tgoop.com/Hussein_s_b/758
Last Update:
ابجي غربتك .. وسلوه عيوني بس بجيك
بعيني وحدتك .. امن تنادي محد رد عليك
وجرحي نادتك.. وتأشر الزينب بديك
باخر نفس تاشر الوداع..وشفت الضياع
وعينك درت لمخيمك
تصيح اقصدوني وانت طريح..تگوم وتطيح
تريد العده ترجع الك
الحرم نادن عليك حسين
ويهزك صوتها النسوان
تريد تگوم ويمنعك
بخصرك چم سهم نيشان
تدگ اعله الارض مهضوم
عازه عازت الخوان
دمعك نزل وتشوفه كل الوادم
مكسور يالكاسر ظهر كل هاشم
(فابك الحُسين..إن كنت باكيا لشيئ)
___
غربه الضعن..والخوف دب ابنينوه
حگهن البچن..يتنطرن ضامي ارتوه
تالي اطلعن ..من المهر سرجه التوه
ورد المهر ينادي الخيام..ضل جسم امام
عاري الضليمه بالفله
وچم عقيله طاحلها دار..ولحگتها نار
ويلاه مصايب كربله
طلعن من خدرهن هيج
مثل سرب الگطه فرن
يدورن جسمك بيا صوب
تعبن وشكثر دورن
حرمه لاذت بحرمه
التعثر كلهن يعثرن
ابجي الحرم ويطول بچيي اعليهن
شافن عذاب امن المهر رد ليهن
(فابك الحُسين..إن كنت باكيا لشيئ)
__
حيره كربله..نسوان تبرز من خدر
بيها عايله .. بين الحوافر والجمر
ضعن كافله.. بس العليل ومنكسر
يصد الخواته مشبوحه عين..ويصرخ حسين
شاف الرمح بس انهدم
فرن يعمه صعبه يگول..بس الخيول
ماترحم اطفال وحرم
ياهضمت عليل الطف
يشاهد عيلته تركض
حسين الخيل رضت بيه
وركض عماته بيه ايرض
يگلهن لوذن بعباس
ودربهن خيل بيه تعرض
ضعن الله بالهيمه تضيع اطفاله
وخلصوا سحگ بحوافر الخياله
(فابك الحُسين..إن كنت باكيا لشيئ)
___
ابجي الك اخت..لا حامي لا كافل صفت
همها لو شفت .. لوحدها بالطف من بقت
امنيتي ماعفت..جسمك تنادي من مشت
كوه تعوفك اعله الفرات..عدها بنات
والحادي مضعن بالهزل
ماتن خجل يشوفن حبال..جفوف الدلال
مايرهم اعلهين حبل
كلشي يهون والماهن
زينب تركب اعله النوگ
ومو عباس صعدها
انحنى السجاد وي الطوگ
يصعد عمته ومصيوب
يلچمه كل جدم محروگ
دير بعيوني اي جرح ترضالي
وهضم الغوالي من توادع غالي
(فابك الحُسين..إن كنت باكيا لشيئ)
____
حسين سعد البهادلي
محرم الحرام1446
https://www.tgoop.com/Hussein_s_b
BY الشاعر حسين سعد البهادلي
Share with your friend now:
tgoop.com/Hussein_s_b/758