والسعر حاجة ما بتتوقعوها والله 💃

_ من أراد هجرك رأى من ثقب الباب مخرجًا، ومن ابتغى قربك صنع من الجدران مدخلاً🥀🔕..............

صباح الخير حُبًا ..!
طريق النجاح محفوف بالعراقيل .. أوعى تفتكر إنك حتصل لمجرد إنو معاك الخريطة.
كلنا عندنا هدف عايزين نصل ليهو .. بس كل زول مُحاط بي ظروف مختلفة .. وأسباب إلاهية مُقدرة ليهو.

في كتاب 50 قصة نجاح كل الناجحين إتفقوا إنو الظروف هي الصنعت منهم "الإنسان الناجح" اللي شايفينو الآن ..!

بتذكر لما نتيجة تالتة طلعت ما كانت النسبة الحتدخلني "صيدلة" حسيت بإحباط شديد .. كنت يائسة وكأنو كل أبواب الدنيا إتقفلت في وشي .. من جهة إيماني بإنو الكاتبو ربنا هو الخير .. ومابين شعور جواي بقول لي طيب وحلمك الفضلتي سنين تحلمي بيه؟
كان جواي عدم رضا وحزن كبير أكبر من إني أحكيو لزول لأنو كل الحوالي كانوا ما قادرين يستوعبوا أنا زعلانة قدر شنو ومع كل مبروك أنا كنت بزعل أكتر إحساس إنتوا بتباركوا لي على شنو؟

مرت الأيام وأنا لسة واقفة في حتتي لا قادرة أفرح بنسبتي ولا قادرة أشوف حوالي الفُرص المتاحة بقيت أقول لنفسي كل الظروف ضدي وبكيت شديد على حلمي الإتحطم.

تمر السنين وإتختيت في حتة تانية ما كنت شايفاها بتشبهني ولا قادرة أدي المجال فُرصة بقرأ وبنجح بس ما من جواي .. لسة مُصرة إنو صيدلة هي الرغبة الوحيدة لحد ما إكتشفت إنو أنا بجد ما ينفع أقرا غير "حاسوب"لأسباب كتيرة منها أنا ما زولة حفظ خالص بألف من راسي وبكتب الإجابات على حسب تصوري الخاص وبشطح شديد وما بحب التقيد وبحب المادة تكون مفتوحة أقراها مطالعة ساي أفهم الفيها وأخش الإمتحان أكتب فهمي فما أعتقد الحاجة دي متوفرة في مجال غير الحاسوب .. !

حكمة ربنا أنا إتختيت في أكتر مجال بشبهني وبليق بي جدًا وبتناسب مع طريقة تفكيري وميولي.

ولسة كل يوم بكتشف إنو بي سبب الحاسوب أنا لقيت وقت أمارس هوايتي "الكتابة" وإكتشفت مهاراتي التانية ولقيت كل المجالات المهمة البتقوي السي في موجودة في حاسوب بصورة أعمق وحبيتا جدًا وطورت نفسي فيها أكتر وإتعرفت عليها عن قُرب و أخدت أكتر من "20"شهادة أساسية مطلوبة في السي في بي سبب الحاسوب وأكتر شي حببني فيهو زاد من معرفتي بعالم التكنلوجيا .. كزولة ما بتقدر تعيش بدون تلفونا ساعتين الجهاز وقف معاي أكتر من أي زول في حياتي ضاع تلفوني .. حصل فيهو عُطل .. بلقى جهازي ساندني.

و أخر شي عزز قناعتي إني ولا مرة فشلت أو عانيت من موضوع وظيفة وتنشنة الإجازة لأنو شغلوا متوفر وخانة محجوزة في أي مؤسسة فالحمدلله دايمًا على إختيارات ربنا.

إتأكدوا إنو ربنا دايمًا بختار لينا الخير .. ومخطط لينا حياتنا بطريقة أفضل حتى لو في البداية ما عجبتنا بس في الأخر إختيارات ربنا أفضل بألف مرة من إختياراتنا.

#على_الهامش:
كل حاجة ما جات على هواك .. أي حلم ما إتحقق .. علاقة فشلت .. فُرصة ضاعت .. إتأكد إنو ما كان فيها خير ليك ورب الخير لا يأتي إلاّ بالخير .

#Morning_Message "2"
#نُودين_بِت_مِن_حُب

صباح الخير حُبًا ..!

"اجتهد حتى لا تعد بحاجة لتقديم نفسك 🌎💙."

الحياة ما بتجي مُتفصلة على مقاسك .. حيكون مطلوب منك تسعى بغض النظر إذا حتنال أو لا بس لابد من السعي.
نجاحك في أي موضوع مرتبط بي مدى إجتهادك .. وفشلك فيهو حتمًا دليل على عدم سعيك بجدية.
واحدة من المشاكل البتواجهنا في البلد دي إننا بنبذل جُهد مُضاعف قُصاد نتايج تكاد تكون غير ملموسة.
_خريج بإمتياز ما لاقي شُغل..!
_أستاذ مجتهد جدًا ساهم في إنو يخرج أجيال للمجتمع بس راتبو لا يسوى.
أمثلة كتيرة شديد بتوضح إنو البيئة العايشين فيها ليها أثر ..!
فهمك للتكنلوجيا ما حيفيدك في مجتمع بعاني من الأمية الرقمية .. لأنو ببساطة إنت زي البأذن في مالطة ما في زول حيفهم لغتك البتتكلم بيها.
كونك أستاذ ممتاز دا ما بديك أولوية لما تقعد مع أساتذة أقل خبرة منك .. لأنو ببساطة لو طالبت بإضافة لراتبك حيتقال ليك شوف حتة أحسن مننا و أمشي ليها قاعد معانا هنا ليه؟

إمتيازك بتاع الجامعة ما حينفعك في بلد كلها واسطات اول ما تمشي حيتعاملوا معاك بلغتهم البفهموها "جاي من طرف منو؟".

نحن عشان نحل المشكلة دي نحن مضطرين نتعايش مع البيئة الحولنا .. كل زول عرف يقيم الحتة القاعد فيها صح عرف كيف يخت نفسو في المكان المناسب.

أبدا بالأسهل وأفهم إنك مُضطر حتى لو في صوت جواك بقول ليك ما مُضطر تقعد هنا .. صدقني حاليًا إنت ما عندك حل غير هنا.

لما نسمع قصص النجاح اول كلمة بتتقال فيها :
"أنا لست محظوظ .. لقد عانيت كثيرًا لأكون ما أنا عليه اليوم "

أشطر أستاذ وحاليًا بدرس في أحسن المدارس لو عرفت اول راتب ليه حتتصدم وما حتصدق لو حكى ليك كيف إترفض في اول وظيفة حتقول الان الناس الرفضوه حيكونوا في أشد الندم.

أديسون قبل يصنع المصباح ويضئ عُتمة العالم .. إتقال ليه من عُلماء يحسبهم أفضل منو إنو هو شخص فاشل.

مدير أكبر شركة الآن حيقول ليك ما بشغل خريجين جُدد .. نفس المقولة الإتقالت ليه قبل سنين طويلة لو كان سمعا اللحظة دي ما كان هو في المكان دا.

لازم تعرف إنك مضطر تثبت نفسك في أي حتة إتختيت فيها ..!

#على_الهامش:
"أزهر أينما أنبتك الله ..!"
#Morning_Message "3"
#نُودين_بِت_مِن_حُب

صباح الخير حُبًا ..!

