موشح الليله الرابعه

آية الله العظمى هاي ام البنين
مرجع الدمعات والون والحنين
_____________________________

بيها محتاره القوافي والكلام
لن مدحها ما يجيده بس امام
شحچي عن دمعاتها اعليها السلام
من مثلها ما جرت بالدنيا عين
_____________________________

مثل دمعتها فلا مقله تسيح
لا يهود او لا اسلام او لا مسيح
انت هم سامع دمع ينزل جريح
او يوجع امن ايطيح من المقلتين
_____________________________

وفّت اويه احسين كل حق الوفاء
بين الاضلوع احملت طف كربلاء
سال من عدها الدمع گد الدماء
السالت ابطف كربله من الوتين
_____________________________

قدمت لحسينها افلاذ الچبد
ساده بس لحسين واحدهم عبد
منهم العباس بالله اشتعتقد
القدمت عباس كم تهوى الحسين !!؟؟
_____________________________

حسين عدها فرض والكل نافله
يا عشگها الوين واصل مرحله
كل بني آدم جمع ما توصله
لا ولا تدركه بعد طول السنين
_____________________________

كلشي بيها ايحير اصحاب العقول
خاف اسولف عنها وابياتي تطول
من وفاها املاك ضلت في ذهول
وين مثل ام الگمر دلوني وين
_____________________________

من مثلها الله ما خالق احد
ولا مثل عباسها ابيوم انولد
قسمن بل قل هو الله احد
وفه البيها ما انوجد بالعالمين
_____________________________

ابو فاطمة الطائي

موشح الليله الخامسه

وين هاشم عنه وين اشبولها
مسلم اتجره العده بخيولها
_______________________

وين هاشم مادرو مسلم وحيد
التمت الكوفه عليه نار او حديد
انذبح والكوفان عدها الليله عيد
عل جنازه ضل تدگ اطبولها
_______________________

آخ عن مسلم شسولف شرد اگول
يآل هاشم دگو ابموته طبول
بين الاسواگ اسحلت جثته الخيول
امصيبه اليشيب الطفل من هولها
_______________________

امصيبته منها يشيّب كل فؤاد
وين عنه اشبولكم يهل السداد
گومو اخذو الجثه من شر العباد
ابهمّه والمالت اعدلو احمولها
_______________________

اوحيد ياويلي وگع وين الكرام
امغيمه الكوفه او عليه تمطر سهام
امن السطح دفوه او رضوله العظام
مارعو طاها النبي مرسولها
_______________________

ما رعوله حرمه لا عدهم قيود
يا فعلهم ما تسويّه اليهود
ويه مسلم جاوزو كل الحدود
والسوالف تجرح امن انگولها

_______________________

گومو للكوفان يليوث العرين
جسد مسلم يا حسافه ضل رهين
اخذوها لجنازه وافزعو امفرعين
اشويه كافور او سدر جهزولها
_______________________

ادفنوه او جيمو يم گبره عزاء
لنه يستاهل دمعنه ايهل دماء
مسلم اول تضحيه ابطف كربلاء
او جثته من دمه صار اغسولها
_______________________

ابو فاطمة الطائي

موشح الليلة السادسه

اعليهم ادموعي يضل جاريها
انصار ابو اليمه يويلي اعليها
_____________________________

ألهم الون والمدامع والنحيب
الضحو الدم النحر دون الغريب
عابس او جون او ابو الرايه حبيب
كون دمعاتي دمه ابچيها
_______________________

مثل اصحاب الكهف واكثر نقآء
فتيةُُ آوو الى طف كربلاء
ربّنا هبنا لبن فاطم وفاء
هاي دعوتها الذي تدعيها
_______________________

والفرق آوو لچن موش الكهف
للمعاره وادخلوها ابكل شغف
نادو اويه احسين موتتنه شرف
او دونه ذله هل حياه نگضيها
_______________________

دون الحسين ابذلو كل النفيس
دون ابو السجاد كل غالي رخيص
بيش اوصفهم يعالم بيش اقيس
او همه اعله المرتبه حاويها
_______________________

زلم كلفين او فلا همهم عدد
اگبالهم سبعين الف طلبو مدد
او همه بس سبعين واحد عالعهد
اجيوش اميه ترجف امخليها
_______________________

كل فرد منهم وگف بالحومه طود
تربية حيدر زلم مليانه زود
گضو حگ الغانمه او وفو عهود
شمس صارو للدرب تضويها
_______________________

اشموس صارو ما لها ابدن افول
اتزول كل الدنيه اسمهم مايزول
حازو اعله مرتبه ابحب البتول
اويهنياله الفاطمه يرضيها
_______________________

ابو فاطمة الطائي

موشح الليلة السابعه

زينب ابعباس يا هنيالها
او يا سلام الله على كفالها
_____

يا سلام الله على راعي العلم
مثله ما شافت فحل كل الامم
من بعد عباس قد جف القلم
ولا يجي مثله ابطويل اجيالها
_____

نفل والكل الشدايد عنده حل
والدليل اعله النهر شوف اشحصل
اربع آلاف الكشفهم واستحل
الشاطي والعسكر عمد إذلالها
_____

استحلّ الشاطي ما هَمّه العدد
والشوارب صارت اتدور مدد
اشجع الشجعان من عدهم شرد
ولبست اثياب النساء ارجالها
_____

ابو فاضل ذل عساكرهم جمع
خله بس صوت النوايح ينسمع
وعلي مو كربله چن يوم الفزع
كفو من ليث الوغه وخيّالها
_____

كفو من بدر الهواشم والعرب
ادخيل الله عل نهر لمن غَضب
نار كبره او روسهم تصبح حطب
وابجهنم ينتهي ترحالها

_____

حيد منهو ايجابله ويتصده له
الضربه من سيفه تگول الزلزله
او خزره اعيونه الشجاع اتجندله
ثابت او بالعركه مثل اجبالها
_____

