tgoop.com/WastyAmmar/7069
Last Update:
قصيدة { فارگت روحك }
يا علي يمفارِگ الروح ... فاطمه من عندك تروح
..........................................................................................................................
رحيل أم الحسن يابه الحسن أصعب رزيّه
دُمُوعك غاليه وسالت دِمـــه هــاي المسيّه
ذبل واثمنطعش عمـــــر الورد هيچ المنيه
دمع عينك على خدك كتب آه يالزچيه
وما تداوي جروح بجروح ... فاطمه من عندك تروح
..........................................................................................................................
وصيه امن النبي بس بالصبر لازم تكابر
وأشد من كل كسر يا سيدي كسر الخواطر
على الزهره بهجوم أهل الحقد تبقه إنته صابر
سلامة دينك بهذا الأمر من المخاطر
أدري يخلص ليلك اتنوح ... فاطمه من عندك تروح
..........................................................................................................................
علي وشگد صعب من المحب يدفنهه روحه
ولا بلسم يصح بيده ولا طابت اجروحه
يبو النفس الأبيه والعزيزه والسَموحه
عفه گلبك بعد أم الحسن ما يگظي نوحه
يا جبل تتهدم اسفوح ... فاطمه من عندك تروح
..........................................................................................................................
تشاهدهه اليتامه يا علي ودم تدمع العين
حزينه زينبك تجري الدمع والحسن وحسين
تروح الوالده وحشه العمر والصبر لي وين
أجل هذا وشرط لازم يفرّق بين الاثنين
والأمل هالليله مذبوح ... فاطمه من عندك تروح
..........................................................................................................................
تموت ومن تشيّعهه بألم وادموعك الدم
خفاء وما تريد أهل المكر والحقد تعلم
الجروحك فاطمه چانت أمس يالغالي بلسم
منو اليسْلم بعد من هالحزن لو گلبه يسْلم
والنعش يالغالي مطروح ... فاطمه من عندك تروح
..........................................................................................................................
دفن حتى الدفن تخفي الگبر عن لا يعرفوه
مصيبه يا علي وتدري العواقب لو يكشفوه
بشر لا ذمه لا من دين عدهم لا يقدروه
ولا حرمه النبي الرحمه بقت كلهم يخونوه
يا ثره لنجومك يلوح ... فاطمه من عندك تروح
..........................................................................................................................
علي وإنته علي وبس الله يعلم معنى صبرك
أبد مو فاطمه بهذا الگبر خليته عمرك
يبو اليمه البقيه في حياتك عظّم أجرك
تودّع فاطمه وگلب الوديعه هم يعذرك
والعتاب الليله مسموح ... فاطمه من عندك تروح
..........................................................................................................................
خادم الإمام الحسين عليه السلام
عمار هليل الواسطي
BY عمار هليل الواسطي
Share with your friend now:
tgoop.com/WastyAmmar/7069