#عزيزُ_قلبي "5"

جاا طالع من الغرفة وهو لابس تي شيرت كحلي فاتح وبرمودة بنفس اللون بس على أغمق..إتعود وإحنا بنتعشى أو بنتغدى يقعد قصادي...المرة دي قعد جنبي وهو بعاين للسفرة بكل حب الدنيا.

_يا سلام..الزوجه المُطيعة الحلوة طابخه لينا شنو اليوم !؟
_عزيز ! ..شنو من الصباح شابكني مُطيعة وبتاع..لي قرابةً الشهر بعمل كل ده والموضوع عادي يعني
_يعني ما عشان قلت ليك بحبك يعني !!
إبتسمت وأنا بحرك المعلقة في الصحن_يعني يعني
ضِحك وبدا آكل_اليوم كان طويل ومٌتعب
_ليه حصل شنو !!
_لقيت في تفاصيل كتيرة وحسابات مُحتاجه ملاحظتي وأنا كنت مشغول بمشاريع تانية.

إبتدأ يحكي عن يومهُ في الشغل...سبب من أسباب نجاح العلاقات الزوجية إنك تحاور شريكك عن مجالك وتاخد منهُ نصائح..أو حتى شوية تشجيع..الحاجات دي بتفرق جداً♡.

_ما كنت عارف إنو في شمس ضاحكه بتظهر بليل♡
_بِمعنى !!
_إيناس يا بقيتي غبية...يا جد جد أنا أتغشيت فيك
_ما هو متشوف كلامي عن الحب والحاجات دي وتعاملني على أساسه وأيوة حصل مرات كتيرة بضيع منك في وسط الكلام وحقيقي ببقى ما عارفة وما فاهمه قصدك شنو.
_قاصد الفستان ولون الفستان وست الفستان♡
_عشان اللون الأصفر أهاااا..تصدق غبية فعلاً
_لا ما تقولي على نفسك كده..أنا بس الأقول
_أننننننن
_لا بجد..كنتي حارماني من الحلاوة دي كلها ليه !؟
_عشان ما كنت حابة شخصيتك
_وحبيتها !!
_هو انت بتمسك في الكلام اللي بيوترني ليييه !!
_شكلك بيبقى عسل وأنتي متوترة♡
_حلو الأكل
_يا ذكية الموضوع ما بتغير بالطريقة دي
_إتغابيت صح !!
_كنا واقفين وين !
_كنت بتسألني إذا حبيت شخ..هاا عزييييز !!!! بتوقعني في الكلام
قام من جنبي وهو بيضحك، ضربني على راسي بِخفة ومسك يديني وعاين لي_أنا بحب البينا ده..بحب صراحتك لي وصراحتي ليك وبحب إني منك وأنتي مني..وما ح أبطل أطلب منك تفضلي وما تمشي..عشان أنا بجد ما ببقى بدونك..وده ما ضعف مني...بس عاوزك تعرفي قدر شنو أنتي مهمة..وجودك بشكل فارق حلو معاي وبُعدك ولو كان للحظات بيضايقني جداً...فلو سمحتي ما تمشي وخليك♡.

شكلهُ وهو بيتكلم بالطريقة دي خلاني أحن ليهو كأنه بيبي صغير وخايف من إني أفك يدهٌ فيضيع..لما القدامك يوصل مرحلة إنو يطلب منك ما تمشي ويفهمك قدر شنو مكانتك جواه كبيرة...تبقى بني آدم ما سوي فعلاً لو إستغليت ده ضدهٌ وجرحتهٌ.

_____
"مكان_آخر"
"عند وعاد"

_يعني كده خلاص !؟
_....
_رد طيب وقول اي شيء
_......
_قول إنك ما كذبت علي..وإنك بتحبني
_أنا آسف
_أنا ما عاوزاك تعتذر
_....
_ألو...ألو

رميت التلفون بغضب لدرجه إنه كل جزء فيه طار في حته..بقيت ببكي وأنا ضامة رجولي علي..ليه الإنسان بيقسى بالطريقة دي على إنسان ما لقى منه غير كل حب ودعم ولطف ومحبة لو إتوزعت على الدنيا كلها ح تكفي...ليه الإنسان يطفي الإنسان الآخر بالشكل البشع ده.

مسحت دموعي لما سمعت صوت كريم وفجأة جاا داخل الغرفة _وعاد
_ايوة يا كيمو
_مالك قاعدة كده..وليه وشك منفوخ بالشكل ده..كنتي بتبكي؟؟
_هه..ااا كنت بحضر في فيلم وأنت عارفني ببكي من أقل شيء
_دموع فيلم دي متأكدة..أنا غير إني أخوك فأنا شاب..يعني بفهم البت بتبكي ليه !
قلبي ضرب شديد_البت بتبكي ليه !؟
_من أبسط وأتفه الأشياء..قومي شوفي الحياة فيها شنو بدل بكاك ده ههه..أنا طالع عاوزة حاجه !!
_ولا شيء

بعد طلع سألت نفسي والدموع مالية خدي _كسرة قلبي شيء تافه وبسيط ؟؟؟

_
"صباح مٌشرق"

_أصحي يا كسلانة..أصحي يا اللي بتشربيني القهوة يوم وتنومي اليوم البعدهُ
فتحت عيوني وعاينت لعزيز_دي صباح الخير عندك ؟؟
_بعد التحية والسلام..قومي أعملي لي قهوتي
_مش متعود تعملها براك..أنا اليوم إجازة فخليني أنوم
_لا ح أتعود عليها منك..الجملة كده صحيحه
_عزيز والله فترانة..أعملها بس وبعمل ليك حقت بليل
_أحلفي !؟
_أووف من غير حلفان...قايمة

قمت دخلت الحمام وبعدها مشيت المطبخ لقيتهٌ عاملها أساساً..لما عاينت ليهو عمل نفسه مشغول بقراءة الجريدة

_وده شنو ده إن شاء الله
_كنت عاوزك تصحي وتونسيني شوية قبل أطلع
_كنت تقول كده طيب
_ما كنتي ح تقومي


"‏يسكُنُ الشعر في حدائِقِ عينيك
‏فلولا عيناك.. لا شعر يُكتبُ♥️"

_أصابعك دي فيها شنو بتكتب حلو كده !!
_عجبك البوست !
_وست البوست والله.

بقى يعاين لي ويرمش

_بتعمل كده ليه
_مش براك كاتبة الشعر ساكن في عيوني..يلا قولي شعر من عيوني سرعة

ضحكت بصوت عالي لما دمعت

_إيناس بصورة جادة
_ها
_ما تضحكي كده غير لي ومعاي وقدامي
_ليه !؟
_ضحكتك حلوة شديد والله♡
_طيب قوم عل شغلك يا شاطر
_الشعر أول
_الشغل
_الشغل يطير ياخ..شغل بيبعدني عنك ده ذاتو ما شغل
ختيت يدي على خدي وقلت_أتدري !!
_والله ما أدري
_يا غبي..خليني أكمل
_أها..ده بداية الشعر يعني..إني آسف..كملي حبيبي
_أتدري عُمق عيناك ، إلى أين يأخُذني؟...أتدري إلى أي العصور عيناك تنتمي...فداك كلي وشعري وإقتباساتي..يا بطل كل رواياتي وحكاياتي♡
_أحم بسم الله الرحمن الرحيم الإجابة بحبك

المرة دي صوت ضحكتي وصل آخر الشارع...عزيز ده مجنون بالجد.

__
"عند نود"

_وإنت أساساً كيف تقول ليها كده !!
_شن عرفني انا بتفاصيلكم دي..المهم انا حاسس إنها محتاجه تتكلم مع بت زيها..ح تقدري تزوريها اليوم !
_أيوة ممكن...أساساً إجازة وإيناس بقت ما فاضية
_عقبال نتزوج وما تفضي ليها
_زولي زولي
_بطلي الأساليب دي
_طيب يا ود الزمراوي
_هيبة الإسم على لسانك♡
_خلاص اقفل عشان ألحق اجهز نفسي
_طيب..وبالله شيلي ليها معاك حاجه حلوة
_ما توصيني..وعاد صحبتي قبل تكون أختك الصغيرة
_ماشي يا باشا
_على فكرة ما مستنياك تقول لي بحبك
_بحبك
_ولا هطلب منك تقول لي خلي بالك من نفسي فيك
_خلي بالك من نفسي فيك
_ولا هقول ليك نفسي في شوكلت وورد أصفر
_ترجعي البيت بس ويكونوا بين يديك♡
_ولا...
قاطعني_نوووود
_خلاص خلاص..أقفل المرة دي بالجد
_يلا سلام.

كنت متوترة شديد وانا ماشة ليها..لإني سلفاً عارفة قصتها مع زياد..وكتير حذرتها ما تتعلق بيهو كده ولا تبين ده..بس كانت بتقول غصب عنها بتعبر عن الجواها..ومعاها حق لما نحب ما بنمسك قلوبنا علينا..بنخليها تفرهد وتطير في السماء..ما بنقص جناحاتها..بس كيف نفرق بين الشخص اليستاهل والشخص البيستغل ويغدر !!!

علاقتي مع كريم ما لقيت زيها..عادي أطلب إهتمام بدون أحس إنو كرامتي هتنجرح..أساساً موضوع الكرامة وعزة النفس تفكيري ما قاعد يمشي عليهم..لأنه عارفة إنو كرامتي من كرامة البحبهُ♡فشيء طبيعي يحافظ عليها قبل اطلب منهٌ ده بشكل واضح وصريح.

_وعاد
_نود

نطقت إسمي وجات علي بلهفة...ضمتني ضمة قوية وفضلت تبكي..ما عارفة مر كم وهي ضاماني كده...بس العرفته إنها كانت محتاجه تطلع من الجو ده بأي طريقة.

#على_الهامش.

"لو رأيت كيف يرتجف الواحد منا خوفًا أن تغادره الأشياء التي وضع قلبه فيها لقَضيت حياتك بأكملها تطمئنه🖤))

‏- داليدا عوض الله

#عزيزُ_قلبي "6"

"أنا هُنا متى ما إحتجتني
أنا هُنا متى ما أردت البُكاء أو الضحك
أنا هُنا حُضناً يحتوي كُل تقلباتك المزاجية
أنا هُنا معك دائماً وأبداً))

_وِعاد
_نُود

نطقت اسمي وجات علي بلهفة..ضمتني ضمة قوية وفضلت تبكي..ما عارفة مر كم وهي ضاماني كده...بس العرفته إنها كانت محتاجه تطلع من الجو ده بأي طريقة.

أخدت وقتها الكافي بعدها إتنهدت وزحت شوية مني بس فِضلت ماسكة في يدي كانت مدنقرة ما قادرة تواجهني حاسة إني عارفة كل حاجة ومتوقعاها.

زياد ما بيستاهل وِعاد هي تستاهل تتحب ويتقدم ليها نفس الحُب اللي بتقدمه وأكتر بس ما كانت حتفهم الكلام دا لو ما جربت لو ما أدت وما لقت شي لو ما إحتاجت كل دا بِفضل كلام لحد ما تجربو..أكتر من مرة إستشارتني وهي سلفًا عارفة بس بطمن روحا كانت عايزة تسمع راي مختلف بتبرر ليه حتى وأنا بشرح ليها إنو الحصل دا غلط بتدافع عنه قدامي وقدامو حتى.

أنا مرتين بقول ليها وِعاد كريم ما يعرف البيعملو فيك الود دا حيقتلو ويريحو من الحياة دي بس كل مرة بتصر إنو هو حيتغيير كان بكلمة منه قادر يخلي وِعاد تنسى كُل شي وتسامحه دي مرة تعبت ورقدت مُستشفى بس ما كلف خاطره يقول ليها بقيتي كيف؟
عكس اللهفة البشوفا في عيونا تجاهو.. وِعاد حتموت بس هو ما يقول أه.

عرفت إنها أخيرًا صِحت على نفسها وما بقت شايفاه ساحر ومُبهر.

-أقعدي هنا حجيب ليك شي تشربيه وأجي.
-ما عايزة يا نُود خليك هنا معاي بس أنا حاسة إن قلبي حيوقف من الزعل.
-بعد الشر .. إنتِ أدخلي أخدي دُش صحصحي كدا وأنا شوية وحأجيك.

