tgoop.com/Share17/21739
Last Update:
قبل أيام كنتَ في لِقاء مع مجموعة من طالبات علم في كذا برنامج علمي اللهم بارك وليهم دور في زيادة الوعي وصاحبات برامج قِيَمية لي بنات المجتمع
ضمن الحضور كانت معانا شيخة جيهان -ح أرفع ليكم رابط صفحتها في أول تعليق-
بعد مُقدمة من الشيخة قالت لينا بعدها:
"إياك
إياك
إياك
تدخلي القبر وما معاك القرآن الكريم
دقستِي دقسة عُمرِك!"
كلام وقتها ممكن احلف صادقة إنو القاعة دي اهتَزَّت من تأثُر البنات ومن نبرة صوت الشيخة سبحان الله!!
واصَلَت كلامها:
مهما نلتي من شهادات الدنيا،مهما بلغ بيك العلم ماف شي بحاجِج عنك ويقيف معاك في القَبُر زي صاحبك القرآن
القرآن ده
يقيف قُصَادك لغاية ما يشوفك دخلتي الجنة،لا عذاب قَبر لا حساب يوم العرض
القبر ده بتقدري عليو؟الكهربا دي لو قطعت ساي
تقعدي تتمَلمَلِي كده لامِن تجي
سَمِح ضِيق القبر كيف؟بتقدري عليو؟!
انتي قايلة روحك بجيبو ليك في القبر مرتبة؟قايلة سريرك بمشي معاك؟ولا قايلة فيو مروحة؟
تُرَاب وضيق وحساب ومنكر ونكير ويا حفرة من نار يا روضة من جنة
في القبر الضيق داك القرآن أنيسِك وجليسك
يوم القيامة:
"يَومَ تَرَونَها تَذهَلُ كُلُّ مُرضِعَةٍ عَمّا أَرضَعَت وَتَضَعُ كُلُّ ذاتِ حَملٍ حَملَها وَتَرَى النّاسَ سُكارى وَما هُم بِسُكارى وَلكِنَّ عَذابَ اللَّهِ شَديدٌ"
الرضيع يرضع في رضاعتو شي ما عملو!
من هَول الموقف يشيب
فوق الأهوَال دي كلها يُقَال ليكِ:"اِقرَئي ورتّلي وارقَي وارتقي فإن منزلتك عند آخر آية تقرَئينها"
ح تعملي شنو؟!
تقولي حفظت ونسيت؟تقري آيتين وتقيفي؟
ح تعملي شنو؟!
مهما عملتي أعمال كويسة في الدنيا دي ما ح تبلغي منزلة الصحابة في الجنة،مهما اتصدقتي وصمتي وصلتي،ما بتبلغي أعلى الدرجات من الجنة!
انتي وين والنبي ﷺ وين؟
دايرة الفردوس الأعلى من الجنة؟دايرة رِفقة النبي ﷺ فيها؟
خلّي هدفك واحد بَس=
لما يُقال ليك اِقرَئي ورتّلي وارقِي وارتقي
تبدي من بسم الله الرحمن الرحيم الفاتِحة وتقيفي وين؟
في الآية دي="من الجِنَّةِ والنَّاس"!
خلي هدفك واحد بس="من الجِنَّةِ والنَّاس"!
في الخِتام..
علِّقيها في قلبك وخليها هدفك من اللحظة دي واسألي الله صادقة إنو يرزقك،وصدقيني ح ييسر ليك السُبُل ويعينك
علِّقيها في قلبك وقِدَّام عينك:
"إياك،إياك،إياك
تدخلي القبر وما معاك القرآن الكريم
دقستِي دقسة عُمرِك!"
=قَد يكونُ الدَّربُ صعبًا،لا تَمِيلي♥️
وشُكرًا
وعفوًا
#صفِيّة_مُصطفى
BY #سِوَدِانَيَزُــ ٲوﭬـررُ 🍁
Share with your friend now:
tgoop.com/Share17/21739