tgoop.com/RAHNTZAHRAHOSAN/3437
Last Update:
القصيدة ( ١)
الى فاطمة العليله
وين رايح بالظعن تانيني
بويه تدريني الهجر ياذيني
بنيتك وتبقى عليله بالثنيه
ابقى بهمومي اعالج بالمنيه
*--------------*-----------*------------*
بويه يحسين بهالظعن وين
رايح وعايف عليله بطرك الاهات
أفتح الشوف ماكو بس خوف
خاف لو طر الفجر الكالي حسرات
من تشيلون توكع اعيون
تتبع اجدام المشو دمعات دمعات
وانه ياحال بلايه آمال
وانتظر مجهول مايحمل مسرات
بويه فكدك لو رحت جتالي
وابقى عنواني يتيمة غالي
يصير عنواني يتيمه فاطميه
ابقى بهمومي اعالج بالمنيه
*-----------*-------------*-------------*
العدها مفكود تنطر ايعود
وانه انطر والدي الراح المنيته
وياها خلان وعدها خوان
وانه اخذهم كلهم وضل خالي بيته
منين مادير روحي اتحير
بلكي اشمن عطر ابوي الدوريته
صارت احلام عطره مادام
حتى عطره وياه خذاه ومالكيته
خوفي خوفي تروح حتى طيوفه
وينكطع نفسي وبعد ماشوفه
وابقى بفراكه بالم وافرك بديه
ابقى بهمومي اعالج بالمنيه
*------------*-------------*------------*
وحدي ضليت بوحشة البيت
والتفت ماضلي احد بس الاشباح
راحو بعيد حزني شفيد
ماترد دمعات من دم والدي الراح
بلله يالبين التفت وين
حتى اشوفن طيف منه وتهده الجراح
كلي تبقين ماتكدرين
وهوه مأخذ كلبي بيده وكل الارواح
بين لوعات القهر خلاني
اخذ كلشي وانه شو عافاني
خوفي محد من هلي يرجع اليه
ابقي بهمومي اعالج بالمنيه
*-------------*-----------*------------*
امحمل اظعون وكلت ترحون
وانه اعاين مني راح يروح بيتي
كلت ارجاك بويه وانخاك
بلكي وياكم يبويه اعرف نويتي
بلايا احباب لا حله وطاب
عيشي لاطاب وحلى وحانت منيتي
من يروحون تبقى الظنون
بفركة الاحباب تتهدم بنيتي
كلبي راح يموت ويشيعونه
لو مشو اهلي تكتله اظنونه
وادري ماواحد يجي ويرد عليه
ابقى بهمومي اعالج بالمنيه
*-------------*--------------*---------------*
كتلي انعود . لاجلج اردود
وناخذج يبنيتي مابين الضعينه
خوفي من هاي وعدك وياي
انتظر والوعد مايحصل بدينه
يتعب الحال . وماكو مرسال
خاف الأكبر مايجي وحالي حزينه
كلبي ممرود وصعبه الوعود
بويه خوفي لو رحت لا ماتجينه
دمغه دمعه ويه الليالي ابجيلك
يالرحت مني يغالي ادعيلك
وانه تنطر عالدرب عيني جريه
أبقى بهمومي اعالج بالمنيه
*------------*------------*-------------*
محمد دعبل النوري
قناة قصائد محمد النوري
https://www.tgoop.com/RAHNTZAHRAHOSAN
BY قناة قصيدة كربلاء ...قصائد محمد النوري
Share with your friend now:
tgoop.com/RAHNTZAHRAHOSAN/3437