نعي لفراق الأهل عند قدوم العيد

دار اهلي الگبل چنت اعتنيها
التضوي والفرح لايگ عليها
مشت عنها البدور التضويها
انا بياحال اروحن وأمر بيها
★★★★★
اجاني العيد ياداري الزهيه
گبل. واليوم مهظومه وخليه
انوح الصبح وانحب كل مسيه
على الماتصح منهم بعد جيه
★★★★★
ريت اصغار بيها ماكبرنه
دار البيها. گضينه عمرنه
اهلها مابعد واحد يمرنه
انكسرنه. ولادوه اليجبر كسرنه
★★★★★
يادار النطبها وندگ ياباب
عنها گوطروا للدوم الاحباب
مافاد النحيب ودمع سچاب
اهلها حيف صاروا تحت التراب
★★★★★
يدار البخت وعليها ولمنه
ابونه مابعد بيها ولمنه
يفطر الصخر ويكسره ولمنه
على احباب الصفوا تحت الوطيه

الشاعر حسن لعيبي الحريشاوي

دار اهلي الگبل چنت اعتنيها
سيد عماد الحسيني
الشاعر حسن لعيبي الحريشاوي

لفاني العيد  (نعي )

لفه عيدك يگلبي منيلَّك  عيد
على حملي يحط الوكت ويزيد
أخذ كلشي من أديه وفرغت الأيد
بالناس التهمني غَرِّب  ابعيد
★★★★★
بيه ايلوم اجاني المادره إصار
الچفه ابماي وانا أچفوفي بالنار
يصبرني ويگلي ليش تحتار
بيها الريح تصفر ضلت الدار
★★★★★
اجاني العيد وانا  السهم بچلاي
يموصاحب عليمن معتني وجاي
بهيمه اووشلت من جربتي  الماي
يلماخذ هلي  اشخليت من راي
★★★★★
اجاني العيد وانا ابحال متعوب
من كل صوب عشر اسهام مصيوب
چني للدهر ثارات مطلوب
من العدليين مدري شلون محسوب
★★★★★
بيكم لويرد الوكت يومين
بشوفتكم اريدن تنملي العين
بلياكم اليوم إعدال سنتين
غريب اخلافكم والحال موزين
★★★★★
ادعي لاتمر ياعيد مريت
ولاشفتك ولابالدار مريت
حنظل  باللسان  وبعد  مريت
أعايدمن   هلي تحت الوطيه

الشاعر حسن لعيبي الحريشاوي

مواويل وابوذيات بطاقات للعيد

تحيه من الگلب تحمل معاني
اخصك بافضل وأجمل تهاني
سعيد ويوم تحقيق الاماني
بنعيم وخير كون ورفاهيه

جميل العيد بس  ايصير أجمل
بوجودك ياصديقي  وبعد يكمل
ارسلت اول.   تحيه  الك. وأول
تهاني العيد   يلغالي عليه

اخط واكتب الك اجمل عباره
اسمك  نور  يحتل. الصداره
سعيده ايامك وعيدك أبشاره
بمسره ادعيلك ودنيا. زهيه

وحگ الرحمته سبقت وعيده
يشرفني كلام ارسل. وعيده
واگول العيد هو انته وعيده
بوجودك ينحسب عيدين إليه

نسولف عن كرم شخصك وجودك
يسگاي الوفه  بچفك  وجودك
العيد أجمل تعطر من وجودك
تهانينا   يابو الذات الوفيه

عيد مبارك عليك وعلينه
بذكرك بلقمم   صرنه وعلينه
وحگ ربنا ومحمدنه وعلينه
ندعي بخير الك صبح ومسيه

الشاعر حسن لعيبي الحريشاوي

*ان سبقتموني فانتم الكرام و ان سبقتكم فتعلمت منكم الاحترام*✋🏻
*تقبل الله طاعاتکم*
☘️💕☘️💕☘️💕☘️💕☘️💕☘️ *عیدڪـــم مبــــارڪ*💕☘️ *ایامڪـم سعیده*
☘️💕☘️💕☘️💕☘️💕☘️💕☘️
☘️💕 *ڪـــل عـــام وانتــم بخیر*

