tgoop.com/S8m8r/108292
Last Update:
تعرفوا ليش المسؤولين والحكام العرب ما يهتموا باللي حاصل بفلسطين؟!
لأنهم أصلًا مش متابعين، بالضبط زي اللي يقولوا ليش تنشروا استوريهات صور وفيديوهات لأشلاء مقطعة ودم وجروح قلوبنا تتوجع مش قادرين نتحمل حرام عليكم توجعوا قلوبنا بالصور والفيديوهات !
ما يشوفوا الصور ما يشوفوا الفيديوهات ما يتابعوا الأخبار عشان لا توجعهم قلوبهم من الهم اللي بيحملوه من المسؤوليات اللي المفروض يحملوها، من الواجب اللي كان لازم يعملوه بس هم ما عملوه، يشتوا يغضوا الطرف متقصدين عن الألم اللي الفلسطينين عايشين فيه عشان يضلوا عايشين براحة وهناء بقصورهم، عشان ياكلوا ويشبعوا وما تتنغص شهيتهم وتنسد لانه تذكر انه الفلسطينين مش لاقين لقمه نظيفه ياكلوها، عشان لمن يجي حد منهم ينام ع مخدته ما يجلس يفكر بذيك الصورة والا يتذكر ذاك الصوت والا ذيك الام وهي تبكي على ابنها، عشان لمن يسافر المسؤول الفلاني يروح يحجز في أحسن فندق واحلى اطلالة واحلى جناح، عشان ما يفكر انه الفلسطينين مش لاقين مكان يناموا فيه بكرامة وراحة مش لاقيين ملابس نظيفة !
انتوا زيهم
ع الاقل توجعوا بالصور والفيديوهات عشان تعاونوهم قليل في وجعهم اللي هم فيه في وسط الدماء والاشلاء واللي هم أهلهم اللي بيتقطعوا ويموتوا ويحملوا اشلائهم بأيديهم، ع الاقل خلو الوجع هذا يشفع لكم أمام الله لما يسالكم ايش عملت انت يا فلان لما كان اليهود يقتلوا ويضربوا اخوك المسلم بالصواريخ والقنابل، ايش عملت يوم ما كانوا مانعين عنهم الاكل والشرب والراحة والحرية وابسط حقوقهم بالدنيا !
كونوا من اللي يقولوا يا رب انا نشرت لهم عشان الناس تشوف وتدعي لهم، انا وجعني قلبي يا رب لمن شفت الاشلاء والدم ودموعهم من الفقد، انا بكيت لاني زعلت عليهم يا رب ووجعني قلبي وما رضيت ولا برضى يا رب إن هذا الحال يعيشه اي إنسان انت خلقته لأنك خلقتنا مكرمين يا رب !
لا تكونوش من اللي يقولوا يارب انا مقدرتش اتفرج لان ما اتحملت اشوف ذيك المناظر، ما قدرت اقاطع لاني احب الجلاكسي والا احب الببسي والا احب النسكافيه ومقدرش اعيش بدونه !!!
ساعتها يوم القيامة وانتوا واقفين بين أهوال وبين جنة ونار بين يد رب عظيم يحاسبك ع كل صغيرة وكبيرة عملتها في حياتك ويمكن تكون هاذي المواقف اللي تشوفها انت الان تافهه وما تأثر هي الفاصلة لك غير عن كل أعمالك، وهي اللي ترجح لك لحالها بس كفه الميزان لصالحك كلها وتكون سبب لدخولك الجنة دون عن كل أعمالك بس لأنك وقفت مع اخوك المسلم الفلسطيني المستضعف !
ساعتها بس في ذيك اللحظة بيجي في نفسك تاكل سنيكرز عشان انت مش انت وانت جيعان!!!
والا الببسي عشان تروي عطشك والا ريد بول بيعطيك جوانح !!
اي من هاذي الحاجات يوم القيامة بينفعك أمام الله، لمن الله جل جلاله يخاطبك:
ليش قتلت اخوك المسلم، تقله لا يارب ما قتلت إنسان انا يارب، يقولك إلا قتلت فلوسك راح منها سهم في قتل الفلسطينين بغزة لأنك اشتريت من الحاجه الفلانية والحاجه الفلانيه
واللي ناسي ويشوف ان أهوال القيامة والوقفه بين يد الله للحساب سهله نصيحة تروح تسمع مقاطع لشيوخ وهم يحكوا عنها وتشوف فيديوهات تحاكي هاذي الاهوال، عشان يمكن يمكن ضميرك الغافي يصحى شوية وتستحي على نفسك، وتلحق لك عمل صالح لوجه الله يشفع لك يوم لا ينفع مال ولا بنون !
BY " إيكادولي 𓂆 "
Share with your friend now:
tgoop.com/S8m8r/108292