tgoop.com/KADMTAMALBNEN/15526
Last Update:
قصيده لفقد الأهل والاحباب
اليفگد احباب الگلب
اعيونه عالراحو تصب
حال اليودع اعزازه
ياويلي چنه اجنازه
اخ أمن الفراگ. اخ أمن الفراگ
،،،،،،،،،،،،،،،،،،،،،،،،،،،،،،،،،،،،،
ريه اونَفس چنه گبل ابخيمتهم امغطينه
ماودعونه من مشو الفرگتهم اتأذينه
ماندري روحتهم زعل والهالسبب ناسينه
جمرة زعلهم ماطفت صبح اومسه تچوينه
احسن نموت اوياهم
ماينحمل فرگاهم
اخ أمن الفراگ. اخ أمن الفراگ
،،،،،،،،،،،،،،،،،،،،،،،،،،،،،،،،،،،،
احسن نموت اويالمشو وبصفهم ايوسدونه
ياهو البعد بينه يمر بس همه ماينسونه
لحضه اوغفل عنه ارحلو ابنص الحزن خلونه
وياهم اخذو كل فرح ابضيم اوقهر عافونه
صبح اومسه ابذكراهم
ماينحمل فرگاهم
اخ أمن الفراگ. اخ أمن الفراگ
،،،،،،،،،،،،،،،،،،،،،،،،،،،،،،،،،،،،،
نذكر سوالفهم گبل ذاك الضحك والونسه
اعزاز الگلب يالغربو گلولي منهم شنسه
مخفيه ونت هالگلب صرخاتي ضلت خرسه
واليفگد احباب اواهل ماظنه يطلع حسه
اسوالفهم اوملگاهم
ماينحمل فرگاهم
اخ أمن الفراگ. اخ أمن الفراگ
،،،،،،،،،،،،،،،،،،،،،،،،،،،،،،،،،،،،،
ذيچ السوالف ماترد اوياهم مشت فرحتنه
بنگابه ملفوف الگلب ناصبه عزه العشرتنه
راحت بعد يادنيتي ماظن ترد لمتنه
ونضل نناشغ چن طفل ومن الگلب نشغتنه
ما ننسى ابد طرواهم
ماينحمل فرگاهم
اخ أمن الفراگ اخ أمن الفراگ
،،،،،،،،،،،،،،،،،،،،،،،،،،،،،،،،،،،،،
يبست شرايين الگلب لمن فگد أحبابه
عنه احنه شبساع ارحلو وتوسدو ال اترابه
اصوابه دلالي كلف ماظن يطيب اصوابه
نار اوتشب وسط الضلع ماتنطفي لهابه
حيف التُرب غطاهم
ماينحمل فرگاهم
اخ أمن الفراگ. اخ أمن الفراگ
،،،،،،،،،،،،،،،،،،،،،،،،،،،،،،،،،،،،،
خادمة ام البنين عليها السلام
ام محمد تقي الموسوي نسألكم الدعاء و الفاتحه لروح والدتي جزاكم الله خيرا
https://www.tgoop.com/KADMTAMALBNEN
BY قناة ام البنين سلام الله عليها بأشراف العلويه ام محمد تقي الموسوي
Share with your friend now:
tgoop.com/KADMTAMALBNEN/15526