*نرفـــــع اسمـــــــی آیات التــــــــــهــانی*
*والتــــــبریڪـات بمناسبة*
عيد الفطر المبارك اعاده الله علينا وعلى جميع المؤمنين و المؤمنات
بقبول الاعمال
والصحة والعافية
💕🍃💕🍃💕🍃💕🍃💕🍃💕🍃💕🍃💕🍃💕🍃

مناجاة  (وزن شيعتي )

كلشي دل  أعليك يانور البصر
يلي باقي وكلشي زايل بالدهر
عن كمالك يعجز لسان البشر
يا الهي ياعظيم
★★★★★
الي خلق هلكون كله   ماتعب واحتاج خبره
ومستعان بواحد أصلا  ماطلب فديوم فكره
ايثبت ويمحي بحكمته الي يقدمه واليأخره
ماترك هاي الكواكب  بكيف تمشي بهلمجره

الوين ماتحويك      ونگول بمكان
ولامتى وساعات     ياقبل الزمان
بالعقل موجود ميشوفك نظر
عن كمالك  يعجز لسان البشر
ياالهي ياعظيم
★★★★★
لواوصفك يا الهي         قارنيتك واليقارن
يعني موجود الي مثلك حاشا غيرك وين ساكن
يعني اجزءك واليجزءك   بالجهل اصبح يراهن
واليجهلك شكل حدد   قصده تحويك الاماكن

احتار من حدد وجودك والصفات
واليخوض ابذاتك  أبحيره يبات
يلي نورك نور في نور انتشر
عن كمالك يعجز لسان البشر
يا الهي يا عظيم
★★★★★
قدرتك ماإلها كل حد     بقدرتك معتصم عقلي
لوگلت اگدر احدد    بالوهم چن مثل قبلي
فارغه چفوف البرية  غير چفك ياهي تملي
يارحيم وجود كلك    ارحم المسكين مثلي

لاولد عندك        ولاعندك شريك 
حجة المخلوق   الك ويدل عليك
الماسعالك ضاع بالدنيا وخسر
عن كمالك يعجز لسان البشر
ياالهي ياعظيم
★★★★★
الماعرف قدرك يجادل   بهلأمر محدود عقله
هذا يعبد نهر جاري      وذاك يعبد حجر قبله
وذاك يمدح بالطبيعه     من هوانه وكثر جهله
عانداك الي خلقته    العاندك من عدم أصله

ياعظيم الشان  يارب السماء
مفرداتك  جسدتها الانبياء
ارد اگولن بالكلام المختصر
عن كمالك يعجز لسان البشر
ياالهي ياعظيم
★★★★★
وين ياصدفه التخلي  هلمقادير الغريبه
وشوكت رسمت الصدفه  هلمجرات العجيبه
الكون چان انحسم أمره والعدم اصبح نصيبه
الكون اذا مابيه مدبر   النهاية شگد قريبه

ياطبيعه الخلقت وسوت  أمان
ومنهو انطاها العوامل والزمان
مات كلمن ماعرف بيك وشعر
عن كمالك يعجز لسان البشر
ياالهي ياعظيم

الشاعر حسن لعيبي الحريشاوي

لذكرى تهديم قبور ال البيت في البقيع. كربلائي ٣ دگات

بارض البقيع شلون.    مهدومه الگبور
بيها الحسب والدين  والرحمه والنور

قاصد مقام الخير. چم ناصبي العال
اصروح المجد والدين سواهن ارمال
بيك انفجعنه.    اهواي ياشهر شوال
لاصرت لاهليت.      من بين الشهور

علشمس شالوا غيظ من ولدت انجوم
من عادت الغربان.      ماجازت اتحوم
گبر الحسن ياصوچ من ساسه مهدوم
والله حقد دساس.    ماظمته اصدور

