tgoop.com/Musawi96/601
Last Update:
ابشع جريمه بحق الانسان
من عدهه رايح تبدي الاحزان
عدنه علم من مقتل الزهره
يبدي وجعنه وتكبر الحسره
زينب انه المهضومه احچي بحرگه ومالومه
امي ماتت مضلومه الزچيه الزچيه
خلف الباب ودفعوهه وعله الحايط عصروهه
وبچف حاقد سطروهه الزچيه الزچيه
الزهره ماتت من ضربهم والحجر اذاهه
وبطنهه چان ابنهه ومات هم وياهه
الله لاينطي السقيفه والگعد جواهه
ماتت وما ناشف دمعهه
وبلا ذنب كسرو ضلعهه
وتكسرت من شدة العصره
يبدي وجعنه وتكبر الحسره
:::::::::::::::::::::::::::::::::::::::::::::::::::::::::::::::::
الله اليستر من باچر راح يصير الماصاير
رايح يكسرني العاشر بعدهه بعدهه
راح حسين يذبحونه وخنصر چفه يگطعونه
فوك الگاع يطشرونه بعدهه بعدهه
بالحوافر حسين اخويه رايح يدوسونه
والدمه تارس لحيته وجامد اعله اعيونه
والله وسفه بالحصيره تالي يلمونه
باچر الحسره اتزيد بيه
لو عنه سئلتني رقيه
گلب البنيه شنهو اليصبره
الديرة غرب امشي سبيه
وماينسه يبقه اليسر ذكره
يبدي وجعنه وتكبر الحسره
:::::::::::::::::::::::::::::::::::::::::::::::::::::::::::::::::
شفته الموقف گدامي وينعاد بحرگ اخيامي
اتشب النار اعله ايتامي يويلي يويلي
ياهو الرايح يحمينه والخيمه اتطيح اعلينه
وعباس ابلا چفينه كفيلي كفيلي
ياگلب يحمل غيابه لمن يجافيني
من يگلي خويه زينب بعد متشوفيني
ادعي ربي الهيچ لحضه عدله ليخليني
ما ينحمل فگد الاحبهم
اتمنه لو ميته قبلهم
والله عليهم بالگلب جمره
يبدي وجعنه وتكبر الحسره
:::::::::::::::::::::::::::::::::::::::::::::::::::::::::::::::::
الذابح محسنه اسم الله باجر يذبح عبدالله
من عدنه يروح بغفله حسافه حسافه
والكاروك يسلبونه بسوگ الشام يبيعونه
گبال عيوني يعرضونه حسافه حسافه
هاي الاطفال اشذنبهم خاطر يذبحونهم
الموت بيد الله نعرفه وهمه ميخلونهم
يعني يعادون الله لمن يكتلونهم
من مات محسن وامه بالباب
منهه وعرفنه معنى الإرهاب
ومنهه الضلم صار واخذ مسره
يبدي وجعنه وتكبر الحسره
:::::::::::::::::::::::::::::::::::::::::::::::::::::::::::::::::
ما صارت بس هل مره حيدر چف ايده بخصره
گاعد يبچي اعله الزهره الحبيبه الحبيبه
يصرخ وينچ يم بيتي تردين البيت امنيتي
اتمنه اسمع رديتي الحبيبه الحبيبه
لمن ماتت بعينه صارت ضلمه كل اسنينه
من فگدهه من بعدهه من يگوم انعينه
ياهضيمه بلا خيمه من مشت ضلينه
چانت بوسط البيت زهره
بوكت الغروب اتصير گمره
حته النفس مانگدر نجره
يبدي وجعنه وتكبر الحسره
:::::::::::::::::::::::::::::::::::::::::::::::::::::::::::::::::
الضالم ميضل كل عمره لابد يوم الله يدثره
غايب عدنه وننتضره يجينه يجينه
ياخذ ثار المضلومه وثار المسلوبه هدومه
وثار الركضن بالحومه يجينه يجينه
باچر المهدي يجينه ويبني گبر الزهره
واليزور الزهره يعني راح حج وعمره
الف هنياله اليجيهه ويشم عطر الحضره
صحن الزچيه يصير جنه
لا والله ما ينشبع منه
وهنياله كلمن زارهه مره
يبدي وجعنه وتكبر الحسره
تمت الشاعر سيد احمد الموسوي
BY الشاعر احمد الموسوي
Share with your friend now:
tgoop.com/Musawi96/601