"الإنسان إبن بيئته"

عداوتك وعدم تقبلك للبيئة العايش فيها ممكن يخصم منك كتير.
فكرة إنك ما مُتصالح مع واقعك دي أكبر مشكلة في حياتك.
نحن نريد والله يريد وممكن إرادة ربنا تكون عكس أمنياتنا وهنا بجي دور القبول والطاعة والرضا.
حقيقي يخوانا نص الراحة في الدنيا إنك تكون راضي عن الإتكتب ليك.
قبل 7سنين بالضبط أنا عشت حالة عدم رضا قلبت حياتي رأسًا على عقب .. زي أي زول عندو أحلامو الخاصة كان نفسي أقرا في جامعة ومجال مختلفين تمامًا عن القريتهم.
أتصالح مع الموضوع و أتقبلو؟
لا طبعًا .. أبكي و أزعل و ألعن حظي.
أنا لوقلت ليكم لمدة تلاتة سنين كل يوم ببكي بالصباح ما حتصدقوني صح؟
بس أقسم بالله دا الحصل تلاتة سنين لما أكون طالعة الجامعة بتضايق وبزهج ونفسي بكتم وبتضيق بي كأني ماشة الموت كرهت الجامعة وأمدرمان والشارع والمواصلات والمؤسسة وأي حتة بتذكرني بالجامعة .. !
كل صباح بصحى زهجانة وبحاول أتهرب من الرد على المكالمات والمسجات عشان مزاجي ما كان بسمح لي .. ما بشرب الشاي ولا بستمتع بأي لحظة من لحظات الصباح البتقال عليها وقدر ما حاولت أحب معاكم الصباح دا غلبني عديل كدا .. !
لو في شي كمل دموعي ياها بكيتي بتاعت الصباح وأنا ماشة الجامعة .. !
لو في حاجة خلتني أتغير من إنسانة هادية مُسالمة لإنسانة بتتعصب وبتزهج بسرعة هي صحية الصباح والتفكير في الجامعة .. !
بي سببا بقيت إنطواعية وقافلة على نفسي وكلامي بسيط .. منتظرين شنو من زول بقش دموعو وبحاول يتصنع إبتسامة مزيفة عشان يجازف بيها باقي اليوم؟
بي سبب عدم تقبلي للبيئة البقت في لحظة جزو من حياتي أنا جاني depression وبدل ما الناس بتكتئب موسميًا أنا بقيت مكتئبة صباحيًا.
جاني panic attack من الصباح بتوتر وما بعرف أتعامل مع المواضيع البتكون بالصباح .. محاضرة .. إمتحان .. لقاء .. أي حاجة بالصباح بالنسبة لي مهددة بالفشل.
عشت مع الشعور دا فترة طويلة وأنا واقفة في نفس الحتة ما قادرة أتصرف مع إني حاولت كتير وسمعت نصايح كتيرة بس كنت بشوفا صعبة علي .. !
لحد ما يوم قعدت مع نفسي وحاولت ألقى حل اول شي عملتو كتبت List بالأسباب البتخليني أكره الجامعة والمجال والمؤسسة الكنت شغالة فيها وقعدت البيت والصباح على وجه الخصوص .
بتذكر إني كتبت صفحتين مليانات عيوب .. بعدها عملت List تانية بالمميزات زي مثلًا شنو أحلى شي في الجامعة .. المميز في تخصصي دا شنو بغض النظر عن إني ما إخترتو وما رغبتي .. أكتر مادة حبيتا .. شنو الـ section البلقى نفسي فيهو .. وأنا ماشة في الطريق غير ما أكون ماشة الجامعة بحب أستقل المسافة وأعمل شنو .. لو ما كنت بجي بالشارع دا عشان الجامعة نظرتي ليو كانت حتكون شنو .. ؟
أخر شي عملتو حاولت أحب الصباح .. أقلاها الصباح الما فيهو جامعة .. بقيت أشرب شاي و أحاول أكون رايقة في اول ساعة من اليوم بدل ما يبوظ كلو .
شوية شوية إتقبلت المجال .. ما خلاص ماف شي حيتغير فات الآوان على تغيرو .. وبقيت شغالة بمبدأ :
"إن لم تفعل ما تحب .. حب ما تفعل"
ومن وقتها لاحظت تغيير في نفسيتي ومعدلي الدراسي .. حرفيًا لقيت إني كنت مضيعة لحظات كتيرة كان ممكن تكون حلوة.
إكتشفت إنو المكان هو جزو بسيط من المشكلة .. المشكلة الأساسية في طريقة تفكيرنا.
أنا لو حسبتها صح ساعات اليوم بعد حساب النوم فيها 18 ساعة في منها بروح في المواصلات ومنها بتكون Break .. وبالعافية الواحد فينا بلاقي ساعة للـ Me Taime يقعد مسترخي يشرب كوباية قهوة ويعمل شي بحبو .. !
كل الزحمة والنكد وسؤ الحظ دا على 12 ساعة ما تسوى؟
أنا عارفة إنو في بيئة صعب نغيرا .. وفي أذى نفسي ما بالساهل نتعافى منو .. بس الأهم نغير نظرتننا ونديها فُرصة عشان نفسنا وعشان الظروف جزو مننا والحياة الصعبة هي البتصنعنا وعشان الدنيا أصلًا ما دار راحة مضطرين نتعلم التحمل والتجاوز وكل شي صعب.
_جامعتك .. مؤسستك .. حتى قعدة البيت حاولي تتصالحي معاهم.
_أصحي بدري ووصلي لنفسك رسالة في معناها .. إنو اليوم حيعدي لو زهجتيي ولا روقتي .
إذا قاعدة في البيت وحاسة بالملل والروتين .. أعملي تغيير وسيبك من الشغل والضغوطات اللي ما بتخلص كتري شاي ببسكويت ومسلسلات.
إذا مضطرة تداومي أصحي بدري أجهزي برواق أخدي معاك كُبايتك أصلي مكتبك بدري رتبيه لصقي فيه Sticky Notes وأشربي شايك أو قهوتك بمزاج وبعدها رتبي الـ Tasks بتاعتك وإشتغلي بكل حُب.
_مهم جدًا يبقى عندك مساحة بسيطة خاصة بيك تمشي أقرب corner تصلحي طرحتك .. تغسلي وشك .. تظبطي هندامك .. تجددي الـ hand Surveys بتاعك .. تشربي موية .. أتاخدي نفس عميق .. أعملي أي شي المهم 5 دقايق تغييري فيها جو.

كاوي الظروف وأعملي كل حاجة إتفرضت عليك بكل حب وشوفي كيف حتنجحي فيها.

#على_الهامش:
يصبح الإنسان قويًا عندما يتعلم كيف يتغلب على ظروفه "

#Morning_Message "4"
#نُودين_بِت_مِن_حُب

#بالحُب_نحيا.
"1"

إحدى مقولات دوشكا المليانة عظمة ومحبة بقول فيها بكل بساطة الدنيا كألطف تعبير لاقاني في حق الحبيبة :
"في مرحلة حب نشعر فيها أن الحبيبة تصلح للناس كلهم من روعتها ♥️))

أشرحا ليكم؟
تخيل تعيش مع شخص من روعتو وإمتنانك لوجودو ومدى سعادتك بيهو بتحس إنك عايز العالم كله يشوف الشخص دا ويتعامل معاه عشان يعرف إنت قدر شنو بختك بيه.

الحُب برضو درجات .. في ناس قُراب وناس قُراب شديد وفي شخص مُفضل وفي شخص تعتبره محور كونك .. بس أعلى الدرجات دي هي :
"هم ليه الناس ما زيك؟"

في لحظة صفا أحمد قال لي وسام:
"الواحد لما يحب وسام حبيبات الناس التانيين ببقوا ليهو كيف كيف كده))

أعتقد دي ألطف طريقة توري بيه شخص قدر شنو إنت بتعزه ..!
قدر شنو هو بيعني ليك.
ياخي قدر شنو إنت ما قادر تصف ليه هو شنو بالنسبة ليك ..!
ما قادر حتى تشرح ليه إنت كيف بتحبو وشوية حتقول ليه ياخي أدخل قلبي شوف ..!

مافي زول قال تعبير أحمد دا خالص يتبروز والله ..!

شكرًا لأحمد عشان قِدر يورينا يعني شنو
يكون في شخص بحبك ..!
شخص لما يجي يعبر ليك عن حبه يكون مختلف ..!
يعمل حاجات خارقة للمنطق ويفكر خارج الصندوق .. مش يقول ليك أنا بحبك .. لا دي بقت مُستهلكة وعادية.
نحن عايزين نشوف الحُب ..!
وريني كيف بتحبني؟
وليه ذاتو تحبني؟
عشان شنو يعني؟
وليه أنا؟
وعرفت كيف دا حُب؟
والخلاك تقول كدا شنو؟
ومن متين؟
ولحدي متين؟

أسئلة كتيرة إجابتا واحدة .. بسيطة .. مُبعثرة ومُلخبطة وكلام كيف كيف كدا ..! حاجة ما مفهومة أصلًا ..!

تقدر تقول بدل بحبك:
-خليك معاي ..!
-تعالي أوريك للعالم أقول ليهم انا لقيت شنو.