الماچانوا بعاشور.       قصدوا مقامه
من عرفوا السجاد.        نور وكرامه
ونهج الصحيفه انوار. خير وسلامه
ردت افعال وخوف. من شهر عاشور

من دروا للكرار.         هاي المعالم
والهم نزل جبريل. بالدنيا خادم
وباقر علوم الدين من نسل هاشم
ساووها وي الگاع   رايات البدور

صادق العتره بزود.       حير امرهم
بفكره وعقيده وراي.   زلزل فكرهم
لهذا السبب يردون.  يمحون أثرهم
لامن صرح ينشاف.    لاواحد ايزور

چم أثر لهل البيت.   ميظل قصدهم
خاب القصد. للدوم.   عالي مجدهم
من أهل السقيفه اطباع موجوده عدهم
ريت بعذاب ونار.      لاذنب مغفور

الشاعر حسن لعيبي الحربشاوي

لذكرى تهديم قبور البقيع( ملمع )

(بأَيَّ ذَنْبٍ هُدَّمَتْ     قبور آل المصطفى)
★★★★★
شكوه توجع وتجرح  ضل ينطق لسان الحال
گبور آل النبي ضلت  من بعد المعالي أرمال
جريمه هزت الدنيا  بثامن من شهر  شوال
من فتوه وهابيه   مشاهد  للفخز تنزال

(ويلاه ماهذاالخبر  إلى متى هذا الجفا؟)
(بأَيَّ ذَنْبٍ هُدَّمَتْ    قبور آل المصطفى ؟ )
★★★★★
تبرير الهدم من چان  عن فتوى وهابيه
تطبيق الشرع والدين لواحقاد بدريه
ماخافي القصد معروف نزعة شر عدائيه
عن غيره وحسد معلوم  عن حقد وكراهيه

(اما كفى مافعلوا   كم اجرموا  اما كفى ؟)
(بأَيَّ ذَنْبٍ هُدَّمَتْ   قبور آل المصطفى ؟ )
★★★★★
گالوا من تعنه ايزور  اشرك والحصيله النار
الزيارة  للگبر  بدعه   منعوا أي  گبر ينزار
نيَّه امبَطَّنَه بالشر وبيها من الحقد إعصار
المقصد نبتعد رادوا   عن آل النبي المختار

(لوكان هذا حاصلاً   آه على الدنيا العفا)
(بأَيَّ ذَنْبٍ هُدَّمَتْ   قبور آل المصطفى )
★★★★★
جدد حزنك بهليوم  ونوح على الجره وأنحب
مناير هدموها اتعود  للهادي النبي وللرب
رادوا فرصه تخدمهم بهلفعله أو وكت أنسب
لأن ابهاذي فعلتهم  لبليس أصبحوا أقرب

(لم يحفظوا عهد النبي   اين العهود والوفا ؟)
(بأي ذنب هدمت   قبور آل المصطفى )
★★★★★
زمره لا أدب واخلاق  من يامِلَّه معدنها
معدنها خيانه وشر  وكل جور الخلگ منها
مو إلها الوفه والطيب  بس طبع الغدر إلها
آخرها  بفعل  غدار     يتمثل  بأولها

(دين الهدى من جهلهم  أمسى ينادي الأسفا)
(بأي ذنب هدمت    قبور آل المصطفى )

