tgoop.com/Musawi96/583
Last Update:
لسان حال مولاتي زينب ع تخاطب اخيها أبا الفضل العباس ع
اودعنك بحساس ،،،، يمن بيك الانفاس
اخويه ورفعة راس ،،،، كافلي. كافلي
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
عباس اعرفنك كفو والشمر تسحگ جيشه
والله انته عنهم تختلف انته اعله راسك ريشه
ادريك ماتهتم ابد بجيش العده وتجييشه
ولو رحت يم المشرعه اعليهم تسود العيشه
ضرب سيفك محلاه ،،، عليك الله الله
رحت فدوه اليمناه ،،، كافلي. كافلي
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
لمن صعدت اعله المهر گتلك يخويه الله وياك
مو سيف شلت بيمنتك عصاة موسى بيمناك
والجيش كله انشق الك وشق البحر صار اهناك
وانه اصيح امنل خيم حياك خويه حياك
شكثر بچيت اعيون ،،، وهلگت اشچم فرعون
الحُسين گلك ممنون ،،، كافلي. كافلي
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
الرايه عله متونك علت امن بعيد ضلت تنشاف
يل منك اتخاف الزلم وعليك ابد ماينخاف
يل يمك يحير الوصف يل تحمل اهواي اوصاف
لمن گعدت اعله النهر. خضرلك اشچم صفصاف
بچفوفك شلت الماي ،،، وتغير لونه هواي
خجل من السقاي ،،، كافلي. كافلي
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
رايح وعرفك ما ترد واشتاگلك راح اهواي
وأعطش ويكتلني العطش الشوفتك مو للماي
ميهمني لو مرني التعب ماشفت راحه بدنياي
ودرب اليسر لامو صعب مادام راسك وياي
ولا عجبه لو صار ،،، الرمح من راسك حار
الگمر چنه الكرار ،،،، كافلي. كافلي
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
بعدك يدخلونه بقصر وملتمه هل وادم تره
ولاما يهموني الزلم اختك تراهه معتبره
يمهم اصيح بكل بفخر انه اخت سبع الگنطره
انه اخت ذاك الگمر المثله ولا جابت مره
غداً وبنص الناس ،،،،، اذلهم والعباس
اطگ كل راس براس ،،، كافلي. كافلي
تمت الشاعر سيد احمد الموسوي
BY الشاعر احمد الموسوي
Share with your friend now:
tgoop.com/Musawi96/583