ليث غاب او بالعرايك ما يفر
مبتسم وجهه او ملامحهم صفر
چنه سجيل وصدع روس الكفر
هو هادمها أو ابن چتالها
_____

والله يا هنيال زينب عل گمر
نهر من الغيره من الحب نهر
رخص الها اعيونه وايده والنحر
لجل ما واحد يشوف اخيالها
_____

ابو فاطمة الطائي

موشح الليلة الثامنه

جاسم اعليه المدامع جاريات
لحد ما هل روح يغشيها الممات
_______________________

آه يا عريس ما تم له الفرح
شاب واگبال امه عطشان انذبح
ثوب عرسه اعليه دم نحره انسفح
ويلي او ذبلن رسومه الزاهيات
_______________________

ذبلن ارسومه الچان اشمحّلاه
باول اسنينه لچن الطف خذاه
بچّه ابو اليمه او گلب رمله چواه
يا حزنها اعليه هد الراسيات
_______________________

ساعد الله أمه من تبچي او تحن
تنعه. والحلو الجهامه امست تون
لا هي ميته او لاهي عدله او تستچن
فگد جاسم ما ترك شي بل حياة
_______________________

ارد اواسيها واهل مُر الدمع
عله ابنها والطم واخسف ضلع
لا تهنه ابحنه لا ياس او شمع
اترسن صينية دموع النادبات
_______________________

مثل كوكب دري واگع عل تراب
جرع واويلاه الوان العذاب
عطش وارماح او بواتر والنشاب
او شمس من عدها ايغلي ماي الفرات
_______________________

موش مال الآم هاذه ابن الدلال
ليش دم واتراب ضيع هل جمال
اشلون اوصفه والشعر وي دمعي سال
اضلوعي وابيات الشعر متهدمات
_______________________

عله جاسم ما بقگت مهجه وانوح
ريت عمري فدوه لعيونه يروح
جرح جاسم كلف مو مثل الجروح
السمه ونت له او تنوح الراسيات
_______________________

ابو فاطمة الطائي

موشح الليلة التاسعه

علي الاكبر طاح محزوز الوريد
او جيش أميه اعلنو هساعه عيد
__________________________

اگبال عين الوالد اوليده انصرع
گبل ما يوگع ابو اليمه وگع
صاح بويه ياعلي گلبي انشلع
راح حيلي او كل عظم بيه يبيد
__________________________

احسين ضل ايطيح بل ممشه او يگوم
اگباله لاچن يشعر ابّعد النجوم
شاب راسه او گلبه ذاب امن الهموم
وصل لبنه اتگول جايه من بعيد
__________________________

لونه متغيّر اعيونه غايرات
اطرافه ترجف والمتون امهدلات
اتمدد اويه ابنه او يشم بل وجنات
شابگه او چنه غده وياه شهيد
__________________________

عله خد ابنه يحط خده او يون
والله حزنه مثله ما صاير حزن
حتى عرش الله غده الحاله يحن
ايگله اگعد ليش عايفني وحيد
__________________________

ايگله اگعد شوف حالي ياعلي
راسي شيب والگلب نار ايغلي
آنه غيرك بويه يا بويه شلي
آخ ياطف كربله مني اشيريد
__________________________

آه ياطف كربلا فت مهجتي
چبدتي انت او خذاها چبدتي
اعيوني طاحن موش طاحت دمنعتي
يا نظر عيني بعد نوحي اشيفيد
__________________________

مايفيد النوح لو نوحن دهر
يامن اصوابك كسر مني الظهر
متت ظامي ياعلي او ذاك النهر
مايه جاري لاچن اعليه عنيد

__________________________

ابو فاطمة الطائي

موشح الليله العاشره

الليلة آخر ليله مضويه الخيام
الليله اشِبعن شوف من وجه الامام
___________________________

الليله ملتمات ربّات الخدور
ابخيمة الحره او گلبهن ضل يفور
كلمن ابكتر الولي گامت تدور
الليله طاب النوح ما طاب المنام
__________________________

زينب او سكنه او رقيه نايحات
واعله ابو السجاد كلهن فازعات
يمه وگعتهن مثل وگعة ممات
فرفحن عنده شبه طير الحمام
__________________________

هاي بيده چلّبت واتقبله
هاي شابگته او دمعها تهمله
هاي تنحب يم وليها او تسأله
اشلون بينه لو رحت يبن الكرام
__________________________

زينب العباسها اتدير النظر
اتگله يمي بعدك او ظهري انكسر
اشلون بيه من تطيح اعله النهر
العيش من عگبك عله اعيوني حرام
__________________________

او يم مهد عبدالله ملتويه الرباب
عله ارگبته حبته او شدت حجاب
اتگله باچر عمك ايجيب الشراب
نام نوم العافيه يوليدي نام
__________________________

او ليلى تنظر عله ولد متحيره بيه
ساعه وجهه اتشمه ساعه اتشم اديه
الليل كله ايخر دمعها او تدعي ليه
ربي دونه خل تلوعني السهام
__________________________

او جاسم امه امجابلتّه او ذاهله
گامت اتنازع وديها امسبله
اتگله يمه امنين اجتني بكربلا
هرش گلبي انشلع يابدر التمام
__________________________

ابو فاطمة الطائي

ليلة العاشر

بـخيـام الـحسيـن هـل ليلـه حيـره
حل وكت الاوداع اونظره الاخيره
واحسيناه واحسيناه
______________________________

حانت النظره الأخيره ويّه علوياته
احسين وياهن يسولف او يفجِعن چلماته
وحده وحده ايعاين الها اخته وابنياته
امودعات الله يگلهن واتهمل دمعاته

يا محله الاوداع ابهاي المسيه
بچه السماوات او بچه الوطيه
واحسيناه واحسيناه
______________________________