الشاعر حسن لعيبي الحريشاوي

لذكرى هدم قبور البقيع

حال البقيع. شگد يعذبنا
مبنيه ترجع. هذا مطلبنا
★★★★★
گلوب الجميع بكل مشاعرها
حال البقيع گلوب. كاسرها
گبور البقيع نريد حاضرها
فوگ الأرض تعله منايرها
هيئاتنا  تنادي ومواكبنا
مبنيه ترجع هذا مطلبنا
★★★★★
زكاها ربنا ابيوتهم  نعمه
ينذكر بيها وينرفع أسمه
همه الانوار ابحالك الظلمه
همه الوسيله ومنبع الحكمه
لگبور مهدومه شكثر حبنا
مبنيه ترجع هذا مطلبنا
★★★★★
اخطر فتاوي كتبت الزمره
موعن درايه ومعرفه وقدره
بس عن حقد ماينوصف ذكره
تنهدم كون أگبور للعتره
يملي علينا اليوم واجبنا
مبنيه ترجع هذا مطلبنا
★★★★★
گبور المجد ياحيف مهدومه
بحجة بدع واقوال مزعومه
أرض البقيع اليوم ملچومه
گبور الاطهار شكثر مظلومه
بخالص النيه ندعي من ربنا
مبنيه ترجع  هذا مطلبنا
★★★★★
گبور ومناير مجد مبنيه
هدمتها غربان الوهابيه
بشوال لمن عقدوا النيه
بأفكار كلها لابن تيميه
بهدم المناير. يوم حاربنا
مبنيه ترجع هذا مطلبنا

الشاعر حسن لعيبي الحريشاوي

قصيدة بمناسبة هدم قبور أئمة البقيع عليهم السلام

چم گبه وضريح ومدخل وباب
هدموهن حسافه وصارن اتراب
من صارن سويه.  دوارس علوطيه
هدموهن حسافه وصارن اتراب

****
(ياعام الهدم ) ياشر الاعوام.
ماصاير گبل هذا بالاسلام
احكام استنبطوها منين الاحكام
تفتي بالهدم  وتزيد الآثام
لفووها بكل رديه. اگبوراهل الحميه
هدموهن حسافه وصارن اتراب

*
استفهام السؤال أيظل للأجيال
شنهو الغايه من كل هاي الأفعال
مناير علارض. ياحيف. تنزال
جريمه  المامثلها ابشهر شوال
مقاصد جاهليه. بمناير طالبيه
هدموهن حسافه وصارن اتراب

****
نهار الدنيا يتبع ليل محزون
حزن عم الارض بيه اظلم الكون
بعد سم الاطهار ابيش يفتون
تبعوا كل وصي بالگبر مدفون
مناير هاشميه  تخص ولد الزچيه
هدموهن حسافه وصارن اتراب

**
معلومه النوايا وأمر مكشوف
ومفهومه الدوافع قصد معروف
كل فتره وزمن تنعاد الطفوف
هاي سيوف تشبه ذيچ السيوف
بمعالم احمديه  مجد فوگ الثريه
هدموهن حسافه وصارن اتراب

****
يبوصالح تون مولاي معذور
لكسر ظلع الزجيه وراس مطبور
وچبدمسموم ذاب وراس منحور
وتصد بأرض البقيع انهدمت أگبور
لهل خير البريه. المنايرهم زهيه
ه‍دموهن حسافه وصارن اتراب

الشاعر حسن لعيبي الحريشاوي

لفاجعة البقيع (قصيدة فصحى )

قد خاب منهم كل جبار عنيد
نحو البقيع قاصدا شرا يريد
عقارب الجحور
قد هدموا القبور
قد خاب منهم كل جبار عنيد
★★★★★
قد هدموا البقيع بحادث مريع
بموقف غاشم
بموقف شنيع. قد حطموا الربيع
وثغره الباسم
تكالب الجميع كأنما قطيع.
مافيهموا نادم
شكواي للسميع و عبده المطيع
لسيدي القائم

مولاي مايجري وماذا يفعلون
لخيركم باي شر قادمون
ياسيدي الصبور
قد هدموا القبور
قد خاب منهم كل جبار عنيد
★★★★★
ياساحل الامان ياصاحب الزمان
ياصولة الباري
العابث المهان يحطم الجنان.
بايما ثاري
خاتمة الامان ان يعبث الجبان
بكوثر جاري
ليزرع الهوان ويكسب الرهان.
بالغدر والعار

