زينب تخاطب أخيها الحسين عليه السلام  حينما يقي  وحيدا بين الاعداء

تنادي يخويه ومالك انصار
طاحوا على الغبره صغار وكبار
اجيب منين يحظر علي الكرار
                يعاين حالتك ويطشر اعداك
يخويه امحزمه الوادم اگبالك
ولاعلبال هيج يصير حالك
ولايجري عليك الي جرالك
                 اهل ومذبحه ولاواحد وياك
لاظل ابن اخوك ولا اوليدك
ولاعباس ابوالكلفه عضيدك
گوم واجت طلابه  تريدك
                        تفارگهم ذبح ناوين ملگاك
يبن حامي الحميه ضعف حيلك
جبيلك صلف مايرحم جبيلك
يخويه لوطحت ياهو اليشيلك
                  وطاح على الشريعه حامل لواك
الف هادود خويه التموا عليك
بلسيوف الباشطه كلها اعتنت ليك
شلون اطلع يخويه وبيش احاميك
                 تلگاني السهم ريت التلكاك

الشاعر حسن لعيبي الحريشاوي

نعي 1
بصوت سيد عماد الحسيني
الشاعر حسن لعيبي الحريشاوي

نعي 2
بصوت سيد عماد الحسيني
الشاعر حسن لعيبي الحريشاوي

كل گطرة دم بشرياني ( عگيلي )

كل گطرة دم بشرياني
وكل ذره شوگ ابوجداني
بيها ومنها ومنسوب الها
وحدك يحسين الشاغلها
گل گطرة دم ابشرياني

شمعناه گلب المايوفيلك
وروح المتنوح وتنعيلك
ولاعين تهل وتبچيلك
ولجدام اتهم وتمشيلك
وانته الخير وانته النعمه
حبك ساكن يابواليمه
كل گطرة دم ابشرياني

يابواليمه اتريد الوادم
ماتنذل ابسيف الظالم
والظالم مايصبح حاكم
رايد عمري لجلك خادم
هاي منيتي وغاية عمري
لمصابك  تنزف لوتجري
كل گطرة دم ابشرياني

لوما دمك يابواليمه
الوادم چا ردت للظلمه
وللاصنام أتعود الأمه
لاناموس ودين. ورحمه
يبن الزهره ومهجة حيدر
حبك ساكن حد المحشر
كل گطرة دم ابشرياني

كل هاي الناس المجموعه
ورايات الطلعت مرفوعه
مولجل الدين وموضوعه
لذبح حسين وطحن ضلوعه
ذابت روحي لهذا الموقف
حسره وآه تسيل وتنزف
كل گطرة دم ابشرياني

راكس نهج الي ايعادينه
بنهجك ضل متحير بينه
شلون الذل ايمر اعلينه
ونهجك فولاذ امسوينه
لمصابك آه يبن الزهره
لوعه ونار وصارت جمره
كل گطرة دم ابشرياني

الشاعر حسن لعيبي الحريشاوي

نِدَاء إلَى نَهْرِ الْفُرَات  (ملمع )

(يافراتا كَيْف تُدْعَى بالفرات)
(اذمنعت الْمَاءِ عَنْ مَاءٍ الحياة)

وَي الْعَدُوّ لِمَن صِرْت ضِدّ الْحَبِيب
ذَاب گلبه مِنْ الْعَطَشِ وَأَصْبَح لَهَيْب
ماكسر گلبك ولاجاسك نَحِيب
(حينما جَمْع الْهُدَى أَمْسَى شتاة)
(يافراتا كَيْف تُدْعَى بالفرات)

مِنْ الْعَطَشِ گلبه حسَافَة ينچوي
ومايك أَهْل الْغَدْر مِنْه ترتوي
رَيْت مِنْ الْأَرْضِ رِيتُك تَنْطَوِي
(حِينَ أَصْبَحَتْ . حَلِيفًا للطغاة)
(يافراتا كَيْف تُدْعَى بالفرات)

شلون  قيَّمَت الْأُمُور بيافكر
صِرْت وَي جَيْش الظَّلالَة وَالْغُدُر
شلون يَم رَبَّ الْبَرِيَّةِ تَعْتَذِر
(كَيْف اعطوك مِنْ الْغَدْرِ صِفَات)
(يافراتا كَيْف تُدْعَى بالفرات)

