tgoop.com/RyhanaAlrasul87/14503
Last Update:
# قصيده ثقيله لسان حال ام البنين عليها السلام تخاطب الحسين عليه السلام
على طور سيد فاقد انا بگلبي جبيره نار
🖊
أنه بگلبي الك لوعات والحسرات اجر بيهه
من اغيابك يبو سجاد روحي الهظم گاظيهه
تحن الروح يايمه
الگلب مجروح يايمه
❥━──➸➽❥❂❥━──➸➽❥❂
آنه أم البنين اشلون يحسين احمل اغيابك
يبني من مشت الضعون اناطر گاعده ابابك
بلكي من السفر تلفون يبني انتـــه وحبابك
حملت الضعن والدار حزنت كل مبانيهه
تحن الروح يايمه
الگلب مجروح يايمه
❥━──➸➽❥❂❥━──➸➽❥❂
من يوم الرحت يحسين گلبي ماطفت ناره
عليك اتهل دموع العين ذهني تايهه افكاره
مالومه وجر اونين وبتك يبني محتاره
وتنشدني العليله اعليك مادري أشرد ليهه
تحن الروح يايمه
الگلب مجروح يايمه
❥━──➸➽❥❂❥━──➸➽❥❂
مهضومه وجر حسرات يمه اعليك يالوالي
بنيني الاربعه ضحيت كلهم الك يالغالي
ياريتك ترد للبيت وتشوف شصاير ابحالي
ضلمه وموحشه هالدار وطير البين ناعيهه
تحن الروح يايمه
الگلب مجروح يايمه
❥━──➸➽❥❂❥━──➸➽❥❂
ياريتك ترد ليه يغالي افرح بجيتك
اتشيل الهم العليه يمه وآلله لو شفتك
فراگك حيل ياذيني مدري شلون فارگتك
انوحن بالنزل ضليت ودموع العين اجريهه
تحن الروح يايمه
الگلب مجروح يايمه
❥━──➸➽❥❂❥━──➸➽❥❂
ضحيت الولد لاجلك يا روحي ونظر العيون
جعفر ويه عبدالله گمر عباس ويه عون
سالم ترجع اتمنيت وفدوه كلهم ايروحون
بيكم دولباني البين سطرني وعيني عاميهه
تحن الروح يايمه
الگلب مجروح يايمه
❥━──➸➽❥❂❥━──➸➽❥❂
تمت بعون الله العزيز
✍سهام المالكي
نسألكم الدعاء بتعجيل الفرج لصاحب الزمان ((عج ))
غير مبري الذمه من يحذف الإسم
https://www.tgoop.com/ssrgk
BY ️ريحانة الرسول الأولى☜ لنشر القصائد المكتوبة
Share with your friend now:
tgoop.com/RyhanaAlrasul87/14503