فانهم للحق في شك مريب
والخير منهم ليس بالقريب
بذلك الغرور
قد هدموا القبور
قد خاب منهم كل جبار عنيد
★★★★★
للناروالحديد كانهم عبيد
في شر اعدادي
امامهم يزيد يفتي كمايريد
فأي اوغاد
الارض لاتميد لانك العميد
وربوة الوادي
منارها الجديد وحلّها الوحيد
يامهجة الهادي

قد قتلوا الحسين في طف جديد
وادخلوا السرور في قلب يزيد
في غاية السرور
قد هدموا القبور
قد خاب منهم كل جبار عنيد
★★★★★
في غاية الغرور في غاية السرور
بفتنة كبرى
قد هدمو القبور وكرروا الشرور.
في مرة أخرى
كأنما النشور تحطم الصدور.
اه لها ذكرى
الحق أن تثور ياسيد العصور
ونسمع البشرى

لابد يوما تصبح البقيع
جنان خلد حفها الربيع
فكيدهم يبور قد هدموا القبور
قد خاب منهم كل جبار عنيد

الشاعر حسن لعيبي الحريشاوي

لذكرى هدم قبور أئمة البقيع  (فايزي جناس )

لرض البقيع بهلوكت. روحي أملها
توصل أگبور امهدمه مظلومه اهلها
★★★★★
أبهدم الگبور الناصبي افراحه وعيده
الماخاف من رب السمه ساعة وعيده
مطلب اظل طول الوكت اذكر وعيده
گبور ومناير تنبني  عالي محلها
★★★★★
شافونه بصروح المجد. احنه علينه
وبعد الحبيب المصطفى نتبع علينه
حقدوا ابكل معنى الحقد حقدوا علينه
وي الناصبي هلمشكله ياهو اليحلها
★★★★★
ياربي انطيه الصبر  گلبي وعينه
وجهي ذبل من الدمع جفنه وعينه
لهذا المصاب من الصغر احنه وعينه
فعلة اهل جور وغدر ماكو مثلها
★★★★★
مهدود من كثر الحزن  مهدينه حيله
من كل خبيث وناصبي والطبعه حيله
هذا الأمر ياسيدي. للباري  حيله
والصعبه باچر سيدي ماغيرك إلها
★★★★★
شماخانت الدنيا ولا توفي وعدها
اسنين صابر وانتظر واحسب وعدها
حمله الامام المنتظر  حَظَّر وعدها
يبني البقيع بدولته وينشر عدلها

الشاعر حسن لعيبي الحريشاوي

بمناسبة هدم قبور أئمة
البقيع عليهم السلام

شوف البقيع وانظر ابحسره
موحش أثرها اگبور للعتره
★★★★★
ابفتوه سوده للعقول الناصبيه
شرك گالوها گبور اهل الحميه
والزياره افعال اهل الجاهليه
وجب تتهدم دوارس علوطيه
غايات عدهم چانت وفكره
موحش أثرها اگبور للعتره
★★★★★
أگبور چانت اربعه بين المگابر
اضرحه نور وتزينها. المناير
بيها گبر الحسن والساجد الذاكر
والإمام الصادق  وسيدي الباقر
مهجوره بين الوحشه والغبره
موحش أثرها اگبور للعتره
★★★★★
اهناه فجيعه صارت ومرت مصيبه
ابراي مامقبول من وادم عجيبه
بلهظم مكه الشريفه وأرض طيبه
صاحب الطلعه الرشيده شگد نحيبه
نار النوايب تلهب ابصدره
موحش أثرها اگبور للعتره
★★★★★
أثمانيه ابشوال ياعظم الفجيعه
هدوا أكبور المجد أهل الخديعة
ضاگت بعين المحبين. الوسيعه
وشعظم بلواك ياحامي الشريعه
ونك يهد الجبل.  ويفطره
موحش أثرها اگبور للعتره
★★★★★
اگبور مهجوره صفت بأرض المدينه
صاحب الطلعه الرشيده اتگول وينه
بالفرج ندعي يهل وجهك.  علينه
شيعتك مسها الهظم مثلك حزينه
وجهك يهل اعليها تنتظره
موحش أثرها اگبور للعتره

