tgoop.com/Hussein_s_b/768
Last Update:
خويه اجينه
گوم خويه اتلگه اختك
يالرحت عنك وصلتك
گوم شوف شصار بينه
مو مثل مارحنه جينه
لاتنشادني اعله حالي
حالي يغني عن سؤالي
وتشرح الحاله الضعينه ..خويه جينه
شتنشد اعله مدللاتك
هسه احسبهن بناتك
واكتفي بس بَسكينه..خويه جينه
لاتناشد عن رقيه
لاتناشد عن صفيه
وعن شريفه وخوله وين
خويه عفنه بكل بخرابة
اطفال عندك ميتين
اطفال ماتو ودفنتهم
اطفال خويه ضيعتهم
اطفال تاهو ياحسين
وبس دمعنه بمثل مارحنه اجينه
وناگع الهدم ابچينه..خويه اجينه
والتقينه
خويه مثل اللهفة ذيج
اركاض رحنه
وركض عالگبر انچفينه
والفرق نار وهزيله
كوه عالهزله ركبنا
وكوة نزلت الضعينه
افتحلي اديك افتحلي صدرك
خلي اشمك .. ارد اضمك..وما الجمك
ارد اعيدك اوصية امك
من بعد رحلة سبينه..خويه جينه
واخيراً .. راح نكعد يم اهلنه
واخيراً .. راح يتلملم شملنه
حسين وين الي كفلنه
شكثر مشتاگه العلمنه
لا روينه ابماي بعده
ولا التذينه بشربنه
شكد عطشنه
ويحرم اعلينه اذا غيره طلبنه
حسين وين الكفلنه
گوم خويه انطينه اديك
وخلي نعرج للمدينه
وهيه حيرة شلون ننطيك الادين
تهضمك اثار الحبال
البسبي ربطت ادينه..خويه جينه
آه خويه كون تدري
الممشه گوه ابلايه رايه
التمشي لا طلاب عدها
والستر بس العبايه
تمشي سكته
تبچي سكته..الماله اهل يگضيها سكته
توسطت حيرة اعله حيرة
الروس كدامي خذوها
خويه وثمانين طفله سحگت دروب المنايه
شكد عفت خويه ورايه
المهم انته.
وما دريت اشصار بينه..خويه جينه
الشام ما خله النه حيله
ما بقة لا حيل لا لون
وانت شوف شصار بم عون
رحت منك هاشميه
ابابه سموني سبيه
نوب كالو خارجيه
واني ماريدن اهضمك يگصر الساني
بكلامي ..هناك عرفوها الاسامي
وكاموا يصيحون خويه بالاسامي
المهم يمك هل وصلنه
المهم يمك هل رجعنه
البيت ابونا عاد ردنه
وداعت امي شكد تعبنه
بدرب بيه ضاع الي يحدي
هيمه تكضي وهيمه تبدي
هواي صاير ماكعدنه
وگبرك مفيي علينه..خويه جينه
شلون اعوفك هسه گلي
شعندي اردن للمدينه
ياهو عندي المن اروحن
حسين ياكلشي بحياتي
وهسه ضاع امن ايدي كلشي
يا أمل خدري وخواتي
ريت اموتن يمك وانهي حياتي
ارتاح بلكي
وما اعيشنك عذاب لحد مماتي
بيك نبدي
وهسه يمك وانتهينه ..خويه جينه
____
حسين سعد البهادلي
https://www.tgoop.com/Hussein_s_b
رجوع الضعن الحسيني الى كربلاء..
BY الشاعر حسين سعد البهادلي
Share with your friend now:
tgoop.com/Hussein_s_b/768