واحدة من البنات الكتبت قصتهم وأعتبرا أقصر قصة حُب وأجمل وحدة كتبتها قالت لي :
إتخيلي يا نُود طلبني كيف؟
كُنت فاكراه قعد على ركبتو وعمل الحركة الرومانسية ديك .. بس صدمتني بِي ردها لما قالت قال ليها:
"بعد إذنك مُمكن تتفضلي تدخلي حياتي عشان هي فاضية ومُحتاجة تتملي بيك؟"

الكلام دا صعب يخوانا؟
مالكم ما بتقولوا حاجات جديدة؟

قولوا:
أرح نبني بيت سوا. ..!
ما تجي نتلما ..!
ما نفسِك تقري أولادنا بدل ما قاعدة تقري أولاد الناس؟

خليكم مبهرين ..
أدهشونا مرة واحدة ..
وأهدونا أغاني الحبيبة جد جد ما كلام ساي ولا بس بتسمعوا أغاني نظام البرستيج ساي؟
إتعلموا ياخ.

مرة شخص قال ليها:
ما نفسك نوودين تكتب قصتنا أنا وإنتِ ؟
فقالت لي:
والله والله والله ثلاثة ما هان علي أرفض بعد الكلام البسيط دا ونزلت ليكم قصتهم أهو.

#على_الهامش:
"عليه أن يحبك حتى يظهر على وجهك كم أنتِ حبيبة لأحدهم))

#نُودين_بِت_مِن_حُب

صباح الخير حُبًا ..!

الإنجليز عندهم حكمة جميلة بتقول:
"Never wrestle with a pig. You just get dirty and the pig enjoys it."
أي بمعنى:
"لا تُصارع خنزيراً في الوحل، فـ تتسخ أنت ويستمتع هو"
ما بالضرورة خنزير .. ريح دماغك من كل حاجة حتكون خصمًا عليك.
من كل معركة ما حتفوز فيها ..!
من كل علاقة ممكن الطرف الأخر يكون فيها مُستمتع وإنت مُرهق.

الحياة دي عبارة عن مضمار سباق .. في رابح وخاسر.
عبارة عن ساحة حرب في معركة حتمًا حيكون فيها مهزوم.
حاول قدر الإمكان تكون في الـ Safe Side ما هروب بس أعرف إنو ما كل المعارك بتستحق تخوضا .. وما كل زول بستحق يترد عليه.

في يوم صحبتي جاتني حمقانة وزعلانة من موقف سخيف حصل ليها بتتكلم بحماقة وكل زعل عاينت ليها مسافة ما مدياني فرصة أرد ليها بعدها سكتت قالت لي أنا كدا بديهو أكتر من قيمتو صح؟
قبل أرد ليها قالت لي تعرفي خلينا نقفل الموضوع دا لأنو ما يستاهل القومة والقعدة دي كلها والله وبعدها مشينا فطرنا وللآن من سنة ما جبنا سيرة الموضوع تاني ودا يتصنف بإنو أرهب Move on في تاريخ البشرية.

فكلكم يا جماعة بيدكم تقفلوا أي باب بجيب ليكم الريح .. تقدروا تمشوا من الحتة اللي ما مرتاحين فيها .. بإمكان أي شخص يقيم نفسو وهو أدرى إذا نفسو تستاهل تهون عليه أكتر من كدا .. إنت الوحيد اللي بتعرف هما يستاهلوا البتعملوا عشانهم دا؟
يستاهلوا كل القيمة دي؟
كل الزعل دا؟
يستاهلوا ترد عليهم؟
للدرجة دي هم مهمين عشان تخسر سلامك النفسي قصادهم؟
لو ما قيمت نفسك ما حيجي زول يقيما ليك.
لو ما عرفت تخت نفسك في المكان البتستاهلو ما حيجي زول يقول ليك إنت مكانك هناك.
لو ما درست الموقف صح وعرفت تديه حجمو المناسب هو الحيتحكم فيك ويعمل منك مهزلة.

أوعى .. كبر دماغك .. قيم نفسك صح .. وطنش اللي ما يستاهل .. إشتري راحة نفسك.

#على_الهامش:
"أنا بطبيعتي مقاتلة، ولكنني بلغت قدراً من النُضج يسمح لي بالتمييز بين معركة يمكن أن تحقق أهدافها، ومعارك لا جدوى من خوضها❤️.!"

#Morning_Message "5"

#نُودين_بِت_مِن_حُب

صباح الخير حُبًا ..!
على الصعيد المهني وإنتِ بتطوري في نفسك ومشغولة بالحياة والإنجازات وحابة التغيير البحصل في حياتك ما تنسي الجانب العاطفي.
كبنات مهم جدًا نحافظ على جانبنا العاطفي .. بعرف إنو في ظروف بتجبرنا نتخلى شوية عن طبيعتنا .. في أسباب كتيرة بتخلي الواحدة فينا تركز على جانب واحد .. في مبررات لإنو الواحدة فينا ساعات بتضطر تختار بين المنطق والعاطفة فبتلقى نفسها ما قادرة توازن بينهم الإتنين فإجباري تختار واحد منهم.

في حلقة مستضيفين فيها نجوم مشاهير إنطلب من كل واحد منهم يقول كلمة في حق المرأة واحد فيهم قال للمذيعة:
"إنتوا إزاي الواحدة فيكم تقدر تلبس كل الشخصيات دي تلاقيها بالمطبخ بتدندن وترقص .. بالمكتب مسحولة بشغلها ومعجوعة بالورق لدرجة إنك ما راح تحب تطلع عليها تطليعتين .. بالبيت وسط الولاد بتصير طفلة .. بالمواقف الصعبة تصير أكبر Support .. بعد كل هالقوة ممكن يبكيها سبب تافهه وترجع تضحك لسبب أتفه .. أنا الصراحة مبهور."

"مبهور"
دي الكلمة الوحيدة البتوصفنا و اللي بتنصفنا جدًا.
نحن إتخلقنا شخصيات عاطفتنا أكتر شي فينا .. أيوة بنقدر نكون عصبيات وجديات جدًا بس دا تجرد ما حيطول وحنرجع لفطرتنا.
علشان كدا مهما حصلت ليك ظروف وإتختيتي في مواقف جبرتك تتجردي من عاطفتك خلي صوتك الداخلي يذكرك إنك بتقدري تكوني قوية حتى بعاطفتك .. بتقدري تعملي كل اللي عايزاه من غير ما تكون العاطفة عائق في طريقك.

#على_الهامش:
"كوني امرأة تُحارب قسوة الأيام برقتها ❤️"

#Morning_Message "6"

#نُودين_بِت_مِن_حُب

صباح الخير حُبًا ..!

نحن في زمن بقى صعب والحياة بقت أصعب مما بتتصوروا وفوق دا بنزودا على بعض شديد.
مافي زول بقت تهمو النية تلاقي الواحد بيتعامل معاك بكل سؤ ظن ودي يا جماعة ما شيمنا كمسلمين.
ما معقول الإنسان يقيف لأخو الإنسان في حلقو كدا إلا ما يشوفو كح ساي يقول دي كورونا.
أوفر خالص خالص والله سؤ الظن وعدم حُسن النية الحاصل دا.
يا إنسان خليك عندك شوية حُسن نية ما كل ما لقيت موضوع عايز تفهمو غلط .. كل ما زول إتصرف قدامك تصرف تفسروا على هواك .. كل ما شُفت الجهة المظلمة إفتكرت دي كدا الخلاصة مافي نور.
كدا حترهق نفسك من ورا جريك في المواضيع الكلها سؤ ظن .. حتفقد ثقتك بكل الحقائق وحتبقى تشوف الدنيا بعيون مطششة كل حاجة لازم تشك فيها.

والله {..وَتَحسَبونَه هَيِّنًا وَهوَ عِندَ اللَّهِ عَظِيمٌ} .. الإنسان الفهمتو غلط .. البت اللي إتكلمتي فيها وإنتِ ما عارفة كل القصة .. التريند الركبتو مع الناس من غير ما تراعي إنك بتهتك عرض إنسان .. الشخص اللي طلعتو عنو قصة ما صحيحة.. كل الحاجات دي حنتحاسب عليها.

أنا عارفة الونسة حلوة .. بس سؤ الظن عليه حساب.
عارفة المواضيع بتجيب بعضها .. بس حتى لو حتتكلم في موضوع خلي نيتك تكون سليمة اللي هي موضوع جاب موضوع بس ما تقرر نوايا الناس .. لأنو كلنا بنغلط.
حسن الظن يعني حتى لو قدامك شر تفكر بي الخير الممكن يكون بنسبة 1%.