إلَيّ تُرْس مُأَيٌّ وتعنه الخيمته
بِسَهْم فارگ ليش مَايك جَرَّبْته
وَيَلِي علعباس ظِلّ ابحسرته
(لَهُ فِي سَقْيًا العطاشى أمنيات)
(يافراتا كَيْف تُدْعَى بالفرات)

وَي ابوالسجاد أسَف ماقصرت
سَهْمٍ مِنْ الْعَطَشِ أَنَّتَهُ مِنْ صِرْت
وَي مُعَسْكَر شِمْر بالحومه چنت
(حَاصَرُوه الْقَوْمُ مِنْ كُلِّ الْجِهَاتِ)
(يافراتا كَيْف تُدْعَى بالفرات)

صرت  جُلُمُود وصَّخْر  يلماتلين
ياظميرك وين ذيچ السَّاعَة وين
ياحسافه ذَبُلَت اشفاف الْحُسَيْن
(بِدَم تُسْقَى  شَفَاه ذابلات )
(يافراتا كَيْف تُدْعَى بالفرات)

شلون تَجْرِي اوگفت أَفْلَاك السِّمَة
علمصاب حسَيْنُ بْنُ حَامِي ألْحَمَه
زينب اتصد ابحزن متألمه
(يالنحر قَطَعْته المرهفات )
(يافراتا كَيْف تُدْعَى بِالْفُرَات  )

الشَّاعِر حَسَنٌ لعيبي الحريشاوي

ياروحي زيدي بالنحيب وبالنعي
وتألمي  لابن الزچيه  اتلَوَّعي
جمرات للمذبوح خليه مدمعي
ويانار فوگ جروح گلبي توَّزعِي
غداره دنيا بالعداله تِدَّعِي
وماخبر منها يوم طَيَّب مسمعي
خانت حسين بن المعارف والوعي
ولزمت ظَهَر ذاك الدَعِي وابن الدَعِي

الشاعر حسن لعيبي الحريشاوي

نعي  بين الاقواس من التراث الحسيني

فدوه كل صدر لجلك تهشم
نياشين الصدور جروح من دم
(لولاك الفرض يحسين ماتم)
يبن الطاهره الحره الزچيه

وحگ كل منذبح عاشر محرم
وحگ اعيال ماعدهم مخيم
(وحگ چبدك المنه ثلث ماتم)
عليك أگلوب تنحب للمنيه

عدوك للهوه يحسين يشتم
وجسمك بالحصيره حيف ينلم
(الك بگلوبنا يحسين مأتم)
(لجلك كل صباح وكل مسيه)

الشاعر حسن لعيبي الحريشاوي

سبيٌ وشقاءٌ وبكاء
من روائع الاستاذ الشاعر حسن لعيبي الحريشاوي
اداء خادمكم الرادود علي الفوادي
ليالي محرم الحرام 1447

ياطلعة الحق

ياطلعة  الحق والكلام الحاسم
ياثورة المظلوم  تنهي  الظالم
حبيبي ياحسين
حبيبي ياحسين
★★★★★
بين الخلگ تنقاس وحدك أمه
اتذوب المعاني بيك يابواليمه
رحمه  ونعيم وزود خير وهمه
ماتاخذك بالله لومة لايم
ياطلعة الحق والكلام الحاسم
حبيبي ياحسين
حبيبي ياحسين
★★★★★
درب الاسلام وجنته المعلومه
وراعي الشعوب الحايره المظلومه
والحق علاماته صفت محسومه
انته السلامه والنعيم الدايم
ياطلعة الحق والكلام الحاسم
حبيبي ياحسين
حبيبي ياحسين
★★★★★
دمك عبارة رفض تجلي  الباطل
تنشر الخير وتطوي صوت الجاهل
ماتقبل بهلدنيا حال المايل
الفايز يظن بغير دربك واهم
ياطلعة الحق والكلام الحاسم
حبيبي ياحسين
حبيبي ياحسين
★★★★★
انته الهداية والطريق الواضح
وانت المواقف والكلام الراجح
حكمة بطريق الخلگ دوم وناصح
انته على گلوب الظماير حاكم
ياطلعة الحق والكلام الحاسم
حبيبي ياحسين
حبيبي ياحسين
★★★★★
ينزال كلشي ونهج حبك ثابت
غصبن على كل ناصبي وكل شامت
لسان العداله المايحب الساكت
واكمال نهجك يضل بيد القائم
ياطلعة الحق والكلام الحاسم
حبيبي ياحسين
حبيبي ياحسين

