tgoop.com/Ketbeb_mender/3443
Last Update:
♥️♡:｡.｡ እዮሪካ ｡.｡:♡♥️
ክፍል ፲፩
✍ደራሲ - አብላካት
ስታጨስ እና ስትጠጣ እየዋለች መብላት እሚለው ነገር ትዝም አይላትም ብዬ ስላሰብኩኝ ቤቱ ውስጥ የነበረውን ስጋ ጠባብሼ ከሻወር ስትወጣ አብረን በላን፤ ስንጨርስ እቃውን አነሳስቼ በዛውም ለእማዬ ለመደወል ወጣሁኝ ስመለስ ሳቢ ልብሷን እየለባበሰች ነበር...
"ወዴት ነው ?"
"እነ አቤላ ደውለውልኝ ውጪ ስለሆንን ትንሽ ተዝናንታችሁ ትመለሳላችሁ ኑ ብለው ነው"
"እሺ" ..ብያት መኪና ውስጥ ገብተን ሄድን። ቦታው ላይ ስንደርስ እነ አቤላ እየጠበቁን ነበር እውነት ለመናገር ናፍቀውኝ ነበር ካገኘኋቸው ትንሽ ቀን ሆነኝ ጩኧታቸው እብደታቸው ሁሉ ነገራቸው ይናፍቃል ግን አቤላ ዛሬ ልጋብዛችሁ ያለው ስለከፋው ነው ምክንያቱም ሁሌም ሲከፋው ቅር ሲለው ብቻውን ላለመሆን ሲል ልጋብዛችሁ የሚለን። የዋህ ነው ሁሌም እኛ እንጂ እኔ እሚል ቃል ከአፉ አይወጣም ግን ሲበዛ ድብቅ ነው ስሜቱን መናገርና ማሳየት አይፈልግም አቤላን ግቢ ስንገባ ነው የተዋወኩት መጀመሪያ አካባቢ ቀንደኛ ጠላቶች ነበርን በምንም ነገር አንስማማም ነበር አንድ ላይ ስንሰበሰብ እነ ሳቢ በፀባችን ከመማረራቸው የተነሳ ቀድመው እንዳንጣላ ያለ የሌለ መሀላ ያስምሉን ነበር። እየቆየ ግን አፉ እንጂ ልቡ መጥፎ እንዳልሆነ ተረዳሁኝ ስሜቱን ለመደበቅ ይናገራል እንጂ ከቆየ በኋላ ምን እንዳለ እንኳን እያስታውስም.....ዛሬ ግን ንግግሩ ሳይቀር ቀዘቀዘብኝ ። ሶስቱ ለመዝናናት ሲወጡ ጎራ ወደ ሚሉባት ግሮሰሪ ግብተን አንድ ሁለት ማለት ጀመርን የአቤላ ጉዳይ ስላስጨነቀኝ መጠጣችንን ይዘን መኪና ውስጥ እንድንቀመጠ ጠየኩትና ተነስተን ሄድን።
"ለምን እዚህ መጣን ?" አለኝ
"ምንድነው ያስጨነቀህ ነገር ?" አልኩት ቀጠል አድርጌ
"ኧረ ምንም ምን ሊያስጨንቀኝ ይችላል"
"አትዋሸኝ ምን ተፈጥሮ ነው ካልነገርከኝ ዳግመኛ አላናግርህም" ብዬ ወጥሬ ያዝኩት
"በቃ በሀኒ ምክንያት ነው" አለኝ። ሀና የአቤላ ፍቅረኛ ናት ከጎንደር Scholarship ወደ ካናዳ ደርሷት አንዳንድ ፕሮሰሶችን ለመጨረስ ሸገር ስትመጣ ነበር የተዋወቁት። በአጭር ጊዜ ውስጥ አመታትን አብረው አሳልፈው ከሚዋደዱ ሰዎች በላይ ተዋደዱ ጊዜ የፍቅር መለኪያ እንዳልሆነ ነበር ያስተማሩን...ግን ችግሩ አሁን ሀና ከአንድ ወር በኋላ ትምህርቷን ጨርሳ ትመለሳለች ግን አባቷ ከጎንደር ከመውጣቷ በፊት ጨርሳ ስትመለስ እሳቸው የመረጡላትን ሰው እንደምታገባ እና ይህንን ቃሏን እንዳታጥፍ በአባቶች ፊት ቃል እንዳስገቧት ገና ድሮ ነበር የነገረችን ግን ይሄንን ያህል ይከራል ብለን ማናችንም አላሰብንም ነበር ዛሬ ግን አባቷ ደውለው ቃልሽን እንዳትረሺ እንዳሏት እንደነገረችው ነገረኝ። ምን ይሉታል ይሄን ምንስ መፍትሄ ይበጅለታል መላ ቅጡ የጠፋ ነገር ምን ብዬ እንደማወራው ሁሉ ግራ ገባኝ ግን ብቻዬን ላፅናናውም መፍትሄ ልፈልግም አልችልም ስለዚህ...
