tgoop.com/Musawi96/577
Last Update:
لسان حال السيده زينب ع تخاطب اخيها الحسين ع
نار الخيم تشبه تره النار الاحس بيهه
كل خيمه يمي تشتعل بدموعي اطفيهه
من ودعاني حسين ،،، لا ما رحمني البين
١
اول محطات الهجر / يالتارك ابكَلبي جمر
يالنايم ابحر الظهر / هجرك مصيبه
راحت اخيتك للسبي / ويكَود بيهه الناصبي
وسفه اصبحت بنت النبي / تالي غريبه
اخيتك من عفتهه ظلت ابحيره / محد يفزع الهه
بعدك كَيدوهه من رحت يحسين /وصار احمر حبلهه
حته الكَلب لمن رحت دكَاته تاذيني
من غمضت عينك بعد ماغمظت عيني
عايفني رايح وين / لا ما رحمني البين
٢
مر بيه لو لحظه بحلم / عندك ردت يصبح علم
اختك مشت وي الزلم/ راحت اسيره
والموت اجتني ساعته / والنفس صرت ابعازته
وداعة الكَطعو يمنته / بدر العشيره
صحت يحسين وينك مادريت اشصار/من طاحت خيمنه
احشم يخوتي ومحد يرد اجواب / وبلا جف علمنه
راسك اشوفه اعله الرمح ويعاين اعليه
والجان اسمهه اخت الكَمر سموهه مسبيه
من كَطعو الجفين / لا ما رحمني البين
٣
من اليسر ظهري انحنه / وكل لحظه اعدنهه ابسنه
مثل اليهاجر موطنه / روحي بغيابك
لمن رحت راح العمر / الكَلبه انكسر ماينجبر
اتمنه اشمنك عطر / وشتم ثيابك
مثل يعقوب صرت اتنطرك ترجع / يالرحت امن اديه
انسلب حته قمصيك مالحكَت اعليه / وأنه ردته اليه
كلشي انسلب بيه احس من سلبو الخاتم
وجسمك ولامنهم سلم ماظل شبر سالم
بعدك متت مرتين ،،،، لا ما رحمني البين
٤
موقف صعب كلش شفت / من بعده حيل اتعذبت
ماتت رقيه اعله الطشت/ يم راس ابوهه
بحظنك يبوهه اشكَد غفت / وياك هيه اتدللت
وعله الدلال اتعودت / مادللوهه
راسك بالطشت وتشاهده بحسره / ويظربونه يمهه
يزيد ايصيح خلو اكَبالهه هالراس / خل يكثر المهه
وي كل نفس ونه وحزن نسمعهه حسرتهه
وتنادي راحو كل هلي ومحد بقه عدهه
نستمع الهه اونين / لا ما رحمني البين
٥
طبينه للشام برمح / لمن طلعناهه بجرح
وكل خطوه بيهه انذبح / ماتنسه الشام
كل واحد ايصد ابحقد / نظرتهم اتيبس الجلد
وانه عله ايتامي اصد / عيني اعله الايتام
حرت عندي يتامه من يباريهم / صرت امهم وابوهم
احس يصعب عليه هالنفس يحسين / لمن يظربوهم
وسفه وبناتك بالغرب كَدامي ضربوههن
وبلا سبب وبلا ذنب ياخويه شتموههن
ظلينه محتارين / لا ما رحمني البين
تمت : الشاعر سيد احمد الموسوي
BY الشاعر احمد الموسوي
Share with your friend now:
tgoop.com/Musawi96/577