في مقولة حلوة بتقول:
"النفس إذا ارتقتْ سكت اللسان ، والروح إذا سمت قل الكلام والهمة إذا علت تُخيرت المشاغل .
اجعل آخر الغيبة وتوافه الأمر عندك، وبداية كل رُقيٍّ منك".

صعب نتغيير فجأة .. ما ساهل نفضل ساكتين أو نمسك روحنا بوجود المواضيع البتشدنا عشان نقول راينا .. بس بنقدر نكون أوعى شوية ونقول راينا بطريقة ألطف .. بنقدر نقدر المواقف ونعاين من نظرة الشخص اللي أخطأ ونتفهم موقفو عشان ما نسيء الظن.. شوية شوية لحد ما تبقى مواضيع الغير ما بتهمنا .. لحد ما نخلي الموضوع في حجمو الطبيعي لو إتكلمنا عنو يكون كموضوع مش قصة وونسة .. لحد ما نصلح من نفسنا ويبقوا الناس أخر همنا.

#على_الهامش:

قبل ما تشيع أي فاحشة أو تتكلم في أي موضوع خت الأية دي قدامك:
" وَلَوْلَا إِذْ سَمِعْتُمُوهُ قُلْتُمْ مَا يَكُونُ لَنَا أَنْ نَتَكَلَّمَ بِهَٰذَا سُبْحَانَكَ هَٰذَا بُهْتَانٌ عَظِيمٌ "
#Morning_Message "7"

#نُودين_بِت_مِن_حُب

#عزيزُ_قلبي "1"

مين الحلوات القرروا يكتبوا ليكم رواية سوا 🙈

نسمة هواء خفيفة خالص بشيل نفسي وبستنشقها..ملامحي هادية جداً وعيوني نورها بزيد كل ما ألمحهُ..قاعد تحت واحده من مظلات الجناين خالف رجوله وقدامه القهوة بتطلع بوخ ساخن..لابس بنطلون وقميص بدرجات متقاربة سادة..نظارة للقراءة وساعة يد بنية..كنت سرحانه في تفاصيل إتعودت عليها منه..زي إنه بشيل الفنجان كل دقيقتين بالضبط وبرفع حاجبه بإستغراب وبِقرب الكتاب بتركيز شديد على وشه..الحركة الوحيدة اللي فاجأني بيها لحظتها لما رفع راسه وعاين لي مسافة طويلة..من الخلعة قفلت الستاير ورجعت حركة ورا بحاول أهدأ عشان نبضات قلبي تنتظم..سمعت ضرب خفيف على باب غرفتي وصوته الهاديء الممزوج بنبرة رجولية مميزة.

_ممكن أدخل.

يا باشا ما تدخل وتخلصني..أول مرة ألاقي راجل بِستأذن عشان يخش غرفة واحدة هي في الأصل زوجته

_إتفضل
_غريبة! صاحية بدري
_عادي يعني وبعدين إنت قلتَ عازم أصحابك الليلة ؟
_عشاء..يعني للعصر حتى تبدي تجهزي أكلك والتفاصيل دي
_طيب كنت جاي ليه !؟
_عشان أقول صباح الخير♡..بتقيفي في الشباك كل مرة وتراقبيني ولا دي أول مرة !!
حسيت عيوني بدت تدمع من الموقف المحرج ده جاوبته ب_على فكرة ما كنت براقبك ولا حاجه..مجرد صدفة بس.

أيوة نحنا متزوجين بس كأننا مغصوبين على بعض..كل واحد في غرفة براهو وفارز حياته عن الطرف التاني..أنا مثلاً عندي شغلي في دار نشر صحفية..بطلع أيام محددة في الأسبوع من تسعة صباحاً لاتنين ضهر..برجع أعمل الغداء..باكل براي وبخش غرفتي اكتب مقالات عن أغرب قصص الحب..سوا بألفها أو بجسدها من الواقع..هو صاحب شركة عقارية شغله بيتطلب يكون موجود فيه من سبعة لسبعة..بيرجع يتغدا وبعدها بمسك اللابتوب والتلفزيون برضو على حسابه..بِختم يومه بكباية قهوة وكتاب تاريخي..أغلب الكتب البيقراها إما تاريخية أو سياسية..وأنا كل الكتب العندي رومانسية مرهفة...إتزوجنا زواج تقليدي..صراحه هو كان عاجبني من ناحية الشكل والمكانة الإجتماعية..بس ك شخصية أكيد كان نفسي أتزوج واحد رومانسي زي.

_أساعدك في حاجه !

إحنا ما بينا كلام بيقولوا عليه..بنتكلم في حاجات اساسية ومهمة وده لو إتضطرينا..غير كده كل واحد في حاله..هزيت راسي بموافقة..دخل كفكف يدين القميص وبدا يقطع الفواكه بطريقة إحترافية..عمل كذا نوع عصير غير العملتهم أنا.

_إتعلمت كل ده وين !؟
ضحك على خفيف_في بيتنا ومن أمي
_كنت بتخش المطبخ !!
_ومستغربة ليه ؟!
_يعني عشان ما حصل شفتك بتعمل حاجه غير القهوة.
_والقهوة المظبوطة صح عملها ساهل ؟؟

لقيت كلامهُ صح..كان بيحكي لي عن مراهقته اللي قضاها في المطبخ بين الفطائر والمخبوزات والفواكة البخلطها على بعض وبتطلع عصير مميز.

_الجرس
عاين لساعة يده_الساعة 8 ونص..الزمن سرقنا

ياريت الزمن يفضل سارقنا على طول كده..ده طلع لطيف بشكل ما عادي♡...عاين لي بنظرة كده وبعدها إتكلم.

_خشي غرفتك غيري ولما تخلصي ناديني
_طيب

مع إني لابسة جلباب طويل يعني وخاته طرحه على اكتافي..نظام بتغير يعني ولا شنو يا باشا !!!

_عبد العزيز

ناديته ووقفت لورا شوية..جاا داخل وهو برد لواحد من أصحابه لما شافني سكت مسافة وبقى يعاين لي

_ألو..سرحان وين !
_ولا مكان

ليه وقتها إتمنيت يقول لي سرحان فيك !!

_زي ما عارفة أصحابي معاهم حريمهم..لو جاهزة نطلع
_جاهزة.
_ما حاسة الروج ده كتير شوية !

عاينت ليهو مستغربة...قبل أتحرك لقيته بحركة سريعة خفف لي الروج بالمنديل..الحركة غاظتني..كان ممكن يطلب مني اخففه..لحظه !! حتى لو طلب ما كنت ح أنفذ.

_على كده يا إيناس متزوجه ليك أربعة شهور
_أمممم

القعدة كانت مسيخه..كلها دهبي ودهبك وراجلي وبيتي وانا ما بحب الجو ده..ممكن نتناقش في تفاصيل العلاقة نفسها..ما فشخرة ساي ! كنا قاعدين برانا..بعد العشاء عبد العزيز إقترح نقعد برة ونكمل ونستنا..كل واحده كانت قاعدة جنب زوجها.

_أها يا أستاذة..الشاب ده قدرتي تمنعي عنه المخدرات ولا لسه !!.
شهقت وعاينت ليهو..ضِحكوا كلهم.
شداني ناحيته_قصدو قراية الكتب
_من أول ما عرفناهُ وهو مستحيل كتاب يفارق يده..ربنا يعينك غايتو
قلت وأنا بحاول أبعد عنه_القراية حلوة..بس بركز على قراية السياسة والتاريخ..وده ما نوعي المفضل.

معظم أصحابه بانت على وشهم علامات الإستغراب وهو بذكاء منه غير الموضوع.

_نحنا طبعاً قِدمنا يا إيناس..عشان كده أحكي لينا عن تجربتك أنتي مع عبد العزيز

يا دي الحُشرية..دي كانت واحده من زوجات اصحابه..جاوبتها ببرود_تجربة حلوة للآن زي ما بقولوا الزواج بطيخه مقفولة..أنا للان البطيخه ما قادرة أحدد طعمها.

ضحكوا مسافة وأنا خلاص إبتديت أتخنق من القعدة..وجهوا لعبد العزيز نفس السؤال.

