tgoop.com/S2ECOND/9984
Last Update:
🔴 انا لو عندي أخ رايح أولي جامعه أو أُخت هوصيهم بالوصيه دي :
- متسألش الدكتور كتير في المُحاضره ومترسمش نفسك .. لان لو وشك إتعرف هتبقي أمك داعيه عليك ..
- إنت مُش موظف فمتحاسبش لحد من زمايلك، وإعمل كده من أولها عشان ميتخربش بيتك ومحدش يستغفلك .. سواء في أكل، شُرب، مواصلات، وخلافُه .. الا لو صديق قريب منك تقدروا توفقوها سوا ..
- متقعدش في المواصلات علي الكرسي القلاب عشان مش كل شويه حد يقومك، ومتحاولش تلم الاجره بحيث هتتلخبط ومنظرك هيبقي مسخره .. إسأل مجرب ;D
- أنا مبحبش الأسر بتاعت الكُليه بيبقي فيها أفوره وإختلاط زياده عن اللزوم .. إلا من رحم ربي طبعًا .. اوعاكي تشتركي في جمعيه خيريه فيها شباب، وإعملي لله لوحدك أو مع صحباتك ..
- لو عندك صاحبه او معاك زميل عنده عربيه مش لازم يوصلك للموقف كل يوم خليك حسيس إلا لو طريقكم واحد فده موضوع تاني ولو انا منك هلزقله ؛D
- ربنا بيساعد اللي بيساعد غيره محدش هياخد رزقك فمتبخلش علي زمايلك بكشكول محاضرتك أو بمعلومه عارفها " إن الله في عون العبد مادام العبد في عون أخيه "
- هتلاقي مستوايات في الكليه أعلي وأقل منك وزيك ..فمتستكرتيش علي حد حاجه وخلي نظرتك طيبه لان الحقد بيبان وده لو إتعرف عنك هتتكره بالجامد .
- متثقيش في اي حد ومتصاحبيش واحد حتي ولو بدافع إنك بتساعديه في دراسته .. عنده معيد وعنده دكتور وعنده زمايل شباب .. الكلام الحلو بيجرجر القلب لسكه اولها جميل ونصها متعب وآخرها وجيعه .. غلفي مشاعرك وحافظي علي نفسك محدش أقوي من الوقوع في الحب ولا يتحمل دهولته ..
- الاكل في المطاعم الغاليه بلاش منه خاصةً لو معاك واحد صاحبك ظروفه ضيقه .. ممكن يوم في الاسبوع والباقي مشوها ع القد .. بحيث مترهقش غيرك او تكلف نفسك بإستمرار، وابعد عن كنتاكي فراخه فيها دم .
- حاولي متحطيش مكياج وتبقي بطبيعتك بحيث تتحبي زي ما انتي ومتقلقيش العريس كده كده جي .. ضحكتك لوحدها بتمكيجك ..
- هتعرف في الجامعه البخيل والندل والاناني واللي ميتعاشرش، واكبر عتاب منك ليهم انك تتجنبهم ومتقلدهمش انت بن اصول .
- متضربيش روحك سُمعه .. بمعني : متقعديش في مكان مُلفت للنظر ومتطرف، او علي باب مدخل اللي رايح واللي جي يشوفك، ولا تقعدي علي سلم ولازم كل طالع واللي نازل يقولك عديني،! ومتضحكيش ضحكه تخلي الناس تلف وشها وتشوف مين اللي بيضحك، او تتصوري بشكل مايع يقل قيمتك، ولا تبصي علي اللي رايح واللي جاي وكأنك منتظره نظرته اللي تأكد حلاوتك لنفسك ! انتي اكبر من كده بكتير ..
- مبنقولش انك حلوه باللبس الواسع ووحشه وانتي مضيقه لبسك .. بس احنا بنقول ان ده امر ربنا وواجب نرضيه في اللي بنلبسه .. ولو مقصره وعارفه إنك مقصره فده في حد ذاته شيء كويس .
- متتكلمش في السياسه حتي ولو بهزار ..
- متتريقش علي دكتور الجامعه اللي بيحب يتكلم عن نفسه لانك لما توصل لمكانه هتعرف انك تعبت جدًا فحابب تشارك غيرك نجاحك اللي تستحقه .. طبعًا من غير أفوره .
- اللي معاهم آي فون مهماش احسن ولا أذكي من حد، ولا انت لو معاك تبقي برنس .. عادي يعني كل واحد له ذوق في نوع الموبايل اللي يشيله ..
- لو زميلتك جايه من بعيد خدي جنب وقعديها جنبك، ولو زميلك نفسك تكسبه هاتله هديه وليكن سندوتش شاورما مثلاً، ولو مجاش يوم رن عليه وإطمن وعرفه انك سجلت المحاضره وهتديهاله .. الهديه والتقدير هيخلوك تدخل قلب اللي قدامك بسُرعة الصاروخ واللي يقدم السبت أكيد هيلاقي الحد ..
- مغلطش اللي قال : إجعل كل من يراك يدعو لمن رباك .. لأن وزير خارجية أي بلد بيمثل دولته ومكانتها في بلاد الناس ..ف إنت وإنتي وزراء خارجية بيوتكم .. شخصيتك وتصرفاتك هتحدد قيمة بيتك وأهلك ومكانتهم في نظر غيرك واللي يعرفوك .. فياتري تحبوا تصدروا أهلكم للي حواليك بأنهي شكل ؟
الوصية ✋🏻
نصيحه مش اكتر❤️❤️.
BY تالته ثانوي 2023
Share with your friend now:
tgoop.com/S2ECOND/9984