tgoop.com/Hussein_s_b/749
Last Update:
بويه احن كل ليله يحسيني
بويه تعال ارحم دمع عيني
بويه الك يامن يوديني يبويه
نسيتوني ذكرتوني
شسولفتو ابدربكم
يهل شلتو ولا كلتو
وحيده عفتو بتكم
بكل ضنه أنه اتمنه
الي ناگه بضعنكم
بويه الدمع يم الغرب يضيع
يالرحتو من الشيبه للرضيع
يا گلبي هود كتله ما يطيع
يا ثگل اليل بلوه
وياگعدتنه الحلوه
اذكر يحسين .... وتصب العين
____
بويه بعد شبچيلك اعيوني
بويه يهضموني الينشدوني
بويه اوياكم ما خذيتوني يبويه
ماحنيت الي اشتاگيت
وديلي علي الاكبر
اخدمكم ولا املكم
بروحي شكثر مااگدر
البعد بلوه اجي سلوه
لعبدالله وعليه اسهر
حن گلبي حيل لگعدت البنات
چم ليله مرت وحدي ابات
ما ينحمل داري بلا خوات
يا داري الصار يخنك
وگلبي حسين امن ايدك
اذاني الشوك ... وكلبي المحروگ
____
بويه السبي للضلت ابدارك
بويه سبتني گطعت اخبارك
بويه احرگتني بالبعد نارك يبويه
ضعيفة حال البعد چتال
عفت طفله وحيده
جمر فرگاك اريد اوياك
احترگ لو ضل بعيده
الحگوني طفه لوني
ومحد مدلي ايده
يالرايح ودرب الضعن طويل
عالباب اتاني وطولي ضل يميل
واسمع صرت من كربله عويل
انحب يل عفتوني
الطف الموت اخذوني
بگلبي اترجاك ... للموت اوياك
____
بويه انام احلامي ترعبني
بويه افز وحيره تاخذني
بويه جفاكم حيل تعبني يبويه
بكل سوره الك صوره
شفت بالمصحف هواي
بحلامي حلم ضامي
باجر تعطش الماي
وتتجوه وتتلوه
بصحاري ومالك افياي
عجل يبويه بالشرب اگول
تركض ركض من تلفي الخيول
ونومك على الغبره اضن يطول
المن احچي اسم الله
لنحرك لو عبد الله
شتريد الماي ... لو عوز افياي
____
بويه العطش لو لاحك وجاسك
بويه يعني اعله الرمح راسك
بويه شتصيح بأخر انفاسك يبويه
عطش باجر وظهر عاشر
ينشف كل الخيام
وشكو جربه تضل صعبه
تفطر بيها السهام
بحلم شفتك اذبلت شفتك
مفطره وضامي اتنام
و وسادتك من الرمل تصير
ويا غربتك جن حيرتي تحير
وخيل وزلم صوب الخدر تغير
وزينب عمتي اوحيده
لو فرت بالبيده
وتريد اخوان ... كل النسوان
____
حسين سعد البهادلي
محرم الحرام1446
https://www.tgoop.com/Hussein_s_b
BY الشاعر حسين سعد البهادلي
Share with your friend now:
tgoop.com/Hussein_s_b/749