الشاعر حسن لعيبي الحريشاوي

يوم ذبحوا مهجة الزهرة البتول ( موشح )

يوم ذبحوا مهجة الزهره البتول
هلمصيبة الماتهون على الرسول
واحسيناه
واحسيناه
★★★★★
هلعساكر بيهم اثلاثين الف
والنوايا سوده أبد ماتختلف
صارت الاحزاب بالعاشر حلف
بمنهج الهادي النبي ماتعترف

على الذبحوا سلوة الهادي شگول
هلمصيبة الماتهون على الرسول
واحسيناه
واحسيناه
★★★★★
هلمصيبة الماتهون على النبي
ينگطع راس الشريف الطالبي
ارحاله منهوبه وحريمه تنسبي
ويحرگ خيامه اللئيم الناصبي

والعساكر علخيم گامت تجول
هلمصيبة الماتهون على الرسول
واحسيناه
واحسيناه
★★★★★
وبعزم شيطاني مرفوعه السيوف
لغاية الشر چان لمتها الالوف
ينگطع نسل النبي بيوم الطفوف
گوم مد البصر والينه يشوف

من الارض دين النبي رادوا يزول
هلمصيبة الماتهون على الرسول
واحسيناه
واحسيناه
★★★★★
وبجمع معلوم معروف الگصد
جابهم غيظ الامس اهل الحقد
صف يرامي اسهام والثاني يهد
گوم عن راي الظلاله ماترد

غير ذبح حسين ماعدهم حلول
هلمصيبة الماتهون على الرسول
واحسيناه
واحسيناه
★★★★★
كل دوه لگلوبنه لامايصح
كل جرح ملچوم بيه مية جرح
ياعشيرة الي گظوا كلهم ذبح
كسر بالاسلام ابد ماينصلح

شمايمر بيها الزمن حسبه تطول
هلمصيبة الماتهون على الرسول
واحسيناه
واحسيناه

الشاعر حسن لعيبي الحريشاوي

(قصيدة گعده) باللغة العربية الفصحى  لاستشهاد الامام الحسين عليه السلام

طَوَّقوا التاريخ في اعتى جريمة
لم تزل آثارها جدآ  أليمه
روعوا آل النبي يوم الطفوفِ 
برماح وسهام  وَسيوفِ
واحسيناه واحسيناه
★★★★★
ملئوا الدنيا ظلاما  غَيَّروا  وجه الزمانِِ
زمر الشَرِ بِشَرٍ    جعلوا الخير يعاني
لم يراعوا الحق يوما  حاربوا السبع المثاني
قد قاتلوا نور الهدى
سبط النبي المصطفى
لما اذاقوه الردى     أصدروا شر بيانِِ

بعد ارسال العهود المستفيضه
انكشفت كل الاسارير البغيضه
انقلبوا ثم  رأووا ان الحلول
كلها في قتل اولاد  الرسول
واحسيناه  واحسيناه
★★★★★
أنها اقسى جريمه   ابكت السبع الشِدادِ
فبدا الصبح ظلاما    وارتدى ثوب السوادِ
احرقت قلب الموالي    جعلته كالرمادِ
تجعل في الحلق شجى
وتملئ القلب أسى
قد قتلوا شمس الضحى  قتلوا خير العبادِ

لوبكينا أمة من بعد أمه
لا نوفي لهمو حقا وذمه
لويشق الجيب اوتدمى الصدور
لم  نوف العشر من ذبح النحور
واحسيناه واحسيناه
★★★★★
ملئوا الأرض جيوشا   نشروا الجور عليها
رفضوا إعلاء حق  اويصان الحق فيها
انكروا حق الامامة  وتمادوا جاحديها
حرب على اهل الحمى
يبغون فيها مغنما
ايسره سفك الدما  وجحود يعتليها

أغضبوا الرحمن اذ أرضوا يزيدا
عند قتل السبط   اذ امسى وحيدا
كيف من حارب نور الانبياء
يرتجي الغفران من رب السماء
واحسيناه واحسيناه