طلعت من غُرفتا ومشيت المطبخ عملت عصير وجيت لقيت الغُرفة جايطة والتلفون كل حاجة فيهو مجدوعة في حتة .. بديت ألم البطانية من الكنبة ورتبت الغُرفة شوية وطلعت بس لسة عيونا مُحمرة ووشها منفوخ كأنها لسة باكية جات إرتمت في السرير ورجعت تبكي ما كان عاجبني وضعها وحقيقي ما كُنت قادرة أتخيل هي حاسة بي شنو يعني الموضوع غريب شديد هي كيف ما قادرة تشوف إنو زياد دا إنسان سيء؟
كيف ما حاساه بستغلها؟
معقولة ولا مرة جاها إحساس عدم الأمان ناحيته؟

أنا بتذكر مرة كريم زعلني شديد لدرجة ما كُنت قادرة أمسك دموعي في مكان عام اول ما وصلت البيت فضلت صاحية طول الليل بتذكر الموقف الواحد دا وبسأل نفسي إذا هو بطل يحبني أو أنا بطلت أحس ناحيته بالأمان .. !
فِضلت إسبوع بتعامل معاه ببرود وزعل وبعيد حسابات كتيرة وبقول لنفسي وإذا إتكرر الموقف ولقيتي نفسك منهارة كدا بعدين قدام أهله أو أولادك؟
يمكن أنا كبرت الموضوع بس هو قدر لحظتا يمتص كُل غضبي تجاهه ويصلح الغلط دا.

معقولة زياد كان بكل السوء الفيه دا قادر يطمن وِعاد ويرجع يخليها تحس بالأمان ناحيته بعد كل المواقف دي حتى وأنا شايفاه ما بحبها؟

حقيقي .. غريب الحُب مين فاهمه))

كُل اللي طلع معاي قومتها وحاولت أمسح دموعا بس قالت لي نُود خليني عايزة أطلعه من جواي ما حأرتاح لو ما بكيت ححس نفسي مخنوقة قلت ليها:
ختي راسك هنا وأحكي لي في شنو؟
ختت راسا في رجولي وبقت تحكي كلمة وتتنهد وتبكي.
-ششش كفاية يا وِعاد .. خلاص روقي.
-ما قادرة أنا مُصدعة شديد حاسة راسي حيتكسر.
-بقيت أعمل ليها مساج في راسا ودموعا ما راضية تقيف يعني قدر ما حاولت أطبطب عليها غلبني عديل.

وِعاد بالنسبة لي ما أخت خطيبي وبس .. هي صحبتي وأختي وليها علي مواقف عمري ما بنساها ..!

صح هي أصغر مني بس قريبة لقلبي شديد وهي السبب في إنو علاقتنا أنا وكريم تستمر للآن ..!

اول مرة شُفتها كان إسبوع المُهندس كريم ماسك يدها وحايم بيها المُجمع كله كانوا مُلفتين للنظر لابسين جينز بأبيض مطقمين طالعين حلوين بيضحكوا سوا .. وكل شوية يقيفوا في حتة ياخد ليها كم صورة.
أنا كُنت مُركزة معاهم شديد إيناس لكزتني مرتين وهي بتحاول تلفت نظري إنو حوالينا ناس كُتار حلوين سيبك من الود بتاع البنات دا ..!
بس ما كُنت قادرة أشيل عيوني عنهم لما جا للسكشن بتاعتنا .. وقفت مُحتارة تختار شنو لقيت نفسي بمشي عليها وبمد ليها كِتاب كان وقتها طبعة جديدة ومُقوم الدنيا رفعت راسا عاينت لي ورجعت عاينت لكريم هو ما كان مُركز مع الكُتب شايفاه بِصور في حتة جمبنا نادت عليه:
-كيمو.
-جنبك .. وساب من إيدو وجا عليها.
-حاسب على دا كمان.
-بس كدا؟
-لسة ما خلصنا بس بالاول حاسب.
دخل يده في جيبو وقال ليها كملتي الكاش يا ودو تاخدي البطاقة تمشي الصراف وتجي؟
عايزة ترجع الكتاب وإترسمت على وشها ملامح زهج.

-أنا ما كُنت ماسكة الموضوع دا ولا لي علاقة فيه الصراحة يعني إحنا جينا نروح عن نفسنا شوية وإيناس أصرت علي نجي نحضر عشان نتذكر أيام الجامعة ومنها نكتب مقال حلو في الصحيفة الثقافية بما إنو وقتها لسة كُنا مُبتدئات وما عندنا عمود خاص.
لقيت نفسي بقول ليه دا هدية مني للحلوة دي وخلي البطاقة معاك ♡

إبتسمت ورجعت عاينت ليه كانت ورا كل حاجة تعملا كأنها بتاخُد رايه إبتسم لي وقال :
شكرًا شديد.
بلهفة قالت ليهو كيمو أخد لينا صورة بعدها سألتني عندك مانع؟

-وافقت مع إني ما بعرفا وكُل البعرفو عنها بت جات مع كراشي.


كراشي اللي أصلًا ما بعرف عنو شي ولا حصل كلمته ولا داري عني ..!

كُل اللي بعرفو عنو هو الفوتغرافر بتاع دُفعة هندسة من أيام الجامعة وكُنت باخد إيناس ونجي نفطر في هندسة علشان بس ألمح عيونو .. على قدر ما الموقف دا بسيط وما بيعني شي بس كان بيصنع فرق في يومي بحس بطاقة إيجابية لما أشوف الإنسان دا. .. فيه حاجة حلوة .. روحو مرحة تلاقيه بسلم على أي شخص يمر بيه بقيف بالدقايق مع عمو علي بتاع المكتبة ويمشي خطوتين يسلم على أولاد الكافتريا ولسة تلاقيه ماشي كُل الحواليه بيشاغلو.

كان بلبس مميز .. الوحيد اللي بلبس فنايل حُقنة مع جكت كت لون البنطلون ..
الوحيد اللي ما بغيير تسريحة شعره بل العكس بحب يخلي شعره طبيعي بدون ما يغير منه.

في مرة حلق شعره أنا زعلت لما إيناس قالت لي:
-نُود ممكن أعرف الموضوع مُضايقك ليه؟
-عشان بقى زيهم يا ننا أنا كُنت شايفاه مُختلف.
-سبحان الله الولد قاعد في مكانو ما داري عنك يلاقي نفسو مُزعلك رايك شنو أناديه يعتذر ليك؟
-ناديه ياخ ما مُتمسكة إذا إعتذر أو سلم علي الساهلة بس.
-قومي قومي خلينا نمشي كليتنا أنا فترت من المشوار الكل يوم بتجيبينا لي دا.
فجاة إنتبهت إنو وِعاد بطلت بكي وغِفت شوية .. ملامحا زي الطفل الصغير اللي أخد بكيته وبعدين نام بكل هدؤ.
ما هان علي أحركا وهي يداب هدت شكلها من أمس ما نايمة سبتها في مكانا طلعت تلفوني من شنطتي اللي كانت جنبي ورسلت لي كريم:
-جيب معاك سندوتشات وإنت جاي.
-رد علي بسرعة-هي كويسة؟حكت ليك شي؟
-حتكون كويسة إنت بس لما تجي خُت الاكل في المطبخ وأمشي.
-ما أشوفك يعني؟يرضيك تجي بيتنا وما نتلاقى؟
-حنتلاقى بس بعد أراضيها.
-حاولي تفهمي منها مالا عشان ما حكت لي شي.
-خليها علي ♡
-كُلنا عليك ♡
-أحيييييينا بس.
-شوارعية خلاص.
-أو تحسبني مثقفاتية؟
- كُنت أظن.
-شش صوتك عالي يلا من هنا.
-طيب تحبوا السندوتشات تكون شنو؟
-أي حاجة حلوة شبه ال الزمراوي كدا.
-أحييييينا.
-شايفاك بقيت شوارعي.
-مُلاحظ مُلاحظ.
-حاسب ما تقع.
-أخخخخخ يداب جاية تقولي لي حاسب.
-نحن منتظرينك على فكرة.
-مسافة السكة بس وأكون عندك.

ختيت تلفوني ولميت ليها شعرها إتحركت ختيت ليها المخدة ورفعت الصينية رجعتها المطبخ العصير سخن ما حيتشرب رجعتو التلاجة وطلعت على غُرفة حبوبة سلمت عليها ومسكتني عندها. .. حبوبة كريم دي حنينة شديد وبتسلم على الزول بكل حنية بتفضل ماسكاه من ايده وتسألوا عن القريبين والبعيدين أنا بحبها شديد أكتر من كريم نفسه ♡

بعد حكاية ربع ساعة ونسة معاها قالت لي:
-كتر خيرك بتطلي علينا يا بتي.
-حبوبة عندي منو غيركم؟
-عندك والله بس إلا نحن الما عندنا غيرك.

كريم أمه متوفية وأبوه بيسافر برة كتير عماته ما بيجوهم إلا لما ابوه يجي من السفر وخالاته إتنين واحدة في القاهرة بأولادا والتانية في ولاية بعيدة عنهم فحقيقي كريم ما عنده غير حبوبته ووِعاد أخته دي بحبهم شديد وهما كُل حياته.

طلعت منها بعد فرشت ليها المُصلاية لأنها عايزة تصلي الضهر لاقيت كريم داخل..!
-نَور بيتنا والله.
- إبتسمت وغطيت وشي بالطرحة.
-شوف الخجل شوف البسمة شوف الضحكة شوف الفستان وستو ♡
-ياخي ياخ.
-يعني بس يا إما تقضيها لي ياخي ياخ يا إما تقولي احييينا ما في حاجة تانية بتطلع معاك؟
-ماف ما عاجبك شوف البديل طوالي.
-للأسف ما بحب غير الأصلي وما متعود على الكوبي.
-بتعاملني كأوبجتكف خلي بالك.!
-بعاملك كوردة ما قادر أخطفا والله.
-هات سندوتشاتنا نحن ما فطرنا.
-هاك قلبي ذاتو ياخ.
-ضحكت وأنا بشيل منو الأكياس كان جايب معاه بيبسي وكولا.
قبل يطلع وقفتو:
-كريم.
-عينيو.
-ما حتاكل؟
-في زول بهمو أكل يعني؟
-أييييا في.
-بقى يتلفت .. وين ما شايفو.
-هنا ما مالية عينك يعني؟
-إبتسم وقرب مني..
-عاين حخت ليك اكلك إنت وحبوبة أمشي أكل معاها أنا إتأخرت على وِعاد بس أخلص منها حتصل ليك ترجعني .. وإتحركت ما إنتظرت ردو.

أنا بحب كريم وأي شي وهو شخص قريب مني وبحترمني بس لسة في جواي إحساس مخلوط بالخوف والخجل ناحيته ما حصل إتخطيت معاه أي حدود المرة الوحيدة اللي خت يدو في يدي لما لبسني الدبلة دي كانت اول وأخر مرة علشان كدا بتهرب من الكلام وساعات ببعد اول ما احسه حيكسر أي حاجز بينا هو ما حيعمل شي غلط بس برضو ما بحب الفُرص اللي بتجي على غفلة بدون ما ننتبه.

شلت سندوتشاتنا والبارد ومشيت لوعاد لقيتا قاعدة في نص السرير وبتضغط على راسا من كترة الصُداع حنستها نفطر عشان تاخد مُسكن ونشوف الحيحصل شنو. .. أكلنا وكانت كل شوية تقول لي:
-ما حاسة بطعم الأكل رغم إنو دي وجبتي المُفضلة.
-نُود كيف الحُب ممكن بلحظة يودينا سابع سما وبلحظة يوقعنا كدا؟
-أنا ليه ما كُنت شايفة النهاية دي؟
-إنتِ ما متخيلة أنا كيف حاسة .. !
-نُود هو قفل في وشي ما جاوبني ولا حتى كلف نفسه يقدم لي عُذر المرة دي..!
-متخيلة معاي هو جبان قدر شنو.

كملنا أكل وشراب وقعدتها ضفرت ليها شعرها طول القعدة هي كانت بتتكلم وتطلع الجواها بس المرة دي من غير بكي .. حسيت إنها بكت كل دموعا ما فضل شي.

سألتني سؤال خلاني أفكر مسافة قبل ما ارد عليه. ..
-نُود إنتِ حصل فكرتي لا سمح الله كريم سابك حتعملي شنو؟

مع سؤالا دا حسيت قلبي ضرباته زادت أيوة صح أنا وكريم ما بينا مشاكل بس يعني كلاما منطقي ليه الإنسان ما بيفكر إذا الشخص اللي البحبه دا ما كمل معاه لأي سبب كان حيحصل شنو؟
ليه ما بيسأل نفسه السؤال دا ويكون شُجاع ويجاوب عليه؟
ليه دايمًا بيرسم الصورة الحلوة الوردية وبتخيل إنو حيكونوا سوا ببساطة وبدون عقبات؟

سكت وأنا بحاول أتخيل كيف حيعدي يومي من غير كريم .. مُجرد يوم بس ما كل حياتي.