آه يا ليلة العاشر والمرار البيها
احسين للحره تعنه رايد ايوصيها
اصبري يم عون گلها او دمعتج ضميها
ارد اوصيچ ابوصايا عني اتحفظيها

صاحت اويلاه يا زينب اعليچ
ابن امچ ايريد يمشي او يخليچ
واحسيناه واحسيناه
______________________________
باچر اعيونچ يگلها جم مصيبه اتناظر
حايره اوحيدچ غريبه ما ألچ كل ناصر
ابو فاضل عل شريعه وآنه جوه الحافر
خويه اوصيچ اببناتي لا يضيعن باچر

انتي التصيرين امهن وابوهن
كلش عزيزات لا يضربوهن
واحسيناه واحسيناه
______________________________

زينب اچفوف او مناحر عل ثره تشوفيهن
ديري عينچ عنها زينب لا تمري اعليهن
ديري بالچ عل يتامه لا شمر ياذيهن
او من يحرگون المخيم حاولي اتشرديهن

بالچ عل ازغار لو هجمت الخيل
الميت من الخوف مابي بعد حيل
واحسيناه واحسيناه
______________________________

خويه راح اعليچ تهجم خيل والخياله
والشمر باچر يزينب توگفين اگباله
خافن ايگول الكفلچن گطعينه اوصاله
لا يشوف ادموع اعينچ عل وجه هماله

ضميها لدموع لو چلچل الليل
من تغفه ليتام خل دمعچ ايسيل
واحسيناه واحسيناه
______________________________

ايگلها هاي آخر مسيه امعززه اومهيوبه
باچر اسمچ موش زينب اسمچ المسلوبه
ادري كلفه اوماكو مثلچ بت نبي مصيوبه
لچن هاذه القدّره الله اوهاي الچ مكتوبه

عاشور الالام انتي التكمليه
او خدر النساوين انتي التكفليه
واحسيناه واحسيناه
______________________________

ابو فاطمة الطائي

الخدر والكفاله

يا عبـاس عـوف الـمـاي وارحـم غـربتـي
بس اتروح يعني ايروح خدري او هيبتي
حيره بعدك ياكفيلي
يانظر عيني او دليلي .. ارحم غربتي
______________________________

خويه تذكر من جبتني اعله محامل
مو گلتلك گلبي خايف يابو فاضل

گتلك والدمع يجري
خافن ينسلب خدري يخويه

گتلي ابشاربي انتي
آنه اشعندي غير اختي الابيه

كلشي ما ردت منك اربدك
ايدي يا أبو فاضل عله يدك

انت السور وانت الجيش وانت كشختي
عگبك راح ابرخص الماي تصبح دمعتي
وآنه يرجف هسه حيلي
يانظر عيني او دليلي .. ارحم غربتي
______________________________

انت حيلي وانت شوفي او كلشي بيه
لو رحت گلي اشيضلّي اشيبقه ليه

يامن فدوه لعيونه
شاهد حالي اشلونه ذِهيله

بعدك ما رحت عني
او دلالي انشلع مني يويله

يعباس انت هل واحد أليه
او تريد اتعوفني بل غاضريه

اترجاك گوم اوياي ردني الديرتي
هاي الدار ماتنراد خويه الشيبتي
بس ألمها يعتنيلي
يانظر عيني او دليلي .. ارحم غربتي
______________________________

خويه خل انضل عطاشه للقيامه
او لا اشوفك ماشي واگعد بالملامه

والي ما يضل عندي
او تسفح دمعتي ابخدي وحيده

عين اعليك تتنطر
او عين اتصد لبو الاكبر شريده

اشوفه ابحومة الميدان دامي
الرايح واليجي بسهام رامي

واحجارات منهن حيف تجرح جبهته
منها ايطيح والعدوان كلها اتولته
ايصدلي چنه يشتكيلي
يانظر عيني او دليلي .. ارحم غربتي
______________________________

لو رحت يعني اخيك محني ظهره
او سهم المثلث يضهده فوگ مهره

يوگع والشمر داسه
من مگفه يحز راسه هظيمه

يلوع گلبه بالخنجر
يعباس او بعد اكثر اليمه
يحز الراس وايجيبه أليه
يگلي صرتي هالساعه سبيه

ابحالي اشلون لو ما جيت ليّه امن النهر
او بين السوط والنيران شتحمل قهر
وآنه اصيحك ما تجيلي
يانظر عيني او دليلي .. ارحم غربتي
______________________________

خويه شنهي الراي لو رحت امن ادينه
والعساكر حرگو اخيمنه علينه

وادم غيره مابيها
تضربني امن احاچيها واصيحن

اگلهم آنه علويه
يزودون الضرب بيه واطيحن

وانادي ياگمر وينك ولوني
اسلبوني . وابحبلهم چتفوني

تقبل هاي يا وفاي ابقه امحيره
بين ازلام اوگف ليش وانه امخدره
من نظرهم ويلي ويلي
يانظر عيني او دليلي .. ارحم غربتي
______________________________

من تروح او ما تجيني للسبي اطلع
امشي والحداي خويه گلبي يشلع

الناگه عرجه ينطيني
او لا هودج يغطيني كسيره

امشي وايدي مچتوفه
للشام او عله الكوفه اسيره

واطب ديوانهم يابو الحميه
وايزيد المنتشي ايعاين عليه

خويه الشام آه الشام ما ريد اوصله
ياعباس خلني وياك اگضي ابكربلا
ياستري او بدر ليلي
يانظر عيني او دليلي .. ارحم غربتي
______________________________

ابو فاطمة الطائي

القاسم عليه السلام

صَوتٌ نادى بينَ العَسكرِ يَنِبضُ عشِقا .. ياحُسين
أِنّا أعـطيـنـاكَ الـمنحـرْ قـولاََ صِدقاََ ... يا حُسيــن
إِنّي القاسِمُ لَستُ أُبالي .. بِالعُرسِ تُقطّعُ أَوصالي
_________________________________