الشاعر حسن لعيبي الحريشاوي

قتلوه السيد المحجبا ملمع بين قوسين فصحى   (وزن المثلث)

( قَتَلُوه السَّيِّد الْمُحَجَّبَا خَيْرٌ خَلَق النَّاسِ أَمَّا وَأَبَا )
واحسينا. واحسيناه
★★★★★
شلون زمره الأجوا مابيهم حميه
والحقدعدهم طبع صار وسجيه
نَفذَّوا  رغبات   اهل الجاهليه
بياذنب ذبحوا  نظر عين الزچيه

(لِيَنَالُوا فِضَّةٍ أَوْ ذَهَبًا  قَتَلُوه السَّيِّد الْمُحَجَّبَا)
واحسينا واحسيناه
★★★★★
حگ دموعي تسيل كل صبح ومسيه
لبن خير الناس   كلها على البريه
انذبح بسيوف الضلال بن الزچيه
رَضَّت اضلوعه الخيول الاعوجيه

(والسما بِالدَّم تَبْكِي غَضَباقَتَلُوه السَّيِّد الْمُحَجَّبَا )
واحسينا واحسيناه
★★★★★
اختاره الله وصار للباري وسيله
المثل جده غايته وحكمه وسبيله
علعدل والخير والحق والفضيله
چم قبيله اتحزمت تنصر قبيله

(هَل نَسُوا مِنْ أَيِّ قَوْمٍِ نَسَبَا قَتَلُوه السَّيِّد الْمُحَجَّبَا )
واحسينا واحسيناه
★★★★★
مثل حيدر صبر وإصرار وعزيمه
برهن لأهل الضلالات القديمه
السكوت على الظلم اكبر هزيمه
سيوف باطلهم أبنحره مو أليمه

(أَنَّهُ قَلَبَ ثَبَات وَإبَا  قَتَلُوه السَّيِّد الْمُحَجَّبَا)
واحسينا واحسيناه
★★★★★
انفوس مو لوَّامَه لاتعرف ملامه
أنسدت آذان الطمع تسمع كلامه
بعد ذبح حسين ماعدهم ندامه
عن طمع مو عن جهل نكروا مقامه

( مزقوه بِالْحِرَاب والضبا  قَتَلُوه السَّيِّد الْمُحَجَّبَا)
واحسينا واحسيناه

الشاعر حسن لعيبي الحريشاوي

يافراتا كيف تدعى بالفرات؟
للشاعر حسن لعيبي الحريشاوي
أداء الشيخ سعود شروفنا

في استشهاد أبا الفضل العباس
عليه السلام  (وزن الفايزي)

مِنْ كِثْر دمُوعِي . نيران اظلوعِي
مِنْ الْقَهْر شَابٌّ الراس
ابچي وانوح لعَبّاس
               نيران ظلوعي
★★★★★
حَيْدَرِي نَهْجَه وَصِفَاتَه  وَطَعْم الْإِحْسَاس
مِن الْمَهْد طَبْعَه حُسَيْنِي حَتَّى الْأَنْفَاس
ياعبارات التوصفه . وبيش ينْقاس
تعجَز الْأَوْصَاف . كُلُّهَا . گبال. عَبَّاس

النَّاذِر چفينه.    والنبله ابعينه
مخنوگ أَعِيش . الْأَنْفَاس .
ابچي وَنُوح لعَبّاس
                 نيران ظلوعي
★★★★★
منذبح عطشان وانته . وانته رَوَّاي
الماي مِنْ صَبْرِك تَرَوِّه . يَشْرَب الماي
شگد خَصَايص يابوفاضل عِنْدَك اهواي
امعطَّر ابسيف الشَّجَاعَه. وَقُوَّةُ الرَّأْيِ

بعزمك وايمانك . يَشْهَد ميدانك
خَلّ تَعْلَم . بحزني النَّاس .
ابچي وانوح لِعَبّاس
                نيران ظلوعي
★★★★★
يلمهماتك عَظِيمَةٌ . شعنها ينگال
كَافِل الْحُرَّه العقيله وضعن الْعِيَال
انْتَه سگاي العطاشى . وَحَامِي الرِّحَال
وَنَاصِر حسَيْن  وعضيده بِيَوْم الْأَهْوَال