إتذكرت لما إختلفنا يوم كامل وفضلت صاحية للصباح ببكي.

على طول بقنع نفسي إني بحبه بس ما متعلقة بيه يعني بعرف متين اكلمه ومتين أفصل وأشوف شغلي وحياتي الخاصة.
اليوم فيه 24ساعة كريم بيستحوذ بالكتير على 6ساعات من يومي الصباح .. زمن البريك .. بعد أرجع .. وساعة بالكتير اخر اليوم.

دا كتقسيم زمني أيوة بس أنا قلبي طول اليوم معاه .. تفكيري فيه حتى وأنا بكتب عمود الجريدة .. ببقى شايل حاجة منه.
عيوني بتفضل شايفاه في كُل حاجة .. بداية بالويلبر بتاعت التلفون .. نهاية بالخاتم اللي في إيدي.

منطقيًا التعلق مشكلة عايزة حل.
عاطفيُا: الحُب أساسه التعلق.
بنبقى واقفين في النُص بين قلوبنا وعقولنا.

رديت ليها:
-ما بعرف يا وعاد بس بتمنى مافي شخص ينفصل عن شخص بحبه بجد وشايفه كل حياتو.

-يارب يا نُود تفضلوا إنتِ وكيمو سوا وتجي تعيشي هنا معاي جنبي أنا تعبت من الوحدة.

-إلتفت علي بعد خلصت من شعرها وهي بتقول كدا مسحت على وشها وقلت ليها:
-إنتِ حلوة يا وِدو وعيونك سمحة ووشك الحلو دا ما شبه الزعل غبي غبي بس عشان كدا ضيعك من إيدو وحيجي البستاهلك وحتقولي نُود قالت.

-قامت وهي بتقول لي :
-أدعي لي معاك ♡

الزمن فات أنا ما قلت لماما جاية لي وِعاد طلعت بس وأسي هي بتتصل علي كان لازم أرجع فقالت لي :
-حتمشي صح؟
-مع إنو نفسي اقعد بس. .
-طيب بس ممكن ما تجيبي لكيمو سيرة عن الموضوع دا عشان خاطري ما عايزاه يعمل مُشكلة!
-إطمني بس بشرط ما تدخلي في نوبات بكي زي بتاعت أمس كريم بخاف عليك حتى لو ما بان عليه بس صدقيني هو بحبك شديد وحيزعل لو شافك كدا.
-عارفة يا نُود أنا مرات بحتاج أمي بس لما أتذكر كريم بحس الدنيا حلوة عشان أدتني ليه.
-هو براو بس.
-ههه طيب وإنتِ كمان أختي وحبيبتي ومرت أخوي.
-أسي لو كان عندي اخو خطبتو ليك.
-ما حوار عادي تخطبي لي صاحب كيمو الطويل داك.
-إتلمي أحسن ليك ولو حبيتي تتكلمي او تطلعي أنا هنا يعني ♡
-ما نتحرم يا قلبي أسي عايزة انوم شوية شوفي حبوبة خليها تاكل ما تستناني.
-كيمو بياكل معاها بس ما تقفلي على نفسك وأطلعي عليهم بعد شوية اوكيه.
-حاضر.
-الكيس دا فيه حاجات حلوة ليك كيمو وصاني أجيبو ليك.
-بحبكم والله ما نفسكم تعرسوا؟
-نفسنا والله بس أخوك دا قاعد يتجرجر.
-أكلمه؟
-اوعك يعني الزول ما يهظر معاك؟
-أحييييا تفصلي.

قفلت الباب وراي وطلعت ودعت حبوبة وكريم فتح لي باب العربية وطول الطريق بيسألني وِعاد مالا وأنا كل مرة أتحجج ليه بإنو دي أسرار بنات ما يضغط علي.
-عارف مواضيع بنات بس يعني هي ما حاصلة ليها مشكلة في الكلية صح؟
-لع.
-طيب في واحد ضايقا أو حاجة؟
-ياخي ياخ ما قلت ليك مشكلة وإتحلت.
-إتحلت كيف يعني وهي كانت اليوم كلو زعلانة أكيد موضوع كبير.
-لع ما كبير.
-طيب يعني وِعاد بتحب؟
-وإنت ما قاعد تحب.
قلتها بزهج بدون ما أنتبه لانو عصبني وكتر لي الأسئلة.
-بحب أيوة بس ما خبيت عليها أنا كنت علطول بجي احكي ليها وهي عارفة كل حاجة ليه اسي تستقصيني من تفاصيلا؟
-ما كدا يا كريم بس يعني نحن كبنات..
-اها يا المتحدث الرسمي باسم البنات إنتوا كبنات مالكمم..؟
-ما بنحب نحكي قصص حبنا غير للبنات الزينا.
-تفسير ما منطقي خالص ليه وعاد ما عايزة توريني إذا حبت واحد يعني؟
-لما تحب حتوريك.
-حأنتظرا زيك كدا صح؟
-ياخ ما علينا .. وين الورد القلت ليك عليه؟
-ياها الوردة قاعدة جنبي.
-طب وين الشوكلاتة؟
-شوفيهم في الكراسي الورا.
-جبتهم يعني؟
-لا جو براهم.
-أحييييا.
-أستغفر الله من دي إعاقة.
-إنت لاقي؟
-ما لاقي وشكلي ما حألقى ذاتو.
-عاين ما تربط وشك دا كدا.
-بس حسب علمي ببقى سمح وأنا زعلان كدا.
-دي منو القالت ليك كدا؟
-وحدة كدا دا أخر ليڤل في الغزل عندها.
-ضحكت.
-يا ويلي.
-كريم أحسن ليك ياخ.
-دا تهديد؟
-أيييا.
-تصدقي خوفتيني.
-إنت بتخاف يعني؟
-ما بخاف إلا من 5حاجات.
-زي؟
-زعلك .. دموعك .. مرضك .. بُعدك .. فقدانك!

-عاينت ليه لقيتو مركز في الطريق وملامحو جادة وماخدة حُزن فجأة.
-ما تخاف دا كلو ما حيحصل يا كريم أنا هنا.
-طب ما ها.
-لع.
-ليه؟
-أبوك لسة ما حاساه راضي.
-وإذا يعني نحن حنتزوج لنفسنا ولا لأبوي؟
-ما حتفهمني بس خلي كل شي لوقته المُناسب عشان الكلام في الموضوع دا بضايقني.
-طيب أنا كمان متضايق والله.
-معلش.
-أحلى معلش إتمعلشتها والله.
-إبتسمت وبقيت اعاين ليه ♡

وصلني ونزلت مشيت البيت لقيت ماما جات وعملت لي موضوع كالعادة بس ما زعلت منها هي برضو معاه حق البوديني بيت خطيبي ليه وزيما قالت الناس حتقول شنو؟
بس انا الوحيدة العارفة هناك في شنو وبيحصل شنو ووعاد محتاجاني فلا يمكن اكسر بخاطرا اكتر حتى لو الناس حتقول.

__
"في مكان آخر"
-بسم الله إتخلعتي كدا ليه؟
-لا ما كدا بس ..
-طيب أسف ما كان أخضك كدا.
-انا لسة ما إتعودت.
-أنا السبب.
-عادي سوء تفاهم وإتحلى.
-واللي بعده؟
-اللي بعده ..
-ما عارفة ياخ.
-عارفة نفسي في شنو؟
-ها.
-ياخي من ها بتاعتك دي.
-طيب ها. .. أقصد يعني نفسك في شنو؟
-نسافر شهر عسل تعويضي عن اللي راح.
-وحنقول ليهم شنو؟
-مين هم عشان نقول ليهم؟
-أمك.. أهلي.. هم ناس مُهمين بالمناسبة.
-ما ضروري إنتِ أهم وحدة ومن حقك تتعوضي.
-بس إنت ليه ضيعت الفات؟
-ما عارف بس خلاص يعني اللي فات مات.
-واللي جاي؟
-قرب وعاين جوة عيوني وهمس لي حيكون حلو شديد ♡

#على_الهامش:
"‏لا احد يستطيع ان يمنحني كل تلك
الألفة والبهجة التي تنبعث من عيناك
نحوي لا احد غيرك💛))

#ننس_تمدين
#نوودين

#عزيزُ_قلبي "7"

فستان سادة على طرحة مشكلة محجباها بطريقة لطيفة..بلبس في الاكسسرز وبحرك دبلتي يمين وشمال..مبتسمة وقلبي طاير كالعادة♡..يدهُ دافية جداً وسط البرد اللي أنا حاسة بيه..لابس بنطلون جينز وتي شيرت أبيض من فوق عليه جكت جينز..نظارة شمسية..شال كتب في يدهٌ الشمال وقلب كبير شايلني براااااي♡

_طيب خليني أتصل ب نود أكلمها
_لا
_الجريدة طيب !!
_لا
_ح يفصلوني يا عزيز
_يِتعمِل ليك أحلى مقر أول ما نرجع.
_طيب ماشيين وين ؟؟
_مفاجأة..بتعرفي المفاجأة !!؟
_وريني
_إيناس اسكتي
_وريني بس وهسكت
_هسكتك والله بطريقتي وبرضو ما بوريك..روقي ساي

سكت ساااي..إتحركنا من بيتنا حوالي الساعة 8 ونص...طول الطريق كان هاديء وساكت..عزيز بيحب يسوق وهو ساكت..بحسه بِعتبر السواقة هواية...فأنا براقب هدوئه وبستمتع بتفاصيل وشه..خليط بين الحِدة واللين♡

_وِصلنا
عاينت لساعتي وليهو_ست ساعات يا عزيز !؟
_لما تنزلي ح تعرفي إنو المكان يستاهل♡

نزل وجاا فتح لي الباب..مسك يدي ومشينا مسافة شوية..كسرنا يمين وبعدها شفت أجمل منظر ممكن أشوفهُ في حياتي...مزرعة كبيرة شديد شديد شديد..أشجارها عالية وفيها ورد أشكال وألوان وعصافير حاسة بأصواتها في قلبي♡...عاينت ليهو ولسه هتكلم..جراني من يدي ودخلنا جواها...منظرها تبارك الرحمن..بتحس كأنك في سويسرا أو أرياف فرنسا..حاجه صعب تتوصف.

_أعتقد واحد من أحلامك إنك تقضي شهر العسل في مزرعة كبيرة مع زوجك براكم عشان تفكي طرحتك وتلبسي فساتينك الرهيبة براحتك..صح ؟؟
إتفاجأت_وعرفت كيييف !!؟
_ما هو أنا بحبك من زمان♡

____
عند نُود:
واقفة في البلكونة بشرب نسكافيه ومُقلقة إيناس تلفونا قافل وإتأخرت شديد في العادة ما بتتأخر بجي ألقاها قدامي .. فتحت الداتا ما لقيت منها أي مسج.
لقيت كريم اونلاين رسلت ليه بدون مُقدمات.
-ننا ما جات وأنا قلقت عليها.
-أهدي بتكون إتأخرت في الطلعة بس.
-طب ليه تلفونا قافل؟
-إستني شوية لو ما وصلت أو فتحت تلفونا حأغشاها أساسًا طالع وأطمنك عليها.
-طيب.
-ما تقلقي كدا كُل شي هيكون تمام.

عدت نص ساعة وكريم رجع لي بكول :
-أنا طالع جات ولا لسة؟
-لسة والله وما فتحت تلفونا.
-رسلي ليها sms يمكن من الشبكة.
-فكرة حلوة أنا ليه ما فكرت كدا من قبيل.
-عشان أنا موجود هنا أفكر ليك.
-تعيش وتفكر لي.
-تعيشي وتستشيرني وألقى حلول لمشاكلك.
-كدا ححبك أكتر والله ويلا أقفل خليني أشوفا.

