tgoop.com/Sidranovels/3111
Last Update:
اسكريبت
- عهد مش عارف ألَبِس حور!
- أووف يا أحمد مش إنتَ اللي أصريت تغيرلها!
- مكنتش أعرف إنه صعب كده!
- أنا جاية.
روحت أشوفه عمل إيه، كان ماسك الفستان ومش عارف يثبت حور عشان يلبسها وهي بتضرب برجليها الصغيرين ومش راضيه تلبس... ضحكت على شكله المُتحسر وقربت منهم.
- بغرور: هات ربنا يخليني للغلابة اللي زيك!
- ذلي في أمي بقى!
- لبستها وقُلتله: هات الشوز البينك بتاعها.
- بصيتله فقال: هو كان فين؟
حور عندها سنتين وأحمد بيحب الأطفال بطريقة رهيبة، وأصحابه قالوله إن البنت صاحبة أُمها فقرر إنه يبقى معاها ومُهتم بيها مِن أول يوم؛ عشان تطلع صاحبته هو!
غيرت هدومي وهو غير هدومه وشال حور وخرجنا، كُنا رايحين لبيت باباه اللي بنتجمع فيه كل أسبوع، لما دخلنا والده ابتسم وأخذ منه حور.
- والد أحمد: ملامحها بدأت تظهر أهُه!
- شوفت يا بابا شبهي أنا مش شبه عهد!
- والد أحمد بابتسامة: وهو في مِن عهد اتنين يا أحمد؟
- الله يا حاج! إنتَ مصاحب مراتي مِن ورايا ولا إيه؟
- والد أحمد ضحك: أُمال أنا مجوزك ليه؟ مش عشان أصاحب مراتك!
- حور بدأت تعمل أصوات وهي بتمد ايديها الاتنين ناحية أحمد فعينيه لمعت بفرحة: بصوا عيزاني أنا إزاي! مجهودي مضاعش!
- ضحكت عليه: هنيالك يا سيدي!
- حضنها وباسها: دي حورية قلب أبيها.
- حور ضحكت ومسكت وش أحمد بإيدها الصغيرة فهتف زي الأطفال: بتفهمني!
- باباه ضحك وبصلي وقال: معلشِ يا بنتي الواد ملحقش يتهنى بطفولته!
***
- أحمد معلشِ إنزل اشتري لحور بامبرز.
- كان قاعد بيلعب معاها ويدغدغها فبصلي بضيق وقال: طيب!
- فكر شوية وابتسم وقال: بس هاخذها معايا وأنا نازل.
- ليه؟
- يابني أنا مامتها مش مرات أبوها!
- مش هسيبكم تتصاحبوا وأنا مش هنا!
- بطل شغل الأطفال ده أنا مش هاكلها!
- خلاص مش نازل.
- اتنهدت: خدها ياخويا خدها.
- مين هينزل الصيدلية مع بابا؟ تعالي لبابا تعالي.
هو غريب إن يبقى في أب حنين ومتعلق ببنته للدرجادي؟
- عهد الحقي! في ناموسة قرصتها! بتوجعك يا حوريتي؟
آه غريب! الواد ده هيشلني!
- بصي يا عهد! بتوجعها؟ بتوجعها صح؟ طب أجيبلها حاجه مِن الصيدلية؟
- أحمد متقلقش مش بتوجعها، هي الناموسة بتوعجك لما بتقرصك؟
- ضحكت: متقلقش يا حبيبي البسكوتاية النواعم مبتوجعهاش القرصة.
- تفتكري هتفضل شبهي لما تكبر ولا هتتغير وتبقى شبهك؟
- لو شبهك هتبقى محظوظه أوي.
- حضني: ولو شبهك هتبقى جميلة أوي.
- حور عيطت: عااا... عااا.
- هتجيب البامبرز؟
***
كنت داخلة أوضتي عشان أنام فلقيت أحمد نايم على السرير وواخذ حور في حضنه، تلقائيًا ابتسمت ومسكت الموبايل وصورتهم ونمت جنبهم.
في نص الليل صحيت على صوت حور بتعيط، فتحت عيني بتعب أنا مطبقة مِن يومين!
لقيت أحمد صحي وشالها وقعد يلعبها وبصلي بابتسامة.
- هقعد بيها بس عندي شرط!
- أي حاجه بس أنام!
- اتفقنا! تفطريني قبل ما أروح الشغل الصبح.
- اتفقنا.
- اشطا! حوريتي تعالي نلعب بره ونسيب ماما تنام.
***
- عايزه حاجه يا حبيبتي؟
- ابتسمت: مع السلامة، كتبت هنا الحاجات اللي أنا عيزاها لِـ حور.
- وإنتِ؟
- وأنا إيه؟
- أجيبلك إيه معايا؟
- تعالى إنتَ بس ومش عايزه حاجه تانية.
- وأنا عايز أجيبلك حاجه تانية... ها؟
- شيكولاته.
- ابتسم وسرح شوية: هي حور هتاكل حلويات امتى؟
- ابتسمت وأنا بتخيل: لسه تكبر الأول.
- خلاص يا بنوتي الكبيرة هجيبلك إنتِ حاليًا.
- بمشاكسة: حاليًا؟ يعني لما حور تكبر هتنسى عهد؟
- حور هتكبر بس عهد هتفضل صغيرة... سلامات يا سُكر.
- سلامات يا جميل.
***
عدت سنتين كمان وزي ما أحمد كان بيتمنى حور فضلت متعلقة بيه، وده مش مزعلني أبدًا بالعكس الموضوع لطيف ومرح.
- كنت نايمة وسمعت صوت ضحك حواليا فاتكلمت وأنا مغمضة: بتضحكوا على إيه؟
- حطت حور ايديها على بوق أحمد: ششش هتمثكنا بثببك!
- أحمد مسك ايديها وقال: الله إيدك حلوة أوي أنا عايز آكلها.
- ضحكت: لا يا بابا كده مث هيبقى عندي إيد! كُل إيد ماما.
- رفعت راسي وفتحت عيني بغيظ: بعتيني بسرعة!
- مث إنتِ إيدك حلوة بلدو؟
- بكاشة! يا ترى طالعة لمين؟
- لبابا.
- حبيبة قلبي!
- ضحكنا وبصيتلهم: كنتم بتضحكوا على إيه؟
- مفيش.
- مفيث.
- اممم أوكِ.
- عهد حبيبتي نامي إنتِ تعبتي النهاردة.
- بصيتله بتعجب: هاا؟
- آه يا ديدا تثبحي على حُولية. (حورية)
- بصيتلهم بتعجب: ديدا؟!
- قربوا الإتنين وباسوني على خدي: تصبحي على خير.
- تثبحي على خير.
قفلوا النور وطلعوا وأنا مش متطمنالهم! أصل دول ثنائي المصايب، قررت أشوف هيعملوا إيه وسمعت أحمد بيتكلم في الفون.
BY ديچاڤو 📒💛
Share with your friend now:
tgoop.com/Sidranovels/3111