tgoop.com/RwayatSudan/41248
Last Update:
#عزيز_قلبي♥️
حلقة 19
" الرجل يصبح أباً للمرهَ الاولى حينَ
يحُب ليسَ حينَ يأتيه طفل♥️.))
"بعد إسبوع"
في ليلة فريدة من نوعا وتُعد واحدة من أجمل الليالي اللي عاشا طول عمره واقف قدام دولابه مُحتار كالعادة بس المرة دي فَضّل يختار بنفسه..أساسًا عارف القميص الأسود هو المُفضل عندها بلا مُنازع.
لبس وشيك على نفسه أكتر من مرة..الزرارة الاولى مفكوكة..العطر المُفضل إترش بطريقة حلوة..!
مرر يده على شعره وبابتسامة حلوة طلع برة..
_جاهزة؟
_وِعاد ردت عليه_يا دي الحلاوة!
_يا شابة إحترمي نفسك.
_عمته أسماء قالت ليه_شكلك طالع عريس بس!
_حتى إنتِ؟
_الله خجلان مننا ولا شنو؟
_هييي مالكن على وليدي دا خلنو بتنجهنو لي.
_شايفة يا حبوبة!
_تعال لي قريب.
_مشى عليها مسكته من يده وباسته فيها..ربنا يسهلا عليك محل ما تقبل.
_آمين آمين يُمة دعواتك بس.
_من مُصلايتي دي ما قايمة لما تجوا.
_لو مشيتي معانا مش أحسن؟
_وينو الحيل البمشوا بيه؟
_حبوبة إنتِ لسة شباب بكرة تشيلي أولادي كمان.
_الله يحضرني ليهن.
جا أبوهم في مظهر كله هيبة تليق بالزمراوي..لابس جلابية وشال ومركوب نمري..شايل مُفتاح العربية وأشر عليهم بدون ما يفتح خشمه نظام يلا أرح.
عمته أسماء بحماس إتقدمت..وكريم لحقا.
أخد المُفتاح من أبوه وساق هو.
طول الطريق الزمراوي كان هادئ وما اتكلم..أسماء كانت كل شوية تتكلم مع كريم..كان ظاهر عليه مبسوط وما قادر يمسك إبتسامته.
_قربنا؟
_لسة شوية!
_لميت فيها وين ساكنة بعيد كدا.
_إتعرفنا في الجامعة.
_قرت معاك في نفس الكلية؟
_لا قرت إعلام.
_غريبة الدنيا.
_غريبة أقدارنا.
_رفضتَ تمشي معاي الدوحة عشان تلاقيها.!
_ما أعتقد لو كان مشيت لقيت أحسن منها.
_وهي بتعمل في شنو حاليًا؟
_ماسكة قسم الإعلام في (...)
_ما هينة يعني.
_قلت ليك هي مُبهرة.
_أما نشوف.!
_أبوي إنت وعدتني!
_مُتذكر وعدي.. وإنت كمان ما تنسى وعدك ليا!
_إتفقنا.
________
"عند نود"
_واااي يا نينا متوترة شديد.
_والله لما جا خطبك ما إتوترتي كدا أقعدي حتة واحدة ياخ.
_ياخي ما قادرة إنتِ ما عارفة أبوه دا بس.
_وإذا يعني أهدي شوية.. ننا إتكلمي معاها.
_لا سيبيها على أساس هتسمع مننا..!
_إنتوا ما حاسين بي.
_غايتو يوم عرسي ما إتوترت كدا.
_ننا إنتِ مفروض تسكتي خالص.
_سكت أهو.
آش جات داخلة وقالت: يا ماما بنادوكي.
_آش تعالي آزريني.
_أسوي ثنو؟
_ما تسوي شي أقعدي جنبي هنا وأحضنيني بس.
في اللحظة دي أنا نفسي أغمض وأفتح ألقى كل شي إنتهى وجنبي بت زي آش دي وما نفسي في شي تاني..أنا ما عايزة أعيش أي تفاصيل لو بالتوتر دا ياخ.. قعدتَ آش جنبي هي فضلت ساكتة مُحتارة فيني وأنا بعاين ليها بطريقة هبلة كدا..ننا ونادين مشوا يجهزوا العشا مع ماما وأنا زرعت الغُرفة بي دربي أمشي وأجي ..كُنت هتصل لكريم أسأله هو وين بس حذرني إنه هيكون متوتر أكتر مني وهيكون سايق وأبوه جنبه.
أووف من دي لحظات كان مفترض تكون حلوة بس خربناها بتوترنا.
بعد شوية ننا جاتني.
_جو.
_واااي.
_والله شكلك حلو وإنتِ متوترة كدا حقو الواحد يصورك ڤيديو يذكرك بيه.
_ما وقتك والله يا ننا وصبرك لما الموضوع دا يخلص نسيتي في عرسك أنا غدا ما إتغديت من توتري معاك.
_إنتِ شوية وهيسموك وتورة أهدي يا بت..رجال هيقعدوا ويتفاهمو سوا.
_أثناء ما بنتكلم جات عمتو أسما داخلة سلمت على إيناس وحضنتني وبقت تعاكس.
_دي شنو السماحة دي؟
_بجد طالعة سمحة؟
_أسمح من كدا عايزة تموتي لينا ولدنا صح؟
_إبتسمت بس..أنا وأسما صحبات شديد نسبة لإنها أكتر وحدة قريبة لكريم وصحبته شديد عرفني بيها اول ما إرتبطنا ومرة خلاها تلاقيني وعندي رقما..هي ذاتا فرفوشة ولطيفة بتعتبر كريم زي ولدا رغم إنها ما كبيرة شديد يعني شباب زينا كدا.
قعدت جنبي وهي بتحكي لي قدر شنو كريم متوتر من الصباح طلع ودخل البيت 60مرة وطول الطريق كان سايق بهدؤ وساكت عكس عادته.
_يصبر لي بس.
_عايزة تعملي فيه شنو؟
_المُشكلة ما قاعدة أعمل ليه شي.
_تحلفي؟
_ضحكت..هطين عيشته إنتِ ما مُتخيلة هو من الصباح ما إتكلم معاي ولا فهمني شي بس إتصل قال لي أبوي هيلاقي أبوك وما تتصلي لي يا نُود.
_قال ليك كدا عديل بالغ.
_شُفتي كيف ولدك حقار.
_لالا بصراحة غلطان ليه ما يتكلم معاك من الصباح أكيد بتكوني إشتقتي ليه.
_أيوة فعلًا من..إستوعبت أنا قلت شنو لما سمعت ننا بتضحك وكلهم بقوا يضحكوا فيني أنا كُنت بتكلم بكل إنفعال وجادة إني زعلانة منه ولما يتكلم معاي هشاكله.
_طيب سامحيه هو برضو متوتر ما شُفتي شكله بس.
_يستاهل.
جوا ماما ونادين قعدوا يتونسوا مع أسما وننا..وأنا نومت آش في رجليني وسرحانة بفكر هم برة بتناقشوا في شنو..!؟
بعد شوية بابا نده لماما أخدت معاها أسما وطلعوا .. أخدوا حكاية رُبع ساعة وجات ماما قالت لي كريم عايزك برة.
من التوتر بقيت ماشة وأنا ما حاسة برجولي..لما وصلته قلبي كان بدق بطريقة فظيعة.
حسيت لما اول مرة اتكلمنا سوا وكنت عايزة أهرب منه.
BY رِوايات سُودانية🪐🤎!)"
Share with your friend now:
tgoop.com/RwayatSudan/41248