_الزواج في حد ذاته رحمة..وأنا بشوف طالما شريكنا متقبلنا وقِبل يكون جزء مننا وبينتمي لينا..فده البحلي الزواج وبِكبر من مقامه♡ وإيناس فيها معظم الصفات الإتمنيتها..كفاية إنها بتتعب نفسها بعد يوم عملي تقيف في المطبخ وتعمل لي حاجه بيدها..كفاية سهرها لما أتأخر...كفاية نظرتها لي كل صباح وكفاية إنها بتدعي لي..حتى لو ما قالت ده..أنا متأكد دعواتها بتصيبني وبتنجيني من حاجات كتيرة♡.

كنت بعاين ليهو وسرحت فيهو وفي كلامه..أنا متين بعمل كل ده !!يمكن النقطه الوحيدة الصح إني بعمل أكل..وبعملهُ عشان جعانة..مش عشانهٌ...بس من حلاوة الكلام كنت ح أقوم أصفق ليهو...خلص اليوم وأخيراً ولحدي ما هم طلعوا هو كان خاتي يدهُ على كتفي...بعد ما قفلنا الباب كان لسه خاتي يدهُ

_ظريفين صح !!
جاوبت وأنا عيني على يدهٌ_جداً

عاين لي مسافة..أول مرة ألاحظ إنو عيونه لونها بني غامق وحاجبه اليسار عليه عرجه بسيطه وعندهُ حسنه في أنفه..دقنه حلوة شديد...مرر إصبعه على حاجبي وبعدها نزل يدهٌ ووقف على بعد مسافة مني
_تصبحي على خير.

غريبة الحياة جداً..ممكن بيدنا نخرب حياتنا وبيدنا نجملها..لقيت نفسي بسأل انا ليه هنا وبعمل شنو..وافقت اتزوج لمجرد كلام الناس الكتير عني وعن عمري 《27》..فقررت أول عريس يجي ح أوافق عليه..فلما هو جاا..إتضح فيما بعد برضو إنو اتزوج عشان أمه زنت عليه كتير ومن حُبه ليها وافق علي..لإني من اختيارها..ما عارفة ليه حياتنا اخدت النمط ده..اللي هو كل واحد في حاله !

_قريت مقالِك عن أساسيات الحب..ما حاسة إنك اجحفتي في الحاجه دي !!
فتح الموضوع ونحنا بنتعشى
_كيييف !!
_يعني الحب ما عندهُ أرضية ثابتة ولا خريطه ممكن الواحد يتبعها..أو خطه يمشي عليها..حبيت يعني حبيت♡
_ما أنا ذكرت النقطه دي
_ذكريتها أيوة..بس اكتر تركيزك كان على الاساسيات المفترض تتوفر..زي الكرامة وإحترام أهتمامات الطرف الآخر وغيرهٌ..يا إيناس صدقيني الحاجات دي كلها بتتعمل بدون تخطيط..حاجه لا إرادية بتحسسك إنو الشخص ده يخصك يهمك والبِمسه بِمسك ♡!

بليل وأنا فاتحه الشباك وماسكه مق القهوة..إتذكرت كلامه وإبتسمت...حسيتني كنت راسمة فكرة غلط عنه...لما نبتسم بنقرب..ولما نقرب..بنحب♡

_الكتاب ده حقك !!
_ومستغربة ليه !!
_من متين بتقرا الحاجات دي؟؟
_من زمان..التاريخ والسياسة البتشوفيهم عندي ما بميل ليهم بقدر ميلي للكتب دي
_على كده نحنا بينا تفاصيل كتيرة مشتركة
_وح نصنع غيرها برضو

الحياة بقت لطيفة شوية..بقيت ارجع اعمل غداء عشان انا حابة اعملهُ ليهو..بستناهُ بليل عشان نتناقش في مقالي الكتبتهٌ...كل جمعه بنحضر فيلم رومانسي..تقريباً حاجه مشتركة بينا إكتفشتها التحليل..بنحلل كل لقطه..ليه البطل اتصرف كده..وليه الموقف الفلاني اتفهم كده..بنحضر ساعتين ونحلل اربعة ساعات !..كُنا بنتونس بالساعات..إكتشفنا إننا شبه بعض في تفاصيل كتيرة...يمكن أكتر حاجه حلت أيامي معاهو...لما يرسل لي الساعة 2صباحاً يسألني عن رأيي في رواية معينة.

_تعالي نلعب لعبة
_اللي هي شنو
_أسئلة
_إتفضل أسأل
_وافقتي تتزوجيني ليه !!
_بصراحة..كده كده ماف عرسان..وأنت لما جيت كنت مناسب معاي من ناحية وضعك المادي والإجتماعي..وعشان
_عشان...
_شكلك جميل.
_طيب ما فكرتي مثلاً إني ممكن أغصبك على حاجات ما بتحبيها أو أعاملك بطريقة كعبة !!
_فكرت..بس كنت بطرد افكاري دي..عشان كلام الناس هو اللي كان مسيطر علي
_يلا أسأليني
_هه..أمممم جيت إتقدمت لي ليه أصلاً...خالتو هي السبب صح !
_لا
_بس هي قالت كده.
_أمي ما كانت بتعرفك زي ما بعرفِك أنا
_وضِح أكتر.
_أقول بحبك وأختصر الحكاية !!♡
_......
_أمممم...بحبك من لما كنتي كاتبة مبتدئة..لحدي ما وصلتي هنا..كنت واحد من ألف معجب♡..بس كنت عارف..إنك ما ح تكوني غير لي.
_عزيز !!
_ح أجتهد أكتر عشان أسمعها منك صح ؟؟
_كفاية تشدني وتخت يدك على كتفي♡

إبتسم
وأنا إبتسمت على بسمتهٌ
وإبتدت أجمل حكاية بينا♡!

#ننس_تمدين
#نوودين

#عزيزُ_قلبي 2

-عزيز!!
-ح أجتهد أكتر عشان أسمعها منك صح؟؟
-كفاية تشدني وتخت يدك على كتفي♡

لحظتا فِضلت أسأل نفسي هو دا حصل بجد؟
عزيز مُتذكر كُل التفاصيل اللي بينا دي؟
دا طلع حتى بِحب كتاباتي المُبعثرة وعيوني العليها هالات من كترة السهر ..!
حب طريقة كلامي العادية، وملامحي اللي مش شايفاها أحلى حاجة وبجتهد كتير عشان أبان قدام المراية إني حلوة وكل مرة بفشل؟

فِضل مُتكأ ع الكنبة وإيدو لسة حاضنة إيدي وأنا كأني غرقانة في بحر بس مبسوطة شديد وما نفسي الإحساس دا ينتهي خالص♡

غمض عينيه وقتها سرقت نظرتين الاولى كنت بشوف قدر شنو هو كل مرة أعاين ليه فيها بيطلع حلو بزيادة، رموشه زيما قال كاتب:
"كأنها مِكنسة للحُزن))
كان مغمض زي طفل صغير مُستني صباح العيد، قلبي كان بيضرب شديد، إتلفت بسرعة خُفت يِفتِّح يلاقيني بعاين ليه كدا بدون حيا أصل كفاية الرجفة الفيني لسة من شوية عرفت إن أكتر حاجة إتمنيتها تحصل حصلت بدون ترتيب وبدون مُقدمات.

ما قدرت أمسك نفسي فعاينت تاني المرة دي ميل كتفو علي وشد على إيدي شوية كانت بسمتو حلوة ماسك نفسه وحسيته شوية وحيقول لي أنا شايفك على فكرة دي عادته إنو يكشفني في كُل مرة أعاين ليه فيها.

عايزة أزح شوية واعدل قعدتي لقيتو بفتح عيونو براحة وبقول لي:
-خلاص شبعتي مني؟
-يا دي الكسوووف غمضت بدون ما احس وسحبت يدي من إيدو كنت ح أقوم من مكاني بس شد علي يدي وهو بقول لي:
-على وين براك كدا يا جميل؟

إتلعثمت وأنا برد:
-اا الزمن إتأخر ولسة ما لميت ..
-أنا طول عُمري كُنت عايز أعرف كيف ينام المرء حين يُقال له أحبك بس طلع المرء كُل همه يلم العدة عشان الصُبح وراه دوام وما تتراكم عليه!

