tgoop.com/KhalidAzizi/1105
Last Update:
سیمینارێکی حیزبی دیموکراتی کوردستانی ئیران لە پارلمانی ئوسترالیا
پێش‌نیوەڕۆی ڕۆژی پێنج‌شەممە ١ی سەرماوەز (٢١ی نوامبری ساڵی ٢٠٢٤) سمینارێکی تایبەت لە سەر پرسی کورد لە ئێران لەنێو پاڕلمانی ئوسترالیا بەڕێوە چوو. لەو سمینارەدا کە لەلایەن کومیتەی حیزبی دێموکراتی کوردستانی ئێران و لۆبیی کورد لە ئۆسترالیا ڕێک‌خرابوو، ژمارەیەک پارلمانتار، سەناتۆڕ و سیاسەتمەداری ئوسترالی بەشدارییان تێدا کرد و وتاریان دا.
لە سەرەتای سیمینارەکەدا خاتوو "ژینا لینۆکس"، بە نوێنەرایەتیی لۆبی کورد لە ئوسترالیا باسێکی گشتیی لەسەر پرسی سیاسی و هەلومەرجی ئەمنیەتیی کورد لە کوردستان و سیاسەتی دەوڵەتانی حاکم بە سەر چارەنووسی کورد لە هەموو بەشەکانی کوردستان پێشکەش کرد.
"باوە ڕەزایی"، بەرپرسی کومیتەی حیزب لە ئادلایدی ئۆسترالیا دووهەم کۆڕگێڕی سیمینارەکە بوو کە باسەکەی بۆ هەڵدانەوەی کارنامەی تێرۆریستیی سپای پاسداران لە کوردستان، ئێران، ناوچە و جیهان تەرخان کردبوو و پێداگریی لەسەر پێویستیی بە تێرۆریست‌ناساندنی سپای پاسداران لەلایەن هەموو وڵاتانی ئازاد و دێموکراتیک و یەک لەوان ئۆسترالیا کرد.
لە بڕگەیەکی دیکەی کاری سیمینارەکەدا وتاری ڤیدیۆیی "خالید عەزیزی"، وتەبێژی حیزبی دێموکراتی کوردستانی ئێران پێشکێش کرا. خالید عەزیزی لە وتارەکەیدا سەرەتا ئاوڕی لە دۆخی شەڕ و ناسەقامگیرییەکانی ناوچەی ڕۆژهەڵاتی نێوەڕاست و دەور و کاریگەریی کۆماری ئیسلامی لە هەموو قەیرانە سیاسی و ئەمنییەتییەکانی ناوچە و پەرەدان بە تێرۆریزمی دەوڵەتی دایەوە، و دوایە بە ڕوانگەیەکی ڕەخنەگرانەوە تیشکی خستەسەر سیاسەتی کۆمەڵگەی جیهانی لەهەمبەر کۆماری ئیسلامی لە ڕابردوودا و گوتی ئەگەر وڵاتان و کۆمەڵگەی جیهانی بەوەخت و لە کاتی خۆیدا لەبری سازان و نەرمی‌نواندن لەگەڵ کۆماری ئیسلامی لەهەمبەر سیاسەتی دەستدریژکارانە و قەیرانخوڵێنیی ڕێژیم لە وڵاتانی ناوچە و پاڵپشتیی لە تێرۆریزمی دەوڵەتی هەڵوێست و کاردانەوەی گونجاو و وەڵامدەریان هەبا و لێپرسینەوەیان لێ‌کردبا، ئێستا ڕێژیم نەیدەتوانی بەمشێوەیە ناوچەی ڕۆژهەڵاتی نێوەڕاست لە ئاگری شەڕ و ململانیی خوێناوی و ناسەقامگیریی سیاسیی بەربدات.