"አቤላዬ ያለህበት ሁኔታ ይገባኛል ግን እመነኝ ሁላችንም ተመካክረን አንድ መፍትሄ አናጣም አትጨናነቅ አሁን ሁሉም በስካር መንፈስ ውስጥ መው ያሉት ነገ ግን በስነ-ስርዓት ሁላችንም ተሰብስበን መፍትሄ እንፈልጋለን መቼም እኛ እያለን አንተ አታዝንም" ብዬ አቀፍኩት...
"አመሰግናለሁ ቃልዬ ከማንም በላይ ባንቺ እተማመናለው" አለኝ...እያወራን እያለን እነ ሳቢ መጡ
"እእ ምን ሆናችሁ ነው ጥላችሁን የመጣችሁት"
"አየሩ ይቀዘቅዛል መኪና ውስጥ እንሁን ብዬው ነው" አልኳት
"በቃ እንንቀሳቀስ ሰዓቱ ስለሄደ እኛን እኔ ቤት አድርሱን" አለ ይሴ። እነሱን እሱ ቤት አድርሰናቸው እኛ ተመለስን ስንገባ ሳቢ ደክሟት ስለነበር ሄዳ አልጋው ላይ ዝርግ አለች እንቅልፍ ሲወስዳት ጠብቄ ጫማዋን አወላልቄላት ተኛች። ልተኛ ወደ አልጋው ስወጣ ስልኬ እየጠራ ነበር ሳየው ማይለፍ ነው ብዙ ጊዜ ደውሎ ግን ሳይለንት ስለነበር አላየሁትም ሳነሳው...
"ይቅርታ ከመሸ እረበሽኩኝ እንዴ ?"
"አይ ችግር የለውም ይቅርታ ስላላየሁት ነው"
"እሺ። እስካሁን አልተኛሽም እንዴ ?"
"አዎ ከጓደኞቼ ጋር አምሽቼ አሁን ገባሁኝ"
"አይ ደስ ይላል እኔማ ሳታነሺ ስትቀሪ ምን ሆና ነው ብዬ ነው"
"ሳይለንት ነበር ይቅርታ።" ብየው ብዙ ነገር አወራን ዘፈን ጋብዘኝ ብየው እየዘፈነልኝ ምን ሰዓት እንቅልፍ እንደወሰደኝ ሳይታወቀኝ ደህና እደር እንኳን ሳልለው ነበር የተኛሁት። ጠዋት ላይ እንደነቃሁኝ ለማይለፍ ይቅርታ ብዬ ቴክስ ከላኩለት በኋላ ለቁርስ እሚሆን ነገር ሰራርቼ ለራሴ በላሁኝና ሳቢን ከምቀሰቅሳት ብዬ አስቀምጬላት ልብሴን ለመቀየር ወደ ቤቴ ሄድኩኝ.... በሩን የከፈተችልኝ ሊዲያ ነበርች...
"ሰላም አደርሽ እመቤቷ" አለችኝ አፏን እያሽሟጠጠች
"ፈጣሪ ይመስገን" ብያት ወደ ውስጥ ገባሁኝ። ሳሎን ውስጥ የእንጀራ አባቴና ሳሙኤል ተቀምጠው ነበር አልፊያቸው ወደ ክፍሌ ልገባ ስል....