-ضحكت بصوت عالي .. وقتها إتذكرت نُود على طول بتقول لي أوعاك تضحكي كدا قدام زول يا إيناس وأنا مُحذراك ما عرفت ليه بس إفتكرتها وسكتا.

وقتها قال لي:
-أنا طلعت واحد محظوظ أو إنتِ اللي أخدتي كل حظي.
-عاينت ليه ببلاهة وقلت ليه ما فهمت كيف؟
-أنا زمان كُنت بقول ما عندي حظ تصدقي أنا كُل حاجة كانت بايظة عندي، موضوع السفر اللي بيتأجل في اخر دقيقة، علاقاتي اللي بتبوظ بعد موقف تافهه، البيت اللي دفعت عربون علشان أشتريه والبيعة فركشت، الشركة اللي رفضت السي في تبعي مع إنو المدير التنفيذي كان أطرا عليه، وحاجات كتيرة كانت بايظة بس ناو وأنا بسمع ضحكتك الحلوة دي إفتكرت كُل الأحزان دي وما حسيت بِحُزن .. حسيت كأنو كان دا كلو مكتوب يحصل عشان ألاقيك وتضحكي في وشي في الساعة دي تحديدًا الساعة اللي مرت سنين بفصل صاحي أتذكر فيها كل الفشل دا وأزعل بس اليوم أنا أسعد شخص عشان كُل الحاجات الضاعت دي أنا ربنا عوضني بيك عنها يا إيناس ♡

-ما عارفة أنا مفروض أقول شنو أو يعني بالليل كدا ببقى نعسانة وما بعرف أفكر .. بحس في كلام كتير عايزة أقولوا فبقعد أكتبه تحب تشوف؟
علشان بس ما تفتكر إني يعني لا سمح الله ما ..
-ما بتحبيني؟

-هزيت راسي بمعنى أيوة.

-لا إطمني عارف كُل حاجة ♡

-زي؟

-زي الصحية اللي بتجيك 2ص علشان تشربي موية وبالمرة بتطلي علي تشوفي إذا نايم كويس أو لا ..
زي النوت بوك اللي قافلة عليه بالمُفتاح وفيه كُل الاحلام والتفاصيل اليومية بتاعتك.
زي الصورة اللي خاتاها قُصاد الجنبة اللي بتنومي عليها وقبل ما تنومي بتفضلي تعايني ليها كُل يوم.
زي الرسالة اللي مسحتيها وإفتكرتي إني ما شُفتها.
زي حاجات كتيرة أعدها ليك كُلها ولا الزمن فات؟

-قلبي حيوقف بعد ما جاب سيرة الدفتر دي حاجة خاصة أنا بعتبر الكتابة عن أحلامي والحاجات اللي نفسي تحصل لي دا نوع من لحظات الضُعف اللي ما قدرت امسك فيها نفسي دا حيكون يا لهوووي بجد لو قراها لا لا عزيز ما بيتطفل أو بيتطفل بس ما للدرجة دي كُنت بضغط على صوابعي "حركة بعملا لما بتوتر"

-ضحك ومسح على وشو ..
سيبك من التفكير ما قريت شي أنا بس بجيني فُضول وبشوف إنتِ صاحية وسايبة الضو ليه .. وبالمناسبة نومي خفيف ببقى حاسس وإنتِ بتفتحي الباب تطمني علي .. ويا ذكية الصباح أكيد حألاحظ لما تغطيني وأنا من يوم ما إتولدت ما بحب الغُطا .. ♡

-دنقرت تحت وحسيت بغبائي يعني ما مُمكن أكون صغيرة كدا لدرجة ما أفكر إنو في يوم مُمكن يعرف أو يحس إني دخلت عليه في غُرفتو بعد نام وطفيت الضو وطلعت الساعة وغطيته أنا ليه ما بفكر أوووف.

ضحك علي زيما يكون سمع أفكاري ..!

بعدها مسكني من يدي وقال لي من اليوم ..

-قطع كلامو وأنا كُنت مُركزة معاه عايزة أعرف حيقرر الحاجة اللي نفسي أسمعا ولا شي تاني برغم الفضول إخترت أسكت.

-ما نفسك تعرفي قررت شنو؟
-هاا
-بتقولي ها بنبرة طفولية بتخلي الزول ما يعرف هو كان مُقرر شنو.

ضحكت وقلت ليه طيب كمل.

-إنتِ أساسًا ما عارفة ولا عاملة فيها ما عارفة؟
-هو شنو اللي ما عارفاه؟
-أنا نِعست وإنتِ بكرة عندك دوام فخلينا ننوم.
-سكت .. على طول غامض وبحب يخرب اللحظات السعيدة وبوقف متى ما يحب وبيتكلم بمزاجه.
قلت ليه ببرود أوكيه وإتحركت على غُرفتي.

إتفاجأت بيدو بتمسكني وبقول لي:
-على طول مُستعجلة وبتفهميني غلط وبتحبي ترسمي سيناريو في دُماغك ما حصل ولا بيحصل.

-ما تعاملني ككاتبة ممكن؟
لأني صراحة ما قاعدة أفهمك مرات.

-ورانا شنو العمر طويل وحتفهميني بس أسي خلينا ننوم الزمن إتأخر.

-ملاحظ إنك بتكلمني بنون الجماعة؟

-وحكلمك بياء الملكية كمان ها في إيه تاني يا حياتي؟

بعد إذن عدم الفهم أنا عايزك جنبي من هنا لقدام عندك أي مانع؟

إبتسمت رُغم إني فاهماه من الاول بس إستنيت تجي منو بكل وضوح كفاية تلميحات من يوم ما عرفتو .. جا الوقت اللي يكون عزيز اللي أنا عايزاه وإستنيتو مش عزيز اللي بيتعزز.


#على_الهامش:
زيما قالت رغد:
تخيَّل وأنتَ الأن وسَط كل هذا الشَّكِ والتِيه .. يأتي شَخصٌ يُحِبُّ فيكَ رهافتَك ، وعينكَ المُتعبَة من إحتضانِ اللَّيل ، وحدِيثُك المُتعرِّج المُثقَل ، تخيّل!
♥️

#ننس_تمدين.
#نوودين.

#عزيزُ_قلبي "3"


صحيت الصباح بدري وما اتأملته..حسيت لو عملت كده ح أضيع اليوم..أول مرة أحب الصباح بالشكل ده..نزلت بسرعة من السرير بعد ظبطت أموري دخلت المطبخ..حاولت اجهز ليهو قهوتهُ بالشكل اللي بِعجبه..سمعت صوته وهو بيصلي صلاة الصبح بعد خلص جاا المطبخ على غير العادة..كان الأول بِتمشى وبجهز نفسه بعدها بيجي يجهز قهوته بعدها يقعد شوية في المظلة يقرأ كتاب وبعدين بيمشي شغله.

_صباح الخير.
_صباح الخير حاف كده.
_صباح الخير يا إيناس.
_صباح الخير يا إيناس حاف كده.

قرب بجسمه مني _صباح الخير يا حبيبة قلبي♡.
_أحم.
_أحم دي تعبير لصباح الخير..أتمنى ما اكون إتخدعت فيك وفي كتاباتك
ضحكت وبعدت عنه وأنا بقول_ممكن تطلع تجهز عشان تدوق أجمل قهوة من تحت يديني.
_يا سلاااام...طيب قولي صباح الخير الأول عشان أمشي.
_عزيز أمشي
_صباح الخير واحده بس.
_عزيز.
_يا قلبه
عاينت ليهو بطرف عيني وأنا بجاهد عشان أخفي إبتسامتي..إبتسم وطلع على طول.

القعدة بتبقى حلوة لما الشخص القدامنا يكون شخص مٌريح وخفيف..عزيز كان اخف من النسمة على قلبي..جبت القهوة وختيتها قدامه ووقفت كأني طالبة ومستنية ثناء ومدح من أُستاذها...ملامح وشه إتغيرت

_شينة !!
_......
_عزيز إتكلم...شينة !!
_تعالي كده شوفيها

مشيت جنبه شربت منها حبه..لقيت طعمها حلو ومستساغ.

_ما أهو طعمها رهيب
_كده أشوف

شرب منها تاني والمرة دي إبتسامته وسعت.

_صح كلامك..طعمها رهيب..بس عارفة ليه !!
_عشان أنا عاملاها !!
_يا غبية لا..عشان شربتي منها♡

قام بسرعة زهو بعاين لساعة يدهٌ...مشيت وراه ودي كانت أول مرة أمشي وراه وأوصله للباب.