واگف ابين العساكر والمخيم چنه شمعه
ينظر العمه او يشوفه ابلا مناصر يجري دمعه
ناده يمه ابعمري شلي وذاك امامي محني ضلعه
امن الحسن عندچ امانه انطيني سيفه انطيني درعه

أينَ الطّاسُ وَلامَةَ حَربي قلبي يُنادي ... ياحُسين
مِن دمعَةِ عمّيَ يا أُمّي ذابَ فؤاديَ .... ياحُسين
والسيفُ يُبرهِنُ أقوالي .. بالعرس تقطّع اوصالي
_________________________________

هلهلت رمله او دمعها دم تهله امن النواظر
اتگله روح اوداعت الله للمنايه او للبواتر
گبل لا تمشي اريدن يمه انشدك من تسافر
ثوب عرسك يبقه المن والصواني والمزاهر

يا وَجعي يا تعبَ سِنيني أِمضي وٱندُبْ ... ياحسين
أُنصُر ذا العطشانِ ودَعْ لي قلبي المُتعبْ ... ياحسين
ناداها أُمّي وكَمالي .. بالعرس تقطّع اوصالي
_________________________________

اتوادعو رمله اويه جاسم ياوداع الكله حسره
ضاعن الكلمات منها ضلت امه يس تنظره
ويه كل خطوه المشاها امن المنيه جتها سكره
والتفت نظره الاخيره ولن سألها ماكو قطره ؟

أُمّاهُ أَما مَاءُُ يوجد ؟ إِنّي مُنهك ... يا حُسين
أُقتلُ عطشاناََ ما ذنبي ؟ دمّي يُسفك .. ياحُسين
قَطرةُ ماءِِ كانَ سؤالي .. بالعرس تقطّع اوصالي
_________________________________

اتوجه العمه يودعه وايترخص للشهاده
چن غصن ذبلان لاكن كله غيره كله اراده
ايگلي عمي الموت دونك شهد چنه او بي عباده
الحياه دونك مذله والشهاده اهنا سعاده

دَعنيَ أُفدي آلنّحرُ بِنحري زِدنيْ شَرفَاََ .. ياحُسين
دَعنيَ أَمضي نحوَ نَوالي أِني لـِهفاَُ ... ياحُسين
إِني لَستُ بحتفي أُبالي .. بالعرس تقطّع اوصالي
_________________________________

اتمشى للموت المحتم يا حسافه چبده ضامي
دارت اعليه المنايه والبواتر والمرامي
اشما تزيد اجروحه ناده فدوه فدوه يا امامي
ليك خل جسمي يتوذر عل وطيه اونحري دامي

كَالنجمِ هَوَى فوقَ الأرضِ نادى ياعمْ .. يا حُسين
مِنّي عليكَ سلامُ اللهِ سلامٌ بالدّمْ .. ياحُسين
وَعلى كفّينِ الكَفّالِ .. بالعرس تقطّع اوصالي
_________________________________

انخطف لون احسين لجله واعتناله محني ظهره
آه يا شمعة شبابك يلي بادي توه عمره
ما يكفي اعليك دمعي لو حياتي كلها عبره
امودع الله يل عفتني ورثت لي ابصدري جمره

إِمضي للزهراءِ تَرَوّى مِنْ كَفّيها .. ياحَسين
شُربةَ ماءِِ مِنْ كوثَرِها تَهنأ فيها ... ياحُسين
وآخبرها ياعَمْ عن حالي .. بالعرس تقطّع اوصالي
_________________________________

ابو فاطمة الطائي

نزله للقاسم ...

طب جسام سوح الحرب
يرجف گام اشجع گلب
_______________________

چنه ليث الغاب متعني جاهم موته لگاهم من الخوف
هاذه شبل المارجع مره خاسر سيفه قاهر كل اسيوف
قاسم المعروف كعبة مراجل للحومه نازل وامه اتشوف
ايگلها گري العين ابنچ گلبهم من دم رگبهم حنه اچفوف

هاذه الحيد ما ينغلب
يرجف گام اشجع گلب
_______________________

صوته لمن صاح چنه الرعيده ما خله صيده ابهل ميدان
اتموج هاي الناس گامت امامه يوم القيامه چنه حان
ادگول سكرانين ماهم سكارى لاكن حيارى بل جيمان
امرادم اخيول او زلم ضلمه صارت ناره فارت چن بركان

نار اتفور فنه اليطب
يرجف گام اشجع گلب
_______________________

زوده من زود الحسن منهو مثله من يوسف احله اي والله
يرتجز واحروفه تعلى المسامع والي يقاطع طر طراه
اينادي آنه ابن الحسن يل نكرتو عني گلتو معرفناه
آنه ابن الشيخ . شيخ الهواشم بتاري قاصم ظهر اعداه

والمعروف فنّي الضرب
يرجف گام اشجع گلب
_______________________

يا فعل جسام وسط العساكر سر النواظر او رفع راس
نار صارت تلتهب عينه حمره چنه جمره. ما ينجاس
وارث افنون الحرب من عمامه الصار امامه يعني انداس
عنده شمره من علي اشمحلاته او كل صفاته من عباس

شربهم الما ينشرب
يرجف گام اشجع گلب
_______________________

بيه ما ضايع تعب رمله امه وامسه قمه او فوگ الفوگ
يمشي مو علگاع .فوگ الشوارب اعليه المراتب والله اتلوگ
نشف ارياج الزلم بالمعاره وابكل جداره شگ احلوگ
لاكو چلمه لا نفس بالفصايل اعليها صايل او رد احگوگ