قفلت منه فتحت الـsms لقيت مُسبقًا هي مُرسلة لي رسالة بتقول فيها:

"نُود أنا هسافر اليوم أخدي لي إذن لحد ما أرسل عُذري في الإيميل قبل الموضوع ما يتعقد .. هشرح ليك كل شي بعدين .. وأنا كويسة بلاش تقلقي علي .. أفطري في الوقت وأكتبي براك لما أرجع هكتب عنك ))

دا شنو دا ننا كيف بتعمل فيني كدا هي سلفًا عارفة الشغل من غيرا هيكون صعب علي قدر شنو نحن بنخطط لكل حاجة سوا وإتعودت أعمل كل حاجة معاها جاية تسافر أسي وأنا أخر من يعلم من الزعل ما رديت ليها نزلت تحت أخدت ليها إذن ورجعت بفكر أكتب عن شنو حسيت نفسي متلخبطة وما عارفة أبدأ من وين رجع لي كريم :
-مُستنيك أنا.
-الأخت طلعت مُسافرة وأنا هنا مُستنياها.
-حلو طيب.
-شنو هو الحلو بقول ليك ننا سافرت يا كريم.
-وإنتِ زعلانة كدا ليه؟
-ما مُتخيل أنا كُنت مُقلقة عليها قدر شنو وأسي ما فاهمة شي.
-أهدي وروقي وأخدي نفس عميق.
-ها.
-بتعملي في شنو أسي؟
-المفروض أبدأ كتابة المقال قبل الساعة 10لازم أسلمه وأجهز حق بُكرة لأنو شكلها ما ناوية تجي قريب.
-أفتحي الشُباك ورتبي المكتب وسيبي التوتر دا وأبدي براحة وهتكتبي أحسن مقال ما اول مرة.
-أنا ما مشكلتي في الكتابة كيف أعدي الأيام دي بدونا؟
المكتب هادي ورايق ما في إزعاج .. ولا كبابي تجوط المكتب .. ولا حتى أكياس بسكويت في التربيزة .. مافي زول يقول لي غيري الكلمة دي حاساها ما مُعبرة .. وهفطر مع منو؟ وزمن البريك أعمل فيه شنو؟ الهيقرأ المقال ويوريني إذا حلو أو لا منو؟
أنا براي يا كريم حاسة بالوحدة والشغل دا طلع ما حلو ننا كانت مهونة علي.
-أنا إبتديت أغير من إيناس دي خلي بالك.
-إنت براك وهي براها بس برضو يعني.
-ما مشكلة أسي إنتِ اكتبي المقال ورسليه لي أشوفو أصلًا من زمان نفسي أكون اول واحد يقراه وبعدين حأديك راي بصراحة وأعلق ليك عليه وبقية التفاصيل هنلقى ليها حل أوكيه؟
-طيب مُتشكرين يا ود حنان.
-العفو يا مدام.
-يلا ما أعطلك عن شغلك.
-ما عندي شُغل أهم منك.♡

قفل مني رتبت المكتب وشلت الجهاز قعدت في الكنبة وبقيت مُحتارة أبدا بي شنو .. فتحت ملف الريفرينس وبقلب في الصور لقيت صورة لي وردة وزوجها ماخدينها ليهم وما كان في جمهور في المسرح غيرو واقف بصفق ليها طوالي جا في بالي ألطف كوبليه قالتو لخص معنى الحُب بقول:

((إنسان لقى نفسه فيك من بعد توهانهُ ))
إبتديت أكتب لحدي ما وصلت 500كلمة بعدين إنتبهت إني مفروض أوقف وبقيت أراجع فيه وأعدل عليه رسلتو لكريم اول ما قراه قال لي:
-نُود إنتِ ما بتتعبي رغم إنك شايلة كُل الحُب دا جواك؟
-ما قاعدة أتعب عشان بوزع ليكم منه.
-طيب زودي حصتي شوية أنا عايز من النوع اللي بتكتبيه دا.
-أي أقعد طبل لي كدا لما يوم أموت من كترت النرجسية البقت فيني دي.
-تموتي شنو هي النرجسية الحتموت بي سببك ..!
-إبتسمت ورسلت ليه قلب أصفر.

جا زمن الفطور عاينت لتلفوني رجعت رديت لإيناس :
((أخدت ليك الإذن مع إنه مستر غضبان جاط فيني بس يلا فداك .. وإنچوي بالسفرة من دوني أصلًا بقيتي ما بتحبيني ))

نزلت تحت أشوف موضوع الفطور إتذكرت إني مفروض أتصل لِوعاد أشوفا الحصل معاها شنو ما ردت علي رسلت ليها sms :
"لما تلقي المكالمة أرجعي لي ضروري"
شلت فطوري ورجعت المكتب بعد الدوام خِلص لقيت كريم مُستني برة وواقف جمب الباب.
-سربرايز.
-دي أحلى وحدة فيهم كُلهم والله.
-أنا حأعتبر الرد دا كأنه"إإشتقت ليك".
-أمس كُنا سوا بس حصل.
-ما تخلطي الأمور أمس يوم براه وجيتي لوِعاد ما لاقيتيني أنا.
-إنت ووِعاد عندي واحد.
-واضح إني نص بس.
-ما كدا ياخ.
-أوكيه أركبي بنتفاهم في السكة.
-واخدني على وين؟
-ما خاطفك والله.
-بعد شنو؟
-دا سؤال؟
-واضحة ما محتاجة شرح.
-أيوة ما أنا مفروض أكتشف الغامض والمثير برضو.
-إنت الليلة قاشر ولا كل يوم بتكون .. سكت
-كل يوم بكون حلو كدا.
-إتلفت على الشارع وعملت رايحة من الموضوع.
-إبتدا يدندن .. يا مُعاين من الشُباك يا أحلى زول شُفناك.
كريم ما بس كلامو حلو لا دا عندو صوت يتوه بغني أيام الجامعة وبعزف كمان بطريقة رهيبة رهيبة ضيعت علي محاضرات الإستيج كلها وإلا كان إتخصصت إذاعة وتلفاز لو ما كُنت بسيب المحاضرات وأمشي أحضره وهو بغني ♡
-نحن ماشين وين؟
-نحن دي عجبتني ♡
-اول مرة تسمعا؟
-أيوة بالعادة بتقولي إنت ماشي بي وين.
-طيب إتعود عليها.
-المهم يا ستي نحن ماشين معرض الكِتاب ولا المرة دي ما نفسك تمشيه؟
-ييييييي والله هموت عليه وكنت بفكر أكلمك بيه بس ما عارفة راح من بالي كيف.
-جاني نوتفيكشن الصباح إنو الليلة حيبدأ فقلت نمشيه سوا ♡
-ما بتفوت أي مناسبة عشان تخليها تكون سعيدة وأنا بحب كدا.
-بذات مناسبة فيها كُتب دي حاجة بتهمني جدًا ومرتبطة عندي بي ذكرى حلوة شديد ♡
-عادي عادي قول لما كنتِ بتكرشي علي وهديتي أختي كتاب.
-ضحك ومرر يدو على شعره ورجع عاين لي
هي دي أيام تتنسي أنا كل يوم بصحى واول حاجة بتجي في بالي إنو إنت يا كريم كراش لأحدهم فببتسم تلقائيًا.
-إنت ما هتمسكا لي ذلة صح؟
-بتعرفي أولادنا؟
-ما تحور المواضيع.
-ما بحور جاوبي.
-ما عندنا أولاد.
-خلاص لما يجوا وهم يجيبوا ليهم أولاد هفضل متذكرا ليك وهحكيها ليهم ألمهم حوالي وأوريهم كيف كنتِ مُكرشة علي.
-لو عارفاك هتمسك في الموضوع كدا ما كان .. سكتَ ما هان علي أندم.
-ما كان شنو؟
-ولا شي ركز في الشارع عايز تموتنا؟
-على أساس الموضوع بيدنا لما نحب؟
-هو صح ما بيدنا بس بنقدر نتحكم فيه.
-واضح واضح في عيونك قدر شنو كنتِ متحكمة فيه.
-حسبي الله ونعم الوكيل .. إنت بتعاين للناس في عيونهم ليه من الاساس.
-إنتِ يوم بتغطسي حجرنا ما تتحسبني 24ساعة كدا.
-أستغفر الله ياخ أسكت يا كريم أسكت.
-سكتَ أهو هأعاين بس.
-في الطريق يا كريم ما هنا.
-شوف العين ما قتل غزال.
-لمن تقتلنا سمح.
-سمحة الصدف سمحة الظروف.
خليتو بدندن أنا ما بفهم هو بجيب الكلام دا من وين بس المهم كلام سمح شديد ♡

لما وصلنا المعرض الجو بِقى حِلو والناس يداب جاية ما خلينا جناح وأنا كل ما أشوف كتاب عيوني يبقوا قلوب قلوب بعدين إتذكرت إنو هو هيحاسب عليهم كلهم ومهما عملت ما هيرضى فبقيت أقول ليه خلينا نرجع إتأخرنا وهو مُصر نكمل للجناح الأخير.

بعد طلعنا شال كمية من الكُتب هو ما ليهو فيها بس شال لي وِعاد كان عندو لستة بفتش عليها لحد ما لقينا أغلبيتا.

طلعنا غلف الكُتب وقال لي:
- حقاتك سيبي جزو عندي.
-ليه؟
-لحاجة في نفسي.
-قول سبب مُقنع.
-دا ما أقنعك يعني؟
-خالص.
-طيب خليهم بجيب ليك منهم بعد تكملي العندك عشان ما يشغلوك عني.
-لو مهتمة بس ما بشغلوني عنك.
-تفتكري هأراهن عشان أعرف مهتمة ولا لا؟
-جرب ما خسران شي.
-ماف وقت للتضيع كفاية الضاع.
-خلينا نمشي طيب مُلاحظ إني ما كلمت أمي؟
-أنا إستئذنت منها قبل أمر عليك.
-أيوة فوز بقلبها يلا وخليها تسمعني كلام بعد نرجع.
-"ضحك" .. فِداي صح؟
-للأسف صح.

طيب خلينا نتغدا سوا بما إنو جينا قريب من مكانا المُفضل وبعدها هأوصلك.
-المشكلة إنت بتقرر أصلًا ما بتستشيرني.
-بخُتِك في الصورة.
-ماشي كويس والله.
-إتعلمت منك.

وصلنا اكلنا وطلعنا لما وصلنا البيت المغرب أذن نزل صلى عندنا وطلع .. قدمتو للباب وقلت ليه:
-شكرًا يا كريم ♡
-ما بينا ♡

الحاجة الغريبة إني لما أكون مع كريم ما ببقى عايزة أصور أو أنشغل بتلفوني خالص رغم إنو فوتغرافر بس صورنا بالعدد وغالبًا بكون صورني بدون ما أنتبه المرات الاولى لكل شي بس بطلع تلفونو يصورا للذكرى غير كدا بقول لي هأعوز بالصورة شنو وإنتِ شخصيًا معاي ♡

ببقى شعور حلو لما تعيش اللحظة أحلى من إنك تقطعا عشان تصوير.
أنا محتفظة بكل التفاصيل دي في قلبي وفي ذكريات أحلى من الصور زي قزازة البارد والتكت بتاعت الفيلم اللي حضرناه اول مرة ومق القهوة اللي شربنا بيه في كافي وعجبني بدل يصورو جابو لي .. شرايط الهدايا وكل البوكسز اللي فيها هي عندي بجد هأعوز بالصورة شنو وأنا لسة اللحظة عايشة جواي ♡

___
عند إيناس:

"أنا وأنت والليل والنجوم..قمر السماء جنبي♡"

القهوة عليها قلب مرسوم..جنبها فطائر مملحه وبسكويت وشوية مكسرات..حبيبي موجود برة وبِظبط أحلى جو يناسبنا ويناسب حالتنا المزاجية..طلعت وأنا لابسة شال بني كبير ومخلية شعري يتطاير مع الهواء المنعش...شايلة مقيين عليهم أسمي أنا وعزيز.

_خلصت ولا لسه ؟
_قرِبي شوية
_ها قربت
خت يدهُ على كتفي_أزيد الحطب ده !؟
_.....
_إيناس
_معاك.
_بقول ليك أزيد الحطب !؟
_لا كده مناسب
بعدني شوية وولعها..ختيت المقيين في التربيزة..لما النار ولعت كنت قريبة منها حسيت بخوفة فشديت على قميصهٌ_عالية شديد النار
_حخليها عالية..طول ما أنتي ماسكه فيني كده♡
ضربتهٌ على كتفهٌ وزحيت منه_بتصطاد في المية العكرة زيما بقولوا

ضِحك بصوت عالي_طيب ممكن تجيبي باقي الحاجات وتجي..في رواية لازم نقراها مع بعض♡

_ما ح تساعدني !!
_باقي شنو جوه !!
_صحنين وكيس شيبس
_بتستهبلي صح...جيبيهم وتعالي
_عزيز تعال معاي..لو سمحتَ
_الله !
_تعال بس
_الصبر من عندك يا رب

دخلنا جوه...أنا مشيت الغرفة جبت ليهو الجكت بتاعهُ وجيت وقفت قدامه زي الشافعة
_يلا ألبسهٌ
_ما بردان
_أسنانك بتضرب في بعض..شنو ما بردان
_انتي عارفاني ما بحب أتغطى
_عزيز الجو بجد بارد.
_لما أبرد ح أتغطى معاك بشالك ده
_يسلااام يسلام..لا ما ح أخليك
_ليييه بس
_كده بس
_نشوف نشوف

ظبطنا القعدة برة...قعدنا حوالين النار...كنت مستمتعة بالجو ورطوبتهُ...عزيز بيقرأ جملتين ويتونس معاي ساعتين♡.

