tgoop.com/Share17/21713
Last Update:
كان معانا بِت في المُعسكر لاحظتَ إنها بتصوم من فترة للتانية اللهُمَّ بارِك
في يوم كانت جالسة في الغرفة جُوَّا ونحنا كلنا برَّا
فلما جا وقت الأذان هي ما كانت سامعاهو
شلتَ لي كُبَّاية موية ومشيت عليها عشان تحلل صيامها
بس شهِدتَ مشهد لا أنساهُ ما حَيِّيت!
جيت لقيتها لابسة سمَّاعة شغال فيها صوت راجل بدعي بدعي بصوت عالي ونبرة البكا واضحة فيهو لدرجة أنا سامعة الصوت حتى وهي لابسة سمَّاعة!
البت دي كانت رافعة يدّيها لي ربنا ومُستقبلة القِبلة وجالسة على الأرض وما بتشوف ملامحها من كُتر الدموع وصوت آمين المبحوح!
أنا بدون أحس لقيت نفسي ح أبكي،ختّيت جنبها الكباية وأشرت ليها إنو المغرب أذن ومشيت
مشيت بس المشهد ده عمرو ما مشى من بالي!
كتير بنقول ما قادرين ندعي،ما عارفين ندعي بي شنو
ما بعرف أدعي
بَس الموقف ده ما أدَّاني فَرَقة مع روحي كلو كلو
ما بتعرف تدعي؟
اسمع دعوات وقول آمين
ما بتعرف تدعي؟
جيب كتاب الأدعية المأثورة وأقراهو وقول آمين!
لما فرعون طغى على سيدنا موسى عليهِ السلام وقومه،دعا عليهم ربنا كما ورد في آيات سورة يونس
فكانت الآية اللي بعد دعاء سيدنا موسى على فرعون إنو ربنا قال:"قالَ قَد أُجيبَت دَعوَتُكُما فَاستَقيما وَلا تَتَّبِعانِّ سَبيلَ الَّذينَ لا يَعلَمونَ"!
في حين إنو سيدنا موسى هو اللي دعا
لكن ربنا قال "قَد أُجيبت دَعوَتُكُما"
ليه؟
دي قِيلَ فيها إنو سيدنا موسى كان بدعي وهارون أخوه عليهِما السلام كان بقول آمين
فكانت الـ آمين دي بمثابة الدعاء!
ما تدّي روحك فَرَقة..انتَ مُحتاج شديد للدعاء في الأيام دي بالذات دونَ غيرها
الفرصة جاتك لغاية عندك..ما تفوِّتها عشان ما تندم!
يا رب يا رب يا رب
أكرِمنا بإجابَةِ دُعائنا،وألهِمنا الدعاء لما فيهِ خيرٌ لنا في دُنيانا والآخرة
يا رب
ولا نخرج من رمضان إلا وقَد غفرتَ لنا وعتقت من النّارِ رِقابنا
يا رب
وآتِ كلَّ سائلٍ منا سُؤلَهُ
آمينُ حتى أُبلّغها ألفينَ آمينا♥️
#صفِيّة_مُصطفى
BY #سِوَدِانَيَزُــ ٲوﭬـررُ 🍁
Share with your friend now:
tgoop.com/Share17/21713