دمهم ساح فوگ الترب
يرجف گام اشجع گلب
_______________________
موش چنه ابعركه چنه ايتمشه خلاها وحشه هاي الگاع
الموته والعدلين نامو سويه فوگ الوطيه حسهم ضاع
او مبتسم جسام صد اعله عمه چنه يكلمه ماكو اسباع
والثلثـ تنعام منك يجاسم بي ربي راسم احله اطباع

عن احسين. يجلي الكرب
يرجف گام اشجع گلب
_______________________


ابوفاطمة الطائي

نزال ام البنين توصي العباس

يابو فاضل _ يكافل
الخدر بعيونك بعيونك تضمه
______________________

يانبض دلالي وانفاسي الأشمها
يا خضار الدنيه اوجاريها او نسمها
انت نور عيوني او بسماتك حلمها
يمه اختك زينب بعيونك تضمها

الدنيا الها _ تذلها
االنفس تفديها تفديها ييمه
______________________

ادري تطفح غيره مو حاجت وصيه
يل ورثت اطباعك من حامي الحميه
لچن گلبي الليله نيرانه سريه
يمه زينب زينب ما تحمل اذيه

كعبه خلها _ اوتجلها
تطوف اعليها اتناديها ينعمه
______________________

اتبسم او گاللها يمه لتوصيني
يمه آنه الزينب ربي امسويني
عل ارض ما تگعد تگعد ابنص عيني
اشحده اليزعلها ابنچ اوتدريني !!

آنه سِدها _ واسدها
انه الموت احمر موت احمر تسمّه
______________________

يمه ليضل بالچ بيدي اتكفلتها
خيم زينب بلطف كعبه سجٌلتها
گبل ما تامرني تدلل گلتها
لو كوكب تطلبه عشره نزلتها

الشاطي اجره _ وانثره
على خيمتها خيمتها وألمّه
______________________

والنعم گالتله يا عزنه او فخرنه
يمه انت امن الله للعاشر ذخرنه
زينب. ابلا زينب شنسوي ابعمرنه
يمه بس خدمتها الي ترفع گدرنه

فدوه عينك . وادينك
فده الخاطرها الخاطرها تقدمه
______________________
صدره دگه او گلها عد عينچ ييمه
خدر زينب غالي بعيوني اضمه
والياذيها فكّر اعليه العيش احرمه
زينب عندي الدين زينب ماهي حرمه

هيه حيلي . او دليلي
او هوه البنفاسي انفاسي اشمه
______________________

ابو فاطمة الطائي

معانات السبي

آه يا نوگ السبي منهن متت
مرمرنّي والشمر بـيهـن يعـت
يا كفيلي ياكفيلي
_____________________________

عل هزيله والدرب كلّه اون
الناگه حنت والشمر لا ما يحن
يبو فاضل روحي انسحنت سحن
اعتب اعله الروس واعيوني تكت
يا كفيلي ياكفيلي
_____________________________

خويه حداي الضعن مابي رحم
اتگول يطلبني ابطلب مني انتقم
لو گلتله الحبل انزف منه دم
ايشده زايد هيچي حادي ماشفت
يا كفيلي ياكفيلي
_____________________________

امن الصبح لـ الليل نمشي اويه الرماح
او لو گلتله اسويعه خلنه نستراح
ابسوطه ايزود جراحي اعله الجراح
امن البواچي ياگمر عيني انعمت
يا كفيلي ياكفيلي
_____________________________

لحد باب الشام واحنه امچتفات
حافيات امحرگات امعذبات
الگينه عند الشام عيد او غانيات
او دگت اطبول الذي الچبدي تفت
يا كفيلي ياكفيلي
_____________________________

التمت اعلينه الشماته ضاحكين
اولايه ما بيها ابد واحد حنين
كلها تنشد عني وين اخت الحسين
وانه ياخويه ابعباتي چلبت
يا كفيلي ياكفيلي
_____________________________

وين اروح الشام ما بيها امان
عصي واحجار انضرب من كل مچان
آخ يا خويه اشلعب بيه الزمان
ريتني ابدالك على الشاطي طحت
يا كفيلي ياكفيلي
_____________________________

ابو فاطمة الطائي

لسان حال ام البنين
( سريعه )

أحضرني ياعلي
أحضرني ياعلي
__________________

يا حاضر ابكل الشدد كل الكلايف حاضر
گلبي مثل جمرة غضا والدمع ينزل حاير
بحسين روحي امعلگه واحسين عنّي امسافر
ما ادري ميت لو عدل مدري عليه اشصاير

راحو الكربله او عافوني
راحو وانه شابح لوني

احضرني ياعلي
__________________

يل حاضر اليونس لمن طايح ابذيچ الشده
خلصني من همٌ الهجر واحسين اليه اترده
طوّل سفرهم ياعلي هاذه الگلب شيركده
والصبر من عگبه مثل ماي ابترابه اتبده
ليلي مانمت بي ساعه
ليلي مرمرني اوجاعه

احضرني ياعلي
__________________

من ايدي راحو ياعلي احسين او جميع اولادي
گتله ترد يمته او سكت ما رد عليه الحادي
ما ادري يا سچه اگطعو وين اسكنو يا وادي
او لا طارش المنهم رجع وايگلي بيه اشسادي

سكته والدرب ضل خالي
سكته والدموع اتلالي

احضرني ياعلي
__________________

يل عندك اعلوم الفلك او درب السما تندله
دليني امشي الكربلا لحسين اريد اوصله
مو گضت روحي ابغيبته واتصوبت چم عله
اشخله بيه من مشه لحسين بيه اشخله

حيدر امروتك نجّيني
حيدر الكربلا وديني
احضرني ياعلي
__________________

ارد اگعد اباب الخيم واحچيله عن اونيني
واعتب واگله اشعطلك مشغول لو ناسيني
مو متت يمه ابغيبتك سيل الدمع عاميني
يعگوب صرت ابغيبتك بيضه وحگك عيني