_قلتي لي ما ح اتغطى معاك !!

كنت مٌرقدة راسي على كتفهٌ ومغطياهُ معاي فعلاً...حاولت أقوم..رقد راسه على راسي.

ضحكتهُ بتدل على الإنتصار _عمرك فكرتي الخطوة الجاية شنو بعد الزواج ؟؟
_لا..لأنه زواجنا كان مجرد هروب من واقعي والأسئلة.
_طيب وحالياً
_الخطوة الجاية..ما نفسي الخطوة تكون بعيدة عن كتفك♡
_عارفة أحلى حاجه فيك شنو !؟
_حاجه واحدة بس !؟
_هههه...كلك حلوة بس اكترهم إنك بريئة..بريئة لدرجه أحياناً بحسك طفلة صغيرة محتاجه تطمن للقدامها وبس♡
_وأنت !
_أنا شنو ؟
_خطوتك الجاية شنو ؟؟
_إني أحبك♡وأفضل أحبك.
_يا عيني يا عيني..نفسي أقابل الناس الإتزوجت بسبب كلامهم كلهم وأشكرهم..وأوريهم قدر شنو طلعت محظوظة وبطيختي حلوة♡
_بمناسبة البطيخ...بطيختك حلوة وبدقن.
_بحبهااااا
_البطيخة !؟
_الدقن يااااخي..الدقن♡.

"وكانت تلك أدفء ليلة من ليالي ديسمبر الباردة♡"

#على_الهامش

‏"اختر الذي يعطيك التبرير دون طلب، خوفًا عليك من إزدحام الأفكار."

#ننس_تمدين
نودين ۦٰ۪۫٭ۦ

#عزيزُ_قلبي "8"

"‏يكفي أن يضع رجُل مثلك يده في يدي
لأمضي في طريقي بِلا إلتفات))

-عزيز ياخ.
-ها.
-بس دي كلمتي.
-كلمتك براك؟
-عادي نتقاسما!
-قرب علي-وكمان؟
-كنت بتقول شنو؟
-كم مرة أوريك ما مفروض تغييري الموضوع بالطريقة دي؟
-كتير لحد ما أتعلم.
-طيب كنت بقول إنتِ عايزة تعملي شنو إضافة لإنك تحبيني؟
-نبني بيت مليان حُب ودفا .. بيت ما تكون فيه خلافات ونقاشات .. ما نخلي في يوم مُشكلة تنوم بينا.
زي الطفلة الخايفة رفعت عيوني أشوف رد فعلو .. يمكن أنا أكتر حاجة بخاف منها المشاكل اللي بتكون بين إتنين قُراب من بعض شديد .. ما بقدر أتخيل كيف حأعدي ليلة وأنا على خِصام مع شخصي المُفضل.
أخد مسافة ما شال عيونو عني بعدها قال:
-إطمني ما في شي حينوم بينا غير حنين وهي خايفة من الضلمة.
-حنين دي منو كمان؟
-بتنا .. بتنا .. ياخ!
-حلو والله بتسميها بدون ما تستشيرني إبتدينا السيطرة من أسي؟
-دا اسم هناديه بيها تيمنًا بي حنيتها وطيبة قلبها البتشبه أمها إنما اسمها فدي مسؤوليتك الكاملة.
-فصلت شوية .. هو قادر يمتص غضبي بكلامه الحلو دا.
-أنا حصل قلت ليك إنو بسمتك بتضوي؟
-ما حصل.
-أسي حصل أهو.
-ما براي يعني بسمتي حلوة؟
-قصدك؟
-بتوقعني قصدًا ولا أنا بقع براي؟
-بوقعك أنا وأدي إمضتي .. مرر أصبعو على يدي وشخبط حاجة ما فهمتها.
-الكلام دا هيدينك خلي بالك!
-أكتر من كدا؟
-عارف!
-ها!
-هكرتك.
-ضربتي السستم كلو.
-ضحكت .. دي شنو المصطلحات الغريبة دي!
-ششش أوعى تضحكي نحن في حتة مقطوعة ولو حصل لي شي ما هتعرفي تتصرفي!
-إنتبهت إنو نحن فعلًا في حتة مقطوعة وضلام والساعة ماشة لي 1ص بخلعة قلت ليه برانا؟
-أيوة برانا أنا وإنتِ وبس.
-خلينا ندخل جوة.
-ليه .. هنا الجو حلو ومبسوطين.
-النار بدت تطفي والزمن إتأخر.
-بردانة يعني ولا خايفة؟
-عاينت حوالي وقبل أقول أي شي قال لي:
-طيب قومي ندخل!
-عايزة أقوم الشال وقع مني لأنو هو كان متغطي بجزو منه وقف على حيلو ورجع غطاني بيه وفضل واقف.
-بيوترني لما يكون هادي كدا ما عرفت أقول ليه شنو فِضلنا ساكتين.
-طيب هطفي النار وإتحرك عليها.
-لميت الصُحانة والمقات وإستنيته يخلص بعدها دخلنا جوة.

_

‏"يعزّ على المرء أن يُترك في نصف الطريق، وأن يَسأل لماذا أُفلتت يده! تعزّ عليه فكرة أنه كان يستحق أن يُحارب من أجله))

دا كان ستوري وِعاد عمري ما شُفت وِعاد بالحُزن والكآبة دي .. عملت ريبلي :

-معلش يا وِعاد هيجي البحارب عشانك ♡
-بس أنا كُنت عايزاه هو يحارب، للدرجة دي البينا هش؟ هُنت عليه بالسهولة دي؟
أسئلة صعبة شديد .. تحس إنه مافي شخص عنده الإجابة عليها .. في اللحظة دي ما قدرت أواسيها ..!
كل الكلمات بتكون غير منطقية قُصاد قلب مكسور .. كل المواساة فاشلة.
رجعت رسلت لي:
-أنا أسفة يا نُود ما رجعت ليك كُنت قافلة تلفوني طول اليوم وما بقيت حاسة إني عايزة أرجع أتواصل مع زول أو أكلم أي شخص حتى الجامعة ما بقى لي نفس أمشيها والله .. حبوبة طول اليوم بتسأل عني وكريم ما سألني بس لو فاض بيه ما هيسكت حتى لو ما كلمتيه هيعرف .. بفكر أمشي لأبوي بس السمستر في بدايته فما عارفة أتصرف كيف؟
-لقيت نفسي بقول ليها تعالي أقعدي معاي رايك شنو تغيري جو شوية وهنتفاهم في الموضوع؟
-لالا ما بقدر حبوبة هتسألني ماشة ليه؟
-قولي ليها عندك إمتحانات وعايزاني أشرح ليك حاجات.
-وكريم؟
-أنا هقنع كريم.
-طيب شوفيه وكلميني.

طوالي لقيت كريم أونلاين رسلت ليه:
-كريم.
-قلبه!
-بتعمل في شنو؟
-بفكر فيك .. أسي كُنت بشوف الاستوري بتاعك وبسأل نفسي أسي لو ما كُنت أنا كريم المحظوظ كان حأشوف ستوريهات حلوة زي دي وين؟
-أحييييييييينا ♡
-بطلي ياخ.
-كويس هبطل وما هخت ستوري أقصدك بيه تاني.
-هتقدري؟
-هتشوف يا كريم الزمراوي.
-رسل لي ستيكر قلوب .. والله اسمي دا ما حلو غير عندك.
-أساسًا أساسًا كلهم بقولوا كيمو هم مفوتين عليهم روعة الاسم دا.
-ديل ما بيعرفوا حاجة ساي.
-بالمناسبة دي عايزة أطلب منك حاجة بس ما ترفض ممكن؟
-أسي وين المناسبة؟
-ياخي ياخ ما تركز هي بتتقال كدا أنا أسوي ليك شنو يعني؟
-أساسًا من ختيتي الاستوري الحلو الواضح الصريح دا حسيت في وراه شي.
-والله ما كدا ختيتو عشان حسيت بشبهك بس لكن كويس كتر خيري.
-طيب أحكي لي في شنو؟
-بالاول قول ما هترفض!
-حصل يوم رفضت ليك طلب؟
-لا.
-طيب أأمري!
-لا هو مجرد طلب غالي بس يرخص لي صح؟
-نُود ..
-هتكلم خلاص بس بالاول قول إنك هتوافق.
-عايزة شنو ما تجننيني.
-شايف بديت تتعصب ما هطلب عشان ما تبوظ لي طلبي.
-طيب ما هأرفض.
-عايزة وِعاد تجي تقعد معاي كم يوم .. كلها كم يوم بس .. بليز يا كريم ما ترفض.

-رسل لي ريكورد"نُود أنا ما هرفض لوعاد تقعد معاك بس حاسي في حاجة حاصلة وريني في شنو؟
-والله ما في شي مُهم ما تشغل بالك عايزاها تجيني نغيير جو وتقعد معاي شوية إيناس ماف وإنت عارف نادين عرست وخلت لي البيت براي بقيت حاسة بالوحدة.
-مُتأكدة؟
-ما بتثق فيني؟
-ما موضوع ثقة بس ياخ .. خلاص خلي بالك منها ♡
-طب والله بحبك ♡
-ما عايز ما بتقوليها إلا مصلحة.
-ما مصلحة والله بس للحظة حسيتك هترفض ما عارفة ليه.
-ما هو لو دا زول تاني حتى لو كانت خالتي أو عمتي رفضت بس المشكلة بقت إنو إنتِ اللي طلبتي.
-يعني لو طلبت أي شي هتوافق؟
-أديك عيوني؟
-لا خليهم عشان أشوف فيهم أولادي.
-ضحك .. لالا ماشة كويس والله.

إتصلت لِوعاد كلمتها تلم شنطتا كريم وافق كانت طايرة من الفرح .

دخلت المطبخ لقيت ماما بتحمر بطاطس.
-ماما مساء الخير.
-أهلًا بالست الما فاضية .. خير الليلة داخلة المطبخ؟
-عايزة اساعدك.
-مالو قال ليك بحب طبيخ البيت؟
-ماما ياخ متين أنا بدخل المطبخ عشان أتعلم أنا أصلًا شيفة رهيبة.
-واضح واضح ما ضاق اكلك بس.
-إنتِ أمي أنا ما تقيفي في صفو.
-أي أمك إنتِ بس هو بعاملني زي أمو.
-ماما إنتِ لسة زعلانة عشان أنا مشيت ليهم بدون ما اكلمك؟
-وطلعتي معاه أمس للمغرب برضو ما كلمتيني.
-عايزة أكلمك وهو قال لي كلمك.
-ودا بمنعك تكلميني؟
-طيب اسفة والله تاني هكلمك اول.
-سمح نشوف!
-بقيت ما عارفة أجيب ليها الموضوع كيف بي طبعي ما بعرف أراوغ بقول الموضوع كلو مرة واحدة فقلت ليها وعاد جاياني وبرضو عملت لي موضوع بس في النهاية راضيتا ♡

خلصت من البطاطس عملت مكرونة بالباشميل ودخلت رتبت غرفتي عشان وعاد جاياني أصلًا بكون مضغوطة ما لاقية وقت أسرح شعري ياخ.
مشيت جبت بخور من غرفة ماما وبخرت الغرفة ووصلت الشاشة أبت تشتغل خليتا طلعت اللابتوب بتاعي شحنتو قلت نحضر فيلم عشان أغيير ليها جو شوية.
_____

-إنت سبتها ليه؟
-زهجت ياخ.
-ما سبب ليك البت كانت شارياك.
-يا مان أنا ما قادر على دلعا الكتير دا.
-وفيها شنو ما هي برضو بتعزك إنت نسيت كم الهدايا وبنكك البتقول عايزه وما بترجعوا ليها ولا مشاويرك بعربيتهم؟
-أقفل الموضوع دا أنا جيت عشان أفرق شوية قرفان من حياتي دي ما تكتر كلام الله ما رقد البنات.
-هو فعلًا البنات راقدات بس زي وِعاد ما هتلقى.
-بعرف كيف أرجعا لو عايز.
-ما كُل مرة هترجع ليك.
-يا مان حنكك شنو إنت لو عايزا هديك سبتها أمشي ليها ما تمعطنا.
-يا زياد أنا لو كنت عايز أخدا منك الموضوع ما كان اخد معاي يومين بالتمام والكمال بس إنت على طول أناني كدا وما بتفكر في زول غير نفسك وعلى العموم أنا ماشي.
-داك الشارع أساسًا خوتك بقت ما بتجدع معاي.
-بس بحذرك ما ترجع تستغلها عشان انا ممكن ..
-وقف على حيلو ورمى السجارة من ايدو .. دقيقة دقيقة إنت مالك يا زول؟
-أنا بس حذرتك.
-صوتو عِلى وهو لاحق رحيم عشان يوقفه جراه من ورا.
-زياد أهدا نحن في مكان عام وما عايز معاك جوطة.
-رحيم إنت حنكك شنو؟
-ما عندي أي حنك زول أخوك وبنصحك بس.
-ما بتلزمني من بعد اليوم.
-تمام.