_إنتي ح تطلعي بعد نص ساعة صح
_صح
_طيب حلو..اول ما توصلي كلميني

قرب مني _على فكرة
_هاا
_يا الله من ها البتخليني أنسى كلامي ليك
_على فكرة شنو قول !!
_على فكرة...حلو دور الزوجة المُطيعة القمتي بيه ده♡
_أنننننننن
_بحبك لما أجي
_وبعد تجي !!
_لا بعد أجي..ح أحبك أكتر♡

مشى وخلاني ببتسم براي زي الهبلة...زي !!..لا أنا فعلاً هبلة...واقفة ربع ساعة ببتسم بعد مشى...جهزت نفسي بصورة سريعة وانا بركب عربيتي جاني إتصال منها.

_نود
_وين أنتي للآن ؟
_في الشارع جاية
_تعالي سرعة..كتبت ليك إقتباس تبدي بيه مقال اليوم
_هو المقال كان عن شنو نسيت !!
_عن السند
_قولي الإقتباس
_وإنّي كُلّما مِلتُ لجأتُ إلى صورتك لأستند، كيف يهدّني عُمر وتبنيني عيناك.
_النص يشبهُ
_يشبه منو !
_ااا..لما أجي..اقفلي يلا.


"صباح الخير ☁️"

-"‏إننّي أستخدمُ ضحكتك كعتادّ، كبوصله، كمُمحاة للحزن، إنك تضحكين بطريقه أقاوُم بِها العالم ♥️".

دي رسالة رسلها لي عزيز..خلاني ما أعرف أركز مع نود ولا هي بتقول في شنو

_بقينا نبتسم لرسائل احدهم
_نود
_أحكي لي وانا هسمع والله
_نووود
_أحكي أحكي..ما عندك غيري أصلاً

يمكن نود قالتها بهظار..بس فعلياً أنا ما عندي غيرها..هي صحبتي الإتمسكت بي في وقت ما كنت قادرة حتى أحب نفسي وأتمسك بيها♡.

_عزيز مُسيطر لكن
_طلع كيوت شديد يا نود
_لا ماهو واضح
_مستنية متين دوامي يخلص وأرجع أجهز الغداء
_العشاء قصدك..نسيتي إنو قال ليك ح يتأخر
_مٌركزة مع زوجي أكتر مني
_أختك برضو

ضحكنا الإتنين...كتبنا مقال التلاتاء وسلمناهٌ..وصلت نود بيتهم وبعدها رجعت بيتي.

_أنا ح أنفصل

دي رسالة نود..في اليوم بتقرر تنفصل من خطيبها ألف مرة.

_إنفصلي
_ما ح تحنسيني
_لا..لأنه أنا ح أحنس وأطبطب..وكريم ح يجي يقتل قلبك بكلمتين
_طيب اقطعي وشك عشان هو بيتصل
_ما قلنا ح ننفصل !!!
_أنا بقول..بس ما بنفذ

ضحكت وقفلت الشبكة...دخلت غرفتي وإبتديت انقل حاجاتي زيما عزيز طلب مني...ما عدا دفتري ما شلته..كنت حابة يكون قاعد في الغرفة دي وأنا أجي أكتب فيهُ..ما يتنقل خالص...عملت كذا تغيير في البيت لحدي ما عزيز إتصل.

_حبيبي

كان متوقع يقول كده..بس أنا حالي إتبهدل..لساني إتشل حرفياً..ما عرفت أرد بشنو.

_إيناس
_أيوة معاك
_ساعة كده وح أكون في البيت
_تصل بالسلامة.
_كده بس؟؟
_وخلي بالك من نفسك
_وتاني ؟؟
_وإستعجل عشان أنا جعت..ومع السلامة.
_عندنا عيب زوجة تنهي المكالمة مع زوجها قبل تقول ليهو بحبك
_يا شيخ !!!
_أحلف !!!
_من غير حلفان... بحبك♡


#على_الهامش

"كان لابد أن أكشف لك عن وريدي لتنظر كيف تعيشُ فيه♡"

#نُوودين
#ننس_تمدين

#عزيزُ_قلبي "4"

‏فِيني ألف شُعور يخَآف عليك ..))

أثناء ما انا بتكلم مع ننا كُنت مُستنية مُكالمتو .. عارفة إني زعلانة منه وفصلتو وقلت ليه أختاني وقفلت الأبواب كُلها في وشو .. بس مُتأكدة هو حيعرف يكسرا كلها ..
حيتصل .. وفعلًا دا الحصل .. ما ثقة في نفسي أو غرور بقدر ما هو حُب وحنية. .. كريم دا ألطف شخص في الحياة .. أكتر شخص بيعرف يخليني مبسوطة .. وأحن علي من نفسي♡

-مساء الخير يا قلبي.
-أهلًا.
-أهلًا يا نُود؟زعلانة مني للدرجة دي؟
-ما زعلانة أنا أصلًا ما بزعل غير من البحبهم.
-وكمان بطلتي تحبيني .. يا خبر الشوم عليك يا ود الزمراوي عايش لشنو قوم إنتحر.
-ما تبالغ يا كريم."كاتمة الضحكة عشان ما ينفع أفصل من اول دقيقة كدا هيبة الزعلة بتروح".
-كيف ما أبالغ وإنتِ بطلتي تحبيني وقلتي لي أهلًا الموضوع دا شوية وحيبقى قضية راي عام كريم الزمراوي يتقال ليه كدا؟
-شايف غرورك وصلنا لوين؟شوية وحننفصل وحيقولوا كريم الزمراوي إنفصل وحتبقى تريند يا أبو هشيمة.
قلتها باستفزاز وأنا خلاص ما قادرة أكتم الضحكة اكتر.
-كدا اسهمي حتنخفض يا أنجلينا وما حاقدر أتنفس وحموت يرضيكي؟
-المرة دي ضحكت خلاص وفصلت يا قول ننا أنا أصلًا ما بقدر عليه.
-ضحكة دي ولا قلبك يا كريم يرحم ايام جدك كان أخر حاجة سمحة سمعا صوت أم كلثوم وهي بتقول "يا عمري اللي فات واللي جاي"
-ياخي إستغفر الله أرحم جدك دا الله يرحمو ويغفر ليه.
-كان راجل ما ساهل حفيدو طالع ليهو بكلمتين بس بيعرف يفصل وحدة عاملة فيها مُصنددة وبتقول أهلًا.
-ما تقول عشان ضحكت ليك معناه سامحتك غلطان أنا بضحك عشان الموضوع بضحك إنما لو جينا للمسامحة ولا مسامحاك ولسة مخاصماك.
-حتى ولو يا نُود ما لدرجة تقولي لي أهلًا قاسية شديد دا ما طبعك إتعلمتي كل دا من وين؟
-إنت مزعلاك الكلمة دي ولا عشان أنا قلتها ليك؟
-هو كان ممكن ما تزعلني لو قالا لي زول غيرك بس منك حسيت نفسي سيد البقالة الجنبكم ما أظن لو كنت سيد البقالة تقولي لي أهلًا والله.
-أيوة صح ما إنت كريم الزمراوي على سن ورمح كيف يتقال ليك أهلًا.
-حصل بقيتي فاهماني ياخ.
-أسي يعني دا غرور؟
-إنتِ شايفاه شنو؟
-شايفة إنك مُزعلني وكمان شايف نفسك.
-أنا ما بسوى شي وإنتِ زعلانة مني أشوف نفسي شنو ياخ.
-طيب ما ها.
-ها شنو أعتذر قصدك؟
-كويس يا كريم شكرًا ليك عشان أثبت لي إنو الإهتمام لا يُطلب.
-دا كلام جرايد ساي أسي أنا جاي وطالب إهتمامك ما تشوفينا ياخ شنو من الصباح برسل ليك قافلة الداتا بتصل القاك ويتنق ارسل sms ما بتردي علي أنا أعمل شنو عشان أصل ليك؟
-بتعرف تطير؟
-لا بس أبوي عندو صاحبو شغال في بدر للطيران ممكن أكلمو يسلفني طيارة تنفع؟
-ضحكت لأنو قالا بطريقة جادة.
-اضحكي خلي روحي ترجع لي.
-وهي مشت وين؟
-مشت ليك لسة ما وصلت؟
-بكون لقت الشارع زحمة.
ضحك هو المرة دي ورد فيني الروح ♡
كريم يفوز بإنو صاحب أحلى ضحكة ممكن الواحد يسمعا.
-بالمنافسة؟
-إتكلم عديل.
-أنا ما قلت حاجة لسة لكن؟
-قول سريع ما فاضية ليك..!
-طيب إكسكوزمي سبعة دقايق من وقتك؟
-يااااخي ياااخ.
-طيب طيب ما حأتكلم كدا ما تتعصبي.
-ها طيب عايز تعتذر؟
-أي بس ما عارف ابدا بي شنو.
-لو مهتم كان عرفت تبدا بي شنو.
-يا دي النكد يا دي النكد.
-أنا نكد مش؟
-لا إنتِ ما نكد والله حاشاك نكد أنا دا.
-خلاص ما تقول على نفسك كدا.
-طيب ما حقول علينا كدا المهم يا ستي عايز أقول:
أنا اسف يا نُود حقك علي ياخ والله ما قصدي الموضوع كان عادي بالنسبة لي وإنتِ براك عارفة مكانتك عندي ومستحيل أي وحدة تتقارن بيك مهما حصل وأنا جد اسف عشان ما أخدت الموضوع على مهمل الجد من البداية وما قدرت احس بيك أوعدك ما حتتكرر ♡

