tgoop.com/WastyAmmar/7070
Last Update:
قصيدة { الوصية }
أدري بيهه ... أعرف الچف السطرهه
أدري بيهه ... أعرف الفـتنـه وأمرهه
أدري بيهه ... ولازم أختار الوصيّه
..................................................................................................................................
آني حيدر يلّي تسأل ياهو حيدر
مؤمن برب العـــرش من عالم الذر
فاجعه بفــگـــــد الزچيه وربنا قدّر
صاحــــــــت الأملاك بيهه اللهُ أكبر
خطوه خطوه ... عالأثر كل خطوه دمعه
خطوه خطوه ... ليلي وحشه بغير شمعه
خطوه خطوه ... والگمر مدفون ضيّه
..................................................................................................................................
بهالمصيبه فــاطـمــه كـتــمـت حزنـهه
لخاطر عيوني شفتهه تخفــي ونّهـه
بت نبي الرحمه وسـگـط منـهه إبنهـه
والدفع بابـــي كـسـر ضلعيــن منهــه
بالوصيه ... ملتزم هذا قراري
بالوصيه ... بالغمد يبقه فُقاري
بالوصيه ... اتحدِدَت هاي الرزيه
..................................................................................................................................
فاطمه إتغيّـر وضعها وزاد حـزني
چنت أشاهدهه تون وبروحي ونّي
گامت تصلي الزچيه بظهــر محني
لونها المخطوف ماخذ حيلي منّي
شاهدتها ... ابيا علي توگف تصـلّي
شاهدتها ... بيهه حسره وما تگلّي
شاهدتها ... خايفه الزهره عليّه
..................................................................................................................................
والله لوما هالـوصـيّــه الدنيــه تـنــدار
ياهو يوصل فاطمه ويهجم على الدار
لو زعل فقّـاري يــهــوه إرگـاب الأشرار
كل مياديني شهودي وماكو أسرار
آني حيدر ... ما زعل ميــداني لحظه
آني حيدر ... والنصر سيفي يفرضه
آني حيدر ... أبو الصوله الحيدريه
..................................................................................................................................
وصّـت الزهره بوصـيتها وبالأسـباب
ما تشيّـعــهه العصابه الدفعـت الباب
بس أهلهه والخواص بربعي الأطياب
هيچ ناخــذ فاطـــمـه نواريـهــه التراب
هالوديـعه ... يشتكي باچر ضلعهه
هالوديعه ... امن السطـرهه والدفعهه
هالوديعه ... تشتكي الرب البريّه
..................................................................................................................................
ينكسر بالفجـعـه گلبي ودمعي لو صَبْ
لأن تنـشدني اعله أُمهه الليله زينب
دمعي يجري روحي ذابت گلبي يلهب
آني أدري باليتم عالطـفــلــه يصعب
أدري زينب ... يـبتدي الليله هضـمهه
أدري زينب ... من تودع الزهره أُمهه
أدري زينب ... إلهه بالحسره بقيه
..................................................................................................................................
من أشـيّــع فاطـمــه يسبقني دمعي
هذا نعش الغالــيـــــه خل يطفه شمعي
شيّعتهه الليله بس إيدي اعله ضلعي
مو جميل الصبر وآني الصبر طبعي
كل حياتي ... رايح أدفن كل حياتي
كل حياتي ... سنين عمري وذكرياتي
كل حياتي ... هيّه روحي وعمري هيّه
..................................................................................................................................
خادم الحسين عليه السلام
عمار هليل الواسطي
BY عمار هليل الواسطي
Share with your friend now:
tgoop.com/WastyAmmar/7070