tgoop.com/Ragadalbhadley/12430
Last Update:
نعي ( للسبي )
.....................
عالنوگ رحنه امجتفينه
و فوك الرمح روس اهالينه
واحدنه ما بطلت عينه
رحنه بيسر و الناس ضلام
و اعيونه من الخوف متنام
و اجروحنه جا بيش تلتام
الحادي لا لا ما رحمنه
يمشي ابعجل واحنه وگعنه
و انصيح لحگونه يهلنه
النوگ هزله و حيل تعرج
و مامش على الهزلات هودج
مدري شوكت ياربي تفرج
احبالهم بيدينه خشنات
و امجرحه اجفوف اليتيمات
من الوجع تذرف الدمعات
تبجي اليتامه و حرت بيها
و الروح ضيم شگد عليها
ناديت الاخوه خل تجيها
ناديت بلكي تجي الخوان
لن الضبابي هز الاسنان
كلش هضمني و دمعي جريان
ونيت يهلي شكد عليكم
كلساع اسولف ضيمي ليكم
و عن حالتي ويلي ابجيكم
يا عازة الخوان كلفه
يصعب عليه هضمي اوصفه
ردت الولي دمعي ينشفه
شمحله اخوتي لو تجيني
و بجفوفهم تمسح دمع عيني
وين اليجي واليباريني
وين اليباريني من اهلنه
و انصيح محد يسمع النه
و ذباحكم لا ما رحمنه
حادي الضعن مسرع بممشاه
و كلساع اگله ابهيده و انخاه
توگعت صفيه شگد اويلاه
وگعت حميده بنص الادروب
و انصيح وين احنان الاگلوب
تلحگ علينه نبقه جندوب
لو ردنه ماي ايجر بالاحبال
و طاحت يتيمه من الاجمال
ويلاه يصعب حال الاطفال
يهل المحنه و الامروه
الحادي مامش بيه نخوه
بلوه التودينه اعله بلوه
------------------------------------------------------
*تمت بأقلام خادمات اهل البيت ع*
*✍ آلــشــاعرة 🎤 والملا رغــد البهادلي*
*✍آلــشــاعرة رغــد ام وسام الفرطوسية*
ذمة عدم حذف الاسم وغير مبرئ الذمة كل من ياخذ من الكلام وينسبه له
https://www.tgoop.com/Omwiessam
BY رثاء الاطهار للشاعرة والملا رغد البهادلي
Share with your friend now:
tgoop.com/Ragadalbhadley/12430