tgoop.com/TillanisoEN/2422
Last Update:
QALBLAR BOR
Otam telefon qilishini
hech istamaganman.
Va telefon qilganda
doim — „sog'mi“, „ shukr“,
doim — qochib qolish.
Uyga borganda, gaplashganda,
o'tirganda — shu.
Go'yo otamning har telefon qilishi mash'um xabarday.
Otam bizga umrini berdi,
borini berdi otam.
Va rozi o'z hayotidan.
Men roziligi uchun baxtiyorman,
Ammo otam doim haq —
Qachon telefon qilsa haq,
Qachon gapirsa haq!
Otamning bu haqligi
masofalar
soldi o'rtamizga:
Qo'rquv masofalari
Qochish masofalari.
Va yolg'on masofalari.
Va mening jimligim
masofalari.
Va mening zulmim
masofalari:
Onamga va o'zimga.
Doim otamga aytolmagan gapimni
Onamga aytdim va jerkdim.
Jimligim yolg'onlarining rostlarini
Onamga aytdim va qo'rqitdim.
Yig'ladi onam —
Onam bilan
qachon gaplashsak
ko'zda yosh bo'ldi.
„Erkinlik — yolg'on gapirmaslik huquqi“.
Birinchi kurs
talaba edim.
Kursdoshlarimdan eshitdim bu so'zni.
Va hayratda edim.
Nahot dunyoda bor shunday
huquq?
Rost bo'laman dedim.
Bu onamni, singlim, atrofdagilar
Va oxir-oqibat qalbimni
qo'rqitdi.
Hamon savol beraman:
Nahot shunday huquq bor?
Onam hayotdan rozi emasdi.
Otamdan farqli —
Men uni ko'p jerkdim.
Bir kun aytdiki:
Men oddiy ayolman,
Qishloqda tug'ildim, o'sdim.
Bilmayman — yolg'on nima,
rost nima.
Onam iloha emas edi —
Oddiy bir ayol.
Keyin ilohalik
idealini yulib
otdim qalbimdan.
Va hamon onamga achinar edim.
Onam o'qishimni istagandi.
Va otam undan ham ko'p.
Onam aytardi:
O'qisang, qo'lingda
bo'lsa to'rt-besh so'm pul.
Eringni qo'liga
qolmaysan qarab.
Hech bo'lmasa ich kiyimingni
o'zing olasan.
Otam aytardiki:
Divanlarda o'tirasan, shaharda
yashaysan -
Va kazo-kazo bo'ladi
tanishlaring ham.
Boy bo'lasan va baxtli.
O'qidim
Jimligim haqqi har narsadan ko'proq sevdim o'qishni.
Va otam va onam aytgan go'zal hayot tasavvurlarin.
Lekin ota-onam aytgandek bo'lmadim.
Biroz farqli bo'ldim —
Biroz ongliroq.
Rejada bu ko'zda tutilmagandi:
Na er va qo'liga qarash,
Na kazo-kazolar ,
Va na divanlar qiziqmas
edi menga.
Ko'rsam yalang'och qalb
ko'ray dedim.
Bersam, beray dedim
qalb rostlarini.
Va baxt ham, rostlik ham
ko'ringandan
dedim boshqaga.
Yolg'on orasidan topmoq kerak, dedim uni.
Va bu jang edi.
Lekin jangchi bo'lishim
rejada ko'zda tutilmagandi.
Sevsam, sevgidan to'xtasin
damim dedim —
Ichimga tushsin,
Yonib sevsin, yonib sevay,
To'lsin ruhim va ichim.
Bahridan kechay barining bu sevgi haqqi -
Lekin rejada ko'zda tutilmagandi.
Onamning xavotiri - dunyo yomon erkakka to'la,
Ko'chaga chiqma ular bor mahal,
Uzoqqa ketma
Yovuz ruh kabi
Yovuz erkaklar bor,
Va atrif xavotiri -
G'iybatlar, pichir-pichirlar -
Ko'chaga chiqma,
Yovuz ruh kabi
Yovuz erkaklar bor.
Men chiqdim - axir menga dunyo kerak edi
Va toza havo.
Axir dunyoda
Qalblar
Hislar va
Buyuk g'oyalar bor.
Men chiqdim —
Hamon ketmoqdaman,
Hamon yo'ldaman.
Faqat otam bilmaydi —
Yolg'on shaklidagi butun
erksizliklar bor.
Men chiqdim —
Onam xavotirdan
o'lib qolishi haqida
qo'rquv yo'llaydi.
Men chiqdim —
Atrof to'la pichir-pichirlar,
shivir-shivirlar.
Men chiqdim axir
dunyoda
Qalblar
Hislar
Va buyuk g'oyalar bor.
Boshqa hech narsa—
Na Tangri, Xudo,
Na shayton, o'lim
Na qo'rquv va vaqt,
Qalblar bor!
BY Hid Gallyutsinatsiyasi
Share with your friend now:
tgoop.com/TillanisoEN/2422