مشى على خالتو ست الشاي حاسب علي الطلب ومشى.

_____
_الو ..
-أهلين.
-ممكن أطلب منك حاجة؟
-في شنو صحبك رسلك؟
-ما تقولي عليه صحبي من بعد اليوم.
-خير ليه؟
-ما مهم عايز أقول لو بتعزي نفسك ما تديه فُرصة المرة دي.
-إنت ليه بتتكلم معاي كدا؟
-عشان أنا عارف عن كل حاجة.
-زي شنو؟
-ما إلاّ تعرفي المهم دا تحذير من زول بخاف عليك.
-رحيم ممكن نتلاقى بكرة وأفهم منك في شنو؟
-أعذريني يا وِعاد ما حأقدر أقعد معاك بس العندي قلتو ليك.
-بس ..
"تم إنهاء المكالمة"

بعد دقيقة:

-الرقم الذي طلبته غير موضوع في الخدمة .. تيت تيت.

#على_الهامش:
لا غيَّب الله وجه حبيب عن حبيبه، ولا أذاق أحدًا مرارة البعد بعد حلاوة القرب، ولا صقيع الوحدة بعد دفء الوَنس.
"آمين"))

#نوودين
ننس تمدين

#عزيزُ_قلبي "9"

(( صباح الخير يا حلو♡ بس أرجع بعرف أراضي قلبِك كيف..المهم أنا مبسوطة وبحبك وأنتي غصب عنك بتحبيني..الود كريم كيفهٌ ؟؟))

رسلت ال sms دي لنُود ورجعت ختيت التلفون..عاينت لعزيز مسافة طويلة..جميل شديد يشبه الصباح وريحه البن الطازج وضحكة الأطفال والبوالين الطايرة..يشبه ريحه المطر وجو الشتاء..ونسمة الربيع♡...عزيز ما ليه شبيه أبداً.

_الصاحية بدري
_الساعة 9..أنت أول مرة تنوم الفترة الطويلة دي
_عشان مٌرتاح بس♡
_دايماً يارب..ممكن تصحصح كده وتقوم
_عشان نعمل شنو !!
_أكيد ما ح نقضي اليوم في الغرفة
ضِحك_أيوة وأنا بسألك ح نعمل شنووو بعد أصحصح وأقوم
جاوبتهُ وأنا بحرك يدي على دقنه_نشرب قهوتنا ونسمع شِعر يشبهنا ونلف شوية..وبالمرة أوريك فستاني العُنابي.
_إسمها ألبس ليك..ما أوريك
_المهم المهم
رجع شعري لورا_المهم يا صباحي أنتي♡..صباح الخير شديد.

((رنة موبايل))
ده كان تلفون عزيز متصل عليه إسم {ست قلبي♡}

_دي أمي
_خالتو السمحه..أديني أسلم عليها
_خلينا بعد نروق شوية برجع أتصل عليها..بتكون حابة تطمن علينا بس.
_طيب يلا.

__
عند نُود:

شفت الsms وإبتسمت غصب عني..عادةً ما ببتسم غير للإتنين ديل..كريم وننا ومرات بسيطه لرسائل وِعاد.

رديت_ما بحبك ما تتلصقي..وكريم كويس خالص وكيفهُ أنا طبعاً♡..أرجعي ياخ أنا ما ببقى بدونك.

اليوم إجازتي والحمد لله..أصحى رايقة وأعمل كل شيء بحبهُ ما عدا إني أتكلم مع ننا لأنه واضح إنها ما فاضية لي..عاينت ناحية سرير وِعاد لقيته فاضي..نزلت بسرعة ومشيت الصالة...لقيتها قاعدة مع ماما وبشربوا في شاي الصباح.

_أممم صباح الخير..خيانات عُظمى.
ردت وِعاد_صباح الفل يا كسلانة..خيانة شنو أصلاً خالتو دي حبيبتي.
_أننننننن..كُبي لي شاييني
_في بنوتة تقول شاييني..الله يرحم الرقة والأنوثة
ضحكت ماما_ههه بطلن مناقرة..ذكرتيني نادين..كانت طبيعي في حالة مناقرة مع أختها.
_طيب جيبي لي الشاي يا حلوة وتعالي عاوزاك
_شنو السر الخطير الما عايزة خالتو تعرفو ؟؟
_وِعاد بطلي فتن

ضحكوا هي وماما..بعدها مشينا الغرفة جوه..كان واضح على ملامح وِعاد إنها بدت تصحى على نفسها وتوعى شوية للحاصل حواليها.

_حاسة في شيء عاوزة تحكي..فأحكي
_نود بتقريء افكاري ؟
_أحكي يلا
_رحيم
_منو رحيم ومالو !؟
_رحيم ياخ..صاحب زياد
_أبو عيون عسلية ! قولي كده..مالو إتشوقت
_أتصل علي أمس وطلب مني ما ادي زياد فرصة تانية
عديت بأصابعي_قصدك فرصة رقم سبعمية
_عارفة نفسي مُهزأة..المهم إتوترت من طريقتهُ..فطلبت منه نتلاقى..قفل الخط تخيلي..إتصلت أفهم منو ليه قال كده...رقمه ما دخل معاي تاني.
_أوووه سووو كيوت...صدقيني رحيم ده طيب شديد وما شبه زياد خالص..كنت مستغربة اساساً كيف هم أصحاب !
_ما علينا..أنا نفسي اشوفهُ
_عشان زياد ولا عشان شنو !!
_ما عارفة وما فاهمه وما قادرة احدد
_أهديء أهديء...خليهُ أنا واثقة إنو ح يرجع يتواصل معاك و

تلفوني رن..مشيت عليه بلهفة.

_ده كريم
_أطلع اخليك براحتك
_أقعدي يا هبلة أنتي
رديت_كريم الزمراوي
_حبيبته ♡
_إتصلت تقول صباح الخير يا نُود..خاتي قدامي تلاتة قمصان..محتار ألبس شنو صح ؟
_صح شديييد..وأسي ركزي معاي...القميص الأول لونه أبيض والتاني بيجي والتالت كحلي غامق...و

خليتهُ واصل كلامه واخترت معاهُ مفترض يلبس شنو.

_نُود
_معاك يا كريم
_خليك معاي دايماً♡..لو أنتي ما هنا...
_أنت هتضيع♡
_لا وواثقة من نفسها أووووي
_بس يا سغيل
_ضِحك وقال بطريقة جادة_هضيع فعلاً يا نود...هضيع♡
_ما هيحصل..شربت شاييك؟
_وِعاد معاك الهيسوي شاي منو؟
_ما تحسسني بالذنب.
_خلاص خليتك يا حساسة..هشرب في المكتب.
_طيب يوم سعيد وموفق.
_سعيد دا منو أنا عايز يوم زي نُود.
_غصب عني ضحكت..طيب يوم بشبهني♡
_سيبك تشربي شاييك.
_ياريت عشان بَرد حتى.
_طيب أشوفك بعدين.
_إنتبه لنفسك.
_حاضر.

قفلت لقيت وِعاد بتعاين لي نظرة ما فهمتها.
_مالك يا بيب؟
_أنا كان نفسي كُل الأولاد يكونو زي كريم أخوي♡
عارفة يا نُود كيمو دا حنين بشكل؟
_أحكي لي..
_زمان لما ماما إتوفت ربنا يرحما ويغفر ليها أنا كُنت صغيرة شديد عمر سنتين يمكن أو أقل..بس كُل ما أشوف ألبوم الصور بتاعتنا بحس إنه كريم ما كان أخوي هو قِدر ببساطة ما يحوجني لأم.. عندنا صورة كان بسرح لي شعري فيها.
وحبوبة قالت كان ما بيمشي المدرسة لو ما جا إطمن علي وباسني في خدي وما بس كدا هو رفض يكمل في مدرسته اللي بدا فيها عشان يتنقل مدرسة جمب البيت وما كان بفطر في المدرسة بيجي البيت يشوفني وياكل حتى يرجع..
_بختك بيه شديد ♡
_إنتِ عارفة إنه لما خالتو أسما إتزوجت وسابتنا مع حبوبة كنت وقتها داخلة الروضة كريم بيصحى يسرح لي شعري ويجهز لي السندويش والزمزمية ويوصلني بعدين يمشي مدرسته؟

_ما غريب علي أسمع كلام زي دا عنه رغم إنو ما حصل حكى لي الحاجات دي وغالبًا ما بفتح معاه السيرة دي لأني بخاف عليه يحن ويشتاق لأمه فيزعل..بس مع ذلك كُنت مُتأكدة إنو هو اللي ربى وِعاد من يوم ما شفتهم سوا حسيتهم أكتر من أخوان.
وِعاد كانت مبتسمة وهي بتحكي زي كأنها بتتذكر المشهد قداما الآن..سرحت شوية وقالت لي:
_أنا متذكرة طفولتي بطريقة بتحسسني إني لسة بعيش فيها مُتذكرة اول صحبة ليا تجي معاي البيت وحبوبة كانت مافي فكريم دخل المطبخ سوا لينا عصير وشاله لما وصلوا جمب الباب بعدها أداني ليه وقال لي: قولي إنتِ اللي عملتيه.
ضحكت بصوت عالي فجأة ولا كأنها وِعاد اللي كانت زعلانة.
_ضحكيني معاك طيب!
_ما قادرة أنا كُل ما أتذكر الموقف دا بضحك كدا.
_طيب في شنو قولي خليني أضحك معاك.
_كُنت في تانية ثانوي وقتها كان رمضان وأنا تعبانة وزهجانة من المدرسة جيت لقيت بابا جايب أكياس كتيرة وقال عنده ضيف خليجي مشتهي ياكل أكل بلدي وأصر علي أعمل الفطور وأنا اخري أعمل شاي لبن وكيك فبقيت أبكي وحبوبة عيانة وعمتو سلمى كانت جاية على أساس تساعدني بس بتها تعبت ومشوا المستشفى تخيلي كريم عمل شنو؟
_رجعت تضحك زي المجنونة وأنا ما قادرة أتخيل هم سوا شنو..بقيت منتظراها تكمل ضحك عشان تحكي لي ما عندي حل غير كدا.
_عملنا الكبكي بعد سألنا خالتو علوية وصفت لي وقالت لي جيبي حاجاتك سوي الملاح عندنا..وأنا ببكي وزعلانة مشيت ليها جيت لقيت كريم جايط المطبخ وساط عصيدة بي دقيق الكيك.
_ما بتتخيلي شكل المطبخ والحلة عبارة عن حاجة كدا عجينة بس وشعره كله دقيق وهو ذاتو منظرو ما بتقابل دا غير البتجاز الله يرحمه طفى عين وشكله بقى كأنه كان مدفون وطلعهو.

بقينا نضحك لما ماما قالت لينا براحة.
ما قادرة اتخيل كريم اللي عامل فيها شيف حاليًا دي كانت بدايته عصيدة بي دقيق الكيك؟؟؟
-بتذكر مرة عملت فيها ظريفة نظام أضوقه حاجة من يدي والفطاير للأسف طلعت عبارة عن ملح بي جبنة وللآن ماسكا لي زلة وبتريق علي وبعدها قال لي هضوقك فطايري وقارني فعلًا يوم جاب لي فطاير وطبعًا ما بحتاج أقول مافي أي مقارنة مع اللي عملتها.