نوحي كل نبي ماناحه
نوحي ليلي وي مصباحه

احضرني ياعلي
__________________

ارد اعتنيله الكربله گلبي عليه ضل لايب
عطشان اضن يومين اله من العذب ماشارب
خافنه واگع بالشمس او حر الهجير اللاهب
خافن اخيته بل يسر واعله الكفيل اتعاتب

ويلا ويلي من اضنوني
ويلا صوبن لي اعيوني

احضرني ياعلي
__________________

ابو فاطمة الطائي

تفاصيل الدفن

راجع العمته يسولف عن تفاصيل الدفن
علي يحچي والعقيله ذابت ابنار الحزن
_______

أتاخر او من جاها ركضت عن غيابه تسأله
وين ياعمه اتركتني او روحك ادري امعلعله
گلها والمدمع يهله چنت انه ابطف كربلا
شمّته او شمّت عباته او گعدت او گامت تون
_______

اتگله يل سجاد عمه اشلون اخوتي ابنينوه
گلبي اموجر عليهم والظهر مني التوه
اثلث ليالي امفارگتهم حيلي بجفاهم خِوه
شيبن راسي او دليلي او طلع شيبي بل جفن
_______

ايگلها عمه من وصلته احسين نايم الثره
امسلبينه امگطعينه اوصاله كلها اموذره
من عجاج الخيل عمه اتراب تارس منحره
والشمس سومرت جلده طعنت الوانه طعن
_______

الحوافر گطعنه او صارن اشلائه اشكثر
اشلون المه اشلون اجهزه اشلون انزله للگبر
اشما كتر منه رفعته يگع من عنده كتر
شلع گلبي او مرمراني ريت آنه المندفن
_______

بل حصيره احسين شلته وانشلع مني الگلب
نوب ادور عن اصبعه زحف ازحف عل ترب
نوب ادور خاف حافر ذاب وذره اعله الدرب
قطعه قطعه لمليت اعظام صدره المنطحن
_______

عمه نزلته ابحفرته والگلب مني انمرد
الميت ايوسدون خده او والدي ماعنده خد
وسدت نحره . او يگلي ادفن اوياي الولد
خلي عبدالله اعله صدري . والنحور اتشابگن
_______

انوب للشاطي يعمه رحت ادور عل گمر
الگيت عمي ابلا ادينه نايم ابكتر النهر
دوريت اچفوف ادينه وآنه مكسور الظهر
مو گبر واحد صفاله اگبور اله انلاثه صفن
_______

ابو فاطمة الطائي

السيده رقيه


صوت اعتله ابخرابه
إِلحگـلي بابا بابا
بويه اجرحو اذني شمعطلك عني
___________________________

ابنص خرابه او دنيه ليل
گد دربهن ما طويل
للحلم ما باقي حيل .. من تعبهن

لا سگف لا بيها باب
ويلي ربات الحجاب
غافيات اعله التراب .. موته چنهن

اهناك بس صوت الونين
زينب ام گلب الحنين
اتباري لاطفال الحسين .. او تغفه يمهن

لن رقيه او بل منام
فرفحت مثل الحمام
او صاحت اعليك السلام ... گعدتهن

بشرني ناشدتّه
بويه العذب شربته
يابويه خبرني شمعطلك عني
___________________________

گامت اتسولف معاه
بالجره اعليها وراه
اتگلي جدمي اهنا چواه حرگ الخيم

اشگد خفت من الخيول
او طحت من دگ الطبول
وين ابونه صرت اگول محد اهتم

جوني ناس ايخوفون
شُعث محمره العيون
بينه گامو يضربون متني ورم

وانه ادور بس عليك
محد ايوديني ليك
ردت الوذ ابين اديك بلكت اسلم


محد رضا ايدليني
كلها تجي اتبچيني
محد رحم وني شمعطلك عني
___________________________

نايمه او مدمعها دار
تگله شبعوني مرار
اركض او بذيالي نار مدري بيها

لن رجس يركض وراي
ايگلي اگفيلي تعاي
هاي مني طاسه ماي اشربـيها

بويه عثرني او هويت
گتله اتركني انچويت
جر تراچيي او بچيت شگد عليها

اوجعتني آذاني حيل
والنزف ما خله حيل
صرت اشوف الدنيه ليل امضلميها

وانشد اريد اجيلك
عن حالتي اشتكيلك
گلبي انشلع مني شمعطلك عني
___________________________


غافيه. او تحچي او تنوح
چنها تحسب له الجروح
انوب صاحت لا تروح حن عليه

فزت او عالي النحيب
عمه شو راح الحبيب
توه چان اهنا جربب او شاف اديه

يمي گاعد يبچي چان
اتلمس اجروحي ابحنان
وين راح اليا مكان ابهل مسيه

عمه شفته او وجهه زين
اجروحه طابن بس حزين
گلي جايبني الحنين يم رقيه

توه الحنين اجاني
شو هم مشه او خلاني
مو هجره شيبني شمعطلك عني
___________________________

هيّجت كل الجراح
وارتفع صوت النياح
يعني محد يستراح ابهل خرابه

طشت جابوه اللئام
حتى تهجع او تنام
عمه ماريد الطعام وينه بابا

واكشفو عنه الغطاء
لگت راسه والدماء
شافت او حان اللقاء اعله الترابه

شبگته او گالتله جيت
ليش شو عني بطيت
انت تدري اشگد تنيت اشگد مُصابه

گامت تشم جبينه
واعليها تجري عينه
مو گتلي تاخذني شمعطلك عني
___________________________


سكتت او ما الها صوت
او زينب ارعبها السكوت
تدري اليشبگه يموت من حنينه

عمه اگعدي . ابلا جواب
عمه ما احمل مصاب
عمه مو دلالي ذاب من ونينه

ماتت او مات الكلام
بل خرابه امسه الختام
رافگت روح الامام الذابحينه

ودعت هاي الضعون
واستراحت هل عيون
لا مدامع لا شجون لا سجينه

ابدار السبي شهيده
اندفنت وسف وحيده
اوزينب بها چني : شمعطلك عني
___________________________


