tgoop.com/Qqaassaad/12594
Last Update:
جديد قصيدة بحق الزهراء عليها السلام
يالساكنة ابوسط الروح گلبي بغيابچ مجروح
صحت بشجن يم الحسن
گلبي بغيابچ مجروح
==================
يا بعد روحي يم حسن نعشچ بدي واريتة
واليدفن ابأيدة المحب اتصير المگابر بيتة
يم گبرچ اگعد وانتحب گبرچ دمع رويتة
المـثلچ ابد ما ينسى طولچ غصب جافيتة
بگبرچ واريدن ملگاچ طول العمر ما انساچ
طول الزمن يم الحسن
گلبي بغيابچ مجروح
=======================
فگدچ صعب يا فاطمة بالفرگة ذايب گلبي
من رحتي ماتت فرحتي عيني لمچانچ تربي
جبـــناها عالمر وحلو وينزاح يمچ تعــــبي
هسه الحزن ثوبي صبح بالگوة اوچد دربي
يالزهرة ذبلت عيناي بعدچ نشف منها الماي
اشموعچ طفن يم الحسن
گلبي بغيابچ مجروح
====================
عشرت عمر هسة انتهت بس ذكريات اصبحتي
خلصت مثل لمح البصر غـــدار خاين وكـــتي
كل لحــظة بيها اتذكرچ تمشـــين بالدم چنتي
يا زهرة اناديچ ابــحزن گلـــبي بغيابچ صبتي
ياهو اليعوض فرگاچ تمنيت اموت انة وياچ
سنينچ گظن يم الحسن
گلبي بغيابچ مجروح
====================
صعبة التحبة اتودعة ويروح اغلى احبابك
تحاچيه بأحزان ودمع ما يرد ليك جوابك
يا گلبي لاموك البشر محد يعرف مصابك
ابفرگة الحبيب اتألمت ياذيني حيل غيابك
يالزهرة ما انام الليل يالماخذة وياچ الحيل
گلبي انسحن يم الحسن
گلبي بغيابچ مجروح
======================
ابلياچ أيامي التجي ضلمة وحزن غاطيها
حسرات وآهات ودمع يازهرة راح اگضيها
ذكراچ تبقى ابكل كتر كل ذكرى ابچي عليها
چا غير انتي ام الحسن روحي الي عايش بيها
ابفرگاچ يا اغلى الناس شاب الگلب وي الراس
دمعي انعلن يم الحسن
گلبي بغيابچ مجروح
=======================
أسألكم الدعاء رائد الاسدي
BY قصائد حسينيه مكتوبه الناشر ابو الاكبر
Share with your friend now:
tgoop.com/Qqaassaad/12594