لما لقيتو بيعتذر شديد ومتحسس جد وقفتو وقلت ليه:
-بس يا كريم كفاية ما عايزاك تنكسر قدامي وتعتذر أنا كنت عايزاك تفهم إني لما حذرتك منها ما كان عدم ثقة فيك ولا عشان بشكك في لحظة إنو ممكن يحصل شي بينك وبينها بس كان جواي إحساس إنو في شي غلط وهي ما بتعاملك زيما إنت ماخد الموضوع عادي كنت عايزاك تحس بي وتفهم وجهة نظري .. كل اللي طلبته منك تفهمني وتقول لي حاضر. .. نحن ما حنختلف عشان وحدة ولا أنا البسمح لواحدة تدخل بينا وتزعزع مكانتنا عند بعض إنت عارف كويس إنت بالنسبة لي شنو ♡

-عارف يا نُود وعارفة كويس بحبك قدر شنو.
-عارفة عارفة والله فهمنا ما تقولا لي كل خمسةدقايق بتوترني ياخ.
-أنا إتغشيت والله كريم الزمراوي إتغشى يا جدعان كان عايزا كاتبة تسمعوا كلام حلو طلع حبر على ورق.
-مشششششم.
-مشششم إنتِ دي والله.
-ضحكت لأنو كانت الحركة حلوة حلوة منو.
-أسي يعني ما حسمع كلام حلو وحتقضيها لي مششششم.

-أييياااا كلو زي دا وإنت إتغشيت أهو.
-يا حليلك يا ود الزمراوي الله يرحم جدك كان كل يوم سمع كلام حلو في زماناتو.
-زمان متين في كلام حلو؟
-إنتِ اسكتي يا بياعة الكلام الحلو.
-مش مليون مرة قلت ليك ما تقول لي بياعة الكلام الحلو.
-بالمنافسة دي النص بتاع الليلة يتبروز رغم إنك زعلانة مني وحزينة ومقررة تنفصلي عني بس كتبتي حلو.
-دي ما أنا دي إيناس كتبتو.
-أنا ما بعرف كلامك من كلام إيناس؟
تقولي الكلام دا لواحد من متابعينك إنما أنا حافرز كلامك كلمة كلمة تحبي اوريك كتبتي شنو الليلة؟
-هو صح انا عايزة أنفصل عنك بس النهايات اخلاق وإنت كُنت سند بجد عشان كدا قلت يا بت ما تظلمي ود الناس وأكتبي عنو كلمة كلمتين يتذكرك بيها.

ضحك وانا نسيت ليه كنت زعلانة منو ♡

كملنا حكي عن موضوع اليوم وقفلنا الصفحة دي.


_
عند إيناس:
أخدت دوش ولبست فستاني الأصفر وضفرت شعري ضفيرتين بقيت احب جو البيت وريحة البخور وصينة الغداء اللي حنتلما عليها بعد يوم طويل.
وأنا بعاين لي نفسي في المراية حاسة بالسعادة ومفرهدة كدا إتذكرت لما يوم ماما وصتني:
"الواحدة فينا ما عندها غير سعادة زوجها إنتِ حتمشي من هنا حزينة وزعلانة عشان فقدتي أهلك واخواتك وصحباتك حتمشي بعيد عننا بس حتكوني مع الأقرب مننا ليك والأحن يا إيناس إنتِ بتي القريبة لي وأنا ما بهون علي زعلك دا بس عايزة سعادتك عزيز دا هو البنفعك كلكم بناتي وعايزاكم جنبي بس وجودي جنبكم براه ما كفاية إنتوا تستاهلوا سعادة اكبر من كدا وأنا نفسي أشوفكم في بيوتكم مبسوطين وأشوف أولادكم حتفهمي الكلام دا لما تبقي أم، حتعرفي إنو ما في أغلى على الأم من شوفة بناتا مبسوطات))

حقيقي وقتها ما كنت فاهمة ولا قادرة أستوعب يعني شنو سعادة زوجية ويعني شنو واحدة تغيير حياتا كلها عشان راجل ..
إتزوجت لأشياء في نفسي كانت احلام كتيرة مع مرور الزمن إتلاشت ..
في بداية دخولي للعشرين كنت بديت أحب وأقرا روايات عبير وأشوف مسلسلات تركية وقتها نظرتي للزواج كانت حبيب ياخدني في حضنة ويمسك يدي نجوب شوارع تركيا ونتصور في التلج.
كبرت شوية وإتخرجت وبقت نظرتي للزواج في التوب والدهب والحنة والمشاركة في المناسبات السعيدة والمسابقات البتوري العالم إنو نحن كابلز حلوين واكتب على صفحتي وجدت بطلي والكلام من النوع دا.
مرة تانية الحياة بتعلمني درس وإنو العمر ماشي وأنا ما حققت ولا شي من احلامي فبديت أتنازل عنها .. إنكسرت مرة وإتخذلت مرات كتيرة والعمر ولى والتريندات ما بقت تستهويني والدهب بقى شي بعيد المنال.
في بداية الـ25 بطلت اجيب سيرة الزواج وبقيت لما اشوف المسلسلات بدعي جواي يارب شخص نتقاسم الرغيفة وكباية الشاي .. لما أمشي المناسبات ونقدم صحبتنا عروس ببقى بدعي من جواي إنو حياتهم تبقى سعيدة ويعملوا اللي انا ما قدرت اعملوا وربنا يرزقني عاجلًا .

في بداية الـ27 لقيت نفسي بطلت احلم .. بطلت أحضر افلام .. بطلت أمشي المناسبات عشان اتحاشى السؤال المزعج .. الشي الوحيد اللي ما بطلته كتاباتي في دفتري عن رغبتي الشديدة في إنو يكون في شخص يملى حياتي بدل الفراغ دا.

في منتصف الـ27جا الشخص دا ..
الشخص اللي إستنيته طويل وجا مبهر أكتر من الافلام والمسلسلات وكل السيناريهات الكتبتها ♡

أثناء ما أنا سرحانة سمعت الباب .. مشيت بلهفة عليه.

-مساء الخير يا جميل.
-مساء النور يا عيوني.
-أنا سمعت صح؟
-الحمام جاهز هات من يدك أجهز وأنا حاسخن الأكل.
قربت أشيل منه الاكياس باسني في خدي بسرعة ومشى بدون ما يقول شي خلاني واقفة بتبسم براي غمضت عيوني لوهلة وما كنت عايزة أصحى إفتكرته حلم جميل لو فتحت حينتهي بس لما فتحت لقيت إنو فعلًا دي حياتي ♡
بيتي اللي حلمت بيه .. جميل فيه زهور والواني المُفضلة وكاسات الشاي والمقات اللي كنت بحتفظ بيها في تلفوني .. بيت مرتب ومتبخر ومليان حب وشخصي المُفضل ينتظرني على طاولة الطعام وفي الحيط معلقة لوحة عليها "الحمدلله "بخط الثلث ♡


#على_الهامش:
"الحياة مُمكن أن تبدأ من حيث ظننا أنها النهاية.🤎))

#ننس_تمدين
#نوودين