Бүгүн, ахсынньы 8 күнүгэр, Майаҕа сылдьан, улуустааҕы бэтэрээннэр сэбиэттэрин, улуус Ытык сүбэтин активтарын кытта көрсөн, элбэх сытыы боппуруостары ырытыһан, санаа атастаһан, ирэ-хоро кэпсэттибит.

Аҕам саастаах биир дойдулаахтарым интэриэһиргиир боппуруостара киэҥ, сүрүн болҕомтолорун олохтоох бэйэни салайыныы биир тиһиктээх былаас ситимигэр көһөр реформатыгар сыһыаннаах федеральнай сокуон олоххо киириитигэр уларыйыылар, олохтоох дьаһалта үлэтэ-хамнаһа, билиҥҥи ыччат дьарыктаах буолуута о.д.а.

Онтон салгыы «Кыталык» РФ үтүөлээх коллектива, үҥкүү норуодунай ансаамбыла 45 сылыгар аналлаах «Дьол кэрэһитэ "Кыталык"» диэн үҥкүү түһүлгэтигэр ыалдьыттаан, саха үҥкүүтүн искусствота үрдүк чыпчаалга тиийбитин сөҕө-махтайа, киэн тутта көрдүбүт.

Саха норуотугар уһулуччу суолталаах, саха култууратын, искусствотын үрдүк чыпчаалга таһаарбыт, саха үҥкүүтүн ис тыыннаабыт, ураты суолталаабыт «Кыталык» норуодунай ансаамбыл бары көлүөнэ үөрэнээччилэрин, уһуйааччыларын ис сүрэхпиттэн эҕэрдэлиибин! Инникитин да «"Кыталыктар" дуо?», – диэн кэрэ кэпсээҥҥэ киирэ тураргытыгар баҕарабын.

Төрөөбүт-үөскээбит Мэҥэм сирэ талааннаах дьонунан баай, Һаханы һаха дэппит киһи гиэнэ кэрэмэстэрэ, саха саарыттара олорон-үөскээн ааспыт, билигин да дойдуларын туһугар олохторун аныыр талба талааннаах дьонноох-сэргэлээх мааны дойдулаахпыттан куруутун киэн туттабын!