ابو فاطمة الطائي

السيده رقيه

هلا بالجاني طيفه ابهل خرابه
هلا يالشيب اگليبي ابغيابه
بويه اهوايه تانيتك .. شنو امعطلك عله ابنيتك
_________________________________

اخيرن يا امل دنياي
ابحلم ليه اشوفك جاي
تعال ابسدّي يا رجواي
سوالف عندي ليك اهواي
گبل كلشي . اشربك ماي ؟؟
اترستلك جربه من عيناي

گضه دمعي اوشوفي امغوش صار ايام
أبه تدري اعيوني اشتدعي لما اتنام
اتگل الربي ابجاه الزهره وداحي الباب
يجي ليه احسين او افرح بل احلام

وخيرا الله لبالي دعائي
اجيت او خففت حزني او بلائي
يچنها العيد يا جيتك شنو امعطلك عله ابنيتك
_________________________________

عنّي وينك امن ازمان
گلبي الشوفتك ولهان
ما تشتاگ ؟ لو زعلان
عفتني او نمت الميدان
او عليه وجت النيران
صحتلك . گالو اتعيبان

عله وجهي كل ساعه اوگع جوه الخيل
واذا اصرخ بابا الحگلي انطگ حيل
هم عطشانه او هم مرعوبه اركض وين ؟
بين اخيامي او بين الحومه صارت ليل

الطفوف ابغيبتك صارت قيامه
العذاب انصب علي مثل الغمامه
او تشوف الحال ياريتك شنو امعطلك عله ابنيتك
_________________________________

بابا يا عزيز الروح
بيّه امخزنات اجروح
صوتي امن البچي مبحوح
من الشمر وين انروح
سوطه ايفزز المذبوح
مايرحم بچي الي ينوح

وجه واحد اشعث مدري اشعنده اوياي
جر ترچيه امن اذني او گامت تجري ادماي
گتله العمي رايح اشكي يضحك گام
عله خدي رد يصفعني اهواي اهواي

شوف ابخدي مطبوعات ادينه
من عدها البچي عندي سنينه
اخاف ابحچيي چويتك ؟ شنو امعطلك عله ابنيتك
_________________________________

يل جيت ابحلم خطار
اسولفلك بعد اخبار
دموعك لا تهل مدار
امن اشوفك چويتي بالنار
او بل معصم بقت آثار
من الحبل ضل تذكار

آنا غصبن عني اشكيلك واجري العين
ابه دمعك يلچم جرحي لا يحسين
ياهوّه اليبچي اعله الثاني بينه اشلون
يبو روحي افداك اجروحي والخدين

يبويه أَعتذر وانسه الحچيته
يبويه ابجيتك كلشي نسيته
ضمني ابهايه خاچيتك شنو امعطلك عله ابنيتك
_________________________________

اعذرني . خذيتك وين !!
من گد لهفتي يحسين
ما ناشدت .عنك زين ؟
اشلونك يا بعد هل عين
ماطابن جرح ؟ جرحين ؟
واليوجعك ياهو ؟ او وين

عله صدرك داسن عشره ابطف عاشور
ولا واحد منّ اضلوعك ما مكسور
گللها اجروحي عوفيها او لا اتهمين
انه گطعو راسي او يمچ گلبي ايدور

جوه الخيل آنه او روحي يمچ
گبل موتي چنت اتمنى اشمچ
تگله اعذرني آذيتك شنو امعطلك عله ابنيتك
_________________________________

يگلها اجروحي الزرگه
طابن بأول الملگه
عوفي النوح والحرگه
ابشرچ ما بعد فرگه
نتشابگ فرد شبگه
او نشهگ سوه فد شهگه

على راسي اعيونج تغفه او يهنه النوم
ما نتفارگ بعد الليله او لا كو اعتاب
انسي الطف او انسي اجروحه او گومي وياي
عله دار البيها الزهره او داحي الباب

دار الما شمر بيها يجيلج
ولا كو حرمله ايعذب دليلچ
تگله العيد يا جيتك شنو امعطلك عله ابنيتك
_________________________________

ابو فاطمة الطائي

زينب وطريق السبي
سريعه

وين الهواشم عني
وين الي يرحم وني
شوفو الجره ابأحوالي . سوط الشمر يبرالي
_________________________________

يهل الرحم متگومون زينب تراني ابحيره
بيه اشعجب ماتدرون من ديره امشي الديره

لا ضل جدم لاكو امتون
والدم يهل من لعيون
يمته عليّه اتحنون يهل الشيم والغيره

من الخوارج چني
محد يدافع عني
دمعاتي دم اتلالي . سوط الشمر يبرالي
_________________________________

عفتوني ليش ابهل حال ابدرب السبي اتمرمر
علويه مو مال احبال زحمه ابحبل اتجرجر
ياهاشم احمولي اثگال
ماضل فكر لا ضل بال
شيبو گلبي الانذال نوب امشي نوب اتعثر

والحادي مابي رحمه
كلسا شتمني ابشتمه
ايسبني او يسب الوالي . سوط الشمر يبرالي
_________________________________

چم دوم اضلن عل نوگ هاذه الدرب شيخلصه
چف ملتهب چف محروگ والحبل لوعه او غصه
والمنها صدري مخنوگ
اشلون اوگف ابذاك السوگ
والروس تتنصب فوگ واصبح حديث او قصه

تتلم عليه اهل الشام
ابدگ الطبل والاعلام
او صوت الشتايم عالي . سوط الشمر يبرالي
_________________________________

عيني الدربكم يحنان كلساعه اگولن جوني
ايفزعون اليه الوليان من حرمله ايخلصوني
معقوله بيد العدوان
هاشم تعوف النسوان
لا حاشه . كلهم شجعان حتمن تسر اعيوني

