tgoop.com/Hussein_s_b/756
Last Update:
عباس خويه.... .طولت عالنهر
ضلمت خيامي.... وماكو غيرك گمر
شو گمت احسن.. بالظهر انكسر
ويلي... ادركني اسمعت
ويلي... گمتلها وطحت
ويلي... وبدربك تهت
الجدم ما عاناني ليك
مكسور وامشي كوه...... شلون اوصلك واجيك
الخيم عفت ومعتنيك
من اجي واوصل وگومك... تكدر تمدلي اديك
خويه.. الخويه بس منك ردت
خويه.. احلى منها ماشفت
خويه.. يل گلتها شو متت
___
عايفني خويه...... واني عفت الخيم
لاضل محامي... ولا بقالي علم
سور البنيته......بطيحتك انهدم
طايح.. سبع الگنطره
طايح.. جفوفك عالثره
طايح.. وضهري كاسره
الدمع من عيوني سال
عاد حاچيني يهضمني.. لو سكوتك خويه طال
مابقه اعله حسين حال
ما ترد استوحدوني..... وهل عدو بحسين عال
خويه.. يذبحونه الماله اخو
خويه.. دمعه ايضحك العدو
خويه.. اخو مثلك وين اكو
___
مخنوگه روحي... وضاك بيه الصدر
من بعد عينك.... كلشي بالدنيا مر
حسين وخيامه... ما يضل للعصر
رايح.. وحسين انوله
رايح.. محد ضل اله
رايح..امن الضعن كافله
شلون اعوفنك وادير
عيني يالمادرت عينك.... مني وبعدك احير
تدري بعدك باليصير
لو طحت وخيامي طاحت.. غاره لخيامك تغير
خويه.. گوم بيرق ألنه شيل
خويه.. گبل لا طولي يميل
خويه.. ياهو الزينب كفيل
___
وشلون اعوفك...فراگك شگد صعب
ومنك اردن........ بالدموع التصب
وتدري شماته.... بحالتي هالغرب
نايم..عالشاطي بضمه
نايم..راعي الموزمه
نايم..ومطفيه السمه
خويه تنطرني البنات
ترجعي وچفي بچفك...... مو جفوفك عالفرات
شنهي تنفعني الحياة
وكلشي عگبك خويه غمض.. كلشي عگبك خويه مات
خويه.. بعدك بحيره صفيت
خويه.. وسفه عالدنيا مشيت
خويه.. شكثر لحسينك وفيت
__
حسين سعد البهادلي
محرم الحرام1446
https://www.tgoop.com/Hussein_s_b
BY الشاعر حسين سعد البهادلي
Share with your friend now:
tgoop.com/Hussein_s_b/756