tgoop.com/KhalidAzizi/1110
Last Update:
🔹بەشداریی وتەبێژی حیزبی دێموکرات لە دوو کۆبوونەوەی پارلەمان و وەزارەتی دەرەوەی سویس
بە بەشداریی نوێنەرانی حیزبی دێموکراتی کوردستانی ئێران لەگەڵ کەسایەتییە سیاسییەکانی وڵاتی سویس دوو کۆبوونەوە بەڕێوە چوون.
ڕۆژی سێشەممە ٢٧ی سەرماوەز کۆبوونەوەیەک بە بەشداریی وتەبێژی حیزبی دێموکراتی کوردستانی ئێران، شاندی کۆمیتەی حیزبی دێموکرات لە سویس و چەند نوێنەری پارلەمانی سویس، لە شاری بێڕن، تایبەت بە هەڵسەنگاندنی بارودوخی کورد لە ڕۆژهەڵاتی کوردستان بەڕێوە چوو.
بەڕێز خالید عەزیزی لە قسەکانیدا لەم کۆبوونەوەیەدا تیشکی خستە سەر چەند دەیە خەبات و تێکۆشانی حیزبی دێموکراتی کوردستانی ئێران لەپێناو وەدیهێنانی ئازادی و دێموکراسی بۆ کوردانی ڕۆژهەڵاتی کوردستان.
بەڕێز عەزیزی بە ئاماژەدان بە دۆخی هەنووکەیی ناوچەکە و سیاسەتە شەڕەنگێزییەکانی کۆماری ئیسلامی ڕایگەیاند کە ئەم دۆخە تەنیا بە لەنێوچوونی کۆماری ئیسلامی کۆتایی پێ دێت و جەختیشی کردەوە کە کۆتاییهێنان بە کۆماری ئیسلامی پێویستی بە پشتیوانیی بەربڵاوی کۆمەڵگەی نێوەدەوڵەتی و دەسەڵاتەکانی ئورووپا و ئەمریکا هەیە.
وتەبێژی حیزبی دێموکرات لە بەشێکی دیکەی قسەکانیدا پەرژایە سەر تاوانەکانی کۆماری ئیسلامی بە دژی ژنان و کچان، بەتایبەتی ئەو تاوانانەی کە پاش بزووتنەوەی "ژن، ژیان، ئازادی" ئەنجام دراوە و لە کۆتاییشدا ڕەوشی نالەباری ئازادی و بژیوی ژیانی خەڵکی ئێران و ڕۆژهەڵاتی کوردستانی بۆ نوێنەرانی پارلەمانی سویس شی کردەوە.
چیمەن بارام میرزا بەرپرسی کۆمیتەی حیزبی دێموکرات لە سویس و هێژا مەنگوڕ بەرپرسی پێوەندییە دەرەکییەکانی حیزب لە سویس، یاوەریی وتەبێژی حیزبی دێموکراتیان لەم کۆبوونەوەیەدا کردووە.
هەر لەم ڕۆژەدا و پاش ئەم کۆبوونەوەیە، بەڕێز خالید عەزیزی سەردانێکی وەزارەتی دەرەوەی سویسی کرد و کۆبوونەوەیەکیشی لەگەڵ جێگری وەزیری دەرەوەی ئەو وڵاتە بەڕێوە برد.
لەم کۆبوونەوەدا باس لەسەر پێداگرییەکانی حیزبی دێموکراتی کوردستانی ئێران بۆ گەیشتنی گەلی کورد لە ڕۆژهەڵاتی کوردستان بە مافەکانیان کراوە و هەروەها داوا لە ناوەندە سیاسییە ئورووپاییەکان کراوە تاکوو یارمەتیدەری خەڵکی ئازادیخوازی ئێران بن و گوێ لە خواستەکانیان بگرن.
پێشێلکارییە مافی مرۆییەکانی کۆماری ئیسلامی بابەتێکی دیکەی کۆبوونەوەکە بووە کە باسی لە سەر کراوە.
