tgoop.com/Omwiessam/1907
Last Update:
قصيده فزاعيات حماسيه حول وفاة السيده زينب ع
-------------------------------------------
ما تلحگوني
احشمكم يخوتي ما تلحگوني
احشمكم يخوتي الليله اتحضرون
يم راسي تجوني كلكم اتونون
تدرون الاخت لو شافت اخوان
تفرح و الامنازع بيها هم ايهون
كلش اثگيله
انازع و المنيه كلش اثگيله
انازع وحدي و الروح رادتكم
جا يمته تجون لصوب اخيتكم
حنيت المسيه و هايمه اهواي
و تلجم بالگلب لوعتني فرگتكم
حيل تاذيني
فرگتكم یخوتي حيل تاذيني
صدگوني گضتني و منها متأذيه
و بعد عالنوح و الون ابد ما بيه
كافي هالعمر خلصته شوغات
تالي بالغرب محد گصد ليه
تالي لوحيدي
اموت بأرض غربه تالي لوحيدي
حسافه الوحدي ما يمي دفانه
و نعشي ايريد هذا اليوم خوانه
هاي الناس ما بيهم رحم لا
يسموني الغريبه ومال عوانه
اتريد عوانه
تدرون الجنازه اتريد عوانه
امنين الليله اجيبنكم تحضروني
ابعاد ادروبكم يا فتشة اعيوني
تمنيت النعش انتو التشيلوه
و هاي الغاليه بونكم تسموني
گضت تعبانه
اريد اللي يصيّح گضت تعبانه
اريد اللي يصيّح مشت مهضومه
و من امصابنه لليوم ملجومه
ما فد يوم گلبي بطل النوح
عليكم ما هديت و حيل مالومه
حدي لهنانه
خويت من البواجي حدي لهنانه
-------------------------------------------------------
*تمت بأقلام خادمات اهل البيت ع*
*✍ آلــشــاعرة 🎤 والملا رغــد البهادلي*
✍آلــشــاعرة رغــد ام وسام الفرطوسية*
ذمة عدم حذف الاسم وغير مبرئ الذمة كل من ياخذ من الكلام وينسبه له
https://www.tgoop.com/Omwiessam
BY الشاعرة رغد ام وسام
Share with your friend now:
tgoop.com/Omwiessam/1907