tgoop.com/ShaikhSameerAlSsalehi/1462
Last Update:
🌑الليلة الأولى من محرم
🏴بحر طويل
🏴أشم ريحة حزن واسمع
نواعي تسيل منهه دموع
واعاين فوگ كل الدور
علم اسود يرف مرفوع
واشوف آثار لوعه تحوم
وگلب كل شيعي شو مفجوع
أثاري مصاب ابو السجاد حل وهل شهر عاشور
@@@@@@@@@@@@@@@@@@
🏴لحسينيات متحضره
بسواد توشحت كلها
شباب وشيب حزنانين
و الدمعات تهملها
بوسط كل رايه إسم حسين
و الأطفال تحملها
محرم هذا بيه حسين عطشان الگلب مفطور
@@@@@@@@@@@@@@@@@@
🏴اشنذكر يامصيبة البيه
كل وحده تِشَّيب الراس
ذبح الطفل عبد الله
لو حرگ الخيم ياناس
مصاب الاكبر وجسام
وگطع اچفوف للعباس
لو سهم المثلث ذاك بچبد حسين ظل محفور
@@@@@@@@@@@@@@@@@@
🏴ونذكر فرت النسوان
بارض الطف واهي تندب
والعدوان شبت نار
وسط خيامهن تسلب
واطفال بچتل وبخوف
ومسحوكه وبعد شاحسب
وزينب شابچه العشره تصب الدمع دم منثور
@@@@@@@@@@@@@@@@@@
🏴تنادي ام الخدر ويلاه
وتنخه تصيح خُواني
فزعتكم أريدنها
هجمت علي عدواني
تدرون الشمر جرني
وسوطه حيل أذاني
عزيزتكم تعوفوني وآنه خاطري مكسور
@@@@@@@@@@@@@@@@@@
🏴ساعه تنخه بالعباس
وساعه حسين ابواليمه
وساعه تنادي ياكرار
إسرع ياعلي بهمه
وساعه تصيح يازهره
تعالي بعجل يايمه
وحيده بغربه مهضومه وراس السبط هلمنحور
#سميرالصالحي
#النجف الأشرف
https://www.tgoop.com/ShaikhSameerAlSsalehi
BY 🌷الشيخ سمير الصالحي🌷
Share with your friend now:
tgoop.com/ShaikhSameerAlSsalehi/1462