داير اي زول في قناتي يتبرع ولو في زول ماعندو يكلمني انا بتبرع عنو

#موضوع_للنقاش

لاقوني شباب كتيرين بقولو الزمن دا الواحد مابيلقى بت ناس محترمة واخلاقة كويس عشان يعرسة وبجد استغربت من كلامهم دا
انتو يا شباب رايكم شنو؟
وانتن يا شابات رايكن شنو في الكلام دا ورايكن في شباب الزمن دا ذاتو شنو؟

وخلو تعليقي ع الموضوع يكون مشاركة زي مشاركاتكم

رسلو لي مشاركاتكم هنا
@nazaroh

ماتتبرع انت براك خلي الاسرة تتبرع معاك

#القومة_للسودان 🇸🇩
#زول_بشخبط
نزار عثمان هاشم

في انتظارك مشاركاتكم

#مشاركةمن
Rboo Oof ♡

التعميم م حلو زي م بقولو اصابع اليد م وحده أكييد لسه ف ناس كويسة و اخلاقها عالية ...بس اهم حاجه علشان تحكم ع زول م تاخد ب شكليات م مجدية ... بس لسسه ف بنات و اولاد كويسييييين شديد و خلوقين ... اما بالنسبه ل رأي ف الأولاد و الله شباب صابر اي نعم ف فئة بتعانيي من طيش و تخبطت بس مقتنعه انه جواهم حاجات كويسة و طاقه جبارة ..

نقفل باب المشاركة ولا في زول حابي يشارك

#مشاركةمن
#زول_بشخبط
انا بفتكر انو اي شاب بقول كدة هو في نفسو ما كويس وليهو علاقات مشبوها عشان كدة بيفتكر انو كل البنات كدة ورغم صعوبة الزمن ورغم بعد الناس عن الدين ورغم الاختلاط الحاصل بين الاولاد والبنات والصحوبية بيناتهم ورغم انتشار الفاحشة باسم الحب برضو في بنات اسر محترمة بتخاف ربها وحافظ نفسها ومنتظرة البدق الباب عشان يفوز بقلبها ويبقي زوجها بالحلال.
في كل زمان في الكويس وفي الكعب حتى في زمن الرسول ﷺ وسلم عشان كدة الناس ما تعاين للبنات الكعبة وتحكم بكدة بانو كل البنات كعبات

ما أتعسنا دون رفقة أُنثى ، حبيبةً كانت او زوجة. وما أسعدنا بصحبتها حبيبةً كانت او زوجة.
قاتل الله الوحدة والكورونا😔

نزار عثمان هاشم
#زول_بشخبط

#مافي_القسمة_يا_العزابه


#رمية

انا الاحترت فوق القسمة
المن بيت الحلال حرمتني
كل ما مشيت لي بت
فيها القسمة ما ادتني
فيهن البتقول مرتبطة
وفيهن العديل رفضتني
كمان والعجيبة الاغرب
بالحبيته ماجمعتني
لا قدرت اسوقة لي للدايرة
لا في الدايراها لي رمتني
اه من عمايل القسمة لو ما كنت مؤمن
وثابت من الملة كان مرقتني

ـ ـ ـ ـ ـ ـ ـ ـ ـ ـ ـ ـ ـ

#القصيدة

مافي القسمة يا العزابه
غزت فينا تب نشابه
ان حبينا نحن نعرس
ترفض هي لينا وتابه

ـ ـ ـ ـ ـ ـ ـ ـ ـ ـ ـ ـ ـ

درانهن كتار ما ادتنا
وكتير ماطرقنا ابوابه
درنا التبقى لينا الزوجة
ودرنا اليبقو لينا نسابه
صحيح القسمة ما بالايد
لاااا بي جيبه قانون غابه
ومهما حاولنا ليهو وصاله
فشل المسعى لينا وخابه

ـ ـ ـ ـ ـ ـ ـ ـ ـ ـ ـ ـ ـ

درناها الصغيرة وجاهلة
الناشئة وقايمة يادابة
ودرنا البتدرس وتقرأ
علي احضانا ماسكة كتابه
ودرنا المطلقة برضو
الزوجها هجرا وسابة
رفضت تب عديل تدينا
مهما عملنا بي اسبابه


اتمنينا نتم نص دينا
ونسمع ليها قولة يابا
نبصر نحن فوق الري
نمشي عليهو نلقى سرابا
عرفين القسم مقسومة
وقالو القسمة ياخ غلابة
رضيانين هي بس لو ترضى
إلا اللتنا ما ترضابا
ـ ـ ـ ـ ـ ـ ـ ـ ـ ـ ـ ـ ـ

ياخي الزوجة هي سكنا
من دونا نفوسنا خرابه
بتأنس ارواحنا بروحه
وتعود الروح لعهد شبابه
وفي عز الهجير والكتمة
تبقى ليك نِسيمةً هابه
كيفن نحن عاد دا نضوقو
ومحسوبين من العزابة!؟

ـ ـ ـ ـ ـ ـ ـ ـ ـ ـ ـ ـ ـ

دايما الاستخارة هي حاضرة
في كل خطوة نمشي ترابة
والدعوات دوام مرفوعة
في الصلوات ووقت إجابه
راضين بالتجيبو اقدارنا
لو كان الاختيار ما صابه
الاحلامو أحجاراً كريمة وجواهر
كيفن يرضى بالدرابة؟

ـ ـ ـ ـ ـ ـ ـ ـ ـ ـ ـ ـ ـ

✍نزار عثمان هاشم
#زول_بشخبط

يا بخت الناس العندها زول وسهرانة معاهو
وا تعاسة الزول الماعندو زول
وسهران هو براهو

#زول_بشخبط

قاتل الله الوحدة وقاتل الله الذي لديه كمية من الحبيبات ولم يبقِي لنا حبيبة نحبها وتحبنا 😂

طول يا ليل على كل مساهر ويامشاغل اشغليه حتى لا ينوم بالنهار 🤪

صباح الخير على كل معذبــ/ ـة ووحيد/ة وسنقلــ/ ــة ومجروحــ/ ــة ومتألمــ /ــة ، اما من هم ليس من هؤلاء لا تحية صباحية لهم مني.

#زول_بشخبط