tgoop.com/RwayatSudan/42602
Last Update:
#ثمن_الاختيار❤️
حلقة3
«كان عليك أن تقترب أكثر أو تبتعد أكثر لا لشيءٍ سوى أن الوقوف في المنتصف يقتل أحيانًا».
كنت بدندن وأنا فاتحة دولابي ومُحتارة ألبس إيه ..!
بكرة اول دوام ومُتحمسة شديد مع إنو كان قدامي ألف فرصة شغل بس ما عايزة غير دا.
وقتها كُنت سامعة نغمة تلفوني الـ نغمة الكنت مُخصصاها ليهو والغريب إنو لحد الآن ما غيرتها.
كُنت عارفة إنو عمرو ح يتصل وح يحاول وما ح يكون مفتكر إني جادة المرة دي في الإنفصال بس حقيقي تعبت ومليت منو وما نفسي أكمل في علاقة زي دي.
إخترت بدلة لحمية وفنيلة بيضا وإسكيرت أسود مع هليز ابيض وعملت لي ماسك ونمت لا قريت رسائل عمرو لا رجعت ليه متأكدة لو كان رديت حننهي النقاش بإعتذاره مافي شي جديد بقيت حافظاه.
صحيت تاني يوم بدري لبست وعاينت لـ نفسي بإعجاب أخدت سيلفي قدام المرايا وطلعت في الطريق إتصلت على ملك رجعت لي برسالة إنها ح تتأخر شوية.
مشيت ما إستنيتا أبدًا ما كنت مترددة ادخل براي أو حسيت بتوتر اول يوم وأصلًا أنا لي سنين ما إترددت أو إتوترت كُنت واثقة إني ح ألفت الأنظار ودا الحصل بالفعل.
إتصلت لـ هشام بعد وصلت طلع لي برة صبح علي ودخلني مكتب فيهو ولدين وبتين عرفهم بي وراني أقعد وين سلموا عليّ بحماس ورحبوا بي مع إني ما النوع البتحمس للناس من اول مرة ودايمًا اول إنطباع عني بقولوا لي كنتِ مُفترية ومسيخة بس ما حبيت أبين كدا قدام هشام رديت عادي وإبتسمت ليهم.
فهمني طبيعة الشغل وإستئذن مني عشان يمشي عندو شغل وحيجي كل شوية يشوف لو محتاجة حاجة ..!
وهو طالع صادف ملك داخلة وقفوا سلموا لبعض وبقى يسأل فيها عن ناس البيت وهي مبتسمة عكس طبعها وبتتكلم معاه لما خلصوا سلمت للشباب بحماس كدا للحظة حسيتهم هم أصحابا أصحب مني أو يمكن عشان أنا طبعي الغيرة وما بحب الحاجات البتخصني أشاركا مع حد تاني شعوري تجاه ملك إنها حاجة بتخصني جدًا.
لما جات حضنتني وسلمت علي:
_والله هايل طلع عندك أصحاب أصحب مني.
="ضحكت وهمست لي: بتغاري؟
_سيبي الوهم أنا حبيبي ما بغيير عليه.
قبل نقعد لفتت إنتباهم وعرفتني بيهم تاني:
_يا شبوبة البت الحلوة دي بيستي عاملوها بطيبة وإحساس ودلعوها قدام الناس.
رجعت عاينت لي بكل حُب .. يمكن أكتر زول أنا متأكدة من حبو لي بعد ماما في الدنيا دي هي ملك حقيقي أنقذتني كتير وإحتوتني وحبتني وطبطبت عليّ في أكتر مواقف صعبة مرت علي ولو ما هي كان لقيت نفسي براي ♡
البنات ما علقوا إكتفوا بإبتسامة والشباب ضحكوا واحد فيهم قال ليها:
_إنت بس سلميني مسؤوليتا وشوفي أنا ح أبهرك كيف.
بعدها قعدت جنبي إتونسنا شوية وكل زول في شغله وقت البريك طلعنا فطرنا ورجعنا تاني.
خلال اليوم هشام جانا مرتين سألني مرة إذا فهمت السستم بتاعهم ولو واجهتني أي مشكلة والمرة التانية جا لملك ناداها طلعوا برة مسافة 5 دقايق وجات راجعة.
الشغل كان مُمل وسخيف وما كان عاجبني بس كان أفضل من قُعاد البيت والفراغ.
مر إسبوعين على الوضع الملل دا أي الشغل ما كان كتير علي بس ما متعودة على التقيد دا المفروض أرجع أغسل كل يوم لأنو يونيفورم ما ينفع أجي بـ أي حاجة ومكوى وما مفروض أساهر عشان أصحى بدري أتسرح وأعمل مك اب واليوم كله بضيع بين الجهاز وقدام وجوه مكررة أنا الجامعة ما كُنت بمشيها يومي عشان وش ناس الدفعة الواحد دا أجي أتحبس في غرفة بين أربعة أشخاص شوية وحطق.
كُنت منتبهة لـ نظرات محمد وأحمد ومحاولاتهم الفاشلة في إنهم يتقربوا مني ويحاولوا يفتحوا مواضيع سخيفة بس ما إستغربت كل دا شي طبيعي بس الـ ما طبيعي إنو هشام ما مركز معاي خالص ولا كأني قدام عيونه ولا مرة علق علي ولا على شغلي ولا حسيت إنو مُعجب معقولة ما فيني شي لفتو؟
ما كان قدامي حل غير إني أحاول أجذبو ناحيتي بكل الطرق والموضوع دا بقى لي تحدي عديل لأنو مستحيل أرضى إنو يجي واحد زي هشام يحسسني إني عادية ..!
كُنت بعمل فيها ما فاهمة كتير عشان يجي يشرح لي ومرات بصادفو وإحنا رايحين نفطر ونعرض عليه بس ما بيوافق بحجه الشغل في واحدة من ونستي مع ملك عرفت إنو عيد ميلادو قرب.
إستغليت الفرصة وطلبت ليه بكج حق قهوة بملحقاته مع ساعه وتشيرت أسود.
بس فضل شي واحد كيف أعرف ملك بالموضوع عشان سببين:
الاول: ما متعودة أخبي عنها شي.
التاني: هو ود خالتا ولازم أختها في الصورة.
يوم الخميس بعد طلعنا قلت ليها تدخل معاي السوق عايزة شوية حاجات بعد لفينا والزمن إتأخر قلت ليها:
=خلينا نتغدا سوا ونرجع عشان ماما سافرت وفي البيت حأزهج أجهز حاجة.
_طيب نمشي وين؟
=مكانا المُفضل.
_حنفلس يا ننو.
=عيب يا بت ح حاسب أنا.
_ح تفلسي طيب.
=بابا ما بيقصر معاي قروشو كلها فداي.
_ربنا يحفظه ليك بس ليه ما مشيتي مع أمك؟
=ما حابة المشية.
_يا ننو العمر بعدي وإنتِ بتقضيه بعيدة عن أبوك.
=أوف يا بلاش من السيرة دي غيري الموضوع.
_طيب أحكي في شنو حاساك عايزة تقولي حاجة؟
=المشكلة إنتِ بتعرفيني.
_هببتي شنو المرة دي؟
=بحكي ليك بعد الأكل أسي جوعانة شديد.
BY رِوايات سُودانية🪐🤎!)"
Share with your friend now:
tgoop.com/RwayatSudan/42602