عُمُرِك ضحيته . لِلْمَوْت انطيته
للخوه مِن دگ السَّاس .
ابچي وانوح لِعَبّاس
              نيران ظلوعي

زينب تنادي يخويه.  شوف الرحال
والوكت هدم شملنه  وبلعجل مال
مو إلك هلنومه هاي.  وهاي الاحوال
سَلَّبَوا ضعني يخويه. وراحة البال

بلطف ضلينه. ياهو يراعينه
مابعد ضلت حرَّاس 
أبچي وانوح لعباس
            نيران ظلوعي
★★★★★
للضعن انظر يخويه.  وشوف الاجناب
بين من يضرب بسوطه. وبين  سَلّاب
حرگوا اخيمنه علينه. وزاد المصاب
الحرمه تدري بلاوليها. شلون تنهاب

تنعه وتبچيله.  كل يوم وليله
كاس الصبر مر الكاس.
ابچي وانوح لعباس
         نيران ظلوعي

الشاعر حسن لعيبي الحريشاوي

في ايام محرم

شفت بيه شكثر تغيير 
حالي غير حال يصير  
أشوف الدنيا واقع طف
عدها شكثر اتوقف
حالي غير حال يصير
★★★★★
اشوف حسين يتقرب 
على الناس ويخاطبهم
يذكرهم عطايا الرب.  .
بنعيم الرب يذكرهم
رغم  احقادهم تلهب  
يريد حسين يصلحهم
اهل الحقد واهل السب 
مثل جده يعاملهم

خلاني اگولن  وين
العالم يلگه مثل حسين
شاغل كلبي والتفكير
حالي غير حال يصير
★★★★★
اصحابه مابقه منهم   
بعينه الموقف ايشاهد
واخوه على الجرف طايح
ماشارب عذب بارد
اهل بيته ضحايا اتروح 
ودخان الخيم  صاعد
طفله بالحظن مذبوح       
لاچن موقفه واحد

لجل الدين والاصلاح
ماهمه نزف لوطاح
بدمه من كتب تعبير
حالي غير حال يصير
★★★★★
اجاهم يشرح ابرهان   
بس لله العبوديه
من يتعلم الانسان    
تصير قيوده حريه
حسين على الجهل بركان 
أعلن فكره ثوريه
حل الوسط مايرضاه  
مو كل ثوره سلميه

يبوالتسعة صغت ثوره
بمحرم من جزت عشره
يخامس ايه التطهير
حالي غير حال يصير
★★★★★
وعلمني شهر عاشور. 
ادروس شكثر علمني
مراحل ماوصلتلها      
الافضل حال وصلني
الكلمه سيف ارفعها    
على الي رايد يذلني
واضحي ماتعز روحي
على كلمن يصاحبني

حسين شكثر علمني
قريب  ومابعد عني 
علمني على التدبير
حالي غير حال يصير
★★★★★
ومن زينب اخذت دروس  
ام الصبر والاحزان
زينب للصبر ايات        
لو وج الگلب نيران
الظنوا بالسبي تنذل 
بكلمه طيحت تيجان
ماخذ من عزم زينب  
عزمي وقوة الوجدان

اگوم شماعثر جدمي
من زينب خذت عزمي
والشر مايوگف الخير
حالي غير حال يصير

الشاعر حسن لعيبي الحريشاوي

الرادود عباس الغانمي

الى خدام الحسين عليه السلام افتقدناهم هذه السنه

تسوُوين ماتسوُوين يادنيانه
جرحچ غميچ بنص درب خَلَّانه
لحسين عِدنَه بالمجالس خدَّام
هاي السَنه ياحيف مو وَيَّانه
أِيد المنايا خَذَت مِنَّه الغاليين
أبمُر الدموع غيابهم بچانه
تزهي المجالس بيهم وتتعطر
غيَّاب عنها افراگهم أذانه
هاذي صورهم ماتفارگنه بيوم
فراگ النحبهم بالگلب نيرانه
يستاهل حسين المدامع من دم
وشهر المحرم نار تچوي احزانه
باچر أجرهم بالحشر يم حسين
وندعي مثلهم كون يتلگانه