ألشاعر حسن لعيبي الحريشاوي

بصوت. مسلم المطيري

لرض البقيع بهالوكت روحي أملها


كلمات الشاعر
حسن لعيبي الحريشاوي

على وزن قصيدة حمزه الصغير باليسرزينب علحرم ظلها    حول ذكرى تهديم قبور البقيع.   (گعديه )

مهدومه الگبور.    وإلي هدمها
أحقاد الأيام.        بلگلب ظمها
برض البقيع چم گبر.  عالي المنارة
صارن سويه. وي الوطيه

دوم متوارث فعلها هلافكار الناصبيه
باب بالإسلام فتحوا تطب منه الجاهليه
دسوا أقوال الضعيفه. بلاسند بين البريه
اتوارثوها اچم درس
شر الطبايع تنغرس
خير الگبور التندرس  تنفرش فوگ الوطيه
من هاي الأفعال.  حيدر قصدهم
ابسيفه للنار.       من وده جدهم
كل گبر عالي تنمحي گالوا آثاره
صارن سويه. وي  الوطيه

افتى شيخ الكفر عدهم للهدم چم فتوى قدم
أخذ من ابليس شورى. وكلشي من عنده تعلم
امنيات الشر وكتها.    اجه  وماللباري. مهتم
معروف نهج الناصبي
ضد الحسيني الطالبي
كل گبرخص آل النبي       عمل صالح لوتهدم
وبهاي الأفعال.  حقق مرامه
يتصور يطيح.  ركن الامامه
يتصور أنوار الوصي.  ذابت أنواره
صارن سويه.  وي الوطنيه

حته لامخلوق يسئل هاي المن هلمعالم
البيها انوار الامامه. كل فقيه وتقي وعالم
اغصان من شجرة محمد لهلنسب جبريل خادم
غير الخيانه ماعرف
يمشي على نهج السلف
ماكظته بيوم الاسف  من فعل فعلته الظالم
هدم هلگبور. سواهن اتراب
ماحاجه.للوم   معروفه الاسباب
جدران مرفوعه وذهب خط الزياره
صارن سويه. وي الوطيه


گلوب ماتعرف الرحمه لفت من صوب الظلاله
وصفت معلومه النوايا   بدون برهان ودلاله
لازم بليس وزمرته.    ايحارب انوار الرساله
حاربوا ياما فاطمه.
وحاربوا حماي الحمه
الحارب انوار السمه. . حارب الباري تعالى
للعتره الاطهار.   شدوا حربهم
والسبب معروف.  مو من حزبهم
عدهم تعاليم النبي قصد العباره
صارن سويه. وي الوطيه


باچر الموعود يبني. صرح لأنوار المعالي
لكل وصي يبنيله گبه وينشرح گلب الموالي
هيه ايام وتعدي.      وتعبر وياها الليالي
الموعود باچر دولته
ايثبت الدين وهيبته
الاسلام يرفع هامته . بعزم أهله يرد عالي
يرفع الموعود. للنصر رايه
وللباطل بزود يكتب نهايه
الخلوا معالم طاهره  بحسره ومراره
صارن سويه. وي الوطيه

الشاعر حسن لعيبي الحربشاوي

❉❉❉❉❉❉❉﷽❉❉❉❉❉❉❉
لسـتة #دعم_مؤسسة_منبريون_الحسينية🌻.
#التثبــيت_سـاعـه
#الحــــــــــذف
بـعـــد نشر اللسـتـةّ بـ4  سـا؏ـات
� غَـير مبري الـذمـةّ ٲمـام الله ڪـل من يـحذف البــوت دون ؏ـلمنا
استقبل 1000 عضو فما فوق
━━━━━━━━━━━━━━━
للإشـــتِـراك 👇🏻.

التواصل مع @ahmed_alziwar0

قناة خاصة بتلحين القصائد

https://www.tgoop.com/+PZwpTt2HLXcvUQZh

------------------------------------------------------