tgoop.com/Sidranovels/3150
Last Update:
مردتش وغمضت عينيّا بتعب وهي عياطها زاد بس سكتت، كنت ماشية عادي وفي لحظة منتبهتش فيها، في عربية خبطتني.. أنا مش مصدقة إني لسة عايشة أصلا.. أنا.. أنا إزاي عايشة؟!..
......
-ممكن تليفوني؟!
$عينيكي يا بنتي و..
-بابا أرجوك، هات تليفوني
طلعه من جيبه فخدته بسرعة، بصيت على الشاشة اللي اتكسرت بس فتحته بسرعة، فتحت واتس وزي ما اتوقعت، ماسدجات كتيرة جدا من حسام ومكالمات أكتر، غمضت عينيّا، ومش عارفة ليه افتكرت كلام فرح (كلامك معاه في أي حاجة هيغضب ربنا ولو حصل نصيب يعدين واتجوزتوا صدقيني ربنا مش هيباركلكوا في حياتكوا لأنكوا بدأتوها بمعصية).. معصية؟!!..
لحظات الحادثة بدأت تهاجمني من تاني وحسيت ان جسمي متكسر أوي، وكإني لسة مخبوطة حالا، بصيت للجبس في إيدي ولرجلي المتجبسة ودموعي نزلت، بصيت للتليفون ومرة واحده عملت بلوك، متكلمتش بس عملت بلوك من كل حتة.. الواتس والتليجرام وعملتله بلوك مكالمات، وبعدين فصلت التليفون خالص وعطيته لبابا.. سندت راسي لورا وغمضت عينيا وابتسمت.. ايه الراحة الغريبة دي يجدع!..
......
(عملتيلي بلوك ليه؟)
بعتلي من رقم غريب شفته اول ما فتحت بس مردتش وعملت بلوك تاني، معتش عايزة أتكلم، مجرد إني معتش عايزة..
......
بقلمي إيمان محمود
......
*مختفية فين يا بت انتي؟! انا برن عليكي من امبارح وبعتلك على الواتس كتير ومش بتردي، قلقتيني عليكي
-مفيش يا حبيبتي، عملت حادثة كدا و..
*حادثة ايه دي بعد الشر؟!
-حادثة عربية، بس الحمد لله بقيت أحسن
*داليا أنا في الفيوم من امبارح انتي فين وانا أجيلك؟!
قلتلها على اسم المستشفى وشئ جوايا خلاني فرحانة عشان هشوفها، يمكن عشان حسيتها هي اللي هتفوقني أكتر؟!..
.......
*بدموع: انتي كويسة؟!
هزيت راسي ورميت نفسي في حضنها وعيطت، عيطت كتير أوي وهي ضمتني وطبطبت عليّا، محدش جالي من ساعة الحادثة، محدش من صحابي عرف أصلا، وعشان مردتش عليهم ولا دخلت قلتلهم محدش فكر يدور ورايا ولا يعرف عني حاجة..
-بعياط: أنا مش كويسة، أنا وحشة أوي، أنا كنت هموت، كنت هموت وأنا بكلمه، كنت هموت وأنا بكذب عليكي وبقولك اني مش بكلمه بس أنا أصلا بخرج معاه، أنا.. وحشة أوي، بقيت بكره حياتي وكل اللي بعمله بس أنا مش عارفة أصلّح حاجة، معتش عارفة أصلّح أي حاجة
*بتطبطب عليا: اشششش، اهدي وصلي على النبي.. يا بت صلي على النبي
-عليه افضل الصلاة والسلام
بعدتني ومسحت دموعي وابتسمت..
-بتعيطي ليه دلوقتي؟!، احنا كلنا بنغلط، وعن أنس بن مالك رضي الله عنه: قال رسول الله صلى الله عليه وسلم: (كل بني آدم خطاء وخير الخطائين التوابون)، احنا موجودين عشان نغلط ونتعلم من غلطنا ونتوب ونرجع لربنا يا داليا، انتي غلطتي لما كلمتيه وخرجتي معاه و و و.. بس طالما استوعبتي غلطك يبقى لازم تفوقي وترجعي لربنا، ربنا غفور رحيم، (وَهُوَ الَّذِي يَقْبَلُ التَّوْبَةَ عَنْ عِبَادِهِ وَيَعْفُو عَنِ السَّيِّئَاتِ وَيَعْلَمُ مَا تَفْعَلُونَ)، وبعدين دا انتي تحمدي ربنا انها جت على قد كدا، وان ربنا بعد الشر عليكي يعني مقبضش روحك في ساعتها، تخيلي كدا لو كنتي قابلتي ربنا وانتي بتعملي كدا؟! كنتي هتبقي عاملة ازاي؟!
عياطي زاد وهي حضنتني..
*أنا عارفة انه مش بإيدك، وان كل حاجة ضاغطة عليكي ومأثرة عليكي ومخلياكي مشوشة، بس صدقيني لو قربتي من ربنا هتلاقي كل حاجة بتتحل، ربنا مفيش أكرم منه، دا يكفي إنك تنوي إنك تتوبي بس.. دا في حد ذاته توبة، ارجعيله بقى وكفاية، كفاية بُعد ووجع قلب.. اثبَتي وارجعيله.. عشان الجنة تستاهل
هزيت راسي جامد وعياطي بيزيد، كلامها بيوجعني أوي، كنت هعمل إيه فعلا لو كنت مت؟! لو كنت مت؟!!!، كنت هعمل ايه لو قابلت ربنا كدا؟!.. كنت هعمل ايه؟!..
......
~انتي فين بقالك فترة؟! ومش بتردي عليا ليه؟!
اتخضيت من صوته العالي، بس تمالكت نفسي..
-حسام لو سمحت، ياريت معتش تبعتلي تاني وتنساني
~بعصبية: انتي بتهزري؟!
-ابتسمت: أبدا، وبتمنى إنك بجد تنساني
سبته ومشيت وهو فضل واقف مكانه مصدوم، مكانش قرار سهل بس.. الجنة تستاهل فعلا..
......
•في عريس متقدملك
-وماله، نشوفوه
•طب اجهزي على الساعة تسعة كدا، واه ابوكي هيكون موجود
هزيت راسي بماشي وقمت جهزت نفسي، طلعت من المستشفى من اربع شهور تقريبا، وعدّىٰ تلات شهور من آخر مواجهة بيني وبين حسام، حاجات كتير قدرت أظبطها، والحمد لله باقي حياتي لسة بحاول فيها، معظم صحابي بعدت عنهم، وفرح قربت منها جدا وفي الفترة اللي فاتت دي بقت أقرب ليا من نفسي، بدأت أبعد عن السوشيال ميديا أوي وبدأت أحاول أحسن من نفسي.. طبعا بمساعدة فرح، اللي بتحاول بكل جهدها تساعدني عشان أقرب من ربنا من تاني خطوة بخطوة.. وبجد.. الحادثة دي، كانت أحسن حاجة حصلتلي!..
......
بقلمي إيمان محمود
......
دخلت بالعصير واتجمدت في مكاني لما لقيت حسام، مكنتش عارفة أتحرك ولا أتكلم، بس لقيت تيتا بتشاورلي عشان أدخل، دخلت وقدمتله العصير وقعدت وشوية ولقيتهم قاموا وسابونا لوحدنا..
BY ديچاڤو 📒💛
Share with your friend now:
tgoop.com/Sidranovels/3150