_يا بت والله كريم دا دخل المطبخ أكتر مني وكل اللي إتعلمه دا فينا نحن ياما أكلنا حاجات ما معروف طعمها مرة جاب لي حاجة لما اكلتها واقف منتظر راي قلت ليه طبخت لينا لساتك صح لأنه دا مستحيل يكون طعم شي غير لستك.

_ها كملي خليني أعرف ماضيه الأسود.
_بس ما تجيبي ليه سيرة حذرتك.
_هأحاول امسك نفسي..وبعدين؟
_بعدين بابا جا داخل لقاني أنا مستلمة الموضوع وقال لي:
_الليلة يا وِعاد هتدقي يعني هتدقي بعد العملتيه دا.
بقيت ما عارفة أضحك ولا أبكي وخلي بالك الساعة 4جات..فحاولنا نظرف الموقف وقلنا نخلط عصير منقة بس بوظناها بالمرة.
_بتبالغوا إنتوا إتنين ما قادرين تعملوا حاجة نافعة؟
_يا بت ما تعديني أنا كريم مستلم الموضوع وكل شوية يقول لي ما تخافي أسي هنصلح الموقف وهو شغال يبوظ كل حاجة بمجرد ما يده تلمسا.
خلطنا المنقة بقشرها وموس الخلاط باظ وجينا نصفيها كانت تقيلة ما عرفنا ليها بعدين إتكشحت في حوض الغسيل وقفلته.
_أنا قدر ما حاولت أتخيل حظهم سيء قدر شنو ما قدرت دا أكيد يوم أسود عليهم.
_المهم يا ستي..
_خلاص كريم علمك تقوليها.
_إكسيوزمي هو كان بقول لي كدا من قبلك.
_كان زمان.
_هأبتدي أغيير منك ها.
_غيري ساي ما شغالة بيك.
_ما تحتكي يا زولة.
_هههه.. طيب كملي دقوك ولا لا؟
_معاي بوديقارد عمرو ما سمح لزول يمس شعرة مني.
_أحيييييينا.
_والله يا نُود كلمتك دي أحسن تبطليها أنا مرة في نص القاعة الدكتور أدانا كلاس ويرك مُفاجئ جمعت اول وحدة قال لي ممتازة يا وِعاد وقعد يشكر فيني قلتها بصوت عالي وما بتتخيلي حسيت نفسي صغيرة قدر شنو قدام الدفعة والدكتور.
_ضحكت..إنتِ هبلة دي ما بتتقال في مواقف زي دي.
_ما علينا بس أحسن تبطليها المهم يا ستي زمن الفطور جا ونحن كل واحد بعاين لي التاني ما عارفين نتصرف الله يدي العافية لخالتو علوية تمت لي المُلاح وملحته لي ورفعت لي جكين عصير بسرعة قطعت الموز والبرتقال والعنب وختيتهم في صُحانة ساي عليهم الكبكي وبلح وطلعت الصينية قام كيمو رفض يطلع يفطر برة وقعد معاي ونحن ما كان عندنا شي ناكله أصلًا غير فواكه وكبكبي.
بعد أكلنا وصلينا إنتظرنا بابا يجي وأنا مجهزة نفسي خلاص هاخد دقة ومتصالحة مع الموضوع وبضحك كمان وكيمو يا حليلو شايل همي عشان عارف بابا صعب وما بهظر.
_كرر علي يخسي عليك يا وِعاد طلعتي معذباه ومنكدة عليه عيشته وأنا جيت تميت الناقص.
_أصبري أصبري هي كترة مواقف نحن إتدقينا سوا وإتحرمنا من مشاوير وملابس عيد ونقصو مصروفنا كم مرة بي سببي وياما عاقبونا وأنا الغلطانة وهو يشيل عني.

_لا بالطريقة دي هختلف معاك والله.
_يا حنييييييينة.
_ما عافية ليك يا وِعاد.
_يا زولة أخوي ولا أخوك.
_خوخة يا وِعاد زعلتيني منك يلا.
_حقو الزول يصورك وإنتِ بتخافي عليه كدا ويذلك بالڤيديو.
_تقدري؟
_ياي خوفتيني..المهم يا ستي أكمل ليك.
_لو أبوك دقاكم من أسي ما تمي لي ومخاصماك.
_بقت تضحك وأنا كنت جادة معاها.
_ما تخافي ما دقوا ليك حبيب القلب.
_طيب كملي لي دقوك كيف؟
_أخصص عليك يا نُود يعني مُستمتعة بالقصة كمان عشان دقوني صح؟
_ضحكت..لا والله بس إتشوقت اعرف الحصل شنو؟
_المهم يا ستي..بابا جا وقال لي ماشي التراويح ويقدم صحبه ويجي يلقى المطبخ دا نضيف ونلقى حل للحوض الكله عصير دا.
_بقينا نضف والحمدلله كيمو عنده مفاتيح فك الحوض وصلحه بس كان يوم مُتعب ونحن ما ماكلين حاجة وبعدا ساعتين ننضف ونرتب وغسلنا العدة ولما خلصنا بابا جا وجاب معاه عشا أكلنا ونمنا ما صحينا للسحور حتى.
_وأسي بقيتي تعرفي تطبخي؟
_لالا راجياك تجي تطبخي لينا.
_الترابة في خشمك والله.
_بشوف لأخوي مرة غيرك بس.
_طيب برة من بيتنا.
_أنا حماتك إحترميني شوية وقومي شوفي لينا الفطور أنا جُعت.
_أسي ماكلة بسكويتين وشاربة شاي بمقي الكبير فطور شنو.
_يا خالتووو هدى تعالي شوفي بتك دي!
_ماشة أسرح شعري داك المطبخ لو عايزة تاكلي أمس ضيفتك..الليلة هتكوي معاي ملابسي كلها جهزي نفسك.

طلعت كل ملابسي فرشت في الأرض ووصلت ليها المكوى وقعدت أسرح شعري.

أنا بتعامل مع وِعاد كأنها نادين أختي ما خاتة أي حواجز بينا والكلام دا من قبل ما أتخطب لكريم أصلًا نحن إتصاحبنا اول بعدين بقت حماتي عشان كدا على طول بقول ليها وِعاد إنتِ صحبتي قبل أي شي.

____

-يا ننا.
_أيوة أيوة ها.
_تعالي سريع.
_جاية يا عزيز ما عندك صبر خالص؟
_صبري كملتو والله.
_إن شاءالله تطلع حاجة تستاهل بعد دا.
_إنتِ رايك شنو؟
_في؟
_فيك!
_حريف شديد.
_لعبتي.
_وقعت كم وحدة؟
_قضيت زمن طويل عشان أوقع وحدة بس الموضوع اخد معاي سنتين وشوية.
_والله!
_والله.
_طلعت من المطبخ بعد خلصت جيت لقيته واقف ومخبي يديه وراه.
_هببت شنو؟
_حاجة حلوة.
_أشوف!
_طلع زهور كتيرة ملونة شكله خطفها من الحديقة برة.
_دي لي أنا؟
_هيكون لمنو مثلًا.
_قربت أخدهم رفض.
_ما تخلف بوعدك.
_ما هتاخديهم ببلاش.
_طب خليهم معاك.
_تعالي تعالي..الواحد ما يهظر معاك!
_هاتهم!
_خُديهم.
_عزيييييز.
_قولي شعر بالاول وبعدين بتاخديهم.
_ما وقتك والله.
_وقتي متين طيب؟
_أنا داخلة وما تتبعني وخلاص ما بقيت عايزاهم.
_بتزعلي بسرعة وكدا ما كويس!
_ما بنفع معاك؟
_مين قال كدا؟
_إنت ما غيرك.
_أنا دا؟ ما حصل.
_سيبني في حالي يا عزيز ضيعتي وقتي ساي.. رجعت المطبخ عندي حاجات جهزتهم أخدت مسافة طويلة ما سامعة صوته طلعت برة لقيته بيضحك إنتبهت إنه بتكلم بالتلفون للحظة حسيت بفضول عشان أعرف عزيز مبسوط كدا مع مين.
بقيت واقفة في حتتي وما سامعة غير صوت ضحكته.. لما قربت شوية كان خلص المكالمة دخل تلفونه وقال لي رايك شنو في المكان؟
_إنتبهت إنو مركب شرايط ضو وفي تربيزة في نصها مزهرية خت فيهم الورد ومفروشة بالأحمر قلت ليه حلو ودخلت.

___
_حتسيبا تضيع منك؟
_هي أصلًا ضاعت.
_قدامك فُرصة تحاول!
_الحاجة لما نحاولا أكتر من مرة وما تظبط مفروض نقتنع ونسيبا!
_ما أي حاجة لكن!
_بغض النظر..أنا تعبت من المحاولات.
_ما تيأس يمكن الحياة عايزة تديك فُرصة؟
_الفايدة شنو إذا الفُرص كُل مرة بتضيع؟
_إنت جرب ما خسران شي؟
_الموضوع صعب إنت ما مُتخيله.
_المهم إنت حاول أنا ماشي عندي مشوار.
كان قاعد براه وسرحان بعيد طلع تلفونه مرتين عاين لجهات الإتصال المحظورة وبقاوم نفسه يفك البلوك ولا لا..!

أشد أنواع الحروب اللي بتكون بينك وبين نفسك..في كل الأحوال إنت خسران..!

_
_يا بت تلفونك دا بيرن شوفيه.
_جاية جاية ثواني بس.

_يداب تتذكريني؟
_يا نُووود ألحقيني ..!
_في شنو مالك بتصرخي..!
_تيت تيت تيت

تم إنهاء المُكالمة.

#على_الهامش:
‏العلاقة بتنجح لما الراجل فيها يكون الطرف الأكثر حُب ..))

#ننس_تمدين
نودين ۦٰ۪۫٭ۦ

#عزيزُ_قلبي "10"

"ويحدُثُ أن يُصفّقَ كثيرون لكَ ولكن تَبقى عيناكَ مُعلّقةً بكفيّهِ هو هو فقط!."

"في الماضي"
"مكالمة"

_عايني أنا مُستنياك من ساعة
_نفطر أول
_نُود..لو فطرنا هتقولي نمشي نشوف السيد كريم عشان هيغني الليلة صح !؟
_صح..
_انا كنت حاسة إني ما هحضر أي محاضرات طول ما نحنا صُحاب
ضِحكت _طيب روقي وأقعدي في أي مكان لما أجيك
_أنتي وين حالياً !؟
_خلاص هركب المواصلات
_نُود
_في الظلط
_نُوووود
_جنب خشم الباب ياخ
_نُوووود
_يا ستي بلبس والله..والله بلبس
_كنت عارفاك بتكذبي..نفسي مرة واحده تلتزمي بالمواعيد
_ما خواجية معليش معليش
_أقفلي ياخ وأخلصي سرعة
_طيب...سلااام

مشيت قعدت جنب خالتو ست الشاي..طلبت لي قهوة وفتحت تلفوني نزلت بوست بيقول :-

آن نتشارك فنجان قهوة
بعض أحاديث المساء
تجمعنا شرفة صغيرة
وحكايات منتصف الليل
هذا ما أطمح له يا حبيبي !♡

-------------:

_تراااااا
_بتبالغي طبعاً
_أطلبي لي شاي بس وهنتفاهم
_مفلسة
_كذابة والله..انا جاية معتمدة عليك
_وأنا برضو جاية معتمدة عليك

فتشنا شِنطنا في نفس اللحظة وبقينا نطلع القروش الفيهم ونحسبها...أنا ونود جيبنا واحد لدرجه بعيدة..يعني أنا طالعة من البيت وما شفت قروشي كم وفي بالي هنتشارك أساساً♡وهي نفس الشيء.

_معاي 400 بس
_وأنا معاي 600...ما مشكلة بتتجازف
_نفسي مرة احسب قروشي وأنا جاية الجامعه
_تحسبيها ليها !! مش أنا معاك♡

هي معاها حق..طول ما هي معاي بكون مطمئنة وبمشي بكل ثقة أي مكان وبعمل كل حاجه عشان واثقة إنها في ضهري دايماً وعمرها ما تتخازل وتتراجع خطوة لورا بدوني♡.

