tgoop.com/ML_mahhde/11493
Last Update:
اتعذبت روحي بغيابك......فاجئتني
وانه منتظره اعله بابك .....عودتني
اشلون يامسلم تروح
كلبي عايش بالجروح
●●●●●●●●●●●●●●●●●●●●●●
ضاعت أحلام العمر...
..باقيه المن انتظر
تالي يذبحني الهجر
..........وانه صبحي بلا ندى
يحفر بخدي الدمع....
.بلا ابو احني الظلع
ليش بالكوفه انفجع..
..............والهضم بعدك سده
ينلچم عمري برحيلك .....لو عفتني
عايشه ابنبضة دليلك.........عودتني
چفي بعدك ما يلوح
كلبي عايش بالجروح
●●●●●●●●●●●●●●●●●●●●●●
يلچم ابروحي الجرح
ليلي ظلمه بلا صبح
صدري بالهم ينشرح
.................ميته بحضان الدمع
تكسف اكبالي الشمس
جرحي بالون ينغرس
لو يرد ليلي بأمس
..............بويه بس اشعل شمع
عگرت چنهه السحابه.......بلايه مطره
ردت بس شمة ثيابه......محلى عطره
سري بس يمك يبوح
كلبي عايش بالجروح
●●●●●●●●●●●●●●●●●●●●●●
يوسفي بحسره انتظر
روحي اطشنهه نذر
بويه ما ظل كل صبر
.....................نار بيه اموجره
ضاكت انجوم الفضا
عمري خلص ونگضه
كلشي بيه مضعضه
................ليلي ابقى مساهره
الفاتحه اقره بحياتي .....يا هضيمه
ليش ماتت امنياتي...... چن يتيمه
دمعتي صارت سفوح
كلبي عايش بالجروح
●●●●●●●●●●●●●●●●●●●●●●
خنگه بنفاسي الهوه
ابعيني ماشوف الضوه
كلبي بالحسره انچوه.....
................وانت ما ظنك ترد
مسلم اشلون الخبر
اشكد رسايل انتظر
خايفه ابكلبي الهجر
.............. كلبي جمره مابرد
ياوسف رحت من اديه........وانه اناطر
اجويعده ابدرب المنيه .......بس اكابر
دمعي يحچيلك نضوح
كلبي عايش بالجروح
●●●●●●●●●●●●●●●●●●●●●●
ذابح امالي الدرب
رايحه الديرة غرب
انه مسبيه انحسب..
..... ...........طبت الكوفه انلچم
العيس ما يرحم جرع
حيره بالكوفه الوضع
ليش دربك بس شمع
............وانه بس حيلي انهدم
ليش من قصر الاماره..........بهل الرزيه
حشمت وين الغياره.......اعله الوطيه
بويه جا المن اروح
كلبي عايش بالجروح
●●●●●●●●●●●●●●●●●●●●●●
تمت بعون الله
#خادمكم ●●يوسف الفتلاوي
https://www.tgoop.com/ML_mahhde
BY قصائد والحان الرادود مهدي الزينبي
Share with your friend now:
tgoop.com/ML_mahhde/11493