وتەبێژی حیزبی دێموکرات لە بەشێکی دیکەی وتارەکەیدا بە ئاماژەدان بە کۆی قەیرانە سیاسییە نێوخۆییەکانی ئێران لە سۆنگەی دەسەڵاتداریی کۆماری ئیسلامییەو و یەک لەوان سەرکوتی مافی نەتەوەکان، باسی لە بەرنامە و سیاسەتەکانی حیزبی دێموکراتی کوردستانی ئێران کرد. بەڕێزیان لەو بەشە لە وتارەکەیدا ڕایگەیاند حیزبی دێموکرات باوەڕی وایە چارەسەری پرسی کورد و نەتەوەکانی دیکە لە ئێران و هەروەها نەهێشتنی هەڵاواردن و قەیرانەکانی ئەم وڵاتە دێموکراسییە. ئەو دێموکراسییەش کاتێک سەقامگیر دەبێ کە نیزامی سیاسیی داهاتووی ئێران لەسەر بنەمای هاوبەشی و بەشداریی نەتەوەکان و هەموو جۆراوجۆرییەکانی ئەم وڵاتە بنیات نرابێ. هەروەها یاسای بنەڕەتیی وڵات وێڕای داننان بە ڕاستییەکانی کۆمەڵگەی ئێران و فرەچەشنییەکانی، دەستەبەری ماف و ئازادییەکانی هەموو پێکهاتەکانی ئەم وڵاتە بکات و ڕەنگدانەوەی دێموکراسیی تەوافوقی لەسەر بنچینەی بنەما دێموکراتیکەکان بۆ هاوبەشیی سیاسیی هەموو جۆراوجۆرییەکانی ئێران بێت.
کۆڕگێرێکی دیکەی ئەم سیمینارە "سەلاح پوورئەسەد"، بەرپرسی کومیتەی حیزب لە ئوسترالیا بوو کە باسەکەی بۆ تیشک‌خستنەسەر دۆخی نالەباری پەنابەرانی کوردی ئێرانی و دژبەرانی سیاسیی کۆماری ئیسلامی بەتایبەت لە کورستانی عێڕاق کرد کە لە ماوەی ساڵانی ڕابردوودا چەند جار کەوتوونەتە بەر هێرشی مووشەکیی کۆماری ئیسلامی و دەیان کەسیان شەهید و بریندار بوون. بەدوای ئەودا خاتوو "ڕووناک ڕاد"، ئەندامی حیزبی دیموکراتی کوردستانی ئێران لە وتارێکدا دۆخی نالەباری ژنانی کورد و ئێران و هەروەها پێشێلکردنی مافەکانیان لەلایەن حکوومەتی کۆماری ئیسلامیی خستەبەر چاوی بەشدارانی سیمینارەکە.
لە بڕگەیەکی دیکەی سیمینارەکەدا "گراهام پیریت"، نوێنەری پارلمانی فیدرال باسی لە سیاسەتی دەوڵەتی ئۆسترالیا لەهەمبەر کۆماری ئیسلامی کرد و گوتی لە دوو ساڵی ڕابردوودا ٢٠٠ ئەندامی سوپای پاسداران و بەڕێوەبەری دادگاکانی شۆڕشی ئیسلامی لەلایەن وڵاتەکەیەوە خراونەتە لیستی تێرورەوە و لەو بارەیەوە هەنگاوی زیاتریش دەنێن و گوشارەکانمان لەسەر کۆماری ئیسلامی زیاتر دەبێت.
لە بڕگەیەکی دیکەی سیمینارەکەدا سەناتوڕ "پۆڵ سکار" لە وتارێکدا ڕایگەیاند سوپای پاسداران هێزێکی تێرۆریستییە و پێویستە بخرێتە لیستی تێرۆرەوە، و ئێمەش هەوڵی خۆمان دەدەین ئەو ئامانجە وەدی بێت.
BY Khalid Azizi (خالید عەزیزی )
Share with your friend now:
tgoop.com/KhalidAzizi/1105