tgoop.com/Wounds_AshuraOne/25680
Last Update:
°❀•✵🍃🕊🍃°❀•✵
ـ🔹🔹 ﷽
(اللهم صل علئ محمد وآل محمد وعجل فرجهم )
#قصيده مفجعه لليوم للعاشر من محرم
زيد النوح ياگلبي زيد النوح
شفته مذبوح حبيبك شفته مذبوح
وخيل داست عالصدر
وهوس براسه الشمر
شفته مذبوح.... شفته مذبوح
ـــــــــــــــــــــــــــــــــــــــــــــــــــــ
زيد النوح وبعد لــــــــتبطل الآه
ولطم وصيح حسينا واحسيناه
ونادي ياشمر الضلالي اعليك بالله
گبل لاتذبح أخوي أذبحني وياه
عايشه المن شنتظر.. وراح الاغله من العمر
شفته مذبوح... شفته مذبوح
ـــــــــــــــــــــــــــــــــــــــــــــــــــــ
عايشه المن والاخو گدامي ذبحوه
وعشر خياله طبگ ميدان سووه
سمعت حتى عضامه طگت لون داسو
شنهي گلبي بعد يصير، شويه رحموه
منين أجيبنه الصبر.. وأبو اليمه بهل الظهر
شفته مذبوح.. شفته مذبوح
ـــــــــــــــــــــــــــــــــــــــــــــــــــــ
حگه گلبي بهل الضهيره يصيح متعوب
لان صبره تــــــــعده حته صبر أيوب
لو صخر شاف الي شفته بونته يذوب
شنهو من عدوان ابد ماعدهم أكلوب
بصدره ماخلو شبر... سالم ومابي گسر
شفته مذبوح.. شفته مذبوح
ـــــــــــــــــــــــــــــــــــــــــــــــــــــ
فوگ الجروح والف وكسور بيهن
ماكفاهم خيلهم داست عليهن
صدره ملعب صار، ويلي بين اديهن
وانه شوف عيوني مابطل بچيهن
دموعي تنزل كالجمر... عالوجه من كل كتر
شفته مذبوح.. شفته مذبوح
ـــــــــــــــــــــــــــــــــــــــــــــــــــــ
حسين وصاني الدمع متشوفه الاجناب
لاچن الشفته يخلي الگلب عــــــطاب
هوس براسه الشمر معروفه الاسباب
حته يقهر، گلب زينب ام المصاب
يريد بس كون انقهر... ويشمت بأم الخدر
شفته مذبوح... شفته مذبوح
ـــــــــــــــــــــــــــــــــــــــــــــــــــــ
🖇تـمــت بتـــوفيــــق الله
🖊بـٲنامــل شاعرة ٲهـــل البيت عليهم السلام
زهـــراء الحــــربي
وغير مبري الذمه ٲمام الله واهل بيت محمد((ع)) من يحذف الاسم وينشرها ٲوينسب القصيده لــنفسه 🚫
💬ونسال الله التوفيق والقبول
وٲسالكم الدعاء👆
https://www.tgoop.com/Wounds_AshuraOne
BY جروح عاشوراء
Share with your friend now:
tgoop.com/Wounds_AshuraOne/25680