قالت بهمس_واي يا نُنا...كريم
رفعت راسي_ما تنهاري
_أنا سِححححتَ والله
_أهدي أهدي
_هتعملي شنو !!
_شكلو هيغني هنا..ما شايفه صحباته وأصحابه جايين
_بس ما تقولي صحباته..كريم ما بيصاحب بنات
_يا سلاااام..نسيتي البت اليوم داك
_ما علينا ياخ
_أسكتي طيب عشان شكلهُ هيغني.

كريم إبتدا يعزف ويغني..ونُود كانت مركزة معاهو..أنا متأكدة إنها ما سامعه شيء بس سرحانه فيهو...لما خلص الناس كلها كانت صانة وصامتة...قومي يا نٌود على حيلك وصفقي...طبعاً في اللحظه ديك عملت نفسي ما بعرفها خاااالص وكنت هقوم أجررري من وهمنة الموقف..كلهم كانوا بعاينوا ليها إحساس دي مالها !!

قمت على حيلي وهمست ليها_نمشي عشان شكلنا بقى زبالة
_.......
_نُود إتحركي
كريم إتكلم معاها_لو سمحتي !!
_.....
قرصتها قرصة حارة_أييي..اها..
_ممكن أتكلم معاك
_اااا
_لا..نحنا مستعجلين.

سحبتها وراي ومشينا الجامعه

_ليييه جريتيني كده..كنت عاوزة أسمعو عايز يقول شنو😭
_حبيبتي كفاية شكلك...واقفة برااااك وبتصفقي
_ما هو بيعزف حلو..كان لازم اصفق
_ود اللمين هو !!
_إتلمي يا حيوانة...يا الله..كان عاوز يقول شنو !! إيناس ما عافية ليك
_إتلهي بالله عليك.
كانت منفعلة جادة وبتتكلم معاي
_كنتي تخليني واقفة اسمعو
_بس...
قاطعتني_كنت هقول ليهُ قدر شنو شكله حلو وهو بغني
_نُود ال...
_وقدر شنو لبسهُ شيك ومختلف
_يا..
_وإنهُ عاجبني من زمان
_نٌود أسمعيني
_وإنهٌ حتى لو ما أتكلم معاي ولا عاين لي حتى...هيفضل عاجبني♡...ك شخصية وك شكل وكيان...وك كريم♡

للأسف نُود كانت بتتكلم وهو واقف وراها مباشرةً وأنا بحاول أوصل ليها ده وهي بتسكتني

_عارفة أكتر شيء بِضايقني منهُ شنو !! لما يقعد مع بنات..أو يسلم على بت...زي الموقف الفات لما جاا مطقم مع واحدة و..
أنا وأنا بحكي إضايقت
_طيب أ...
_وأكتر شيء بيعجبني فيهُ...إنو فارض وجودهٌ ومحل ما يمشي بتشاف..تحسي مغرور لما يذكر إسمه وهو رافع راسه..أنا كريم الزمراوي..وفي نفس الوقت تحسي التواضع مالي قلبهُ...وصلت مرحلة أشم عطرهُ في أي مكان...بمناسبة العطر..ح تفتكريني هندية والجو ده..بس حقيقي أنا شامة ريحتهُ حالياً♡
_لا ما هندية ولا شيء...هو فعلاً ريحة عطرهُ مالية المكان لأنهُ وراك يا نٌود

عملت لي حركة بوشها نظام أأكد ليها كلامي

_أمممممم وراك والله
حركت لسانها ببطء_أجري ولا أعمل شنو !!

_والبيعجبك فيني شنو تاني !! واصلي
_أنا..أنا عندي محاضرة ولازم امشي
_ما هخليك تهربي زي كل مرة
_نعم !!
_يعني يا نُود معقولة ما حسيتي
_حسيت بشنو !!
_إنهٌ كريم الزمراوي كمان مُعجب بيك♡!

______

"في الحاضر"
عند نُود:-

لما ننا أتصلت علي وقعدت تصرخ...بقيت بحاول أفهم منها هي وين والحاصل شنو..يا الله حتى فهمت منها إنو عزيز تِعب وهي ما عارفة تتصرف..

_يا نُود أنا خايفة..إتصلت على أخوانه تلفوناتهم مغلقة..وأمهُ ما بترد...ما لقيت غيرك
_طيب روقي ووريني انتي وين بالضبط...المزرعة دي وين ومسافتها من هنا كم !!
_حوالي ست ساعات
_طيب اهدي...خليك معاي ح أدخل كريم في مكالمة اشوفهٌ وين..ما تخافي هتصرف

كريم رد علي بعد مسافة..قبل اقول شيء كان بيعتذر إنه طلع رحلة مع أصحابه بدون يكلمني وحالياً هم في مزرعة بعيدة و هياخد وقت لحدي ما يرجع.

_المزرعة دي وين يا كريم !؟
_يعني ده كل همك في الموضوع !!..ما همك إني مشيت بدون أكلمك..إعتذرت على الفاضي يعني
_كريم ما وقت هظارك..عاوزة اعرف المزرعة دي وين يمكن تكون قريبة للمزرعة الفيها ناس إيناس

فهمتهُ الحاصل..وبعدها بِقى متابع مع إيناس عشان يوصل ليها في أسرع وقت...وأنا قلقت شديييد عليها.

___
عند إيناس:-

بعد صعوبة حتى لميت في كريم...كنت ببكي ومتبهدلة شديد..عزيز فجأة عرق وشكله بقى ما طبيعي..كنت بحاول قدر ما أقدر أخلي ما يغمض عيونه مع إني ما عارفة ده شنو الجاهو ده..إتصلت على أخوانه ما بيردوا وأمهٌ تلفونها قافل..ما لقيت غير نُود..مع إني ما عارفة إنها هتساعد بشيء ولالا...بس كنت واثقة إنها هتطمني♡

_روقي يا إيناس..إن شاء الله خير..في مركز قريب من هنا..حكاية نص ساعة كده...خلينا نتحرك ونشوف الحاصل شنو.

فِعلاً إتحركنا والحمد لله المركز كان شغال...كُنا ماسكين عزيز مع بعض لحدي ما جابوا النقالة..كريم كان بيتكلم مع نُود وأنا قاعدة مستنية الدكتور يجي ويكلمني الحاصل شنو...بعد مسافة طالت...الدكتور جاا طالع..مشينا ناحيتهٌ أنا وكريم

_خير يا دكتور
_خير إن شاء الله...كومة سكري بس عدت الحمد لله
_سُكري !!
_إنتي زوجته !!
_أيوة
_السُكر عندهُ كان مرتفع..الحمد لله قدرنا نعمل اللازم

إتفاجأت لأنو ولا مرة شفت عزيز بياخد علاجات السُكري ولا حتى حقن...الدكتور طمنا عليه ووصاني كذا وصية بخصوصهُ...لما عزيز صحصح شوية...كلمتهُ بالحاصل وهو سلفاً بيعرف كريم..بس ك معرفة سطحية...رجعنا المزرعة تاني لمينا حاجاتنا وقفلناها...بعدها إتحركنا.

_____
"صباح اليوم الثاني"

_ما هتنزلي شغلك !؟
_أنزل كيف وأخليك
_بس أنا كويس
_لا ما كويس..وبعدين ليه هامل موضوع السُكري ده كده
_عادي يعني...وبعدين أول مرة تحصل لي
_لازم تقابل دكتور يا عزيز وتتابع معاهو...السُكري ما هين وعاوز محافظة
_أمس إتبهدلتي صح !؟
_خٌفت عليك
_ما هتتكرر
_نفطر بشنو !!؟
_أي شيء
_لالا...من اليوم لازم قائمة أكلك تنتظم
_هتعملي لي فيها مُمرضة
_غصب عنك
مسك يدي_شكراً♡
_على شنو !!
_على إنك هنا...دايماً♡
_طيب بما أنك صحصحت أساساً..عاوزة أسألك سؤال..بس تجاوب بصراحة
_حصل كذبت عليك !!
_كتيير
_متين ده
_لما كنت بتقول إنك ما شغال بي وأنت ميت فيني
_ههههه..طيب اسألي
_أمس كنت بتتكلم مع منو وبتتضاحك بأعلى صوتك
_متين ده كمان
_عزييييز
_أهاااا...والله كنت بتكلم مع أمي
_وهي ماما بنضحك معاها كده !!!
_ما مُصدقاني !!..يعني فِكرك بضحك مع منو..وأنا أساساً حياتي ما فيها نسوان غيرك أنتي وهي♡
_طيب ليه ما أديتني أسلم عليها
_ما اتذكرت بس...أمشي اتصلي ليها وسلمي عليها يا غيورة
_غيورة في عينك
_سمحه وأنتي غيرانة كده...على فكرة
_ها
_أنا مُتابع مع دكتور ومحافظ وكل شيء..بس ما حبيت أجيب ليك سيرة
_ليه !!
_ما عارف...في ناس بتخاف من السُكري وبتشوفوا على إنهُ مسؤولية ما بس للمريض..للحواليه كلهم وأنا ما بحب كده
_هو مرض زيو زي أي مرض...بس مفروض كنت اعرف..الحمد لله عرفت..عشان موقف أمس ما يتكرر تاني.
_أنا جُعت
_إنصرافي بشكل.

___
عند نُود:-

كُنا قاعدين في الكافيه بنفطر...كريم كان بيحاول يلهيني بكذا موضوع عشان انسى ليهو عملته الأمس

_يعني بقينا نطلع مع اصحابنا رحلة لمزرعة وما بنكلم زول
_كنت هكلمك وإنتي اتصلتي..فلما اتصلتي كلمتك
_ود الزمراوي
_أحكي..أنا عارف اليوم أسود علي.
_ما كلمتني ليه ؟؟
_كنتي هتقولي ما تمشي والدنيا نص اسبوع وشغلك وما شغلك
_ويمكن أقول العكس..أقول ايوة امشي واستمتع مع اصحابك وعادي يعني
_أنتي تقولي كده ؟؟؟؟..إلا لو محمومة
_كريم بصورة جادة
_هو في صور جادة وصور بتاعت هظار !!
_ياخ هسسس اسمع
_قولي قولي
_ما عاوزة أحس نفسي خانقاك..يعني من حقك يكون عندك مساحة خاصة بيك شوية و
قاطعني_أنا عاوزك تخنقيني..ومن حقك تدخلي في مساحتي الخاصة..ها إيه تاني...وقولي احييينا عشان اشق راسك بالسكين دي

بقيت بضحك وبعاين ليهو بس♡♡♡.

___
"مكان آخر"

_ممكن نتكلم شوية !!
_وِعاد
_أيوة...في شنو يا رحيم !!
_تشربي شنو أول
_ما عايزة...عايزة أفهم ليه اليوم داك قلت ما أدي زياد فرصة
_يعني جاية عشان زياد !
_رحيم
إتعصب_بلا رحيم بلا زفت...واحد إنتي دافعة ليهو كل تكاليفه وأي مصيبة يعملها بتتجرجري للأقسام عشان تطلعي منها...ما قصرتي معاهو ولا في شيء..وهو شايفك مجرد واحده روحها فيهُ وما ممكن أبداً تقدر بدونه...ضامن وجودك لدرجه إنو زعلك ما بيفرق معاهو...مستنية شنو من واحد بخليك تراضي نفسك بنفسك يا وِعاد...قولي مستنية شنو !!

#على_الهامش.

"كان قلبه يصرخ من فرط الآلم...ويقول تلك موسيقى في الأرجاء💔))
نودين ۦٰ۪۫٭ۦ
#ننس_تمدين

كل شيء سيأتيك في وقته المُناسب، ثق بتدبير الله واطمئن.

‏"يا الله :
‏نسألُكَ البِشَارَاتَ التي نُحِب
‏والأيامَ التي تَسُرُّ
‏والرّحمَاتِ التي تتوالى
‏والعَافيةَ التي تَدُوم
‏والخيرَ الذي لا ينقطع
‏ورِضاكَ قبل كل شي يا الله، رضاك!" ❤️

°°
ما دُمت متمسكاً بورد من القرآن تتلوه، ستأتيك آياتٌ تربط بها حزنك، وتجبر كسر خاطرك، وتُداوي جرحك الغائر، ويستقيم بها وتد الإيمان في قلبك، وتضيء سبيلك المُبهم، آيات لو أُنزلت على جبلٍ لجعلته قاعاً صفصفاً، فما ظنك بقلبك الصغير ونفسك المنهكة
التي تحملها بين جنبيك 💗🦋.

نحن دائمًا بحاجةٍ لمن يأتي إلينا من تِلقاء
قلبهِ .❤