واتنطر او محد جاي
ويخيب ضني او رجواي
لا اول او لا تالي . سوط الشمر يبرالي
_________________________________

شاب الگلب ويه الراس من هالسبي ياهاشم
تتمزهد اعليه الناس كلسا تگلي الوادم :
چا وينه اخوج العباس
راعي الوفه والاحساس
مايدري بالخدر انداس نايم عله الشط نايم

عيني ابدمعها اتجاوب
او راس الكفيل اتعاتب
تقبل يخويه الغالي . سوط الشمر يبرالي
_________________________________

ياهاشم اشلون الراي بالشام اضل اوحيدي
والله يم شاطي الماي آنه متت لو بيدي
يل مادريتو ابّلواي
او لا زلمه من عدكم جاي
خايب وسف يارجواي يادمعتي دم زيدي

نامو ابرغد يل وليان
راح ادخل اعله الديوان
چن ما وصل مرسالي . سوط الشمر يبرالي
_________________________________

ابو فاطمة الطائي

نزله سريعه لمسلم

الكوفه ماجت والزلم محتاره
هاذه مسلم لو علي او فقاره
_________________________

طبها مسلم والمنايه ضل تدگ اجراسها
الكوفه ماجت جوه رجله اتزلزلت من ساسها
چنه ملچ الموت بيده قابض اعله انفاسها
وين وين الحيد بيهم عل شوارب داسها

سيفه يجدح بل مناحر ناره
هاذه مسلم لو علي او فقاره
_________________________

چنه حامي الجار حيدر من يدك احصونها
اشما تگرب للمعاره يصبح اصفر لونها
يبست الآف العساكر بس تدير اعيونها
مسلم او غضبان اجاها يعني بالله اشلونها

امنين تشرد مابعد كل چاره
هاذه مسلم لو علي او فقاره
_________________________

حيّ حيّ عل هزيمه بل مآذن صاحو
لان كل حمله التجي له بس خزرهم طاحو
غير ابن عمه ابو فاضل !! ذوله المن راحو
اشجع الشجعان منه بل معارك ناحو

فقط الله الي عرف مقداره
هاذه مسلم لو علي او فقاره
_________________________

صب عليهم موت احمر حوّط ابكوفانها
زلم واخيول اترادم وانگلب ميدانها
او علي من شافت حملته اتبوّشت شجعانها
اتساوت اگبال ابو طاهر زلم وي نسوانها

چنه آيه محكمات اسراره
هاذه مسلم لو علي او فقاره
_________________________

چن عذاب انصب عليها والسبب افعالها
وادم اتبيع ابو سكنه واشترت ارذالها
هاي غير الموت ابدن ماكو شي يحلالها
ولذالك گام يحصد مسلم ابأبطالها

او للقيامه باقيات اخباره
هاذه مسلم لو علي او فقاره
_________________________

ما يهاب الموت مسلم لا يهاب اسيوفها
زلم فوگ الخيل لاجن تحت رجله ايشوفها
زلمه بل ميدان رابي احگوگه لا ميعوفها
اخذ حيفه اواخذ بيده روسها اويه اچفوفها

او فنه واحد ينكر الـ آثاره
هاذه مسلم لو علي او فقاره
_________________________

ابو فاطمة الطائي

نزله لام البنين عليها السلام

يام الكافل عباس اولادچ رفعة راس
صارو لحسين احزام صارو لحسين احزام
___________________________________

قرآن انتي للوفه. واربع سور ربّيتي
من لبن متروس ابعشگ هل اربعه غذيتي
واحدهم ايعادل نبي. لبن الزچيه انطيتي
مشكوره يا ام الگمر. نعم الوفه وفيتي

يل دمعاتچ برهان مثلچ ماصار انسان
مهما اتمر الايام صارو لحسين احزام
___________________________________

اولادچ اوسام الصدر واعگال فوگ الهامه
اربع اليوث ابكربلا طيحو كل اعمامه
املاك چنهم نازله تحمي الخدر واخيامه
لحسين صاروله درع بيهم يشد احزامه

قدسيين او اطهار نورانيين ابرار
عل عيله اشلون اتنام صارو لحسين احزام
___________________________________

چن شِجره انتي امباركه اثمرت اربع ساده
ابطف كربلا همه السند همه المدد والقاده
اطباعهم چن حيدره والمرجله الهم عاده
ينطون حگ المعركه او ينطون فوگه ازياده

بل حومه امن ايطبون تجدح منهم لعيون
بالطف بس همه ازلام صارو لحسين احزام
___________________________________

يام البنين اهل الشعر عدهم تگف محتاره
لا من قصيده او لا نثر لا شاعر او افكاره
يوصف فعلهم بالحرب لا وحگ حامي جاره
اربع كواكب جسدو معنى العشگ واسراره

داسو روس الاعداء گرة عين الزهراء
لا تنذل لا تنضام صارو لحسين احزام
___________________________________

وگفتهم ابكتر النهر منها البشر مذهوله
يوم النزل راعي العلم والجيش چان اشطوله
من خزرته ابنظرة غضب كلها اصبحت مشلوله
اربع الاف اتيبست ايصيحون بس گلوله:

هاك اخذ الماي الماي لا تزعل يل وفاي
امروتك ضم الصمصام صارو لحسين احزام
___________________________________

رفعة الراس ابكل زمن يم البنين ابنينچ
اعليهم يحگ لچ من دمه يل حره تهمل عينچ
انطيتيهم ابطيبة نفس او ردتي يرد احسينچ
يا ويلي ما واحد رجع او ضليتي بس لونينچ

مارد ياويلي احسين او لا ردو هالطيبين
كلهم بالطف انيام صارو لحسين احزام
___________________________________

ابو فاطمة الطائي