە گوتم: دەردی دڵم، چی هەیە دەیڵێم
حەیفێ؛ کە دەمی وەسڵەتی تۆ، کورتە لە شەودا

نەمزانی چییە سیڕی دەهانی وەکو نوقتەت
خۆی نوقتەیی مەوهووم و جیهان قەیدییە لەودا

هەمدەرس کەنین: بەختی من و چەشمی سیاهت
بۆچی وەکو: یەک ڕۆژ و شەون،هەردوو دەخەودا!

سۆفی؛ کە دوێ مەنعی ئەمەی کرد و مەلامەت
ئەمڕۆ لە خەراباتە؛ عەمامەی لە گرەودا

هەرچەندە مەتاعی سوخەن؛ ئەم عەهدە کەسادە
ئەمما گوهەری شیعری ئەدەب هەر لە برەودا

@Honrave
#عەبدوڵڵا_بەگی_میسباح_دیوان
#ئەدەب

دڵبەری، نازپەروەری، ڕووئەنوەری، مەهپارەکەم
نەونیهال، ئەبرۆ هیلال، شیرین جەمال، نازدارەکەم

مەهروویی، موشکین موویی، چاو ئاهوویی سەحرای خوتەن
سوور گوڵە، موو سونبولە، ماهی پەری ڕوخسارەکەم

جانی جانان، شاهی خووبان، ڕەهزەنی پیر و جەوان
گوڵ ڕووە، شیرین خووە، شۆخی شەکەر گوفتارەکەم

چاوی کاڵە، لێوی ئاڵە، ڕوو بە خاڵە، دڵبەرم
زوڵفی خاوە، لێم بە داوە، یارەکەی ئەغیارەکەم

چەندی بێ مەیلیم دەکەی، سەد هێندە مەفتوونم لە بۆت
جارێ ڕەحمێکت نەبوو دەرحەق دڵی خەمبارەکەم

بەسیە بێڕەحمی بە قوربان، پایەماڵی غەم بووم
ڕێی نەجاتیم بۆ نییە گەر تۆ نەبی غەمخوارەکەم

ئەشکی چاوم ئەرزی داگرت، دوودی ئاهم ئاسمان
بۆیە وا ڕەش داگەڕا لەو ئاهی ئاتەشبارەکەم

وا لە جێی نێشی خەدەنگت تا بە ڕۆژی حەشرەوە
خوێنی لێ دەڕژێ بە دائیم لەو دڵی زامدارەکەم

سافییا سا حاڵ پەرێشانیم لە غایەت دەرچووە
ڕووحەکەم ڕەحمێ بکە بەو شین و گریە و زارەکەم

@Honrave
#سافی_هیرانی

دڵ نەخۆشی دەردی هیجرە، جانی جانانم وەرە
لەت لەتە جەرگ و هەناوم، ماهی تابانم وەرە

عیللەتی دەرد و شەفاکەم وا بە لێوی شەککەرت
مایەیی ژین و حەیاتم، دەرد و دەرمانم وەرە

سەد شوکر دووبارە جەژنە، وەختی عەیش و شادییە
بۆ بەڵا گەردانی باڵات، قۆچی قوربانم وەرە

دڵبەرەی قەد عەرعەرەی بێ ڕەحمەکەی بەدبەختەکەم
دڵ ڕفێنەی شۆخەکەی بێ عەهد و پەیمانم وەرە

نازەنینەی سوخمە ئاڵەی دیدە مەستەی کەچ کولاهـ
گوڵعوزارەی شۆخ و شەنگەی شاهی خووبانم وەرە

@Honrave
#تاهیر_به‌گی_جاف

دەردی دڵی خۆم جوملەیەکی بێنمە تەقریر
ئنس و مەلەک و جن و پەری دێنمە گریان

بێ شک موتەحەیر دەبێ، دێوانە لە زنجیر
سەد عاقڵ و هۆشیار ئەخەمە کێو و بیابان

@Honrave
#شێخ_نوری_شێخ_ساڵح

مەگەر ئەو ساتە وا پڕژا بە سەرما گەردی گیان دەرچوون
یەخەی چاری ڕەشم بەردەم، لە گیانی خۆم بڵێم ئۆخەی

@Honrave
#ئیسماعیل_موختاری

@Honrave
شێعر: #ئیسماعیل_موختاری
خوێندنەوە: #شیوا_ئەمینی