"ሲያሻሽ እምትመጪበት ሲያሻሽ የምትቀሪበት ቡና ቤት እኮ አደለም ይሄ የተከበረ ሰው ቤት ነው እንዴት ብትንቂን ነው ጭራሽ አድረሽ እምትመጪው !" ብሎ የእንጀራ አባቴ በቁጣ መንፈስ ተናገረኝ የመመለስ ፍላጎቱ ስላል ነበረኝ እንዳልሰማ ሆኜ ላልፍ ስል ግን ሳሙኤል አባቱን ተከትሎ የተናገረው ንግግር ከጆሮዬ ላይ አቃጨለ
"እሷ ምን ታድርግ የማንንም ዲቃላ እዚህ እንድትኖር ፈቅደን እኮ ነው እሚሰራትን ያሳጣት!" ሲል ሳይታወቀኝ ከአይኖቼ የእምባ ዘለላዋች የወርዱ ጀመረ..... በማን ቤት እየኖሩ ነው እኔን ዲቃላ ለማለት የበቁት? በአባቴ ቤት ተንደላቀው እየኖሩ አባቴ ደም ተፍቶ ወገቡ እየጎበጠ ባቆመው ቤት ላይ እራሳቸውን እንደ ባለቤት ሲቆጥሩ ነደደኝ በዛችው ቅፅበት ከቤቴ ውስጥ መንቅሬ ባሶጣቸው ምነኛ ደስ ባለኝ ነበር ዛሬስ አላልፋቸውም ብዬ ለመናገር ፊቴን ሳዞር የአማን የሳሎኑን በር ተደግፎ ቆሟል እሱ ፊት መናገሬ የገቢ መስሎ ስላልታየኝ ንዴቴን ዋጥ አድርጌ ወደ ክፍሌ ገባሁኝ። የያዝኩትን ቦርሳ አልጋው ላይ ወርውሬ ግርግዳው ላይ ወደ ለጠፍኩት የእመቤቴ ምስለ- ስዕል አጠገብ ተንበርክኬ ስቅስቅ ብዬ አለቀስኩኝ እንደሌላው ደፈር ብዬ ሲናገሩኝ እንኳን መልስ እንዳልሰጥ ይሄ ትንሽ ልጅ እና መውጫ ቀዳዳው ጠፍቷት ሌት ተቀን የምታለቅሰው እናቴ አስረው ያዙኝ። ሰው አክብሮ ዝም ሲል እንደ ፈሪ እና ሞኝ በሚቆጠርበት ውጥንቅጡ በወጣ አለም ላይ እየተኖረ ሰው እንዴት ጥሩነትን ያስብ ሰው እንዴት በጎ ይስራ መልካም የሰራ ሳይሆን የተሳደበና ያንቆሸሸ አፉን የከፈተ ሁሉ የሚነግስበት ፣ ሰርቶ ከተለወጠው ይልቅ ዘርፎ የተመፃደቀው የሚከበርበት ፣ አንገቱን ደፍቶ ዝምታን ከመረጠው ይልቅ መርዛማ ንግግሩን የሚረጨው የሚሞገስባት ሆድና ጀርባ በሆነች ምድር ላይ እንዴት ነው መኖር የሚቻለው ? አሁንስ ታከተኝ ህይወቴ ሁሉ እየፈጩ ጥሬ ሆነብኝ ነጋ ጠባ እማይሻሻል እየተመለሰ እዛው የሆነ ህይወት።
ይቀጥላል........
ቀጣዩ ክፍል እንዲለቀቅ እያነበባችሁ አስተያየታችሁን አድርሱኝ
ለአስተያየት - @Yetomah_Bot
✯┄┅┅✿❀♥️❀✿┅┅┄✯
@Ketbeb_Mender
@Ketbeb_Mender
✯┄┅┅✿❀♥️❀✿┅┅┄✯
BY የብዕር ጠብታ✍📒📖
Share with your friend now:
tgoop.com/Ketbeb_mender/3443