لظيم النايبات الوكت عدنه
وعدينه الليالي وتاه عدنه
لبواليمه شكثرخدام عدنه
فگدناهم صفوا تحت الوطيه

الشاعر حسن لعيبي الحريشاوي

لوفاة ام البنين عليها السلام

ضحت اشبال وگمرها 
وراحة الروح وعمرها
والشهود ايامها
الجنة تحت اقدامها
ام البنين🚩 😭
★★★★★
تضحيات وجود كلها 
من البداية الحد أجلها
رضا الباري كل املها  
غير هذا مايهمها
يشهد التاريخ الها 
يعجز يوصف فضلها

رغم كل آلآمها
الجنة تحت اقدامها
ام البنين
★★★★★
لاحت جروح الخفيه 
ومرت ايام المنيه
تعاني بالدار الخليه  
وفارگت ابن الزچيه
والبدور الهاشميه  
موحشه اعليها المسيه

اعليها تبچي ايتامها
الجنة تحت اقدامها
ام البنين
★★★★★
يافضل عنها نذكره 
الفاضله الطاهره الحره
أبد ماقصرت مره    
تفخر ابخدمة العتره
أتمنت من الولد عشره  
كون كلهم فده الزهره

فده الطيب انسامها
الجنة تحت اقدامها
ام البنين
★★★★★
ابدارها تنحب عليله  
عگب ابو اليمه نحيله
وابو فاضل والعقيله  
ليله أشد من بعد ليله
الراحة صارت مستحيله 
بدت رحلتها الطويله

والقدر گدامها
الجنة تحت اقدامها
ام البنين
★★★★★
بحر من فيض العداله  
وگفت بوجه الضلاله
ورسمت الحق وجماله 
ونالت بهاي البساله
الفوز من رب الجلاله 
الخدمت اعلام الرساله

نفتخر خدامها
الجنة تحت اقدامها
أم البنين

الشاعر حسن لعيبي الحريشاوي

لسان حال العقيلة زينب عليها السلام تخاطب أخيها الحسين عليه السّلام بين الاقواس من التراث الحسيني

(ضليت وحدك مالَك امعين )
ضليت وحدك خويه يحسين
★★★★★
آلاف خويه التمت الناس
كلمن بسيفه ودرعه والطاس
يم الشريعه طاح عباس
(التمت عليك الگوم صوبين )
★★★★★
هلشدَّه ماصارت بالاسلام
فزعوا عليك شلون ظِلَّام
وصلت عساكرهم للخيام
(وگومك على الغبره مطاعين )
★★★★★
گومك على الغبره يمظلوم
وتنهب خيمنه هجمت الگوم
بس العليل يطيح  ويگوم
(أمنين اجيب المرتضى منين )
★★★★★
مووكت  نومه فوگ الرمال
يحسين خويه عاين الحال
چفوف الحرم شدَّوها بحبال
وللشام عگبك بينه ماشين
★★★★★
بويه علي مااحمل النوح
كونك تجي ياسلوة الروح
بعينك تشوف حسين مذبوح
(عن كربلا بويه غبت وين )

الشاعر حسن لعيبي الحريشاوي

لسان حال السيدة رقية

أيام السود شمخليات بيه
الردتهن مايجن مَرَّن عليه
بحال المايسر صبح ومسيه
صحت ياوالدي الفرگه أذيه
گبلك  ردت تلفيني المنيه
شلي بالروح يلرحت من أديه
عليله من  مصاب  الغاضريه
هذا حالها  بنتك رقيه

الشاعر حسن لعيبي الحريشاوي

❉❉❉❉❉❉❉﷽❉❉❉❉❉❉❉
لسـتة #دعم_مؤسسة_منبريون_الحسينية🌻.
#التثبــيت_سـاعـه
#الحــــــــــذف
بـعـــد نشر اللسـتـةّ بـ4  سـا؏ـات
� غَـير مبري الـذمـةّ ٲمـام الله ڪـل من يـحذف البــوت دون ؏ـلمنا
استقبل 1000 عضو فما فوق
━━━━━━━━━━━━━━━
للإشـــتِـراك 👇🏻.

التواصل مع @ahmed_alziwar0

قناة خاصة بتلحين القصائد

https://www.tgoop.com/+PZwpTt2HLXcvUQZh

------------------------------------------------------